Luk 9

Khógów Jisas yó kem sfolò lewu

(Matyu 10:5-15; Mark 6:7-13)

1Sotu kdaw bè yó, gotu sentifun Jisas yó kem sfolò lewu gel lemolò du, ne wen kfasang blayen kul ne wen kwalis le hdó busaw ne hkó des. 2Ominen hógów kul mò na a hetngón yóm kogot Dwata tau, ne hlós lan le hkó des yó kem tau. 3Yó hlauhen kul, monen, “Béen abay wen nwit ye bè yóm kógów ye ni, balù tuged duhen ke bag duhen ke bnotu duhen ke filak. Balù kgal ye, bê ye abay hlewu nwit ye. 4Yó se gónô gónón wen hmódó kuy, yó se gónó ye mefet efet kól bè kulék ye gu bè yóm benwu yó. 5Ke wen tau menwu là hmódó kuy, tódô tnagak ye yóm benwu yó, olo ye tmótók yóm kfung bè ti ye mò ilô yóm angat ktafak Dwata kul.”

6Tahu se, lemwót le yó kem gel lemolò ke Jisas, ne tódô ket le tu kem benwu tmulón du bè kem tau yóm Tulón Hyu lemwót bè Dwata, ne hlós lan le gel hkó des snéen.

Kegbelen bè nawa Hirod yóm tehe kehfatayen ke Jan gel mabtays

(Matyu 14:1-12; Mark 6:14-29)

7Ngangen mból yóm gel nmò le Jisas efet gefet ebè Hirod, yóm gubérnor bè Galili. Bè yóm kungolen du, tey sbeweg kegnómen du, abay se sbol mon le deng bud mowil yóm Jan tehe mabtays. 8Ne yó mon kem dumu, deng bud semfulék yóm tehe Ilaydya. Ne bud mon kem dumu, deng wen bè yó kem gna tugod Dwata ekni bud mowil.

9Ne yó mon Hirod, “Blaem deng tehe heklengu liholen yóm Jan. Okóm tmau du yóm alì tulón le ni?” Hatan mkó nawahen ke deng tonen Jisas.

Kehken Jisas yó kem limu libu logi

(Matyu 14:13-21; Mark 6:30-44; Jan 6:1-14)

10Timbow le deng bud kól yó kem sfolò lewu tau hógów Jisas yó, gotu tulón le ke Jisas yó kem deng gendeng le. Ne omin Jisas mit kul hetsik són lu ditu bè yóm sotu benwu boluyen Bitsayda. 11Timbow glileb yó kem tey tau sbung yóm kógów le yó, gbót le kemtes huli se kul. Ne là se kem dog kenbê Jisas kul. Tulónen kul yóm kun kmò kogot tau Dwata, ne kóhen se yó kem gemnóm des bélê le. 12Tikóng deng móyón kimel, mógów le ebè Jisas yó kem sfolò lewu gel lemolò du, yó mon le mò du, “Nam na dók lu dé, ni kem tey tau ni anì na le e mebel ken le ne mebel gónó le tungô bè tu kem dumu benwu hmilol. Abay se là monihen bè tau nim benwu ni.”

13Okóm mom yó mon Jisas mò kul, “Tódô yu ne hemken kul.”

Bud mon le se, “Són nô bélê me bè ni, tek són limu botù mambang ne lewu tedek utón él. Yó kô kóyóem ke ne me e bemli ken bè ni kem tey genged tau ni?” 14Blaem wen dô limu libu logi bè yó.

Okóm mon Jisas mò yó kem gel lemolò du, monen, “Hyón ye lu dé ni kem tau ni, ket na limu folò kmò kesbung ye kul.” 15Ne tahu se, gotu le myón kdê le. 16Omin Jisas ma yóm limu botù mambang ne yóm lewu tedek utón él, ne nan temngel ebè longit, ne dóyónen Dwata, ominen kembéng yóm mambang ne yóm utón él, oguhen yó kem gel lemolò du anì sagid le ebè yó kem tau. 17Tahu se, gotu le mken yóm kdê le, ne gotu le se bsow. Tikóng deng kken le, gotu sentifun yó kem gel lemolò ke Jisas yóm lukas ken le. Botong sfolò lewu abì lukasen.

Kdilô Pitér ke Jisas yóm Misaya yóm deng kehkamal Dwata du yóm klamangen

(Matyu 16:13-19; Mark 8:27-29)

18Sotu kdaw bè yó, mni bè Dwata Jisas, tek sotuhen. Sut le béléen yó kem gel lemolò du. Ne wen snólók Jisas bélê le, monen, “Tedu de kmò kehedem le dou yó kem dumu tau?”

19Ne yó mon le, “Wen se mon du Jani kun, yóm tehe gel mabtays. Mon kem dumu, Ilaydyahi kun. Bud wen se mon du, deng wen bè yó kem gna tugod Dwata ekni deng bud mowil.”

20Ne mon Jisas se mò kul, “Kmò se kuy du? Tedu se kuy kmò kehedem dou du?”

Ne fen bnalà Pitér, monen, “Uu se yóm Misaya, yóm deng nélék Dwata.”

21Tey mget kmon Jisas du mò kul, “Hol bê ye abay tulón yóm mon ye yó.”

Tanay ktulón Jisas du kul yóm angat keglayamen ne katayen

(Matyu 16:21-28; Mark 8:31—9:1)

22Ne yó bud tulón Jisas kul, monen, “Nan na hol glayam he yóm Ngà Tau. Angat senkbê yó kem tuha gónó tekuy gel galak, ne yó kem tau hol geta gel demsù ebè Dwata, dalang se yó kem tau gel tmolok hlau. Ngang le mò du efet ghatay le. Okóm angat bud hlowil Dwata bè yóm getluhen kdaw.”

23Ne yó bud mon Jisas ebè yóm kdê le, “Ke wen tau móyô lemolò do, song hyu ke tódô tebelen yóm kun kóyô, ne eles tnihangen yóm kun kros ket haya, ominen yó lemolò do.#9:23 9:23 Yóm kros mon Jisas yó, hningónen yóm là klikò le matay bè yóm klolò le du.Yóm tau, ke knamaen klowilen, angat lana béléen yóm klowilen yó. Okóm yóm tau ke là knamaen du yóm klowilen lanen lemolò do, angat gutahen yóm klowil laen dù sónen. 24Yóm tau, ke knamaen klowilen, angat lana béléen yóm klowilen yó. Okóm yóm tau ke là knamaen du yóm klowilen lanen lemolò do, angat gutahen yóm klowil laen dù sónen. 25Anien he ke gotu gfun tau yóm klamangen benwu, laen kô ofolen du ke lana béléen yóm klowil laen dù sónen. 26Yóm tau ke mom hnalaen yóm kloloen do dalang se yóm gel toloku, angat hnalà yóm Ngà Tau se kun bè yóm bud kesfuléken edini na a mogot benwu. Bè yóm bud kesfuléken edini yó, angat gfan yóm kegetahen, ne yóm kun kegeta Maen, dalang se kul yó kem hógówen gu bè longit. 27Tódô tulónu kuy ktahuhen, wen he bélê ye gmafit mton du yóm kogot Dwata tau gu laan ye là deng matay.”

Kesfili kton le ke Jisas

(Matyu 17:1-8; Mark 9:2-8)

28Wen dô sotu fedyanen kogol yóm kmon Jisas du yóm yó koni, ominen mneged elem bulul nan e mni bè Dwata. Niten le Pitér, Jan ne Jim. 29Yóm igò Jisas tolo mni, tódô sfili kton le lem uyóhen, dalang se yóm nesen, gotu tódô sminang bukay. 30Wen lewu tau tódô na a hetnga stulón du, yóm tehe Musis ne yóm tehe Ilaydya. 31Tódô le sminang snéen kul. Yó sentulón le yóm móyón katay Jisas bè Jirusalim, yakà yó du hol lem yóm gónó Dwata hógów du ete tonok.

32Okóm ke Pitér ne yó kem dumuhen, deng le mom gotu henga tungô. Tikóng le dmemen, tódô ton le yóm tey sminang gu bè Jisas ne yó kem lewu tau sedà du. 33Timbow le skó ke Jisas yó kem lewu tau yó, hebkó mudél ebéléen Pitér, monen, “Tey hyu ni, Sér, deng me nô bè ni. Hdà me tlu lowig bè ni, sotu kóm, sotu ke Musis, ne sotu se ke Ilaydya.” Okóm là kô tngón Pitér du yóm monen yó. 34Yóm igò Pitér tolo mudél yó, tódô wen lobun holun eta le, ne gotu gnolungen lu, ngangen mò kul efet tódô lememek eta le. Ya tey klikò le du yóm lobun yó.

35Tódô gungol le se yóm mudél gu lemen, yó monen, “Ni se hol dou Ngà, yóm deng eles néléku. Hol gel hnungol ye.” 36Tikóng teflok yóm udélen yó, tek són Jisas dù ton le mdà bè yó. Bè yóm kmoen yó, laen kô dù tau gónó le tmulón du yóm deng ton le yó.

Hdó Jisas busaw yóm ngà wen malak du

(Matyu 17:14-18; Mark 9:14-27)

37Timbow hayahen bè yó, mulék le gu lem bulul le Jisas ne yó kem tlu tehe mung du, tey genged tau bud na a semmang du. 38Wen sotu tau tmaba du lemwót lem blóng ni kem tau sbung ni, monen, “Ó Sér, henkoduhu béléem, nam e tenngel dou yóm ngau logi. Blaem tek sónen ni ngau. 39Yó gónóhu hetngel du kóm, abay se wen busaw malak du. Sok gefet béléen, tódô gel kentohen lemangat, ne tódô gel hkengkel, ngangen efet mulok séléken, ne ngangen gel mò du efet deng tey kehsideken du, ne là géhélen mdó béléen. 40Denge hkodu bè yó kem gel lemolò kóm anì hdó le, okóm là gbek le du.”

41Mudél Jisas, monen, “Yu kem tau kmoen ni, alì ye hemda. Gel sekban yóm kehedem ye. Igoen deng tey kegenu nô lem blóng ye, ne tey kehlawihu nawahu bélê ye.” Omin Jisas mon du mò yóm mà yóm ngà yó, “Nitem edini sen yóm ngaem.” Tahu se, nwiten ebéléen. 42Yóm igoen mógów ebè Jisas yóm ngà, tódô sut béléen yóm busaw gel malak du, ne kento mugod se yóm ngà, ne tódô hkengkel. Okóm tódô hdó Jisas yóm busaw gel malak du yó, ne tódô bud hyu se yóm ngà yó. Mon Jisas mò ke maen, “Ni ngaem.” 43Ya tey ketnga le du yó kem tau yóm tey kfasang Dwata deng ton le.

Yóm gewu dulék Jisas eles tmulón yóm angat katayen

(Matyu 17:22-23; Mark 9:30-32)

Yóm igò le semftaw du yó kem tau yóm kdê gel nmò Jisas, yó bud mon Jisas ebè yó kem gel lemolò du, monen, 44“Hol bê ye abay klifót nim tulónu kuy ni. Angat blay le elem tdok yó kem tau mogot kukum yóm Ngà Tau.” 45Okóm yó kem gel lemolò du, là dog tngón le du gónón e temnef nim tulón Jisas kul ni. Là heglileb Dwata du kul lanen anì là tngón le du. Ne là se mlos le smólók du bè Jisas yóm kmò klanen yóm monen yó.

Yóm hol geta bè yó kem tau nogot Dwata

(Matyu 18:1-5; Mark 9:33-37)

46Sotu kdaw bè yó, wen gónó le segled yó kem tau gel lemolò ke Jisas. Yó sen-gled le ke mahil du bélê le yóm hol geta. 47Blaem deng sana tngón Jisas yóm kehedem le, yó gónón ma yóm sotu ngà, ne hdaen klohoken, 48ne monen mò kul, “Ke wen tau hmódó nim ngà nii mlan bè dou boluy, lómón ke ou yóm hnódóhen. Ne yóm hmódó do, lómón ke hnódóhen snéen tum hógów do. Yakà yóm alì heglaan bélê ye, yó se yóm hol geta.”

Yóm tau là hohonen tekuy, hono kut kwen

(Mark 9:38-40)

49Ne mudél se ke Jan kun, monen, “Ó Sér, wen tau ton me gbót hdó busaw hlanen bè boluyem. Okóm bnólów me, abay se là kut kwen du.”

50Okóm mon Jisas mò du, “Yake bê ye abay bnólów? Yóm tau là hnohonen tekuy, nfihen tekuy.”

Kekbê le ke Jisas bè yóm sotu benwu snakuf Samarya

51Timbow deng móyón moni yóm buteng Jisas bud mulék ebè longit, nan na hol nalu mógów ebè Jirusalim. 52Wen tau hógówen tukô gna mò fen mebel gónô mò gónó le mefet bè yóm sotu benwu snakuf Samarya. 53Okóm yó kem tau bè yó, là dog le móyô, yakà bè Jirusalim du yóm gónóhen e solu. 54Timbow tngón Jim ne Jan yóm là khódó le kul bè yó, mon le mò ke Jisas, “Ke móyói, Sér, mni me ofi gu bè longit anì gotu le meglà yó kem tau yó.” 55Mom beklil ebélê le Jisas, ne bnólówen lu. 56Ne tódô le hlós ebè yóm sotu benwu.

Yó kem tau tô lemolò ke Jisas

(Matyu 8:19-22)

57Yóm igò le mógów, wen tau mudél ebè Jisas, monen, “Ó Sér, lolou uu balù kihu gónóm e mógów.”

58Bnalà Jisas se, monen, “Wen kul lefunges yó kem bolos, ne wen se kul sala yó kem onuk lem bnes, okóm yóm Ngà Tau laen kô dù mdengen gónóhen hegnô.”

59Mudél Jisas ebè yóm sotu tau, monen mò du, “Ó Wè, loloem ou.”

Mom yó balaen ke Jisas, monen, “Naw na lebeng mà he, Sér, ominu yó lemolò kóm.”#9:59 Sotu lanen yóm udélen ebè Jisas yó, “Nan matay mà he, Sér, ominu lemolò kóm.”

60Mon Jisas se mò du, “Tódô angat hebengem tu he kem kun dumu là hemtahu yóm maem. Okóm yó kóm nmò, fen nam e hetngón bè kem tau yóm kogot Dwata tau.”

61Ne bud wen sotu tau mudél ebè Jisas, monen, “Angat lolou uu he dou, Sér, naw ne mbal ta he dé.”

62Ne yó mon Jisas mò du, monen, “Là kóen hyu bè yóm tau dmadu ke tlek bud tendo temdélé semfulék. Senged snéen,” monen, “bè yóm tau tô lemolò dou, là kóen hyu ke tlek bud tendo temdélé semfulék. Ke yó nmoen, laen dù muhen ke gmung bè yóm kogot Dwata tau.”

Currently Selected:

Luk 9: tbl

Highlight

Copy