LUKA 13

Mwekalukhanie okhurula mutsimbi tsienywe khase mwakhafwa

1Olwene yilwo abandu nalebe baliho ababool'la Yesu amang'ana kabandu ba Galilaya aba Pilato yera olwa bali nibahaananga omusango khu Nyasaye. 2Yesu nababool'la, “Mupaalanga aba Galilaya yabo naboni okhuyomba aba Galilaya bandi, sichila berwa munjila yiyo? 3Tawe. Mubool'langa mbu nenywe nimuba murarula mutsimbi tsienywe, mwakhatibe singa bo. 4Nohomba abandu likhumi nende munane Esiloamu aboluhinga lwakwakhwo ma nibafwa, mupaalanga bali aboni okhuyomba abandu bandi bosi abamenyanga Yerusalemu? 5Tawe. Nebutswa nenywe murarula mutsimbi tsienywe mwakhatibe mwesi singa bo.”

Olukano lwomukhuyu okurayamanga amakhuyu

6Ma Yesu nababool'la olukano yilu, “Omundu mulala yali nomukhuyu okwali nikwasimikhwa mumukunda kwe okwemisabibu. Yatsia okhuruna amakhuyu khumusala yikwo anoke, nebutswa siyanyoola khwo tawe. 7Nabool'la omulindi womukunda kwe, ‘Lola, khulwemihika chitaru ndaitsile okhuruna amakhuyu khumukhuyu yiku, ne sinyoolanga khwo esindu siosi tawe. Okuremake, busina kutsilil'le okhwononia liloba butswa?’ 8Nebutswa omulindi namubool'la, ‘Omwami, okulekhe omuhika kuno; nangwachile ma nanzukhe khwo imbolela. 9Nikuba nikwakhaama amakhuyu omuhika kwitsa bwakhaba obulahi, nebutswa nikuraama amakhuyu ne okuremaka.’ ”

Yesu yahonia omukhasi omulema litukhu lie Sabato

10Litukhu elala elie Sabato Yesu yali niyebaalanga musinakoki. 11Ne omukhasi mulala owali niyalwala emihika likhumi nende munane yali mwo. Omubilikwe kwali nikwenama ne siyali onyala okhukol'lokha tawe. 12Olwa Yesu yamulola yamulanga, namubool'la, “Omukhasi uboholoywe okhurula mubutekhele bubwo.” 13Yesu Nara amakhonoke khuye ne bwangu omukhasi uyo nakol'lokha ma niyetsomia Nyasaye.

14Omukhongo wesinakoki yasinyikha sichila Yesu yali nahonisie khwitukhu lie Sabato. Yamala nabool'la abandu, “Kaliho amatukhu kasasaba akokhukhol'la mwo emilimo, mwitse muhonichisibwe mumatukhu yako, muretsa litukhu lie Sabato tawe.”#Okhur. 20:9-10; Okhuka. 5:13-14

15Nebutswa Omwami namukalusia naboola, “Inywe abakalama, ali khwo khwinywe orakhabohol'la ing'ombe ye nohomba esikhili ye okhurula musiko, ahile okhunywesia kata nilili litukhu lie Sabato? 16Hano aliho omukhaana wa Aburahamu, owa Setani yaboha khulwemihika likhumi nende munane. Sibuli obulahi ahonibwe litukhu lie Sabato tawe?” 17Olwa yamala okhuboola akene yako, bosi abali nibahingananga n'naye basimba emirwe, ne abandu bosi basangala khulwa amang'ana kosi akayali nakhol'le.

Olukano lwolukutsa lwelisatsi

(Mat. 13:31-32; Mk. 4:30-32)

18Yesu nareeba, “Obwami bwa Nyasaye buli mbwena? Mbufwananie nende sina? 19Bufwana nende olukutsa lwelisatsi, olwomundu yabukula naraka mumukunda kukwe: nilumela ma nikuba omusaala omukali. Amanyonyi kokhwikulu nikombokha ebitsu biako mutsisaka tsiakwo.”

Olukano lwamamela

(Mat. 13:33)

20Khandi Yesu nareeba, “Ndakhafwanania Obwami bwa Nyasaye nende sina? 21Bufwana singa amamela akomukhasi yabukula ma natsokania mumbikul'lo tsitaru tsiobusie mbuluha mbuhambila bwosi.”

Omuliango omunyel'le

(Mat. 7:13-14,21-23)

22Yesu yatsilil'la noluchendo lulwe okhutsia Yerusalemu nabir'ranga mumataala amakali nende amatu. 23Omundu mulala namureeba, “Omwami, nabandu abatututu abakhahonibwe noho?” 24Yesu namubool'la, “Muhambachil'le okhwinjila mumuliango omunyel'le, sichila mubool'langa, abenji bakhateme okhwinjila nebutswa sibakhanyale tawe. 25Mwene nyumba yakhasinjile ma alekale omuliango. Inywe mwakhasinjile esioba, nimukhong'onda khumuliango nimuboola, ‘Omwami khwikul'le omuliango!’ Nebutswa naye yakhamukalusie, ‘Simumanyile hamurul'le tawe.’ 26Nenywe mwakhachiake okhumubool'la, ‘Ifwe nifwe abalia nikhunywa halala n'nawe, nawe webaala mwitaala liefwe.’ 27Naye yakhaboole khandi, ‘Simumanyile inywe murul'le hena tawe. Rule khwise, inywe mwesi abakholi bobubi.’#Ebikh. 6:8 28Khulibaho okhulakaya nende okhukhwayula ameno, olwa mulilola Aburahamu, Isaka nende Yakobo, nende abaroobi bosi nibali mu Bwami bwa Nyasaye, ne nenywe abene nimufubilwe esioba.#Mat. 22:13; 25:30#Mat. 8:11-12 29Abandu bakhetse okhurula ebukwe nende emasaba, nende esinyolu ma nende enandete, bakhetse okhwikhala mu Bwami bwa Nyasaye. 30Ne yabo abali abeinyuma bakhabe abeimbeli, ne abeimbeli bakhabe abeinyuma.”#Mat. 19:30; 20:16; Mk. 10:31

Obuyanzi bwa Yesu khu Yerusalemu

(Mat. 23:37-39)

31Olwene yilwo Abafarisayi balala betsa khu Yesu nibamubool'la, “Rula hano otsie habundu undi, sichila Herode yenyanga okhukhwira.” 32Yesu nabakalusia, “Tsie mubool'le esibwe yisio mbu, ‘Litukhu lino nende eliamukamba mbininjia ebisieno nende okhuhonia abalwaye, ne khwitukhu liakhataru namale emilimo chianje!’ 33Kata mbwo litukhu lino nende mukamba ma nende omukamba kulonda khwo, okhwola nzilil'le noluchendo, okhuba sibuli obulahi omuroobi yer'rwe esioba wa Yerusalemu tawe.

34“Inywe abandu ba Yerusalemu, mwiranga abaroobi, nimubalasa amachina yabo abarumwa khwinywe. Ni hali khanga nirunanga okhubunjelesia abaana baabo halala singa ingokho enyabuli ebunjelesianga ebiminywi biayo mumbaha tsiayo, ne simwaimbuchil'la tawe. 35Khulwe yako Ehekalu yenywe mulekheywe abene likunda. Mubool'langa akatooto, simwakhandole khandi tawe okhwola olwa mwakhaboole, ‘Noweikhabi owitsanga muliira lio Mwami.’ ”#Etsisa. 118:26; Yer. 22:5

Currently Selected:

LUKA 13: EBAIBO

Highlight

Copy