LUKA 20

Lireebo khukobunyali bwa Yesu

(Mat. 21:23-27; Mk. 11:27-33)

1Litukhu elala, olwa Yesu yali niyebaal'langa abandu mu Hekalu ne nabakambila Amang'ana Amalahi, abesaalisi abakhongo nende abebaali ba Malako halala nende abakhulundu batsia 2nibamubool'la, “Khubool'le, okholanga yaka mubunyali sina?” 3Yesu nababool'la, “Nase ndamureeba lireebo: 4Obunyali bwa Yohana khubaputisa bwarula khu Nyasaye nohomba khubandu?” 5Nibachiaka okhuhingana abene khubene, nibaboola, “Nikhuboola bwarula khu Nyasaye yetsa okhukhureeba ‘Busina nimurasubila Yohana?’ 6Ne nikhuboola ‘Bwarula khubandu’ ne abandu bali hano yaba bosi betsa okhukhulasa namachina, sichila bosi basubilanga mbu Yohana yali omuroobi.” 7Kho bamala nibamubool'la, “Sikhumanyile obunyali yibwo bwarula hena tawe.” 8Yesu nababool'la, “Nase simubool'la kholanga yaka nabunyali sina tawe.”

Olukano lwabalimi bomukunda kwemisabibu

(Mat. 21:33-46; Mk. 12:1-12)

9Yesu natsilil'la okhubool'la abandu olukano yilu: “Omundu nalebe yasimikha omukunda kwemisabibu, ma nakulekhela abalimi ne narula natsia musibala sie hale namenya yo oluhono.#Isaya 5:1 10Mumatukhu kelichesa, yaruma omurumikhiliwe khubalimi yabo bamuhekhwo ebiamo biomukunda kwemisabibu. Nebutswa abalimi yabo bakhupaka omurumikhili uyo nibamukhunga amakhono makhaya. 11Omundu uyo naruma omurumikhili undi; abalimi yabo khandi nibamukhupaka, nibamukhol'la obubi ma nibamukhungania amakhono makhaya. 12Ma naruma omurumikhili wakhataru, abalimi nibamukhupa tsinguma, nibamufuuba esioba amakhono makhaya. 13Ma omwene omukunda kwe misabibu napaala, ‘Nakhole mbwena? Ndaruma omwana wanje owandayanza, haundi bakhamuria.’ 14Nebutswa olwabalimi yabo bamulola nibabool'lana ‘Uyu niye owakhalamilwe emiandu. Chende khumwire kho obulaamebwe bube obwefwe.’ 15Nibamuhinia esioba womukunda kwemisabibu, ma nibamwira.”

Yesu nabareeba, “Omwene mukunda yakhabakhol'le mbwena abalimi yabo? 16Aliitsa okhubamulula abalimi yabo, ma alahelesie abalimi bandi omukunda kwemisabibu yikwo.” Olwabandu bahul'la amang'ana yako bafukula, nibaboola: “Karabba mbwo tawe.”

17Nebutswa Yesu yabahenga ma nabareeba, “Akahandikwa yaka kho kali nasifune sina?

‘Lichina eliabombokhi basuula,

Eliene yilio likwiye eliobukhonyi obukali khunyumba!’#Etsisa. 118:22

18Omundu wosi niyakhakwa khwichina yilio yakhafunikha mubitonye; ne nililikwila omundu liakhamutubule singa olukukhi.”

Okhurunga obusuru khumuruchi wa Baroma

(Mat. 22:15-22; Mk. 12:13-17)

19Abebaali ba Malako nende abesaalisi abakhongo benya okhumutiila habwene nahabwene sichila bamanya mbu olukano yilu yakhupanga khubo, nebutswa baria abandu. 20Ma nibachiaka okhuruna obweyangu obulahi. Nibahetsa abandu okhwekhola okhuba abalahi, nibabaruma okhutsia okhurechekha Yesu namarebo khe bamutile bamure mumakhono khandi mubunyali bwomukafuna we Buroma. 21Abarunilisi bamang'ana yabo nibamubool'la, “Khwamanya mbu sioritsanga omundu wosi kata siohenganga khubukhongo bwomundu tawe, nebutswa wibaalanga injila ya Nyasaye habwene. 22Khubool'le, nomusilo okhurunga obusuru khumuruchi wa Baroma nohomba tawe?”

23Yesu yamanya okhuteema khwabwe, nababool'la, 24“Mumanyie efetsa ndole. Eli nende likondo nende olwanzilo lwa wina?” Nibamukalusia, “Nebiomuruchi wa Baroma.” 25Yesu nababool'la, “Kho muhelesie Omuruchi wa Baroma ebili ebiomuruchi, ne muhe Nyasaye ebili ebia Nyasaye.” 26Bakhumbulwa okhufumila ling'ana liosi imbeli wabandu nibachenya masiling'ana khumakalusio kaake.

Lireebo khukokhusimukukha khwabafu

(Mat. 22:23-33; Mk. 12:18-27)

27Abasadukayi ababoolanga mbu abafu sibanyala okhusimukukha betsa khu Yesu, nibaboola;#Ebikh. 23:8 28“Omwibaali; Musa yakhuhandichila mbu omwana wanga omundu nalebe nafwa ne nalekha omukhasiwe narali no mwana, omwana wabwe akalusie omukhasi omulekhwa uyo, yebul'le omwana wabwe abaana.#Okhuka. 25:5 29Khale baliho abasiani bomundu mulala bane nabataru. Owokhuranga yateesia omukhasi, ma nafwa nasili okhunyoolakhwo omwana. 30Omusiani wabwe wakhabili nakalusia omukhasi uyo, naye khandi nafwa, 31ne owakhataru khandi naye mbwo. Nikatsilil'la mbwo okhwola bosi bane nabataru nibafwa sila okhulekhakhwo omwana. 32Olweinyuma omukhasi uyo khandi naye nafwa. 33Litukhu liokhusimukukha khwabafu, omukhasi uyo yakhabe owa wina? Bosi bane nabataru bamutesia khwo.”

34Yesu nababool'la, “Abandu bamatukhu kano batesianga nibatesibwa; 35nebutswa yabo aba Nyasaye yakhanyal'le okhwola khukhusimukukha sibakhatesie nohomba okhutesibwa tawe. 36Bakhabe singa abamalaika, ne sibakhafwe khandi tawe. Nabaana ba Nyasaye sichila basimukukha okhurula mubafu. 37Nebutswa akokhusimukukha khwabafu kata Musa yamanyia habulafu musitonye sia Mahandiko Amatsienukhu aha kahandikwa khusitsakha esiali nisiakhanga omul'lo, amuralanga singa Nyasaye wa Aburahamu, Isaka nende Yakobo.#Okhur. 3:6 38Kho siali Nyasaye wabafu tawe, nikarali ni Nyasaye we yabo abali mwoyo; okhuba khuye bosi bali mwoyo.”

39Abalala khubebaali ba Malako, nibaboola, “Omwibaali, ukalusisie obulahi okhusila.” 40Sichila sibali neikholo yokhumureeba amarebo kandi tawe.

Lireebo khu Masihi

(Mat. 22:41-46; Mk. 12:35-37)

41Yesu nabareeba, “Busina kaboolekhanga Masihi ne es'soni sia Daudi? 42Okhuba Daudi mwene aboolanga mu Saburi,

‘Omwami yabool'la Omwami wanje

yikhala khumukhono kwanje omusaatsa.

43Okhwola olwandikhola abasukubo balabe singa indebe yokhulambisia khwo ebilenjebio.’#Etsisa. 110:1

44Daudi amulanganga ‘Omwami’; kho yakhaba mbwena khandi es'soni sie?”

Yesu yachetsiyia abandu khukabebaali ba Malako

(Mat. 23:1-36; Mk. 12:38-40)

45Yesu yabool'la abechi baabe imbeli wabandu bosi, 46“Mwelinde khubebaali ba Malako abayanza okhuchendachenda nibebiikhile etsikanzo. Bayanza okhusiesibwa noluyali nabandu mubiiro, bekhalanga khutsindebe etsioluyali mutsisinakoki, nibabukula obwikhalo bweimbeli mumasabo. 47Beyinjisianga mutsinyumba tsiabakhasi abalekhwa nibabanuula emiandu chiabwe, ne nibekhola okhuba abalahi mukhusaaya khwabwe okhurambi. Litukhu liokhukhalachilwa esiina bakhanyoole esinyasio esikali okhusila!”

Currently Selected:

LUKA 20: EBAIBO

Highlight

Copy