LUKA 12

Lichetsiyio Khubukalama

(Mat. 10:26-27)

1Olwa abandu etsielefu tsinyinji bali nibebunjikhile halala ma kata nibaba basenananga, Yesu yaranga okhubool'la abechi baabe, “Mwelinde khumamela ka Bafarisayi, akali obukalama.#Mat. 16:6; Mk. 8:15 2Siosi esifuunikhilwanga siakhafunulwe ne siosi esiebisa siakhabulikhe.#Mk. 4:22; Lk. 8:17 3Khulwe yako, liosi eliamubool'la musiilima liakhahulilikhe habulafu, ne akamumonyan'na mu birwi emiliango nichikaye kalikambilwa khubisuli.

Owenyekhanga aribwe

(Mat. 10:28-31)

4“Mubool'langa abalina banje, muraria yabo aberanga omubili ne sibanyala okhukhola khwo elindi liosi olwe inyuma eliyoomba yaka tawe. 5Ndamumanyia owamukwana okhuria: murie Nyasaye, ye olwa aba niyer're, ali nobunyali okhufuuba mu Kehena. Yee, mubool'langa, murie omwene uyo. 6Amarobelesi karano sikakusibwanga amapesa kabili? Nebutswa kata elala khuko silibil'lwanga imbeli wa Nyasaye tawe. 7Kata liswi liokhumirwe chienywe liabalwa liosi. Muraria tawe; inywe muyombele amarobelesi amenji.

Okhweyama nende okhweyambakhana Kristo

(Mat. 10:32-33; 12:32; 10:19-20)

8“Mubool'langa tooto, siomundu olindeyama imbeli wabandu mbu nowanje, Omwana wo Mundu naye yakhamweyame imbeli wabamalaika ba Nyasaye mbu omundu uyo nouwe. 9Nebutswa omundu wosi owakhanyambakhana imbeli wabandu, Omwana wo Mundu alimweyambakhana imbeli wabamalaika ba Nyasaye.

10“Omundu wosi onyekanga Omwana wo Mundu yakhalekhelwa; nebutswa onyekanga Omwoyo Omutsienukhu siyakhalekhelwa tawe.#Mat. 12:32; Mk. 3:29

11“Olwa bakhamuhile imbeli wetsisinakoki, nende khubami nende khubomuse, murahende obwa namukalusie nohomba elianamuboole tawe.#Mat. 10:19-20; Mk. 13:11; Lk. 21:14-15 12Okhuba olwene yilwo Omwoyo Omutsienukhu yakhamwibaal'le akamwenyekhanga okhuboola.”

Olukano lwomuhinda owali omuhingwa

13Omundu mulala mumukanda yikwo namubool'la, “Omwibaali, bool'la omwana wefwe yangabul'le khwo obulame bwakhwalekhelwa nende papa wefwe.” 14Nebutswa Yesu namureeba, “Omulina wanje, niwina owambikha mbe omukhalachi nohomba omukabuli wemiandu khwinywe?” 15Ma nabool'la bosi, “Mwelinde khusikhayilwe siosi, sichila obulamu bwomundu sibuli khubindu ebiomundu yetsula n'nabio tawe.” 16Ma nababool'la olukano luno: “Yaliho omuhinda mulala owali nende omukunda kukwe okwama ebiamo ebinji okhusila. 17Omundu uyo napaala mumwoyokwe, niyebool'la; ‘Nakhole mbwena sichila sindi nende habundu hokhubikha ebichese bianje tawe? 18Ndakhakhola mbu, nasambule ebiachi bianje ma nyombokhe ebikali, ma mbikhe mwo ebichese bianje nende ebindu bianje. 19Ma nambool'le omwoyo kwanje; luno oli nende obuhinda obwinji obwokhulia khwo emihika ne mihika. Hulukha, olie onywe ma osangale.’ 20Nebutswa Nyasaye namubool'la, ‘Oli omuhingwa; obutukhu buno omwoyo kukwo kwitsa okhubukulwa. Khubindu yibio biosi ebia webunjikhila biakhaba ebia wina?’ ” 21Yesu namalila nende okhuboola “Nimbwo kali khumundu owebikhilanga obuhinda khububwe omwene, ne narali omuhinda khu Nyasaye.”

Musubile Nyasaye

(Mat. 6:25-34)

22Ma Yesu nabool'la abechi baabe, “Khulwe yako mubool'langa, murahendela obulamu bwenywe, esianamulie kata esianamunywe, nohomba akemibili chienywe esia namwebiikhe. 23Obulamu buyomba ebiokhulia, ne omubili kuyomba tsingubo. 24Mupaalekhwo khusifwanani siamakhokho, sikarakanga, kata sikachesanga, sikali nende ebiachi tawe; nebutswa Nyasaye akalisianga. Inywe muyombele amanyonyi. 25Niwina khwinywe khulwo khuhendela, owakhameeta oburambi bwobulamu bubwe? 26Kho nimuba nimurakhanyala okhukhola elili litu singa yili busina muhendelanga akandi? 27Paalekhwo singa obwa amatanya kamelanga. Sikanyakhananga, kata sikalukhanga tawe, nebutswa mubool'langa kata Solomoni mubukhongo bubwe siyayebiikha khwo singa elala khuko tawe.#1 Abar. 10:4-7; 2 Aketsi. 9:3-6 28Nebutswa, Nyasaye naba nabiikhanga obunyasi bwom'bulimo, obuliho n'nondi, ne mukamba bufuubwa mumul'lo, siyakhasilana okhumubikha inywe abandu bobusubili obutu? 29Kho murahendela esia namulie, nohomba esia namunywe. 30Okhuba yibio biosi abetsimbia, abaramanya Nyasaye babihendelanga. Papa wenywe wamanya mbu mutakhanga ebindu yibio. 31Nebutswa murune obwami bubwe mbelio, ne yibio biosi mulametelwa.

Obuhinda bwo Mwikulu

(Mat. 6:19-21)

32“Muraria tawe, inywe esiayo esitu, okhuba Papa wenywe uyanzile okhumuhelesia obwami. 33Mukusie ebia muli n'nabio ma muhaane ebihanwa bietsimbabasi khubatakha. Mwelombele emitata echirakhunguhanga, ma mubikhe libere mwikulu halirakhatutuhe, ahabebi barakhoola nohomba amatsilili okhwononia tawe. 34Okhuba ahe libere lilio lili niho ahomwoyo kukwo kuli.

Abarumikhili abali meso

35“Mwerechekhele kosi akaba niketsa, nimwebohele emikoye chienywe mubisienje bienywe, ne etsitaya tsienywe tsibe nitsiakhanga.#Mat. 25:1-13 36Mube singa abarumikhi abalindil'langa omwami wabwe olwachelela okhurula mus'selelo. Yetsanga ma akhong'onde, ne bamwikul'la bwangu.#Mk. 13:34-36 37Nabeikhabi abarumikhili yabo abo Mwami wabwe yakhanyoola nibali meso nibalindil'langa. Mubool'langa tooto mbu yakhebohe olukhoba mus'sienje sie, ma alabekhasie khubiokhulia ne nabarumikhila. 38Kata nibwakhaba mubutukhu hakari nohomba m'mabwebwe, niyakhabanyoola nibalindil'langa, bakhaba neikhabi. 39Khandi mumanyilisie mbu omwene nyumba niyakhamanya esaa yomwibi yetsela mwo okhwiba, yakhalindil'la, ma siyakhalekhele inyumba ye efunakwe tawe.#Mat. 24:43-44 40Nenywe khandi mukwana okhwerechekha sichila Omwana wo Mundu yakhetse esaa eya murapaalanga khwo tawe.”

Omulindi omusubilwa nende orali omusubilwa

(Mat. 24:45-51)

41Petero namubool'la, “Omwami, olukano yilu luli khulwe ifwe fwenyene nohomba khulwa abandu bosi?”

42Omwami nakalusia, “Niwina oli omulindi omusubilwa khandi omuchesi? Ni uyo owomwami yakhare ikulu wabarumikhili bandi mbu abahelesie ebiokhulia munyinga tsiabio. 43Noweikhabi omulindi uyo nikakhaba olwomwamiwe yakhakalukhe yakhamunyoole nakholanga mbwo. 44Siahene yakhamure okhulinda emianduchie chiosi. 45Nebutswa omulindi uyo niyakhapaala mumwoyokwe naboola; ‘Omwami wanje usisiliye okhukalukha’ ma achiake okhukhupaka abarumikhili bandi abes'siani nende abesikhana, ma achiake okhunywa nakholwa, 46omwamiwe yakhetse litukhu eliaramanyile khandi musaa eyarapaalangakhwo tawe, yakhamukhalanie ma alamure mwiboho elala nende yabo abarali abasubili. 47Nebutswa omurumikhili owamanya obuha bwomwamiwe ne siyayerechekha okhukhola obwa yenyekhanga akhole tawe yakhatiabwe tsisala tsinyinji. 48Ne uyo oramanyile aka yenyekhanga akhole, ma akhole yako akakwan'ne okhutiabwa, yakhatiabwe tsindititi. Owahebwa ebinji yakhabanzwe ebinji, ne wosi owahebwa ebinji yakhasabwe okhuhaana ebinji okhusila.

Yesu nesifune siokhwabukhana khwabandu

(Mat. 10:34-36)

49“Ndetsa okhuhambia omul'lo musibala, ne ndekombanga kube nikwakhanga. 50Ndi nende okhubaputiswa okhwenyekhanga mbaputiswe mwo, ne nyakhananga okhusila okhwola khuhesibwe!#Mk. 10:38 51Mupaalanga ndetsa okhulera omulembe musibala? Kata nahati; sikuli omulembe okwandetsa okhulera tawe nebutswa obwabukhani. 52Okhuba okhurula luno barano abomunyumba ndala balabukhana, bataru balalwana babili, ne babili balalwana bataru. 53Samwana alabukhana no mwanawe, ne omwana nasamwana, nyina alabukhana nomukhaanawe, ne omukhaana nende nyina, nyakhusalanyene alabukhana nomukhasi womusianiwe ne omukhasi womusiani alabukhana na nyakhusala.”#Mika 7:6

Okhumanyilisia tsinyinga

(Mat. 16:2-3)

54Yesu khandi nabool'la emikanda chiabandu, “Olwa mulolanga lilumbesi nilihimbanga imbo, ne muboola bwangu, ‘Ifula yitsa okhukwa’, ne tooto emalanga ekwe. 55Olwa mulolanga omuyeka kwe enandete nikuhungutsa ne muboola, ‘Siakhabe esimi’ ne esimi nisibaho. 56Inywe abakalama! Mwamanya okhurooba liiba liesibala olwa muhenga esibala nohomba likulu; busina muranyala okhuchelania amatukhu yaka?

Huchilisania nende omusukuwo

(Mat. 5:25-26)

57“Busina murekhalachilanga abene akali akahabwene okhukhola? 58Okhuba nyinga omubanziwo akhuyaalanga ma akhuhile imbeli womukhalachi, okhole esinani muhuchilisanie n'naye nimusili khunjila. Khase alakhuhila khumukhalachi, ma naye akhure mumakhono kabasikari, ne nabo bakhure mubuhambe. 59Tooto mwene siwakharulamwo tawe okhwola olwolimala okhurunga lisendi liokhumal'likha.”

Currently Selected:

LUKA 12: EBAIBO

Highlight

Copy