LUKAS 9

Obadya Yuba Lenaʾ Gak Nang Ek Boksuk Yuba

(Mat. 10:5-15; Mrk. 6:7-13)

1Dara Yesus ara, alja obadya yuba lenaʾ gak nang ek yoululum aboka, sikenek bisaʾ doro bobogoka, bisaʾ ak obleboka, neiknaʾ nimi hwesin danasa, migib elegosuk. 2Dara, Yesus ara sikenek, Ugunda nimi hweboka, hnonda Imik Neyung adya hekaʾ huboka wenelemnesilaʾ anyek lero yabalamnelum, aboka lebsuk. 3#Luk. 10:4-11Onoʾ sikenek lebsukaʾ ara, ”Ugunda pikek binilumaʾ amba dara, yokaʾ-yokaʾ bonaʾ ara mem. Ugunda gamaʾ dungunaʾ bobnenggunulum, dem gloʾ aklenga salyaʾ bonaʾ ab, denaʾ gom, rupiah gom, ongon aklenga penya so bonaʾ ara mem. 4Dara anyagan nublaboka neikaʾ ulumnemab henesak ek an ulumunaʾ ara, wera onoʾ e nenyek anyebaʾ ara binilum. 5#Kis. 13:51Nublaboka neikaʾ ulumnemab aboka dobnenggunusak heik era, heik enyek ara lo yabamunukanya, yan blesa anyek heik enyek an habdeboka binilumaʾ adya, siksamba beknaʾ dibaʾ danamla,” aboka wenewosuk. 6Dara sikda bilimeekanya, mek-mek heikek sam biniboka, Imik Neyung yuba leb elegoka, yokok-yokok sam nimi nauba hwero yabalesik.

Herodes Ab Yesus Ab Yuba

(Mat. 14:1-12; Mrk. 6:14-29)

7 # Mat. 16:14; Mrk. 8:28; Luk. 9:19 Galilea sokok wenesin dubnya Herodes bera, Yesus ban eini nidyaʾ unulumok yub enyek kebok dara, hekaʾ hubnamna ak lelemak do senewoka ganya emok. Hnonda lelemekja, ‘Yohanes Pembaptis bera seleb suboka lanawok,’ alamekaʾ anasa, ganya eb menegegoka okna damok. 8Hnonda lelemekja, ‘Eli bera onoʾ wera seleb subuka lanawok,’ alamek. Hnon nim edya lelemekaʾ ara, ‘Youmaʾ ununumnaʾ lelemek nanga ben hnon, wera seleb embengaʾ suboka lanawok,’ alamek. 9Ban nenesa leboka, Herodes bedya lebnemokaʾ ara, ”Nara Yohanes Pembaptis bera seleb ya nganga daksa. Bok ban wenyalamaknya bera heknyek lelemak do? Alja yokaʾ-yokaʾ unulamla an yuba nauba kelenaba,” aboka, Herodes bera Yesus ak okoka eibsinya senewoka pik elemok.

Nimi Denga Lambadya Nang Ek Gwanenga Deb Elegosuk Yuba

(Mat. 14:13-21; Mrk. 6:30-44; Yoh. 6:1-14)

10Yesus adya yuba lenaʾ gak nang bokosuk nang era yeekanya, Yesus ak nunda ban unu welemab aboka nekdo yek. Wera dara, Yesus adya ugunda yoululum aboka eboka bobsuk dara, sikbeyokaʾ Betsaida heikek byik. Anedya alda sikeneblaboka sikbeyokaʾ anyegan ulumek. 11Bok nimi nauba ara byikaʾ anyek ella uboka, sikbabya Yesus ak dobdo byik. Dara Yesus adya sikenek pe youlum aboka, Imik Neyung adya hekaʾ huboka wenelemnesilaʾ anyek neklesuk. Dara onoʾ hnonda sik gangganek sam nimi nauba neiknaʾ anasa hwebnamen ubnanya nera hweboka meiriyisuk.

12Wera sin dangoka inin salek oka dok dara, Yesus adya yuba doro diriga ban nang era, alak yeiniboka lebekja, ”Neyung o, anyaganera gakdenaʾ sokok anasa, sikda ok anyan mek-mek heik pik biniboka e denaʾ eboka mabnokaʾ aboka orugeisilom,” hyek. 13Bok Yesus adya lebok ara, ”Ugunja sikenek denaʾ eleganalum,” hyok. Anasa alja yuba doro diriga ban nang edya dara, ”Nuk ara gwanenga lambadya ok uboka, hadyaʾ ara penyok ulumla. Nunda ban nimi mandebnaʾ danasa gwanenga heikek dekel binisibya danyek goma?” hyek. 14(Anyaganera nengmab ok anyek denga yubaʾ lambadya nang (lima ribu orang) ulumek.) Yesus adya alja yuba diriga ban nang ek, ”Ban nimi danara nimi buma yok-yok sunuwoka buklulum aboka orugosululum. Hnonok oulyang era denga penya uboka buknelum aboka orugosululum,” hyok. 15Dara alja yuba doro diriga ban nang era, Yesus adya sikenek wenyalasuk dara, nidyaʾ sunuwoka unuwek. 16Dara Yesus ara gwaneng ab hadyaʾ danyeb dara doboka, imik keeboka Imik Neyung ak perob aboka molowok. Seleb molobgogowok dara, gwaneng ab hadyaʾ ab dara, Yesus adya seleb sob menegemok dara, alja yuba doro diriga ban nang ek, nimi bukumek nimi nidyaʾ ak boknesulum aboka elegosuk. 17Wera nimi mandebnaʾ dara delemekaʾ ara, mona bukusuk. Dara Yesus adya yuba doro diriga ban nang era, deregoka bok lobeknya nera sor serrem obadya mamagoka kiblomek.

Petrus Bedya Yesus Ak Anda Imik Neyung Me Hyok Yuba

(Mat. 16:13-19; Mrk. 8:27-29)

18Wera onoʾ yok sum enyek, Yesus ara albeyokaʾ heng uboka mololemok dara, alja yuba doro diriga ban nang era alak yeilimek. Danyek Yesus adya sikenek, ”Nim adya dara, nara heknya alanyak do?” wenyaboka heibsuk. 19#Mat. 14:1-2; Mrk. 6:14-15; Luk. 9:7-8Danyek sikja lebnemekaʾ ara, ”Hnonda lelenjakja, Yohanes Pembaptis, alanjak. Hnonda, Elia benyaʾ, alanjak. Anya hnon nim edya dara, youmaʾ ununumnaʾ lelemek nang danyek ben hnon seleb embengaʾ suboka bukok alanjak,” hyek. 20#Yoh. 6:68-69Bok Yesus ara sikenek, ”Ugun nong adya dara, nara heknya senelenulum do?” aboka heibsuk. Danyek Petrus bedya dara, ”Neyung, anda Kristus, Imik Neyung adyaʾ nimi blebsinaʾ dubnya, ululam,” hyok. 21Dara Yesus adya alja yuba doro diriga ban nang ek lebsukaʾ ara, ”Ban yub era yok nim ek salyaʾ nekdo banaʾ ara mem,” husuk.

Yesus Ara Gwekoka Somoganamokaʾ Amba Mennya Lebok Yuba

(Mat. 16:21-28; Mrk. 8:31–9:1)

22Anya Yesus ara lebokja, ”Nimi dibaʾ me ara, nauba gweknamlaʾ ara, Yahudi dub nang eb, Imik Neyung yuba wa gakaʾ dub nang eb, yuba neksin nang eb dadya, malya nenewanamak. Alda hyakaʾ obnemak bok, winilinya sum yenewalya dara, onoʾ embengaʾ subnamla,” hyok.

23 # Mat. 10:38; Luk. 14:27 Dara alda sik nidyaʾ ak, ”Nak diriga yanalenya bera, alak perob danamsoʾ digum ara loboka, li sobaʾ aljaʾ igin yakaʾ doboka, nak diriga yalanulul. 24#Mat. 10:39; Luk. 17:33; Yoh. 12:25Anasa wera, alja nong enyek, blebdanamna senelelanya bera, alda nong era weiningganamla. Bok, wenyek alja nong era, nasamba leboka bologoldalalanya bera, eimik era blebdanamla. 25Nimi ben hnon sokok ulumlaʾ nidyaʾ ara aljaʾ ok dangasobok, al nong anyek malyaʾ nenewoka denghenemso dara, alak perobaʾ digum ara hekaʾ ak dangal binimso do? 26Nimi ben hnon nadya lelemna yub eb, nasamba danyek laga lenaʾ ara alya anasa lolonelnya bera, nimi dibaʾ me yanamla sum era, Imik Neyung Wenelesilnya bedya migib eb, geisa ulumak lero nang eb senenggomaʾ yanamak sum era, nababya alya anasa, benyek albabya alja si laga lenaʾ lobnamna. 27Nara ugunuk lebnesin, Ugun ban ublum nang enera, hnonda Imik Neyung adya wenelemnesilaʾ eibnenggumeija bok dara, somoganggunulum nanga hnon ululum,” hyok.

Yesus Ara Yok So Dangamok Yuba

(Mat. 17:1-8; Mrk. 9:2-8)

28 # 2Ptr. 1:17-18 Yesus ara ban yuba dan wenyaboka neksuk salek era, minggu hnonok so seleb mabok dara, onoʾ alda Petrus beb Yohanes beb Yakobus beb yok meinik sam heng uboka molowanobaʾ aboka bo welesuk. 29Wera Yesus ara mein enyek an heng uboka mololomok dara, alja hogung era yoka dangoka, alja boksom era hyak geisa nongaʾ anyek dangamok. 30-31Wene sab-sab enyek, nimi penya nang ara Musa beb, Eli beb, imik heikek ab dilinaʾ yeboka, warak loboka, sikda laga goboka sekdek. Dara sikda Yesus anyek mek anam Yerusalem heikek ab ura somoganamok yub enyek, neikaʾ salamek. 32Ban salek era, Petrus beb alja hemyabo penya nang eb dara, hogunga mamek bok, onoʾ wene salek gaawoka bukumek dara, sikda Yesus ara senenggom migib senedyaʾ edya warak loboka, alda nimi penya nang eb seklemekaʾ ak eibek. 33Wera penya nang dara, Yesus ak loboka sikda barek dara, Petrus bedya Yesus ak, ”Neklesilimnya o, nunda anyagan ulumabaʾ ara hyak pemab. Nunda anyagan ara lubna e winilya, hnonda neyung ansamba, hnonda Musa bemba, hnonnya nera Eli bemba sobnemab,” hyok. (Petrus bera ban wenhyoknya nera alja lelemokaʾ ara damok ara anyek lebnamnaʾ elgom bok salyaʾ lebok.)

34Petrus bera wenyaro anam yuba salamok salek enyek, debaʾ buma hnon lo yingginiboka, sikenek siklewosuk dara, sikda hyak loka dabsuk. 35#Yes. 42:1; Mat. 3:17, 12:18; Mrk. 1:11; Luk. 3:22Wera ban debaʾ enyek anyeb yuba sabnemokaʾ ara, ”Nadya weboka domsa me nera ban e. Alak ok pe keblulum,” hyok. 36Wera yub era seleb saro dakdowok dara, sikja dara, anyagan ara Yesus ok albeyok ulumokaʾ ak eiyimek. Yesus aljaʾ winilya yuba lenaʾ gak nang era, sikda yuba sanaʾ loboka, gelegemek, dara onoʾ ban salek enyek, sikja eiyimekaʾ ara, yok nim ek unu eiyimab aboka, nekdo yibinggumek.

Bisaʾ Gologomok Me Nek Hwebok Yuba

(Mat. 17:14-18; Mrk. 9:14-27)

37Ampum soʾ gwelegok dara, Yesus ab aljaʾ winilya yuba lenaʾ gak nang eb dara, meinik abaʾ ara yanggalamek enyek, nimi nauba Yesus ak yalamek. 38Nimi hnoum ab nengmabo ben hnonja Yesus ak bii aboka lelemokaʾ ara, ”Neklesilimnya o, nadya me nenyek arawoka kendenelom e. Alda nadyaʾ hnonok me nong ek bar! 39Wera bisaʾ anyek gologol yanggan dara, ngoluknaʾ yuba leboka, alja nong era bonggeiling-bonggeiling aboka gwekoka, sibamaʾ ara bol gamalaʾ youlul-youlul alamla. Bisaʾ ganya ara alak saboka oboka, goboka banaʾ ara lek senelamla. 40Nara anja yuba doro diriga yalanjak nang ek, na me hwebnenulum aboka molowasa bok, sikda hwebnamenggom anasa lorob,” hyok. 41Yesus adya sikenek lebnesukaʾ ara, ”Ugunda hyak dong dang anaʾ nong anyek, dib senenaʾ loboka salyaʾ ululum ba! Ugunda nauba meknewoka, onoʾ dib senenggululum nang ek ululum. Nara hwer salek ek ugunub goʾ ganya daklinggoka ulumnamab do? Me damnya bek, me nera nak an bo yalom,” hyok.

42Me nera Yesus ak bo yanggok enyek, bisaʾ gologomokaʾ ganya era, alak somora bobogoka nong ara bonggeiling-bonggeiling aboka gweklemok. Bok Yesus adya bisaʾ era goboka bilom aboka orugookanya, wera me nera merewok. Dara me nera Yesus adya eili bek saaboka lebok. 43Nimi nidyaʾ ara, Imik Neyung adya senenggom migib unulamlaʾ anyek eiyimek dara, hyak lok ganya bomek.

Yesus Ara Somoganamokaʾ Amba Hnonnya Lebok Yuba

(Mat. 17:22-23; Mrk. 9:30-32)

Nimi nauba ara, Yesus adya lok so unulumokaʾ anyek eiyiboka, anam lok ganya boboka ulumek salek, Yesus adya alja yuba doro diriga ban nang ek lebokaʾ ara, 44”Ban nadya lebnamna yub enyek, ugunda hiliknaʾ loboka pe bekmoubnelum, Nimi dibaʾ me ara eimik doboka nimi migib lomok eleganamak,” hyok. 45Bok Yesus yuba doro diriga ban nang edya dara, Yesus adya wenhyok yuba damok era, anasa lebla senewoka ella danggumek. Sikenek dara, ganya onga lesuk. Bok onoʾ sikjaʾ anaba Yesus ak hekaʾ ak leblam aboka heinaʾ ara lok anasa, lobek.

Heknyek Naubenya Ulumla Aboka Heibdek Yuba

(Mat. 18:1-5; Mrk. 9:33-37)

46 # Luk. 22:24 Yesus alja yuba lenaʾ gak nang edya dara, heknya ek nu gangganek ara senenggom so ulumla do aboka waldanaʾ lanawek. 47Yesus adya sikja ban wen senen ganya bomekaʾ ak eibsuk dara, alda me hnon doboka aljaʾ saramek sam sekiyiwok. 48#Mat. 10:40; Luk. 10:16; Yoh. 13:20Anya onoʾ sikenek, ”Heknedya nadya si, nasamba leboka banaso me nenyek dolomla dara, alda nak dolonel. Wera nak dolonelnya bera, alda na bokol yeilinyoknya bek dolomla. Anasa wera, ugun gangganek anyek hyak mek sonya ululanya benyek alda senenggom so ulumla,” hyok.

Lek Senenaʾ Orok Nang Ugunuk Mala Dolosak Yuba

(Mrk. 9:38-40)

49Yohanes bedya Yesus ak, ”Neyung o, nimi ben hnon alda nuk makoka unggulumabjok, alda anja si sibuka bisaʾ yaklamlaʾ anasa, Mem loblom, amna,” hyok. 50Danyek Yesus adya Yohanes bek hnon yok alja yuba doro diriga ban nang ek ara, ”Ugunda alak mem anaʾ ara mem.” Alda anasa wera, ”Ugunuk lek anggulusak nim era, sikda ugunuk mala dolosak nim era an,” hyok.

Samaria Heik Ab Yesus Ak Donaʾ Lek Hyek Yuba

51Yesus ara imik do welewanamok salek oka dokaʾ eibuk dara, nara wera Yerusalem heikek hyak binimna aboka gegewok. 52Dara wera, alja nimi hnon ugunda men bililulum aboka orugosuk. Wera orugosuk nang era sikda men biniboka, Samaria sokok sam yok heikek biniboka, Yesus amba yokaʾ-yokaʾ meewoka beibnemab aboka ubek. 53Bok Yesus ara laga Yerusalem heikek balamokaʾ anyek eiyiboka, heik enyegan nim edya dara, Yesus ak nunjaʾ heikek yalom aboka dobnenggumek. 54#2Raj. 1:9-16Dara Yesus alja yuba doro diriga balarek nang, Yohanes beb Petrus beb dadya, ban ganya en bomekaʾ eibdek nang edya dara, ”Wenelesilimnya o, Wenelesilimnya anda perob senemen dara, imik ab nim enyek nidyaʾ uk adya doblinggoka oblulaʾ aboka molowananam goma?” herek. 55Danyek Yesus adya sikenek sam saaboka wabsuk. 56Ban nen seleb dara, sikda yok heikek don byik.

Yesus Adya Diriga Ban Nang Dangalamak Yuba

(Mat. 8:19-22)

57Wera Yesus ab alja yuba doro diriga ban nang era pikek anam balamek dara, nimi ben hnon Yesus ak yeiniboka, ”Neyung o, anda hek mok ok binimenaʾ nidyaʾ ara, nara al anab neikaʾ ok yabalemnenam,” hyok. 58Yesus adya alak saaboka lebnemok dara, ”Wining ara e solomla, soko manaʾ ara oulyanga yak bok, nimi dibaʾ me nera man ekla era unggulumla,” hyok. 59Dara onoʾ Yesus ara yoknya bek hnon lebokaʾ ara, ”Anda nak diriga yanelom,” hyok. Bok benedya Yesus ak lebokja, ”Neyung o, nadya neyung be somogamlaʾ anyek soko lokol binimnaʾ anasa, men or henemen bok,” hyok. 60Danyek Yesus adya lebnemokaʾ ara, ”Nimi somoklomak nim era, sik dam nang soko lokol dalanok, alda anda Imik Neyung ara hekaʾ huboka wenelemnesilaʾ anyek, yok-yok moka bo lel elegel binilam,” hyok. 61#1Raj. 19:20Nimi ben hnon onoʾ Yesus ak yeiniboka lebokaʾ ara, ”Neyung o, nara anak diriga yalamnenggen bok, men nadya nauba nim ek molol binimnaʾ anasa, or henenelem,” hyok. 62Danyek Yesus adya benyek an lebnemokaʾ ara, ”Nimi ben hnon wa wel einileladyok, youmaʾ wenanya nek sobaʾ saaboka kemel samalamla dara, bera Imik Neyung wa pe wenya danggunumla,” hyok.

Currently Selected:

LUKAS 9: LAINLC

Highlight

Copy