LUKA 2

Okhwibulwa khwa Yesu

(Mat. 1:18-25)

1Mumatukhu yako omunwa kwarula Khumuruchi Omukhongo Agusto mbu abandu bosi musibala esiayarukanga bahandikwe amera. 2Okhuhandikwa khuno khwali okhwokhuranga Kuirinio nali Omwami wesibala sia Siria. 3Abandu bosi bamala batsie okhuhandikwa amera, siomundu mwitaala mwabwe. 4Yosefu naye yalomba oluchendo okhurula mwitaala lia Nasareti elili mu Galilaya, natsia mwitaala lia Betselehemu elili Ebuyahudi eliomuruchi Daudi yebul'lwamwo. Yosefu yatsiayo sichila yali owolwibulo lwa Daudi. 5Yatsia mbu ahandichilweyo eliira, halala nende Mariamu, owa yali niyahamba. Yali niyabelekha, 6na olwa bali mu Betselehemu, litukhu lie eliokhwibula liola. 7Niyebula omwana we owokhuranga omusiani, namufuunikha tsingubo tsiaabaana abatoro, ma namukonia musiko sietsing'ombe, sichila sibanyoola obweyangu munyumba yabacheni tawe.

Abayi nende Abamalaika

8Musibala yisio balimwo abayi abekhalanga musiayo obutukhu bwosi nibalinda ebiayo biabwe. 9Om'malaika wo Mwami yabalolekhela ma obukhongo bwo Mwami nibubaakhila. Baria okhusila, 10nebutswa om'malaika nababool'la, “Muraria tawe. Mulereye amang'ana amalahi, akakhalere obusangali khubandu bosi. 11Okhuba litukhu lino mwitookho lia Daudi mwibuliywe omuhoni, niye Kristo Omwami. 12Ne sino nisio esianasibe esimanyilo khwinywe, namunyoole omwana nafumilwe tsingubo tsiabaana abatoro, nakon'ne musiko sietsing'ombe.” 13Ne bwangubwangu omukanda omukali okwabamalaika bomwikulu kwalolekha nende om'malaika uyo, nikwembanga oluyali khu Nyasaye nikuboola,

14“Obukhongo khu Nyasaye ikulu mwikulu

ne emilembe khusibala khubandu abamuyanzisianga.”

15Olwo om'malaika yali narul'le khubo okhukalukha mwikulu, abayi babool'lana, “Chende khutsie Betselehemu, khulole ling'ana eliekhol'le yili, elio Mwami akhumanyisie.” 16Nibatsia tsimbilo nibanyoola Mariamu nende Yosefu ma nibalola omwana nakon'ne musiko. 17Olwa bamulola, baboola akom'malaika yali nababooleye khuko omwana. 18Bosi abahulila bahuka khukabayi baboola. 19Nebutswa Mariamu yabiikha amang'ana yaka kosi ma nakapaala khwo mumwoyo kukwe. 20Abayi bakalukha nibafumianga nende okhwitsomia Nyasaye khukosi akabali nibahuliye nende okhulola, kosi kali butswa singa om'malaika yali nababooleye.

Yesu yakulikhwa eliira

21Inyuma wamatukhu munane, litukhu liokhumuseba liola, nakulikhwa Yesu, eliira liom'malaika yali niyamuhelesia kata nasili okhubelekhwa.#Abal. 12:3; Lk. 1:31

Yesu yahilwa mu Hekalu

22Amatukhu kola aka Yosefu nende Mariamu okhulomba omulukha kwokhusiiywa, singa obwa Amalako ka Musa kaboolanga. Ma nibabukula omwana nibamuhila Yerusalemu okhumuhaana khu Mwami,#Abal. 12:6-8 23singa kahandikwa mumalako ko Omwami: “Sies'saatsa siosi esiranga okhwibulwa sihanwe khu Nyasaye.”#Okhur. 13:2,12 24Khandi batsia okhuhaana omusango kwebituka bibili nohomba amakhulwi kabili singa lilako lio Omwami liboolanga. 25Mumatukhu yako yali ho omundu mu Yerusalemu owalangwa Simioni. Yali omundu omulahi, owaria Nyasaye, ma yali nalindil'langa okhuhonibwa khwa Baisiraeli. Omwoyo Omutsienukhu yali halala n'naye 26ma yali niyamusubisia mbu siyakhafwe nasili okhulola Masihi wo Mwami tawe. 27Yemel'lwa no Mwoyo okhutsia mu Hekalu, ne olwa abebuli balera mwo omwana Yesu okhumukhol'la akelilako liboolanga, 28Simioni yamubukula mumakhono kaake, niyetsomia Nyasaye, naboola:

29“Luno Omwami uhesisie esilaka munwa sisio,

onyala okhulekha omurumikhiliwo afwe mumulembe.

30Okhuba tsimoni tsianje tsimal'le okhulola obuhoni bubwo,

31obwa walombela mumoni tsiabandu baabo bosi,

32Obulafu okhumanyia obulalilo bubwo khu abandu bosi abetsimbia,

nende okhulera obukhongo bwabandu baabo ba Isiraeli.”#Isaya 42:6; 49:6; 52:10

33Samwana nende nyina bachenya khumang'ana ka Simioni yaboola khumwana. 34Simioni yabalamila ikhabi ma nabool'la Mariamu, nyina omwana, “Omwana uno wel'lwe nende Nyasaye khulwo okhukwa nende okhuhona khwabenji mu Baisiraeli. Yakhabe esimanyilo okhurula khu Nyasaye esia benji bakhafukule, 35ma alaribule amambiswi kamapaalo kabwe. Ne esibeela singa olukanga siakhafumire omwoyo kukwo.”

36Yaliho omuroobi mulala owesikhaye ma omusiele okhusila, owalangwa Ana, omukhaana wa Fanweli, owoluyia lwa Asheri. Yali niyamenya nomusaatsawe emihika chine nachitaru okhurula nibatesania. 37Ma nasikala omulekhwa emihika amakhumi munane nende chine. Ne emihika yichio chiosi siyarulanga khwo mu Hekalu tawe, yekayakayanga nahonga okhulia om'basu nobutukhu. 38Esaa iyo yenjila okhuhaana embwo khu Nyasaye ma naboola amang'ana komwana khu bosi abali nibalindil'langa Nyasaye okhununula Yerusalemu.

Okhukalukha Nasareti

39Olwa Yosefu nende Mariamu bali nibahesisie kosi ake lilako lio Mwami liboolanga, bakalukha Galilaya, mwitaala liabwe elia Nasareti.#Mat. 2:23 40Omwana yakhula ma nakufuhala, niyetsula nobuchesi ne tsikhabi tsia Nyasaye tsiali khuye.

Omusiani Yesu mu Hekalu

41Siomuhika, abebuli ba Yesu batsitsanga Yerusalemu Khwisabo lie Pasaka.#Okhur. 12:1-27; Okhuka. 16:1-8 42Olwa Yesu yali niyahel'le emihika likhumi nende chibili batsia khwisabo singa khasotso. 43Olwe Lisabo liahwa bachiaka oluchendo lwokhukalukha ingo, nebutswa omusiani Yesu yasikala Yerusalemu ne abebuli baabe sibamanyakhwo tawe. 44Bapaalanga ali m'mukanda, ma nibachenda oluchendo lwelitukhu elala liosi, kho nibachiaka okhumuruna mubekho nende mubalina. 45Sibamunyoola tawe, kho bakalukha Yerusalemu okhumuruna. 46Khwitukhu liakhataru bamunyoola mu Hekalu niyekhaye nende abebaali Besiyahudi, nahul'langa aka baboolanga ne nabareeba amareebo. 47Bosi abamuhulila bahuka khubuchesibwe nende amakalusio ke. 48Olwa abebuli baabe bamulola bang'ang'ala, ma nyina namureeba, “Mwana wanje, busina nokhukhol'la yaka? Papawo n'nase khukhurun'ne nesihenda mwoyo habundu hosi.” 49Yabakalusia naboola, “Esichil'le nimuruna nisina? Simumanyile mbu kambel'le okhuba munyumba ya Papa wanje tawe?” 50Nebutswa sibamanyilisia likalusio lie yilio tawe. 51Ma Yesu nakalukha n'nabo Nasareti, yali omuhulili khubo. Nyina yabiikha amang'ana yaka kosi mumwoyokwe nakanil'la khwo. 52Yesu yatsilil'la okhukhula mubuchesi nende mumubili, nayanzwa nende Nyasaye ma nende abandu.#1 Sam. 2:26; Tsinj. 3:4

Currently Selected:

LUKA 2: EBAIBO

Highlight

Copy