LUKAS 8
8
Yesus Ak Aralemek Gelewa Yuba
1Nen seleb dara, mandewal henggonggom Yesus ara nauba heikek abaĘľ ara hnon nauba heikek uboka, onoĘľ mek heikek abaĘľ ara hnon mek heikek sam, Imik Neyung adya wera seleb wenelemnesil aboka, perob lero yanggan yuba leb elekgiga yabalamok. Dara aljaĘľ obadya yuba doro diriga ban nang eneba alab neikaĘľ yabalamek. 2#Mat. 27:55-56; Mrk. 15:40-41; Luk. 23:49Dara bisaĘľ gologosukaĘľ hnon, yok-yok neiknaĘľ salalesukaĘľ ak hwesuk anyek, hwesuk gelewa eb neikaĘľ yabalamek. Ban gelewa dara, gela hnonda Maria yok si nera Magdalena alamek gel ge hnon (alda bisaĘľ sekbadya ban gel genyek anyeb yakoka hwemok gel), 3hnonda Herodes dubnya bedyaĘľ ek sam rupiah beilinaĘľ wa welemoknya, Khuza bedya gel Yohana geb, Susana geb uboka, onoĘľ yok gelewa nauba neikaĘľ yabalamek. Dara gelewa danedya, sikjaĘľ yok-yok bonaĘľ edya Yesus ab, alja yuba doro diriga ban nang eb aralesik.
Be Hnon YinaĘľ Bo Bolol Bilimok Aboka Sunuwok Yuba
(Mat. 13:1-9; Mrk. 4:1-9)
4Wera nimi nauba Yesus ak yok-yok heikek abaʾ ara alak bolol yal dibilloklomek dara, alda sikenek ban sununaʾ enyek sunuwoka lebsukaʾ ara, 5”Nimi wa wenaʾanya ben hnon yinaʾ bo bolol bununaʾ aboka bilimok. Wera bera yinaʾ bo bolol bilimok dara, yinaʾ hnonda pikek sam yama yinggyuk. Dara nera hnonda nim adya yan ingib saboka, hnonda wining adya yeindeboka nidyaʾ doboka jek. 6Yinaʾ hnonda girik lumok sam yama yinggyuk. Wera yinaʾ era seleb bongowok bok, soko ara gelelom arob adya bongowokjok sesewok. 7Yinaʾ hnonda giriknaʾ hnoum yama yinggyuk. Wera yinaʾ era giriknaʾ ab neikaʾ pe bongowarekjok, giriknaʾ adya aragokaʾ adya somogok. 8Bok yinaʾ hnonda perob sokok malyingginiboka, pe bongowoka doka nauba moulumok dara, hnonda denga dombadya anaso moru balamok,” hyok. Yesus ara seleb wenyaboka sunuwoka lebgogowok dara, onoʾ lebokja, ”Heknyek kendamba o yakaʾ ara, pe keblul!” hyok.
Hekasa SununaĘľ Adya Lelemok Yuba
(Mat. 13:10-17; Mrk. 4:10-12)
9Wera alja yuba doro diriga ban nang edya alak, ”Ban sunuwoka lelelamaʾ ara, damok ara hekaʾ ak lelelam?” aboka heibek. 10#Yes. 6:9-10Dara alda sikenek saaboka wenhyok, ”Imik Neyung adya wenelemnesilaʾ damoka ella dangan damba dara, alja migibaʾ era ugunuk ara seleb elegosuk. Bok yok nim ek dara, sikda eilin damba uruma dililimak bok, eilinggulumak, ken dara kelemak bok, anyek senewoka pe ella danganggulumak aboka, yokaʾ ak sunuwoka lelesin,” hyok.
YinaĘľ Bo Bolol BilimokaĘľ Ak SunuwokaĘľ Damok Yuba
(Mat. 13:18-23; Mrk. 4:13-20)
11”Wera yinaʾ bo bolol bilimokaʾ sununaʾ damok ara ban: Yinaʾ ara Imik Neyung yuba. 12Yinaʾ pikek sam yama yinggilimoknya nera, nim ara Imik Neyung yuba kelemak bok, Imik Neyung yub ak dib seneweija enyek, blebsilyek aboka, Iblis adya Imik Neyung yub ara sikja ganya ak ab hokaʾ dololanya nera an. 13Alda yinaʾ girik lumok sokok sam yama yinggilimoknya nera, nim anam salek era ganya goluwoka yuba dolomak bok, yub ara dibaʾ sikjaʾ ganya lomok sam yinaʾ menggulusil. Sikda anam salek seʾ ok dib senewanaʾ ara, yokaʾ sunulyamasinaʾ yanggan dara, wonaʾ dangalamaknya nera an. 14Alda giriknaʾ hnoum yama yinggilimok aboka sunuwoknya nera, nim Imik Neyung yuba kelemak bok, sokok un ganya eb, bonaʾ dubnya dangoka ulusinya ganya ab, ganya daldom-daldom anaʾ ganya eb dadya, yuba dolomlaʾ ara, seklama darab eleganakanya, perob doka mounggulusilnya nera an. 15Alda perob sokok sam yama yinggilimok aboka sunuwoknya nera, nim Imik Neyung yuba pe keboka, onoʾ ganya lomok beiyiboka pe uboka, bojam ulumak nim ek lebok. Dara ban nim era pe siklewoka ulumnekanya, yub ara pe yinaʾ meboka doka molulanya nera an,” hyok.
WesaĘľ Ak Sunuwok Yuba
(Mrk. 4:21-25)
16 #
Mat. 5:15; Luk. 11:33 ”Nimi hnon wesaʾ ara diniwoka mek hmei lomok gom, ekla manaʾ damumduk sam beibnenggunuseng. Alda ek wekel yanggeija nim era, dilinaʾ anyek, eibnokaʾ aboka, wesaʾ ara diniwoka, laga beilin oulyang ak sam beibnamso. 17#Mat. 10:26; Luk. 12:2Doknowoka ululanya nidyaʾ ara, eimik laga danamla. Dara onoʾ, wenera gunuwoka ululanya nidyaʾ ara, eimik olowoka laga dangoka ella ulumnamak. 18#Mat. 25:29; Luk. 19:26Wera anasa, ugunda seleb keblumaʾ anyek pe keeboka seiniwanalum. Anasa heknyek nauba ululanya bera, makoka elek sounuwanalabok, heknyek mekaʾ ulumlakanya, hnon ulunel senelelanya neneba, nidyaʾ alak ab dorowanamla,” hyok.
Yesus Ab Alja Weisab Eb Yuba
(Mat. 12:46-50; Mrk. 3:31-35)
19Dara Yesus eilinggeb, alja weisab eb, Yesus ak yeilimek bok, nimi nauba adya al nong ok okoka oka yanggumek. 20Dara nim adya alak, ”Neyung o, anjaʾ genong geb, anja weisab eb dara, sikda anab eibdanobaʾ aboka yeilimaakanya, beiyik ono seklemak,” hyek. 21Bok Yesus ara sikenek, ”Nimi nidyaʾ Imik Neyung yuba kelemaakanya, wenyalamlaʾ anyek unulumak nim enyek, sikenek wera nadyaʾ genong yabo, nadya weisab ulumak nim era al an,” hyok.
Mek Dubuk KaboĘľ NamenaĘľ Gebok Yuba
(Mat. 8:23-27; Mrk. 4:35-41)
22Dara onoʾ yok sum enyek, Yesus ab alja yuba doro diriga ban nang eb dara, mek ekla bunaʾ ak bukumek dara, Yesus adya sikenek, ”Nunda meka gouboka eer sam gemek binimabaʾ anasa, yoululum,” husuk. Dara sikda lanawoka buku balamek. 23Wera sikda anam mek hnoumunga buka balameekanya, Yesus ara seʾ hogunga mamok. Dara mek dubuk sam senenggom kaboʾ dorogookanya, wera sik bukumek mek ekla bunaʾ era meka wekoka sikda hyak nidyaʾ obsununaʾ aboka ul yabasuk. 24Anasa yuba doro diriga ban nang era lok anasa, sikda Yesus ak biniboka, ”Neyung o, neyung o, nunda wera meka si dereganabsil!” aboka gamayibek. Dara Yesus ara bukoka, mek era yakna nee yeiniboka eillilemokaʾ ak loblom aboka waboka lebok. Wenyek kaboʾ ab mek eiliwoka poweklemokaʾ ara loboka, mek ara namenaʾ mab lobok. 25Dara alda alja yuba doro diriga ban nang ek, ”Ugunja ganya dib senenaʾ ara hanyagar do?” husuk. Dara sikda hyak nauba lok ganya bomeekanya, sik moumen leldalamekja, ”Kabo ab, mek uu aboka eillilamnaʾ anaba, alja loblom al yaban enyek, alja yuba dibaʾ kelemakaʾ anasa, ban benera heknyek ulumla do?” aboka lelemek.
Yesus Ara BisaĘľ Ganya YamaĘľ Yakok Yuba
(Mat. 8:28-34; Mrk. 5:1-20)
26Dara Yesus ab alja yuba doro diriga ban nang era, mek ekla bunaʾ buku balamekaʾ ara, Galilea mek gwana geme ener sam gouboka, Gerasa nang edya moka lanel byik. 27Wera Yesus ara mek ekla bunaʾ ak ab gouboka gasaʾ ak sekel bok dara, nengmabo ben hnon bisaʾ gologomoknya bek Yesus ak yok. Bera alda youmaʾ ek moruwoka, akleng ongonaʾ orokaʾ anyek, e dibaʾ ak unaʾ loboka, beiyik nimi dilinaʾ pik ok mal giriklemok. 28Bera alda Yesus ak eibuk dara, alda Yesus adyaʾ saramek oumuwoka giboka yuba bii aboka lebokja, ”Imik ululanya, Imik Neyung bedya me, Yesus o! Anda nak ara hekaʾ ak ulumla do? Nak malya nenewoka lobaʾ nenenaʾ ara mem aboka molowagen!” hyok. 29Alda wenyaboka lelemokaʾ ara, Yesus adya alak an gologomok bisaʾ danyek gouboka bululum al yabokaʾ anasa lel yabok. Bera alda sobaʾ bisaʾ adya gologol yan dara, alja yan eb, soruk ab dara, gasa heng edya gouboka onoʾ pe diri bo ulumnaʾ anaba, heng era bisaʾ ganya yamaʾ adya bolok-bolok ab menegoka, hwalek gasaʾ ak sam gloʾ ak bo balamok. 30Dara Yesus ara benyek an, ”Anda si ara heknya do?” aboka heibok. Wenyek benedya dara, alda bisaʾ ara nauba gologomek bok anasa lebokja, ”Nadya si nera Legion,” hyok. 31Dara benyek an wekemek bisaʾ mandebnaʾ danadya, Yesus ak nunda salyaʾ somoknaʾ gweren selengaʾ ak sam yaksinaʾ ara mem aboka molowek.
32Dara mok enyek anera, pama nauba mein pik mola dero yabalamek. Anasa benyek an gologomek bisaĘľ danadya, Yesus ak nunda ban pam mandebnaĘľ lom enyek an weknobaĘľ aboka, or hesilom aboka molowek. 33Dara wera bisaĘľ gong era, gologomeknya bek ab gouboka, pam pik wekel byik. Dara pam dara, yeiriwoka mok soko abom pik abaĘľ ara langa diniwoka, mek gwanek sam youruwoka somokdo byik.
34Wera pama lob geregoka bo ulumek nang edya ban nidyaĘľ unuwokaĘľ ara okoka eibek. Dara nang enedya nauba heikek hnon, mek-mek heik pik sik ulumekaĘľ gokgobok heik me nidyaĘľ ara unuwal aro nekdo byik. 35Dara nimi nidyaĘľ heikek ab unumokaĘľ nidyaĘľ eibnobaĘľ aboka gobek. Dara sikda Yesus ulumokaĘľ ak sam yeiniboka kemelemek enyek, bisaĘľ gologomokaĘľ anyek alja hwemoknya bera, Yesus adyaĘľ yan berem bulumokaĘľ anyek eibek. Dara bera alda ganya sirikaĘľ beiyiboka, aklenga seleb ongowoka bulumok. Wenyek eiyimek nim era, hyak lok ganya bobek. 36Dara hwebokaĘľ eibek nim edya, Yesus ara ban bisaĘľ gologoknya bera hekaĘľ huboka hwemlaĘľ ara, unu hwemla enyek meremla aboka nekdangamek. 37Dara Gerasa mok sokok nimi nidyaĘľ ara, hyak lok ganya bobekaĘľ anasa, Yesus ak, wera anda nunja mok unaĘľ ara lo binilam aboka wenyal byik. Anasa Yesus ara mek ekla bunaĘľ ak bukoka saaboka yek.
38Bok men dara, bisaʾ gologomokaʾ anyek, hwemoknya bedya Yesus ak nara neikaʾ anab bininam gom aboka molowok. Bok Yesus adya anjaʾ ek binilam aboka orugoka lebokja, 39”Imik Neyung adya nidyaʾ anak sam unuwagelaʾ anyek, anda biniboka nekdo yibinelam,” hyok. Dara bera, Yesus adya alak nidyaʾ unumokaʾ anyek, alja mok heik nimi nidyaʾ ak biniboka nekdo yabalamok.
Yairus Bedya Me Subiyiwoka E Bugumok Gel Ge Hwebok Yuba
(Mat. 9:18-26; Mrk. 5:21-43)
40Wera Yesus ara, seleb onok yok dara, nimi nauba orowek alsamba diri ulumekaĘľ adya, ganya eiyasaĘľ alak pika dibek. 41Dara heik enyek an, Yahudi nim edya yuba don e damnya bera Yesus ak yok. Bera alja si nera Yairus. Alda Yesus adyaĘľ saram nong ok yeiniboka komo lumugoka giboka, nadya ek yanalam aboka molol yok. 42Nera alja gelma gibnaĘľ ara obadya lemok gelma enyek, somogonunaĘľ aboka ul yabokaĘľ anasa el yok. Dara Yesus ara ek sam bununaĘľ aboka, anam pikek balamok dara, nimi nauba darasam-darasam abaĘľ ara, Yesus nong ak ol goklemek. 43Dara, neik ek dangamok gela hnon, gibnaĘľ obadya lemok gel ge hnon ulumok. Gel gera nimi hwesinaĘľ nim ek hwebnenokaĘľ aboka, bonaĘľ yokaĘľ-yokaĘľ ara gobdo dengaromok bok, hyak alak gobdo pika garawoka hwebnenggumek. 44Wera gel gera Yesus balamok pik eimik dib dobol yeiniboka, Yesus adya ongomok akleng mousa ek mekaĘľ soruka bebegemok. Dara al wene sab-sab enyek, neik ek dangamokaĘľ ara, gobdo dengaro lobok.
45Wenyek Yesus ara, ”Heknedya nak bebegenel do?” aboka heibsuk. Dara nimi nidyaʾ ara hnon laga lebnenggubek. Anasa Petrus bedya Yesus ak, ”Neyung o, an ululamaʾ ak ara, nimi mandebnaʾ hyak nauba ulumaakanya, sikda anak dukaʾ eboka ol gokoldalamak ara eiyilam,” hyok. 46Bok Yesus adya dara, ”Nimi hnon nak an sene soruka bebeganyak. Nak ab senenggom migiba hnon gobnelaʾ eibnaʾ anasa,” hyok. 47Danyek bebegemok gel gedya dara, nadya unumnaʾ ara, ella uboka wera eibnel senewoka ella dookanya, alda ber-ber anaʾ dib yeiniboka, Yesus adyaʾ saramek sam yeiniboka oumuwoka gibok. Dara onoʾ gel gera nimi hnoum anyeb, hekasa alda Yesus ak bebegamlakanya, alja neik ek dangamokaʾ ara, wene salek denghyokaʾ ara, anesemba aboka unuwanel aboka laga nekok. 48Dara Yesus adya gel genyek an, ”Nadya gelma o, anda nak dib senenelemaʾ adya, wera anda merewalem. Anasa anda wera or ganya hekoka ek bindowalom,” hyok.
49Wera Yesus ara anam yuba salamok sab-sab, Yairus bedyaʾ ek ab oruknaʾanya ben hnon yeiniboka, Yairus bek, ”Neyung o, anja gelma era, seleb somogal. Anasa neyung, neklesilnya bek lobaʾ nenenggom, mem,” hyok. 50Bok Yesus ara ban yub en kebok dara, Yairus bek, ”Anda lok ganya bonggom, mem. Anja me nera eimik merewanamlaʾ anasa, anda dib senewanalam,” hyok. 51Wera sikda Yairus bedyaʾ ek sam seleb byik dara, Yesus ara yok nim era, ugunda e lomok wekel yangganaʾ mem aboka, alda Petrus beb, Yohanes beb, Yakobus beb me nen alja genonga neyung ok or bo weksuk. 52Wera nimi nidyaʾ ara gelma enesa engewoka nimi saleka bulumek. Bok Yesus adya engelemek nim ek an, Gelma enera somoganggumla, alda hogung dema mamlaʾ anasa, engenaʾ ara mem loblulum! husuk.
53Wera sikja dara, gelma era seleb somogomokaʾ ella umek bok adya, Yesus ak oksiyiwek. 54Dara Yesus ara gelma enedya soruka glibsalawoka, lebokja, ”Najabo gelma o, buklom!” aboka lebok. 55Dara gelma enedya ganya era onsok yookanya, gelma era wene sab-sab eneba, bukoka sekok. Dara, Yesus adya gelma ara denaʾ elegolulum aboka orugosuk. 56Gelma enedya alaʾ genonga neyung ara, hyak loka dabdowosuk. Bok Yesus ara ban unu hwebokaʾ ara, yok nim ek salyaʾ nekdo yabanaʾ ara mem aboka lebsuk.
Currently Selected:
LUKAS 8: LAINLC
Highlight
Share
Copy
Want to have your highlights saved across all your devices? Sign up or sign in
