LUKAS 18

Me Yougel Geb Yana Lelesinya Beb Sunuwok Yuba

1Ban nen wenyaboka lebgogowok dara, Yesus ara alja yuba doro diriga ban nang ek, sikda ganya mounduk-mounduk anaʾ loboka sobaʾ heng uboka mololenokaʾ aboka, yokaʾ ak sunuwoka neksuk. 2Anya Yesus adya dara, ”Nauba heikek hnon, nimi yana lelesinaʾ dubnya ben hnon alda Imik Neyung ak lok ganya bonaʾ oroknya bek ulumookanya, nim ek anaba perobaʾ leboka unggulusuk. 3Dara onoʾ al neik heikek ara, yougel ge hnon ulumookanya, nimi yana lelesinaʾ dubnya bek an sobaʾ balamok. Yougel gedya dara, nadya isaʾ nang eb yuba garabdananamaʾ anasa, anda nak arawananelom, hyok. 4Men salek yana lelesinaʾ dubnya bedya dara, arawanggunumna senewoka lomok. Bok eimik era, alda seiniwokaʾ ara, Imik Neyung ak lok unggulumna, nim ek anaba perobaʾ lenggulusin bok, 5ban yougel genera nak an lobaʾ nenel yalanelaʾ anasa, wera yuba garanaʾ dibaʾ alak igina kweiyirobaʾ ara meewoka lelewanamna. Anyek unuwanggunumna dara, gel gera nak yeindibigamlyakanya, nak lobaʾ nenewanelyek senewok,” hyok.

6Dara onoʾ Wenelesilnya bedya lebokaʾ ara, ”Pe ununaʾ orokaʾ yana lelesinya bedya lebokaʾ anyek ugunda pe kendululum! 7Anasa wera, Imik Neyung ara alja mabo silibaʾ edya inimnek yubyek pik arawoka mala dobnesilim alamaknya nek ara, mala dobnenggunususo de? Imik Neyung adya sikenek sum enyek arawanasin aboka, gokgiga binimso de? 8Imik Neyung ara sikenek mala doboka arawanasilaʾ anyek ugunda dib senewanalum! Bok nimi dibaʾ me yanggalya sum era, alak dib senemeija nim era, anyagan sokok anam ulumeijaʾ ak eibnesil gom, orok gom,” hyok.

Rupiah Donya Beb Parisinya Beb Sunuwok Yuba

9Onoʾ hnon, nimi ganya adya dara, yok nang era malya so nang senen bok, sik dam nang dara, alan seleb pe ulumab senelemek nang emba sunuwoka lebsukaʾ ara, 10”Nimi penya nang heng uboka molowanomaʾ aboka Imik Neyung ek sam bilirek. Nimi ben hnonda Parisi nang dara, ben hnonda mok soko amba rupiah molowoka dolosuknya bek bilirek. 11Dara Parisinya bera albeyok sekoka lero mololemokja, Wei Imik Neyung o, nara yok nang ulumak sokaʾ ak unggulumna, nara hokaʾ donggulunanya, nara gununggulunanya, nara gela salyaʾ salenggulunanya, anasa anak perob aboka gibgen. Nara ban rupiah mok soko amba mololanya benesoʾ ak unggulumnaʾ anasemba, perob aboka gibgen. 12Nara minggu hnonok ansamba lika penya gwanenga lobsiniwoka giblenggen, nadya nidyaʾ dolomnaʾ ulumlaʾ ara, bokoka darasam sagonya nera ansamba bo beil yalenggen, alamok. 13Bok mok soko amba rupiah molowoka dolomoknya bera, alda mok sam sekoka, imik sam kemel weiningnaʾ anaba loboka, saraʾ sibuka obdangoka lero mololemokja, Wei Imik Neyung o, nak malya unaʾanya bek an angoo yadyek senewoka arawanelom e, aboka mololemok,” hyok.

14 # Mat. 23:12; Luk. 14:11 Onoʾ Yesus adya lebokaʾ ara, ”Anasa ban lebsin, Ban penya nang dara, sikjaʾ ek seleb birik dara, Parisinya bera loboka, alda mok soko amba rupiah molonanya benyek, Imik Neyung adya pemnaʾ gebok. Anasa nimi nidyaʾ imik neneldalamak nang era, sokok nenewanasilikanya, ganya sokok nenebdangoka ulumak nang enyek, imik nenewanasil,” hyok.

Yesus Ara Mekmab Ek Perobaʾ Onowosuk Yuba

(Mat. 19:13-15; Mrk. 10:13-16)

15Nimi nauba sikja moum den mab eneba, soruka salawoka perobaʾ onowosululaʾ aboka, memabo Yesus ak bo yeilimek. Dara, Yesus alja yuba doro diriga ban nang edya anyek eibek dara, memabo bo yeilimek nang ek wabsik. 16Bok Yesus adya dara, mabo danyek nak an yoululum aboka, alja yuba doro diriga ban nang ek, ”Malye, mabo danara, nak an or yanok! Ban unurub so nang enyek, Imik Neyung wenesin heikek weknemak nim era an anasa, sikenek ara nak yangganaʾ mem asinggom, mem. 17Mek sirik mabo yokaʾ-yokaʾ dolomak sok, Imik Neyung wenesin heik era dobnenggunumak nim era, eimik era Imik Neyung wenesin heikek weknenggunumak, ugunda pe beknelum,” hyok.

Dub Nim Emba Lebok Yuba

(Mat. 19:16-30; Mrk. 10:17-31)

18Yahudi nang dubnya ben hnonja Yesus ak, ”Neyung, perob neklesilimnya o, nara hekaʾ ak hubnyaʾ adya dib embengaʾ unaʾ ara dobnamna do?” aboka heibuk. 19Dara onoʾ Yesus adya benyek saaboka, ”Anda hekasa nak ara perobnya henelem do? Nimi hnon perobaʾ ak unaʾ ara orok bok, Imik Neyung ak hnonok alak ok perobnya bek ulumla. 20#Kel. 20:12-16; Ul. 5:16-20Anda Imik Neyung adya oruknaʾ yuba momnya dobokaʾ ara seleb ella ululamaʾ ara, gela salyaʾ salenggom, nimi salyaʾ onggom, hokaʾ donggom mem, sondaʾ yuba salyaʾ lenggom, anya anjaʾ genonga neyung ak pe gibel dololom,” hyok.

21Danyek benedya, ”Ban yuba danara, nara mekewek moruwoka unulamna,” hyok. 22Yesus ara ban nenyek kebok dara, alja lebnemokaʾ ara, ”Hyak hnonok anam or anaso unuwanalamaʾ ara, anja bonaʾ nidyaʾ ara dekoka rupiah dobmen dara, rupiah era bonaʾ garan ulumak nim ek boknesilim. Dara anda imik heikek ulumla bonaʾ enyek dobnelam. Ban unubgogowamen dara, anda nak diriga yananelem,” hyok. 23Dubnya bera ban yub en kebok dara, alda hyak bonaʾ dubnya ulumokaʾ anasa, nauba igin ganya bobok. 24Dara, Yesus ara ban bera bonaʾ dub adya hyak igin ganya bobokaʾ ak eibuk dara, alja lebokaʾ ara, ”Bonaʾ dub nim era, Imik Neyung wenesin heikek weknaʾ ara, hyak okna! 25Nim abaksin pam era, imir lomok pik ara or weknamso bok, bonaʾ dub nim enyek, Imik Neyung bedya heikek sam wekna dara, hyak okna nong,” hyok.

26Wera Yesus adya wenyalamokaʾ anyek, anyagan ulumek nim edya kebek dara, sikja, ”Ban anaso wenyalalam dara, wera hek nim ek blebnamla do?” aboka heibek. 27Danyek Yesus adya dara, ”Nim adya ununaʾ oknanya neneba, Imik Neyung alak ok hnonok or unulamla!” hyok.

28Danyek wera Petrus bedya Yesus ak, ”Neyung o, kendelom! Nunda nauba nimi gelewa mabo loboka anak diriga yeilinjuba,” hyok. 29Anasa Yesus adya dara, ”Ugunda ban nong anyek dib senewanalum! Nimi hnon alja e nek gom, alja gel gek gom, alja weisab ek gom, alja genong gek gom, alja mab ek gom, Imik Neyung wenesinaʾ amba leboka, lo yalamla dara, 30ban unuwalenya bek ara, wene salek ek dara, yokaʾ-yokaʾ nauba lunuwoka doboka eleganemlakanya, eimik era dib embengaʾ ulmoubnaʾ damok eleganamla,” hyok.

Yesus Ara Winilinya Sum Suboka Buknamna Abdok Yuba

(Mat. 20:17-19; Mrk. 10:32-34)

31Yesus ara alja yuba doro diriga ban nang ek sikbeyokaʾ ak mamagiyiwoka lebsukaʾ ara, ”Ugunda pe keblulum! Nunda wenera Yerusalem heikek balamab. Dara, Yerusalem heikek ab dara, ununumnaʾ lelemek nang edya nimi dibaʾ me nemba leboka momnya dorobaʾ nidyaʾ ara, gigiwoka unuwanamla. 32Nimi dibaʾ me nera alda doboka Yahudi gom nim ek eleganamak dara, wera alak lobaʾ nenewoka derewoka waboka, gamalaʾ solol golulumnemak. Dara ban nang edya alak nauba malya uboka oboka dibnemak dara, 33lika winilinya sum era, alda embengaʾ suboka buknamla,” hyok.

34Ban nidyaʾ wenyalamokaʾ ara, Yesus alja yuba doro diriga ban nang edya dara, mekaʾ sibin anaba hnon damok ara anyek lelemla senewoka ella danggumek. Ban lelemok yuba damok era, doknonanya nenesokaʾ ak ulusuk. Anadya sikda alja lelemok yuba damok era, anyek lelemla ara elgom ulumek.

Heng Lumnya Mololdo Bulumokaʾ Ak Hwebok Yuba

(Mat. 20:29-34; Mrk. 10:46-52)

35Yesus ara Yerikho heikek wekel bununaʾ aboka ok berem bok dara, anyagan ara nimi ben hnon heng umoknya pik gek sam mololdo bulumok. 36Benedya al bulumok pik era nimi nauba yabalamekaʾ ak kemok dara, ”Hekaʾ ak ulumlaʾ anasa do?” aboka heilisuk. 37Dara yok nim edya benyek an, ”Nazaret mok ebnya, Yesus anyek pik enyegan yabalamla,” hyek. 38Dara heng lumnya bedya dara bii aboka, ”Wei, Yesus o, Daud bedya me. Angoo nak yadyek senewanelom e!” aboka lelemok. 39Men mengemek nim edya dara, benyek nauba waboka yuba sanaʾ gelegalom aboka lelemek. Bok henga lumnya bedya dara, hyak nauba bii aboka, ”Daud bedya me o! Angoo nak yadyek senewanelom e!” aboka lelemok.

40Wera dara, Yesus ara balamokaʾ ara, sek loboka nim ek heng lumnya bera oka bo yoululum aboka orugosuk. Bera Yesus berem bo yek dara, Yesus adya alak heibuk, 41”Anda hekaʾ ak nadya ansamba unuwonulul senelam do?” aboka heibuk. Benedya dara, ”Neyung o, nara heng gwelegoka eibsinya senemna,” hyok. 42Dara Yesus adya dara, ”Anaso senelam dara, wera kendelom! Anda nak dib senenelemaʾ nong adya, wera anda seleb merewalam an,” hyok. 43Al wene salek enyek, bera seleb heng gwelegoka eibuk dara, alda Yesus ak diriga biniboka Imik Neyung ak hwebnelemaʾ perob aboka, giblemok. Nimi nidyaʾ ban unumokaʾ anyek eibek dara, sikda lok ganya boboka Imik Neyung ak perob aboka nauba giblemek.

Currently Selected:

LUKAS 18: LAINLC

Highlight

Copy