LUKA 15

Olukano lwelikondi eliakora

(Mat. 18:12-14)

1Litukhu elala basololi abobusuru nende aboni abenji batsia okhuhul'la Yesu nal'lomanga.#Lk. 5:29-30 2Abafarisayi nende abebaali ba Malako nibachiaka okhumumuchil'la, nibaboola, “Omundu uyu abukulanga aboni nalia n'nabo.” 3Yesu nababool'la olukano luno: 4“Omundu khwinywe niyakhaba nende amakondi emia ndala ma akosiekhwo elala, yakhakhola sina? Alekhanga akasikaye amakhumi karano nakane nende karano nakane musitsiimi ma atsia okhuruna elikor're okhwola olwa alinyoola. 5Nalinyooye aliretsanga khumabeka nobusangali. 6Olwa yoolanga hango, ne alanga abalina baabe ma ababool'la, ‘Sangale n'nase sichila nyooye likondi lianje eliali nilikor're.’ 7Khandi mbwo mubool'langa, obusangali obwinji bwakhabe mwikulu khulwa owetsimbi mulala orul'le mutsimbi, okhuyomba khulwa abandu abalunji amakhumi karano nakane nende barano nabane nibabula okhurula mutsimbi.

Olukano olwesilingi eyakora

8“Nohomba omukhasi nalebe niyakhaba nende etsisilingi likhumi ma akosiekhwo ndala, akholanga sina? Ahambianga etaya ma yeya munyumba nahengelesia okhwola achinyoole. 9Niyakhachinyoola, alanganga abalina nende abamenyani baabe ma ababool'le, ‘Sangale n'nase sichila nyooye esilingi yanje eyali nekor're.’ 10Khandi mbwo, mubool'langa, nimbwo obusangali bwakhabe ho khubamalaika ba Nyasaye khulwa owetsimbi mulala orul'le mutsimbi.”

Olukano lwomusiani owakora

11Yesu natsilil'la okhuboola, “Yaliho omundu nalebe owali nende abasiani babili. 12Omusiani mutu namubool'la, ‘Papa, mbelesia omukabwa kwanje okwemiandu lunondi.’ Ma samwana nabakabul'la emiandu chichie. 13Inyuma wamatukhu matu omusiani mutu uyo nakusia emianduchie chiosi ma narula hango nende amapesa, natsia musibala esiehale nasasichisiayo emiandu chichie mubulamu bwetsimbi. 14Olwa yamala ebindu biosi, inzala ikhongo yamala neba musibala yisio ma nachiaka okhutiima. 15Nareeba emilimo khumundu nalebe musibala yisio. Ne omundu uyo namuhila mumukunda kwe alisinjie tsimbitsi. 16Yekomba okhwikura mukhulia ebiokhulia bietsimbitsi tsiahebwa okhulia, nebutswa omundu wosi siyamuhakhwo esiokhulia tawe. 17Ne olwa yalaba tsimoni, yaboola, ‘Abarumikhili ba papa wanje nabenji, ne bekuranga ebiliibwa ebinji ma bibarama, ne nase inzala niyinzir'ra hano! 18Narule nanzie khu papa wanje ma namubool'le; Papa, ndayon'na Nyasaye khandi ndakhwon'na ibe, 19Kata singwan'ne okhulangwa omwanawo khandi tawe. Ukhole singa mulala khubarumikhili baabo.’ 20Ma nachiaka oluchendo lwokhukalukha khu samwana.

“Olwa yali nasili ehale ne samwana namulola, ne namubelel'la, natsia tsimbilo khuye, namukwaka nende okhumutsunzuuna. 21Omusiani uyo namubool'la, ‘Papa ndayon'na Nyasaye khandi ndakhwon'na ibe. Singwan'ne kata okhulangwa omwanawo tawe.’ 22Nebutswa samwana yabool'la abarumikhili baabe, ‘Tsie bwangu mulere tsingubo tsindahi mum'biikhe! Khandi mum'biikhe ingaka nende ebilaro. 23Mwire esimoosi esianera, khulie khusangale. 24Sichila omwana wanje uyu yali niyafwa ne luno ali mwoyo, yali niyakora ne luno unyolekhele.’ Nibachiaka okhusangal'la lisabo.

25“Ne olwene yilwo omusiani wabwe yali nasili mumukunda. Olwa yali nachelelanga nali ahembi okhwola hango, yahul'la amayoosi ketsinyembo nende okhusalama. 26Nalanga mulala khubarumikhili namureeba, ‘Nisina esikwiye?’ 27Omurumwa uyo naye namubool'la, ‘Omusiani wenywe ukalukhile hango ma papawo umwiriye esimoosi esianera sichila umunyooye nasili mwoyo.’

28“Omusiani mukhulundu uyo yamala nasinyikha okhusila ma nasuula okhwinjila munyumba. Samwana narula esioba okhumuhomba yenjile. 29Nebutswa naye nabool'la samwana, ‘Lola, emihika yichi chiosi nikhurumikhilanga, sili okhufunaka khwo lilako lilio kata elala tawe, nebutswa osili okhumbakhwo kata esimeme sieimbusi sangale nende abalina banje! 30Nebutswa omwanawo uyu owalia emianduchio nende amasambale, olwa yetsele umwiriye esimoosi esianera.’ 31Samwana namukalusia, ‘Mwana wanje, ibe obetsanga n'nase khasotso, ne ebiandi n'nabio biosi nebibio. 32Kaali akobuha mbu khukhole lisabo nende okhusangala sichila omwana wenywe uyu yali niyafwa, ne luno ali mwoyo; yali niyakora ne luno unyoolekhele.’ ”

Currently Selected:

LUKA 15: EBAIBO

Highlight

Copy