LUKA 1
1
1Abandu abenji bateemakhwo akabanyala okhuhandika amang'ana ake ebindu ebiali okhukholwa mwifwe. 2Bahandika aka khwabool'lwa nende yabo abalola ebindu yibi okhurula mukhuchiaka ma nibalandia amang'ana kene yaka. 3Ma nase ndutsi, owoluyali Tseofilo,#1:3 Tseofilo Esisina sialio liboolanga “Omulina wa Nyasaye”. mbu nobulahi khuhandichile amang'ana yaka inyuma wokhuhengelesia mubweyinikhu okhurula mukhuchiaka. 4Kholanga mbwo khe ibe omanye akatooto kosi akawechibwa.
Okhwibulwa khwa Yohana Omubaputisi khwalandibwa
5Mumatukhu ka Herode yali omuruchi we Ebuyahudi, yaliho omwesaalisi owalangwa Sakaria, owalinji owomukanda kwa abesaalisi okwali hasi wa Abiya. Omukhasi uwe yalangwanga Elisabeti, owomubakhana ba Haruni.#1 Aketsi. 24:10 6Bombi bamenyanga obulahi imbeli wa Nyasaye ma balondanga amalako nende emilukha chio Mwami sila esikha. 7Sibaalikhwo nende abaana tawe sichila Elisabeti yali omukumba, ma khandi bombi bali nibakhunguha okhusila. 8Litukhu elala Sakaria yali narumikhilanga Omwami uwe mu Hekalu, mumukhosi kwobulindi bubwe. 9Okhulondokhana nende esimo siobwesaalisi yelwa okhubir'ra khumbulu okhusamba obwali khulusambwa. Ma natsia mu Hekalu yo Mwami, 10ne omukanda kwabandu kwali esioba nikusaayanga khunyinga eyobwali bwasambwa. 11Om'malaika wo Mwami yalolekha khuye nasinjiye khulubeka lwomukhono omulunji okwolusambwa lwokhusambilakhwo obwali. 12Olwa Sakaria yamulola, nahumania ma naria. 13Nebutswa om'malaika namubool'la, “Sakaria, oraria tawe! Nyasaye uhuliye okhusaaya khwo, ne omukhasiwo Elisabeti yakhakhwibul'le omwana omusiani. Wakhamukulikhe eliiralie Yohana. 14Wakhabe nobusangali nende obuyanzi, khandi abenji bakhasangale olwa yakhebulwe! 15Yakhabe omundu omukhongo mumoni mwo Mwami. Arakhanywakhwo ewaini nohomba esiokhunywa sindi esilulu tawe. Yakhetsule nende Omwoyo Omutsienukhu okhurula khukhwibulwakhwe.#Obub. 6:3 16Yakhakalusie abandu ba Isiraeli abenji khu Mwami Nyasaye wabwe. 17Yakharanjil'le okhutsia imbeli wo Mwami mutsingufu nende obunyali bwa Elija. Yakhaleere abapapa nende abaana halala, yakhasukhanie abandu besikala marwi khunjila eyo khupaala khwabalunji, yakharechekhele Omwami abandu.”#Mal. 4:5-6
18Sakaria nabool'la om'malaika, “Ndakhamanya mbwena yaka kali mbwo? Ise ndi omusakhulu khandi omukhasi wanje nomusiele.” 19Om'malaika nakalusia naboola, “Ise nise Gaburieli, sinjilanga imbeli wa Nyasaye ourumile okhwitsa okhul'loma n'nawe, nende okhukhuler'ra amang'ana amalahi yaka.#Dan. 8:16; 9:21 20Nebutswa siosubiye oburume bwanje tawe, khulwe yako olasiluhala, nobule okhul'loma okhwola khwitukhu elia akakhusubisisie kaliekhola.”
21Ne abandu bali nibalindil'langa Sakaria, nibahukanga busina nasisil'la oluhono mu Hekalu. 22Olwa yarulamwo siyaali onyala okhul'loma khubo tawe, ma nibamanya mbu uluutsi obusukhi mu Hekalu. Yabasimila butswa namakhono sichila siyali onyala okhul'loma tawe. 23Olwa amatukhu kaake akokhurumikha mu Hekalu kahwa yatsia ingowe. 24Olweinyumakhwo omukhasiwe Elisabeti yabelekha, ne niyebisa munyumba khulwe emiesi chirano naboola, 25“Leelo Omwami ukhonyele, umbinichisisie es'simbamurwe sianje mubandu.”
Okhwibulwa khwa Yesu khwalandibwa
26Mumwesi kwakhasasaba okhurula Elisabeti nabelekha, Nyasaye yaruma om'malaika Gaburieli mwitaala lia Galilaya elialangwa Nasareti. 27Yali noburume khumukhaana owali niyahambwa nende omundu owalangwa mbu Yosefu, owali owolwibulolwomuruchi Daudi. Eliira liomukhaana tsana liali Mariamu.#Mat. 1:18 28Om'malaika yetsa khuye naboola, “Omulembe kube khwibe! Nyasaye ukhubeeleye esirenda, Omwami ali n'nawe ma oli neikhabi.” 29Mariamu yanyakhana mumakani khuburume bwom'malaika ma nahuka esifune siamang'ana yaka. 30Om'malaika nabool'la Mariamu, “Oraria tawe. Unyooye esirenda khu Nyasaye. 31Nobelekhe inda, ma wakhebule omwana omusiani, ne wakhamukulikhe eliiralie Yesu.#Mat. 1:21 32Yakhabe omukhongo ma yakhalangwe Omwana wa Nyasaye Oweikulu Okhusila. Omwami yakhamukhole okhuba omuruchi, singa Daudi kuka nyene yali,#2 Sam. 7:12,13,16; Isaya 9:7 33ne yakhabe omuruchi khubandu ba Isiraeli inziaiyo, obwamibwe sibulihwa tawe.”
34Mariamu nabool'la om'malaika, “Ise sili okhubakhwo nende omusaatsa wosi tawe. Khe yaka kakhekhola mbwena?”
35Om'malaika nakalusia, “Omwoyo Omutsienukhu alikhwitsila, ne obunyali bwa Nyasaye bwakhabe khuibe. Khulwe yako omwana omutsienukhu wolibula yakhalangwe Omwana wa Nyasaye. 36Ne lola, Elisabeti omwikhowo naye wabelekha ali neinda eyemiesi chisasaba mubusiele bubwe, kata nikali walangwa omukumba. 37Okhuba libulaho ling'ana liosi elia Nyasaye arakhakhola.”#Okhuch. 18:14 38Mariamu naboola, “Ise ndi omurumikhili wo Mwami, kekhole khwise singa obooye.” Ma om'malaika namulekha, natsia.
Mariamu Yatsia Okhukonya Elisabeti
39Inyuma khwo hatititi Mariamu yarula natsia mayuchila mwitaala liomubikulu elie Buyahudi. 40Niyenjila munyumba ya Sakaria ma nasiesia Elisabeti. 41Olwa Elisabeti yahul'la amasiesi ka Mariamu, omwana yerunda munda mumwe. Omwoyo Omutsienukhu yetsula mu Elisabeti, 42nahanzukha butinyu naboola, “Ibe oli neikhabi ingali mubakhasi bosi, khandi omwana owawakhebule noweikhabi. 43Busina ling'ana likali yili liekhole khwise, mbu nyina Omwami wanje witsile okhungonya? 44Okhuba olwambuliye butswa amasiesi kako, omwana yerun'nde munda mwanje khulwo obusangali. 45Oli neikhabi okhusubila mbu yako ako Mwami yakhubooleye kaliekhola.”
Olwembo lwa Mariamu lwokhwitsomia
46Mariamu naboola,
“Omwoyo kwanje kwitsoomianga Omwami#1 Sam. 2:1-10
47Ne omwoyo kwanje kusangaliiye Nyasaye omuhoni wanje,
48Okhuba unzitsuliiye ise omurumikhili uwe omutu!
Okhurula leelo abandu nabanangenge oweikhabi,#1 Sam. 1:11
49khulwa amang'ana amakali aka Nyasaye wobunyali yakholeye.
Eliira lilie nelitsienukhu;
50Tsimbabasi tsitsie tsili khu yabo abamuhetsanga oluyali,
Khumasuuba na masuuba.
51Unyiil'le omukhono kukwe ma usasisie abeinjinia halala nende obuloosie bwabwe.
52Uhiinisie abaami khutsiruba tsiabwe
ma uchingul'le aba hasi.#Ayubu 5:11; 12:19
53Abe inzala ubekusisie nebindu ebilahi,
ne abahinda ubatabisie namakhono amakhaya.
54Ukhonyele omurumikhiliwe Isiraeli singa obwa yalaka abakuka befwe.
55Witsuliye okhumanyia Aburahamu
nende olwibulolwe tsimbabasi inziaiyo.”#Okhuch. 17:7
56Mariamu yamenya nende Elisabeti singa emiesi chitaru ma nakalukha ingo.
Okhwibulwa khwa Yohana Omubaputisi
57Amatukhu ka Elisabeti okhwibula koola, niyebula omwana omusiani. 58Abamenyani baabe nende abekho bahul'la obwo Mwami yali omulahi khuye, ma bosi nibasangala halala n'naye. 59Khwitukhu liamunane betsa okhuseba omwana, ne bali nibenyanga okhumukulikha Sakaria eliira lia samwana.#Abal. 12:3 60Nebutswa nyina naboola “Tawe. Eliira lilie lienyekhanga libe Yohana.”
61Nibamubool'la, “Mubekho benywe sialikhwoho olangwanga eliira yili tawe.” 62Ma nibasima samwana, nibenya okhumanya eliira liayenya omwana akulikhwe. 63Sakaria nasaba liseleti liokhuhandika khwo ma nahandika, “Eliira lilie ni Yohana.” Bosi nibachenya. 64Olwene yilwo ne Sakaria nachiaka okhul'loma khandi, ma nachiaka okhwitsomia Nyasaye. 65Oburi bwahamba abarende babwe bosi, ne amang'ana yaka kalanda hosi mubikulu bie Buyahudi. 66Bosi abakahulila bakapaalakhwo mumioyo chiabwe, nibaboola, “Omwana uno yakhabe owambila sina?” Okhuba kalolekha kol'lani mbu obunyali bwo Mwami bwali khuye.
Oburoobi bwa Sakaria
67Sakaria, samwana Yohana yetsula no Mwoyo Omutsienukhu, naroba naboola,
68“Yetsoomibwe Omwami, Nyasaye wa Baisiraeli
Witsile okhukhonya abandube
ma ubakhol'le abalakhule.
69Ukhunyooleye omuhoni omukufu,
owomunyumba ya Daudi omurumikhiliwe.
70Yalaka khale okhubir'ra mubaroobi baabe abatsienukhu
71mbu yakhakhuhonia khubasuku befwe,
okhurula mubunyalibwe yabo abakhubihil'lwanga.
72Yaboola yakhabeele abakuka befwe tsimbabasi
nende okhwitsul'la Indakano ye inzienukhu.
73Yesuha esiesuho khukuka wefwe Aburahamu
74nalaka okhukhusoola khubasuku befwe
ma khumurumikhile sila oburi.
75Kho khube abatsienukhu khandi abalunji
imbeli we amatukhu kosi akobulamu bwefwe.
76“Nawe, omwana wanje, wakhalangwe
omuroobi wa Nyasaye Weikulu okhusila.
Wakharanjil'le Omwami okhumulombela injila,#Mal. 3:1
77okhubool'la abandube mbu bakhahonibwe
nibalekhelwa tsimbi tsiabwe.
78Nyasaye wefwe nowetsimbabasi,
yakhachile omukamba omulahi okwobuhoni kulakhusiele ifwe
79ma kulakhwakhile okhurula mwikulu yabo bosi abamenyanga musiilima siokhufwa,
kukhwemel'le ebilenje biefwe munjila yomulembe.”#Isaya 9:2
80Omwana yakhula, nakufuhala mumwoyo. Yamenya musitsiimi okhwola litukhu elia yalolekha habulafu khubandu ba Isiraeli.
Currently Selected:
LUKA 1: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
