LUKA 17

Ebiokhwesirasia abandu okhukhola tsimbi

(Mat. 18:6-7,21-22; Mk. 9:42)

1Yesu yabool'la abechi baabe, “Ebiesirasio ebichilanga abandu nibakwa mutsimbi bitsanga siahene, nebutswa alitsiboolelwa omundu ochilanga nibitsa! 2Bwakhabeye obulahi khuye oluchina olwarekoreko nilwakhabohelwe mwikosimwe ma afuubwe munyanza, okhuyomba ye okhuchila mulala khubatu yaba okhukhola tsimbi. 3Mwelinde abene. Omwana wenywe naba nakhwonela omuchetsiyie, ne naba niyekalukhania omulekhele.#Mat. 18:15 4Naba nakhuwonela esia khane nakhataru khwitukhu elala, ne nakalukha khuibe esia khane nakhataru naboola, ‘Khuwoneye, umbeele’, omubeele.”

Obusubili

5Abarumwa nibamubool'la, “Omwami, okhumet'te obusubili.” 6Omwami nabakalusia, “Nimwakhabeye no busubili singa obwolukutsa lwelisatsi, mwakhabool'la omusaala kwo Muforosadi yiku, ‘Khunyukha, ma wesimikhe munyanza’, ne kwakhamuhul'la.

Omulimo Kwomutiyi

7“Mulala khu inywe niyakhaba nende omukholi olimanga nelichembe lietsing'ombe nohomba owayanga amakondi, ma olwa achelelanga okhurula mumukunda, wamubool'la yetse bwangu yekhale alie ebiokhulia? 8Sikakhanyalikha tawe! Nebutswa yakhamubooleye ‘Nombela ebiokhulia ndie, ma webohe mus'sienje urumikhile okhwola olwamala okhulia nende okhunywa, khe nawe olie khandi onywe.’ 9Siabool'langa omukholi uyo embwo tawe sichila uhesisie akayalakwa. 10Khandi nimbwo kali khu inywe; Nimumal'le okhukhola kosi akamulachilwe; muboolenje, ‘Ifwe khuli abakholi ababula obukhala, khukhol'le butswa aka khukwan'ne okhukhola.’ ”

Yesu yahonia abandu likhumi abali nobuchele

11Olwa Yesu yali nali khuluchendo lwokhutsia Yerusalemu yabir'ra hakari wa Samaria nende Galilaya. 12Olwa yali niyenjilanga mwitaala elala, abandu likhumi abali nende obuchele bakaana n'naye, nibasinjil'la ehale, 13nibahanzukha butinyu nibaboola, “Yesu Omwami, okhubeele tsimbabasi.” 14Olwa yabalola yababool'la, “Tsie mwemanyie khubesaalisi.” Kali olwa bali nibatsitsanga, bamala nibasiywa.#Abal. 14:1-32 15Mulala khubo olwa yalola mbu usiyikhile yakalukha niyetsominjia Nyasaye butinyu. 16Nakwa hasi imbeli webilenje bia Yesu namubool'la embwo. Ne yali Omusamaria. 17Yesu naboola, “Abasiyilwe sibali abandu likhumi? Barano nabane bali hena? 18Abulaho okalukhile okhwitsomia Nyasaye narali omucheni uyu?” 19Ma nabool'la omundu uyo, “Sinjila otsie, obusubili bubwo bukhuhonisie.”

Okhwitsa khwo Bwami bwa Nyasaye

(Mat. 24:23-28,37-41)

20Abafarisayi bareba Yesu, “Obwami bwa Nyasaye bwakhetse lina?” Naye nabakalusia, “Obwami bwa Nyasaye sibwitsanga kol'lani nibulolekha tawe. 21Abulaho owakhaboole, ‘Buli hano’, nohomba, ‘Buli hala;’ sichila Obwami bwa Nyasaye buli mwinywe!”

22Ma nabool'la abechi baabe, “Amatukhu ketsanga aka mwakhekombe okhulola elala khumatukhu ko Mwana wo Mundu, nebutswa simwakhalilole tawe. 23Ne abandu bakhamubool'le, ‘Henge mulole ali hala!’ nohomba ‘Henge mulole ali hano!’ Inywe murakharula nohomba okhubalonda tawe. 24Okhuba singa oluheni obwa luhenukhanga bwangu okhurula olubeka l'lala okhutsia elubeka lundi, nimbwo Omwana wo Mundu yakhalolekhe mwitukhu lilie. 25Nebutswa yako nikasili okhwekhola, kamuhel'le asalisibwe okhusila nende okhusuulwa khwisuba yili. 26Singa obwa kali mumatukhu ka Noa, nimbwo kakhabe mumatukhu ko Mwana wo Mundu.#Okhuch. 6:5-8 27Abandu batsilil'la okhulia nende okhunywa, okhuteesia nende okhuteesibwa okhwola olwa Noa yenjila musafina. Olucheka lwetsa ma nilubakhuya bosi.#Okhuch. 7:6-24 28Kakhabe singa obwa kali mumatukhu ka Loti. Abandu batsilil'la okhulia nende okhunywa, okhukula nende okhukusia, okhuraaka imwo nende okhwombokha.#Okhuch. 18:20—19:25 29Nebutswa litukhu elia Loti yarula Sodoma omul'lo nende obunora biakwa okhurula mwikulu singa ifula, nibibakhuya bosi. 30Nimbwo kakhabe litukhu elio Mwana wo Mundu yakhabisukhe.

31“Litukhu yilio omundu wosi owakhabe khusilama sieinyumba arakhekhe okhutsia munyumba okhubukula ebindu bibie tawe. Khandi owakhabe nali mumukunda arakhakalukhe ingo tawe.#Mat. 24:17-18; Mk. 13:15-16 32Mwitsul'le akali okhwekhola khumukhasi wa Loti.#Okhuch. 19:26 33Wosi owakhateme okhuhonia obulamu bubwe yakhabukosie, ne wosi owakhakosia obulamu bwe yakhabuhonie.#Mat. 10:39; 16:25; Mk. 8:35; Lk. 9:24; Yoh. 12:25 34Mubool'langa, litukhu yilio abandu babili bakhabe nibakon'ne halala, mulala yakhabukulwe ne oundi yakhalekhwe. 35Abakhasi babili bakhabe nibasetsanga halala, mulala yakhabukulwe ne oundi yakhalekhwe. [ 36Abandu babili bakhabe nibatiyanga mumukunda, mulala yakhabukulwe ne oundi yakhalekhwe.]#17:36 Amahandiko kandi amakhulu sikali nesiasia sia 36 tawe.”

37Abechi baabe nibamureeba, “Hena, Omwami?” Yesu nababool'la, “Ahomubili kufwiye kuli, niho ahetsisori tsiebunjikhanga.”

Currently Selected:

LUKA 17: EBAIBO

Highlight

Copy