LUKA 18

Olukano lwo mulekhwa nende Omukhalachi

1Ma Yesu nabool'la abechi baabe olukano okhubebaal'la mbu buli lwosi basaayenje sila okhufwa emioyo. 2“Yaliho omukhalachi mwitaala nalebe oraritsanga Nyasaye nohomba okhuhendel'la omundu tawe. 3Mwitaala liene yilio khandi yalimwo omukhasi omulekhwa owatsia khumukhalachi uyo esiakhenji namubool'la, ‘Yanza ukhalachile kololi khumusuku wanje.’ 4Khulwa amatukhu amenji omukhalachi uyo siyayenya okhumukhonya tawe, nebutswa olwe inyuma yamala napaala mumwoyokwe, ‘Kata nikali siritsanga Nyasaye nohomba okhuhendel'la omundu, 5nebutswa sichila omulekhwa uyu yanyasianga, ndamukhalachila kololi, khase yakhatsilil'la okhwitsa hano ma yanjonyie!’ ”

6Ma Omwami natsilil'la okhuboola, “Hulile akomukhalachi orali omulunji yaboola. 7Kho Nyasaye siyakhakhalachila kololi yabo abayela, abamulakayilanga om'basu nobutukhu? Yakhasisil'le okhubakhonya noho? 8Mubool'langa, alabakhalachila kololi bwangu. Ne kata mbwo, olwo Omwana wo Mundu yakhetse, alinyoola obusubili musibala noho?”

Olukano lwo Mufarisayi nende Omusololi wobusuru

9Yesu khandi nababool'la olukano yabo abelolanga abene okhuba abalunji, ne nibachiaya abandi. 10“Abandu babili banichila okhutsia mu Hekalu okhusaaya; mulala yali Omufarisayi ne oundi omusololi wobusuru. 11Omufarisayi yasinjila, nasaaya mbu, ‘Nyasaye, khukhupilanga embwo sichila ise sindi singa abandu bandi, abalangu, nohomba abaheyi tawe. Khukhupilanga embwo sichila sindi singa omusololi wobusuru uyu tawe. 12Monganga okhulia esiakhabili khwihonga, mbananga esielikhumi khu biosi ebianyoolanga!’

13“Nebutswa omusololi wobusuru yasinjila ehale, kata siyayenya okhuchinguula tsimonitsie ikulu tawe, niyekhupaka esilifu sie nesibeela, naboola, ‘Nyasaye, umbeele tsimbabasi, ise omwoni.’ 14Mubool'langa, omusololi wobusuru uyu yakalukha ingo we nalunjisibwe na Nyasaye okhuyomba Omufarisayi. Okhuba wosi owekalihianga yakhachiehibwe, ne wosi owechiehianga yakhakalihibwe.”#Mat. 23:12; Lk. 14:11

Yesu alaamila abaana batu tsikhabi

(Mat. 19:13-15; Mk. 10:13-16)

15Abandu baler'ra Yesu abaana batu abatile khwo. Olwa bechi babalola, nibabakondekhela butinyu. 16Nebutswa Yesu yabalanga betse khuye naboola, “Lekhe abaana batu yabo betse khwise, murabekal'la tawe, sichila Obwami bwa Nyasaye nobwa bafwana singa yaba. 17Mubool'langa tooto mbu, omundu wosi naba narabukula Obwami bwa Nyasaye singa Omwana mutu, siyakhenjile mwo kata nahati tawe.”

Omundu owali Omuhinda

(Mat. 19:16-30; Mk. 10:17-31)

18Omukhongo mulala Omuyahudi yareba Yesu, “Omwibaali omulahi, ndakhakhola sina kho nyoole Obulamu oburahwa?” 19Yesu namureeba, “Busina unanganga Omulahi? Abulaho omulahi narali Nyasaye yenyene. 20Wamanya Amalako: ‘Oraheya, Oreera, Oreeba, Orakobokhela obubehi, okoosie papawo nende mamawo?’ ”#Okhur. 20:12-16; Okhuka. 5:16-20 21Naye namukalusia, “Yaka kosi ndakafumila okhurula mubwana bwanje.” 22Olwa Yesu yahul'la yaka yamubool'la, “Sisili esindu silala esiawenyekhanga okhole; okusie ebioli n'nabio biosi ma okabul'le abatakha, ne wakhaba nende libere mwikulu; ma witse unonde.” 23Nebutswa olwomundu uyo yahul'la yako, yabelela muno sichila yali omuhinda okhusila.

24Yesu yalola nabeeleye ma naboola, “Nobutinyu abahinda okhwinjila mu Bwami bwa Nyasaye! 25Nobutoro ingamia okhubir'ra mumuluhu kwesindani okhuyomba omuhinda okhwinjila mu Bwami bwa Nyasaye.” 26Abandu abamuhulila nibareba, “Khe niwina onyala okhuhonibwa?” 27Yesu nakalusia, “Akaranyalikha khumundu nakanyalikha khu Nyasaye.”

28Petero naye naboola, “Lola, ifwe khwalekha ebiefwe biosi khwakhulonda.” 29Yesu nababool'la, “Tooto mubool'langa, omundu wosi owalekha hango nohomba omukhasi nohomba abamwabo babwe nohomba abebuli nohomba abaana khulwo Bwami bwa Nyasaye, 30yakhanyoole ebinji okhusila mutsinyinga tsino, khandi yakhanyoole obwami oburahwa mutsinyinga etsitsanga.”

Yesu yaboola olwakhataru akokhufwakhwe nende okhusimukukha

(Mat. 20:17-19; Mk. 10:32-34)

31Yesu yabukula abechi likhumi nababili natsia n'nabo sibeka, nababool'la, “Hulile, khutsitsanga Yerusalemu, ne amang'ana kosi akabaroobi bahandika nakahesibwe khu Mwana wo Mundu. 32Okhuba narebwe mumakhono kabandu betsimbia, nabamutsekhel'le nibamukhupia esibi nibamufutsila amare. 33Nabamukhupe tsikhoba, nabamwire, nebutswa inyuma wamatukhu kataru yakhasimukukhe.” 34Nebutswa bo sibamanyilisiakhwo ling'ana kata elala khuko tawe; bali nibabiswa esifune siamang'ana yako, ne sibamanya nisina esia babool'lwa tawe.

Yesu yahonia Omubofu

(Mat. 20:29-34; Mk. 10:46-52)

35Olwa Yesu yali nali ahembi okhwola Yeriko, yaliho omundu owali omubofu niyekhaye khundulo khweinjila, nasabanga. 36Olwa yahul'la omukanda nikubiranga nareeba, “Nisina esikwiye?” 37Nibamubool'la, “Yesu wa Nasareti niye obiranga hano.” 38Nachingula omwoyo nahanzukha naboola, “Yesu Omwana wa Daudi umbeele tsimbabasi!” 39Abandu bali nibemeye bamukondekhela nibamubool'la abune; nebutswa naye natsilil'la okhuhanzukha naboola, “Omwana wa Daudi, umbeele tsimbabasi.” 40Yesu yasinjila, nalaka mbu bamulere khuye. Olwomubofu uyo yetsa ahembi, Yesu namureeba, 41“Wenyanga khukhol'le sina?” Naye namukalusia “Omwami, nyenyanga ndole.” 42Yesu namubool'la, “Henga! Obusubili bubwo bukhuhonisie.” 43Ne nonoho nahenga, nalonda Yesu niyetsomianga Nyasaye. Abandu bosi abaliho olwa balola yako, bafumia Nyasaye.

Currently Selected:

LUKA 18: EBAIBO

Highlight

Copy