LUKA 11

Yesu yebaala khukokhusaaya

(Mat. 6:9-13; 7:7-11)

1Litukhu elala Yesu yali nasaayanga habundu nalebe. Olwa yamala okhusaaya, mulala khubechi baabe namubool'la, “Omwami okhwibaal'le okhusaaya, singa obwa Yohana yebaal'la abechi baabe.”

2Yesu nababool'la, “Olwa musaaya, muboole mbu:

‘Papa:

Eliiralio litsienukhu lifumibwe

Obwami bubwo bwitse

3Okhuhe ebiokhulia biefwe, biesielitukhu

4Okhulekhele okhwona khwefwe

sichila ifwe khulekhelanga bosi abakhwonelanga,

Orakhuhila mukhutemwa tawe.’ ”

5Ma Yesu nabool'la abechi baabe, “Nikakhaba mulala khwinywe ali nende omulinawe, ma atsie khuye mubutukhu hakari amubool'le, ‘Omulina wanje mambia khwo esibere umbe emikati chitaru, 6sichila omulina wanje undi unzitsiye, ne ali khuluchendo, nase sindi khwo nende esiokhulia esianyala okhumuhelesia tawe.’ 7Ne nikakhaba omulinawo yakhakalusia nali munyumba aboole, ‘Oranyasia tawe. Mal'le okhwikala omuliango. Ise nende abaana banje khumal'le okhukona, sinyala okhubuukha khuhelesie tawe!’ Kakhaba mbwena? 8Mubool'langa, kata narakhabuukha amuhelesie sichila no omulinawe, nebutswa yakhabuukha amuhe siosi esiarebele sichila ureleleye mukhureba.

9“Khulwe yako mubool'langa; Musabe ne mulahebwa, murune ne mulanyoola, mukhong'onde ne mulekul'lwa. 10Okhuba siomundu osabanga ahebwanga, orunanga anyoolanga, ne okhong'ondanga yekul'lwanga. 11Ali hena khwinywe abasamwana owomwana we yakhasaba isutse naye wamuha inzokha? 12Nohomba namusaba liyayi naye amuhelesie likatia? 13Kho nikakhaba inywe abali ababi mwamanya obwo khuhaana ebindu ebilahi khubaana benywe, Papa wenywe womwikulu naye sialayombia okhuhaana Omwoyo Omutsienukhu khu yabo abamusabanga?”

Yesu nende Belisebuli

(Mat. 12:22-30; Mk. 3:20-27)

14Litukhu elala Yesu yali nahinianga es'sieno esiasiluhala. Olwes'sieno yisio siarula muye ne omusilu uyo nachiaka okhul'loma, ma omukanda kwabandu nikuchenya. 15Balala khubo baboola, “Ahinianga ebisieno khulwe tsingufu tsia Belisebuli, omukhongo webisieno.”#Mat. 9:34; 10:25 16Ne abandi bamutema nibenya akhole akamangalimwa okhumanyia mbu ali nende obunyali oburula mwikulu.#Mat. 12:38; 16:1; Mk. 8:11

17Nebutswa sichila yali namanyile amapaalo kabwe, nababool'la, “Obwami bwosi obwabukhana mubituma ebikhupananga ebiene khu biene sibwakhamenya oluhono tawe; khandi kata inyumba eyabukhana khubwayo yakhatiba. 18Kho nikakhaba obwami bwa Setani buli nemikanda echilwananga echiene khu chiene bwakhasinjila mbwena? Inywe muboolanga mbinianga ebisieno mubunyali bwa Belisebuli. 19Nikakhaba nimbwo ise mbinianga ebisieno, kho abaana benywe nabo bahinichisianga ebisieno mubunyali bwa wina? Khulwe yako nibo abakhamukhalachile esiina abene. 20Nebutswa ise nimba nimbinianga ebisieno mubunyali bwa Nyasaye, khe mumanye mbu Obwami bwa Nyasaye bumal'le okhumwitsila.

21“Olwomundu omukufu ali nebiesingo bie, nalindanga hango hahe, ebindu bibie biosi bili nomulembe. 22Nebutswa omundu undi oli netsingufu okhumuyomba niyetsa okhumwinjil'la ma amuleche, anuulanga ebiesingo bia mwene hango yeletanga khwo ma akabulania ebiabetsanga nanul'le.

23“Wosi orali n'nase yafukulanga, ne wosi orakhonyanga okhubunjelesia, asalanianga.#Mk. 9:40

Okhukalukha khwo omwoyo Kwesifwabwi

(Mat. 12:43-45)

24“Olwo omwoyo kwesifwabwi kurulanga mumundu kubotokhananga khusibala esiomu nikuruna hakuhulukhila. Nikubula okhunyoola habundu ne kuboola, ‘Ndakalukha munyumba yanje eyandarula mwo.’ 25Olwa kukalukhanga ne kunyoola inyumba niyeyelwe ma nekaasibwe obulahi. 26Ma kutsia okhulanga emioyo chindi echiesifwabwi chine nachitaru echili emibi okhukuyomba, ma chiosi chinjila mumundu uyo. Kho liiba liomundu uyo libetsanga libi okhusila okhuyomba olwokhuranga.”

Ikhabi ya tooto

27Olwa Yesu yali nasiboola amang'ana yako, omukhasi mulala mumukanda yikwo yahanzuukha naboola, “Noweikhabi omukhasi owakhwibula ma nakhununia.”

28Ne Yesu namukalusia, “Nabeikhabi okhusila yabo abahul'langa ling'ana lia Nyasaye, nibalifumila!”

Abakhongo ba Bayahudi benya esilolelo

(Mat. 12:38-42)

29Olwo omukanda kwabandu kwatsilil'la okhwebunjikha khuye Yesu yababool'la, “Lisuba liamatukhu kano nelibi, lirunanga esilolelo, nebutswa siliakhahebwekhwo esilolelo siosi tawe nisirali esia Yona.#Mat. 16:4; Mk. 8:12 30Singa obwa Yona yali esilolelo khubandu ba Nineve, nimbwo Omwana wo Mundu yakhabe esilolelo khwisuba yili.#Yona 3:4 31Khwitukhu liesiina, omwami omukhasi wa Sheba yakhasinjile okhukhalachila abandu abelisuba yili sichila yarula khundulo khwesibala niyetsa okhuhul'la obuchesi bwomuruchi Solomoni. Ne mubool'langa, omukhongo oyombele Solomoni ali hano.#1 Abar. 10:1-10; 2 Aketsi. 9:1-12 32Litukhu liesiina abandu ba Nineve bakhasinjile okhumukhalachila inywe esiina, okhuba abandu ba Nineve bekalukhania okhurula mutsimbi tsiabwe olwa Yona yabakambila. Nebutswa mubool'langa, omukhongo oyombele Yona ali hano.#Yona 3:5

Etaya yom'bili

(Mat. 5:15; 6:22-23)

33“Abulaho omundu ohambianga etaya ma achibisa nohomba afunikhila musipaala, nebutswa achiretsanga khusihani siayo, kho abenjilanga balole obulafu.#Mat. 5:15; Mk. 4:21; Lk. 8:16 34Tsimoni tsitsio tsili singa etaya yomubili kwo. Nitsiba nitsili habwene nomubili kukwo kwitsulamwo obulafu; nebutswa nitsiba tsimbi ne omubili kukwo kwosi kulaba musiilima. 35Kho olole mbu obulafu buli mwiwe sibuli esiilima tawe. 36Om'bili kukwo kwosi nikuba nikuli nobulafu, ne esitonye siosi nisiralikhwo musiilima tawe, omubili yikwo nakube nobulafu mubwitsulu singa obwetaya ekhulabichisianga mukhwakha khwayo.”

Yesu yachetsiyia abandu khuka Abafarisayi nende Abebaali ba Malako

(Mat. 23:1-36; Mk. 12:38-40)

37Olwa Yesu yamala okhul'loma, Omufarisayi yamulanga atsie okhulia n'naye munyumba mwe. Natsia ma niyekhala n'naye khubiokhulia. 38Omufarisayi uyo yahuka okhul'la mbu Yesu aliitsanga naresaabile amakhono.

39Ma Omwami namubool'la, “Inywe Abafarisayi mwosianga es'sanda nende esahani ikulu, nebutswa mukari mwenywe mwaitsula mwo obunuli nende obubi. 40Abahingwa inywe, owalomba ikulu siali niye owalomba mukari khandi? 41Nebutswa muhaane khubatakha ebia muli n'nabio mukari ne ebindi biosi nabibe ebisiyikhu khwinywe.

42“Nebutswa mulitsiboolelwa inywe Abafarisayi, sichila muhaananga esielikhumi khumurele nende emiro nende tsifwa tsiosi, ne simuhendel'langa akatooto nende obuyanzi khu Nyasaye tawe. Ne yaka kenyekhanga mukakhole sila okhumayia akandi.#Abal. 27:30

43“Mulitsiboolelwa inywe, Abafarisayi! Sichila mwayanza tsindebe tsieimbeli mutsisinakoki, nende okhusiesibwa mubiiro. 44Mulitsiboolelwa inywe, sichila muli singa ebilindwa ebiebisa, abandu bachendanga khubio nibaramanyile.”

45Mulala khubebaali ba Malako namubool'la, “Omwibaali, nyinga oboolanga yaka okhurindilanga nefwe khandi.” 46Yesu namukalusia, “Nenywe abebaali ba Malako, mulitsiboolelwa, sichila mutukhanga abandu ebilinga ebia baranyala okhuchinga, ne nenywe abene simutila khwo kata esitere sionyene okhubakhonya tawe. 47Mulitsiboolelwa, sichila mwombokhanga ebilindwa biabaroobi ababakuka benywe bera. 48Inywe abene mukobokhelanga okhuhuchilisania khwenywe nende emilimo chiabakuka benywe, sichila nibo abeera abaroobi, ne nenywe mwombokhanga ebilindwa biabwe. 49Khulwe sifune yisi obuchesi bwa Nyasaye bwaboola, ‘Ndakhabarumile abaroobi nende abarumwa, nebutswa bakhere abalala khubo ne nibakhupia abandi esibi.’ 50Kho lisuba yili liakhanyoole esinyasio khulwa amatsahi kabaroobi bosi aberwa okhurula esibala nisilombwa; 51okhurula khukhwirwa khwa Habili okhwola khukhwirwa khwa Sakaria ower'rwa hakari holusambwa nende Habundu Hatsienukhu. Yee mubool'langa lisuba yili liakhanyoole esinyasio khulwe ebikhole yibi biosi.#Okhuch. 4:8; 2 Aketsi. 24:20-21

52“Mulitsiboolelwa inywe abebaali ba Malako, sichila mwabisa olufungo lwomuliango kwobuchesi; inywe abene simwakhenjile mwo tawe, khandi mwikal'langa abatemanga okhwinjila mwo.”

53Olwa Yesu yarulaho, Abebaali ba Malako nende Abafarisayi nibachiaka okhumwinjil'la butinyu, nibamureeba amarebo khumang'ana amenji, 54khe bamureke ma bamutile naboolanga ling'ana lisiamu.

Currently Selected:

LUKA 11: EBAIBO

Highlight

Copy