LUKA 14

Yesu yahonia omulwaye

1Litukhu elala elie Sabato, Yesu yatsia okhulia ebiokhulia munyumba eya mulala khubemeli ba Bafarisayi. Abandu abaliho bosi bali nibamuhengelesianga. 2Omundu owali nobulwaye bweimbunda yali naliho, 3ma Yesu nareeba abebaali ba Malako nende Abafarisayi, “Nobulahi okhuhonia omundu litukhu lie Sabato nohomba tawe?” 4Nebutswa basiling'ana butswa. Yesu nafumila omulwaye uyo, namuhonia ma namusebula. 5Ma nababool'la, “Niwina khwinywe owomwana we nohomba ing'ombe ye yakhakwa mubuko, owakhabula okhumuhiniamwo nohomba okhuchihiniamwo mwitukhu lie Sabato?”#Mat. 12:11 6Sibaali abanyala okhumukalusia tawe.

Obuhaani nende Obwetutuyi

7Olwa Yesu yalola abali nibalangilwe obwa belukhan'nanga tsindebe tsieimbeli etsioluyali, yababool'la olukano luno: 8“Omundu naba nakhulanga musisel'lo orekhala khundebe yeimbeli eyoluyali tawe, khase oundi yakhaba nalangilwe omukoosi okhuyomba ibe,#Tsinj. 25:6-7 9ne omulanjile mwesi yetse akhubool'le, ‘Yikul'la uyu obwikhalo!’ Ma wakhasimba omurwe ma wikhale khundebe yeinyuma okhusila. 10Musilenje siokhukhola mbwo, noba nolangwa mumukho, wikhale mubwikhalo bweinyuma, kho okhulanjile olwa yetsa akhubool'le, ‘Omulina, yitsa wikhale imbeli, habundu halahi.’ Kano kakhakhusimbulusia omurwe imbeli wabandu bosi abekhaye halala n'nawe. 11Okhuba wosi owefumianga yakhachiehibwe, ne owechieyianga yakhafumibwe.”#Mat. 23:12; Lk. 18:14

12Ma Yesu nabool'la owali namulanjile, “Niwakhalombela abandu lisabo m'basu nohomba khubwile oralanga abalinabo, nohomba abaana benywe, nohomba abekho baabo, nohomba abamenyani baabo abahinda sichila nabo nabakhulange ma babe bakhurunjile akawabakhol'la tawe. 13Nebutswa ibe olwolombanga lisabo, olange, abatiecheli, abatakha, abalema nende ababofu, 14ne wakhaba unyooye ikhabi, sichila yabo sibali nende esiokhukhurunga tawe. Nyasaye yakhakhuhelesie omukabwakwo olwabandu abalunji bakhasimukukhe.”

Olukano lwe lisabo likali

(Mat. 22:1-10)

15Mulala khu yabo abali nibekhaye nende Yesu khubiokhulia yaboola, “Noweikhabi owakhalie ebiokhulia mu Bwami bwa Nyasaye.”

16Yesu namubool'la, “Omundu nalebe yalomba lisabo likali, nalanga abandu abenji. 17Olwe esaa ye lisabo yola yaruma omurumwa okhutsia okhubool'la abali nibalangilwe, betse sichila ebindu biosi biali nibierechekhele. 18Nebutswa bosi bachiaka okhureba obubeeli. Owokhuranga nabool'la omurumwa uyo, ‘Ngul'le omukunda ne khatimba nzie okhukulola; noyanza umbeele.’ 19Oundi naboola, ‘Ngul'le tsing'ombe tsiokhulima amakokolo karano, nzitsanga okhutsitema, noyanza umbeele.’ 20Ne oundi naboola, ‘Nder're omukhasi, khulwe yako sinyala okhwitsa tawe.’

21“Omurumwa uyo nakalukha nabool'la omwamiwe amang'ana yako. Mwene nyumba uyo lirima liamuhamba, nabool'la omurumwawe, ‘Tsia bwangu mumihanda nende mutsinjila tsiomwitaala olere abatakha, abalema, ababofu nende abatiecheli.’ 22Olwe inyuma omurumwa yetsa naboola, ‘Omwami amang'ana kosi kekhol'le singa olachile, nebutswa obweyangu busili okhwitsula!’ 23Omwami nabool'la omurumwa, ‘Tsia mutsinzebo nende mumihanda ohindilisie abandu benjile munyumba yanje, yitsule tu. 24Okhuba mubool'langa, abulaho kata mulala khu yabo abali nibalanjilwe owakhatsanzame khwo lisabo lianje.’ ”

Obukusi bwokhuba omwechi

(Mat. 10:37-38)

25Ne emikanda emikhongo nichilonda Yesu. Ma nasukhana nababool'la, 26“Omundu wosi naba niyakhetsa khwise, ne narabihil'lwa samwana nende nyina, omukhasiwe nabaana babwe nende ababotso nyene, yee kata obulamu bwe bwene, sianyala okhuba omwechi wanje tawe.#Mat. 10:37 27Omundu naba naretuukha omusalapa kukwe ma yanonde, sianyala okhuba omwechi wanje tawe.#Mat. 10:38; 16:24; Mk. 8:34; Lk. 9:23

28“Niwina khwinywe owakhenya okhwombokha oluhinga orekhala mbelio abale obukusi bwalwo, alole nikali ebiali n'nabio biakhahela? 29Khase olwaba namal'le okhuyaba omuse ma akhumbulwe okhumala, abandu bakhamutsekhel'la nibaboola, 30‘Omundu uyu yachiaka okhwombokha, ma wakhumbulwa okhumala.’

31“Nohomba, nimwami sina otsitsanga okhulwana lihe nende omwami undi, orekhala mbelio alole nikakhaba abasikari baabe etsielefu likhumi banyala okhulwana nabasikari etsielefu amakhumi kabili? 32Nalola mbu siali onyala tawe, ne aruma abarumwa okhuruna omulembe khu mwami wasie uyo nasili ehale. 33Nimbwo kali, abulaho kata mulala khwinywe owakhaba omwechi wanje naralekhele biosi ebiali n'nabio.

Omunyu okubula mwo esinosi

(Mat. 5:13; Mk. 9:50)

34“Omunyu nomulahi, nebutswa nikubulamwo esinosi, kwakhatoola hena esinosi siakwo? 35Sikuba nikuli matsami khwiloba nohomba kata khumbolela tawe. Abandu bakufubanga esioba. Nimuli namarwi akokhuhulila muhulile.”

Currently Selected:

LUKA 14: EBAIBO

Highlight

Copy