LUKAS 17

Nimi Malya Ul Eleklesilaʾ Yuba

(Mat. 18:6-7, 21-22; Mrk. 9:42)

1Yesus adya alja yuba doro diriga ban nang ek, ”Nim ek malya ul eleksinaʾ ara sob ulumnamla. Bok malya ub eleganesilnya be nong anyek, hyak omomaʾ ak ulumla! 2Yokaʾ gwablemak girik edya ngang ak geregoka mek ek al nonga boboganeseng dara perob. Hnon yok me nenyek benedya malya unaʾ ub elegalyaʾ anyek, omom nonga dalyek. 3#Mat. 18:15Anasa ugunda pe keeboka diri uldalalulum!”

”Anja hembe malya ublya dara, alak omoma leblom. Wenyek alda ganya dangawalya dara, danyek or meebdanarum. 4Alda neik sum enyek, lika sekbadya so anak malya ubgelyekanya, alja anak sobaʾ yeiniboka nara aldib malya ubgen aboka laga lebgelya dara, wera anda alak sobaʾ meebdanarum,” hyok.

Yub Ak Ganya Ologoka Dib Senelemak Yuba

5Yuba lenaʾ gak nang edya Wenelesilnya Yesus ak, ”Wenelesilimnya o, nunja dib senenaʾ anyek, gasa nenewoka migibaʾ gebsilom,” hyek. 6Danyek Wenelesilnya bedya sikenek lebsukaʾ ara, ”Ugunja dib senewoka ganya oloknaʾ anyek geibya dok anaso dara, nginya gal ak lebnesomja, dama deleboka mek gwan dubuk sam meldal bilom, henesom dara, wera gal eneba ugunja yuba keboka unuwanamso,” hyok.

Wa Welenanya Bedya Unulamla Yuba

7”Ugun gangganek sam nimi ben hnon wa dubnya uboka, alja wa wenya gom, pam beilinanya yaknya bek ulumso dara, bera wa welemsoʾ ara, anam wak abaʾ sekel yanggaso enyek, wa dubnya bedya, del yanggalom, henemso de? 8Orok wenyhenggunumso! Alda wa dubnya bedya wa wenya bek ara, nadya denaʾ meewoka beibnenelem. Yok akleng ongowoka, na anam gwaneng ab mek ab delemnya salek era, diri seklenemnaʾ ara debgogowanya dara, wera anda or denelam, henemso. 9Wa dubnya bedya dara, alja orugamsoʾ anyek keboka unumsoʾ anasa, perob aboka nauba gibnamso de? Orok. 10Ugumba anaso neikek. Ugunuk nidyaʾ unulululum aboka orugosuknya nenyek unulumun dara, ban nenyek lebnelum, nunda wa oruksin nang enyaʾ, nunda nunja webnesibya wa nok wero ulumab, henelum,” hyok.

Yesus Ara Nimi Sagobadya Nang Hwebsuk Yuba

11Yesus ara Yerusalem heikek anam balamokok ab dara, alda Galilea mok eb uboka Samaria moka wiknebaʾ pik uboka balamok. 12Wera yok heikek byuk enyek, nimi sagobadya nanga gororomaʾ adya malya uro delesukaʾ anyek, Yesus ak yek. Sikda mok ab sekoka, 13lelemekja, ”Neyung, Yesus o! Nuk angoo yadyek seneweisilom e!” alamek.

14 # Im. 14:1-32 Wera Yesus adya sikenek eibsuk dara, ”Ugunda Yahudi yuba gak nang ek, ugunja nong enyek amaldal binilum!” hyok. Wera anam pikek balamek salek enyek, sikenek delesuk gororomaʾ era seleb denghusuk. 15Dara nimi ben hnonjok, alda seleb merewan senewoka ella ubdok dara, bera saaboka Imik Neyung nauba gibgiga Yesus ak nekel yeilimok. 16Dara Yesus saram nong ok hogung dib malyingginiboka, Yesus ak perob aboka gimok. (Ban unuwoknya bera Samarianya bedya unumok.)

17Danyek Yesus adya, ”Nimi sagobadya nang hwebnenggumna de? Soubnabadya nang era hanyagar ulumak do? 18Hekasa ban sekel yangganya benyek ok, lo saaboka nak perob aboka gibel yanel do?” hyok. 19Dara onoʾ Yesus adya gibel yoknya bek an, ”Anda sekmenekanya bilom. Anda nak dib senewanelemaʾ adya, anda seleb merelam,” hyok.

Imik Neyung Dubnya Uboka Wenelemnesil Yuba

(Mat. 24:23-28, 37-41)

20Parisi nang wene nang Yesus ak Imik Neyung adya hwer salek yeiniboka, wenelemnesil aboka heibek. Wenyek Yesus adya dara, ”Imik Neyung adya wenelemnesilaʾ ara, beknaʾ ulumlaʾ damok ara, nim adya laga beknaʾ eilinggulumak. 21Imik Neyung adya seleb ugun lomok an wenelesil bok anasa, nim adya dara, alda ban ulumlaʾ anyek kemel yoululum! Goma, alda ono sam ulumla! aboka alja wenelesilaʾ ak lebnenggunumak,” hyok.

22Ban wenyabgogowok dara, Yesus ara alja yuba doro diriga ban nang ek, ”Eimik era, nimi dibaʾ me nedyaʾ perob sum lika hnonok ok yanamso henelum bok, ugunda heng eibnenggunulum. 23Eimik era nim adya ugunuk wenyhenesak, kendululum, alda anyagan ulumla! Goma, alda ono sam ulumla! henesak. Bok ugunda kendenobaʾ aboka goboka el yabanaʾ ara hyak mem. 24Nimi dibaʾ me yanamla sum era, ebnaʾ ara imik ab langam henekanya, mok soko gokgobok nidyaʾ yeblamla sok, unuwanamla. 25Bok men dara, wen ulumak nim edya nimi dibaʾ me donaʾ loboka, alda igina kweboka nauba gweknamla.

26 # Kej. 6:5-8 Nimi dibaʾ me yanamla sum era, Nuh ulumok salek ek ulumek sok diligaʾ danamla. 27#Kej. 7:6-24Ban salek era, nimi nidyaʾ ara gwanenga meka deregoka, gela dobdangoka, al nenyek ok unuro ulumekaʾ ara, Nuh bera mek ekla bunaʾ ak wekel yabok sum era, sikda nidyaʾ ara mek adya dengaboka obsuk. 28#Kej. 18:20–19:25Onoʾ Lod be ulumok salek era, neik so unulumek. Nimi nidyaʾ ara gwanenga meka deregoka, deknaʾ dekoka bobdangdo, masa meewoka, e soboka ulumek. 29Bok Lod bera Sodom heikek abaʾ ara goboka bok dara, ban sum enyek nimi nidyaʾ ak uk ab poba girik ab dadya doublinggoka obsuk.

30Nimi dibaʾ me yanamla sum era, neik so unuwanamla. 31#Mat. 24:17-18; Mrk. 13:15-16Ban unuwanamla sum era, nim e weilik sam buru yabalemeija nang era, e lomok sam bonaʾ beiyimeijaʾ ulumlyaʾ anyek, dobnamna bar aboka weknenggunumak. Anasonya beiyek wak sam ulumeija nim era ek sam saaboka yanggunumak. 32#Kej. 19:26Lod alaʾ gel ak umokaʾ anyek ugunda pe beknelum! 33#Mat. 10:39, 16:25; Mrk. 8:35; Luk. 9:24; Yoh. 12:25Nadya nonga hyak pe blebdonun senelemak nim era, sikda weiningdanamak. Bok sik weiningdanamak nim era, sik nonga blebdanamak. 34Ban sum era, inimnek nimi penya nimi neikaʾ ak marija bok, ben hnonda dobnamla dara, ben hnonda lobnamlaʾ anyek, ugunuk dib lebsin. 35Gelewa penya gandum gwablerija bok, gela hnonda dobnamla dara, gela hnonda lobnamla. 36Nengmabo penya nang neikaʾ wa welerija dara, ben hnonda dobnamla dara, ben hnonda lobnamla,” hyok. 37Yesus alja yuba doro diriga ban nang edya, ”Wenelesilimnya o, ban ara hanyagareb unuwanamla do?” hyek. Dara Yesus adya lebokaʾ ara, ”Hanyagarek blonaʾ yakaʾ ulumla dara, anyagan ara songaʾ den wining ulumla,” hyok.

Currently Selected:

LUKAS 17: LAINLC

Highlight

Copy