LUKA 19

Yesu nende Sakayo

1Yesu yenjila mwitaala lia Yeriko, ne olwa yali nabiranga khunjila mwitaala yimwo, 2omundu mulala yarul'la mwo owalangwa Sakayo. Omundu uyo yali omukhongo wabasololi bobusuru ma khandi yali omuhinda okhusila. 3Yenya okhulola Yesu niwina, nebutswa siyali onyala okhumulola tawe sichila omukanda kwali omwinji khandi yali omwimbichiti. 4Kho yamala niyelukha natsia imbeli, naniina khumukhuyu kho abe onyala okhulola Yesu, sichila yali nabir'ranga habwene yaho. 5Olwa Yesu yoola habwene yaho, yahenga ikulu namubool'la, “Sakayo yikha bwangu, okhuba leelo nzia okhuhonga hango haho.” 6Sakayo niyekha bwangu, namwinjisia nobusangali. 7Abandu bosi olwa balola mbwo nibachiaka okhumumuchil'la nibaboola, “Utsiye okhubutsa homundu wetsimbi.” 8Nebutswa Sakayo yasinjila nabool'la Yesu, “Hulila Omwami, nambelesie abatakha enusu yemiandu chianje. Nikali ndali okhunuula khwo esindu siomundu wosi, namukaluchisie esia khane.” 9Yesu namubool'la “Leelo obuhoni bwol'le munyumba yiyi, sichila uyu naye khandi nowolubela lwa Aburahamu. 10Okhuba Omwana wo Mundu yetsa okhuruna nende okhuhonia esiakora.”#Mat. 18:11

Olukano lwefetsa

(Mat. 25:14-30)

11Olwabandu bali nibasihuyia yako, Yesu yababool'la olukano. Yaho yali nali ahembi okhwola Yerusalemu, ne abandu yabo bapaalanga mbu Obwami bwa Nyasaye bwali nibuli ahembi okhwola.#Mat. 25:14-30 12Kho yababool'la, “Yaliho omundu mulala omukhongo owalomba oluchendo okhutsia musibala siehale okhuhebwa obwami ma akalukhe. 13Nasili okhurula yalanga abarumikhili baabe likhumi, nabahelesia simulala etsipaundi tsitaru#19:13 Etsipaundi tsitaru Oluyunani: Etsimina tsitaru. Emina ndala ehela omurungo kwomukholi womukhono khulwa emiesi chitaru. nababool'la, ‘Mukhol'le obukhala okhwola olwa ndikalukha.’ 14Nebutswa abomusibala sisie bali nibamusuula ma nibaruma abarumwa batsie baboole; ‘Sikhwenya omundu uyu akhuruke tawe.’

15“Omundu uyo yamala nakholwa omuruchi ma nakalukha, ne nalaka mbu abatiyi abayahelesia amapesa balangwe kho amanye simulala khubo yanyoola obukhala buhela mbwena. 16Omurumikhili wokhuranga yetsa khuye naboola; ‘Omwami, amapesako kaleera etsipaundi etsindi likhumi.’ 17Naye namubool'la, ‘Nobulahi, omurumikhili omulahi. Khulwa mbu wali omusubilwa khu matititi, nobe omuruchi khumataala likhumi.’ 18Omurumikhili wakhabili niyetsa, naboola, ‘Omwami amapesako kaleera etsipaundi tsindi tsirano.’ 19Naye namubool'la, ‘Nawe nobe omuruchi khumataala karano.’

20“Omurumikhili undi niyetsa naboola, ‘Omwami, amapesa kaako ngakano. Ndakabiikha bulahi musitambaya. 21Ndali okhukhuria ibe okhuba oli omululu. Ibe obukulanga ebirali ebibio khandi ochesanga ahoraraaka.’ 22Naye namubool'la, ‘Khukhalachiye okhurulana khumang'ana kaako kene, ibe omurumikhili omubi. Wamanya ise ndi omundu omululu, mbukulanga ebirali ebianje, khandi njesanga aharaaraka. 23Busina orabiikha efetsa yanje mwibiikhilo elebulana, ma ndanyoola nende injelesio yayo olwa njeleye.’ 24Ma nabool'la abali nibaliho ‘Munuule amapesa yako muhelesie onyooye etsipaundi likhumi.’ 25Nebutswa nabo nibamubool'la, ‘Omwami uyo ali netsipaundi likhumi!’ 26Naye nabakalusia ‘Wosi oli nesindu yakhamet'twe. Nebutswa obulakhwo esindu, kata situ esiali n'nasio siakhabukulwe.#Mat. 13:12; Mk. 4:25; Lk. 8:18 27Ne luno abasuku banje yabo abarayanzanga mbe omuruchi wabwe, mubalere hano muber're imbeli wanje.’ ”

Yesu yenjila Yerusalemu nomwekhoyo

(Mat. 21:1-11; Mk. 11:1-11; Yoh. 12:12-19)

28Yesu yaboola yako ma niyemela okhutsia Yerusalemu imbeli wabwe. 29Olwa yali nali ahembi okhwola Betsifage nende Betsania, ahembi nende esikulu sia Miseituni, yaruma abechi baabe babili, 30nababool'la, “Tsie mwitaala elili imbeli wenywe. Olwa namube nimwinjilangamwo, namunyoole esimoosi siesikhili nisibohelwe, esiomundu asili okhuniina khwo tawe. Musibohol'le, musileere hano. 31Omundu naba namureeba esichilanga nimusibohol'la, mumubool'le, Omwami asirunanga.”

32Nibatsia, nibanyoola ebindu biosi nibili singa Yesu yali nababooleye. 33Olwa bali nibabohol'langa esimoosi siesikhili yisio, abene sio nibabareba, “Busina mubohol'langa esimoosi yisi?” 34Nabo nibakalusia, “Omwami asirunanga.” 35Ma nibahila esimoosi siesikhili yisio khu Yesu. Nibaala tsingubo tsiabwe khusimoosi yisio, ma nibaniinia khwo Yesu. 36Yesu natsilil'la noluchendolwe naniin'ne khusimosi siesikhili; ne abandu nibaala tsingubo tsiabwe khunjila.

37Olwa yoola ahembi nende Yerusalemu, khusikongomo siesikulu sia Miseituni, omukanda omukali okwabechi baabe nibachiaka okhusangala nende okhwitsomia Nyasaye nemioyo emikali khulwebindu ebikhongo ebia bali nibaluutsi; 38nibaboola, “Nyasaye alamile omuruchi owitsanga muliira lio Mwami ikhabi. Omulembe kube mwikulu ne oluyali khu Nyasaye!”#Etsisa. 118:26

39Abafarisayi abali mumukanda yikwo nibabool'la Yesu, “Omwibaali, laka abechi baabo babune.” 40Yesu nabakalusia, “Mubool'langa, nibabuna ne amachina kene nako kakhachiaka okhuhanzukha.”

Yesu yalakaya khulwa Yerusalemu

41Olwa yoola ahembi Yerusalemu ma nalola litaala, Yesu yalilakayila, 42naboola, “Olaba nomanyile litukhu lino akakwan'ne emilembe chichio! Nebutswa luno kebisile mutsimoni tsitsio. 43Okhuba amatukhu ketsanga olwa basuku baabo bakhakhubotokhanie nende lisisi, bakhakhwikal'le nende okhukhwinjil'la mutsimbeka tsiosi. 44Bakhakhumulule ibe nende bosi abali mwibe; sibakhalekhekhwo kata lichina elala khulindi tawe, sichila siwamanyilisia inyinga eya Nyasaye yetsa okhukhuhonia tawe!”

Yesu yenjila mu Hekalu

(Mat. 21:12-17; Mk. 11:15-19; Yoh. 2:13-22)

45Ma Yesu niyenjila mu Hekalu nachiaka okhukhunga abakholi bobukhala. 46Nababool'la, “Kahandikwa, ‘Ehekalu yanje elaba inyumba yokhusaaya’; nebutswa inywe muchikhol'le oluhangaywa lwabanuli.”#Isaya 56:7; Yer. 7:11

47Sielitukhu Yesu yebaalanga mu Hekalu. Abesaalisi abakhongo, abebaali ba Malako nende abemeli babandu baruna okhumwira,#Lk. 21:37 48nebutswa sibalola eliokhukhola tawe, sichila abandu bosi bali nibamuhuyianga mubweyinikhu okhusila.

Currently Selected:

LUKA 19: EBAIBO

Highlight

Copy