Luk 8

Yó kem libun gel mung kul le Jisas

1Timbow kogolen bè yó, omin Jisas tódô hlós ebè yó kem dumu benwu lanen tmulón du yóm Tulón Hyu gbak ebè yóm kogot Dwata tau. Ne mung du yó kem sfolò lewu tau gel lemolò du. 2Ne wen se kem libun mung kul mò tmóbóng kul. Ni kem libun ni, deng gotu tehe hdó Jisas yó kem busaw malak kul, ne hkóhen bélê le snéen yó kem dumu des le. Sotu bélê le boluyen Midi, libun lemwót bè Magdala, botong hitu busaw tehe hdó Jisas béléen. 3Ne sotuhen, Juhana yehen Kusa, yóm tau bong glalen bè Hirod. Bud sotuhen, Susana ne tey wen he kem dumuhen. Lemwót bélê le yó kem mò tdof le kul le Jisas ne yó kem gel lemolò du.

Yóm hlingón bè yóm tau smohul

(Matyu 13:1-9; Mark 4:1-9)

4Ne le e gotu sguku ebè Jisas yó kem tey tau wen, kem tau lemwót bè yó kem dumu benwu hmilol. Wen hningón Jisas bélê le, monen, 5“Wen sotu tau nan e sohul bnéken bè dnaduhen. Bè yóm ksohulen du, wen se temsik ebè lan, ne gel gdà kem tau, ne gotu tnukô yó kem onuk koyu. 6Wen se sohulen gdek elem lusok botu. Tmowok le snéen, okóm hlóng menes, abay se là kóen héfê lem buten. 7Bud wen se sohulen gdek e talak yóm gónón wen kluon. Ne tmowok se, tódô mung senok bè yó kem kluon, ne tódô limes lem blóng le. 8Wen se sohulen gdek ebè gónón hyu tonok, ne tmowok le. Timbow gefet, tey mfól bungu le, ket na lematu bungu yóm sotuhen.” Omin Jisas bud mon du, “Yóm tau wen klinguhen, hol hmungol.”

Yóm mu yó kem hlingón

(Matyu 13:10-17; Mark 4:10-12)

9Snólók yó kem gel lemolò ke Jisas, mon le, “Gónón e temnef de, Sér, nim hningónem ni?” 10Bnalà Jisas se, monen, “Wen yóm là heglileb Dwata du bè kem dumu tau bè yóm kmò kogoten tau, okóm deng heglileben kuy. Bè yóm gel ktulónu du bè dumu tau, gel hningónu, abay se bè yóm kton le du, là kô dog dilô le du. Ne bè yóm kungol le du, là kô na le e glileb du.”#8:10 8:10 Isaya 6:9.

Tennef yóm tau smohul

(Matyu 13:18-23; Mark 4:13-20)

11“Ni sii,” mon Jisas, “tennefen yóm hlingón yó koni. Yó kem bnék sohul yóm tau yó, duhen yóm Udél Dwata. 12Yóm lan gónón e gdek yó kem dumu bnék sohulen, duhen yó kem tau hmungol yóm Udél Dwata, okóm tódô sut Seitan, mom nwahen bélê le yóm udél deng gungol le yó anì là dog le hemtahu, ne anì là gewà le lem salà le. 13Yóm lusok botu gónón e gdek yó kem dumu bnék sohulen yó, duhen yó kem tau hmungol du yóm Udél Dwata, ne tey le hligal bè yóm kehtahu le du, okóm là kóen dmolil. Tek likót le hemtahu. Timbow wen tilów mgel sut bélê le, gkogol le ne yóm kehtahu le. 14Ne yóm gónón mfól bnes semnual gónón e gdek yó kem dumu bnék sohulen yó, duhen yó se kem tau hmungol du yóm Udél Dwata, okóm tey dê lenóngón nawa le bè kendengen le ne tey dê kenbeyen nawa le ne deng le tódô limes là kóen dog tmuha kehtahu le. 15Yóm tonok hyu gónón e gdek yóm dumu bnék sohulen, duhen yó se kem tau hmungol du yóm Udél Dwata, ne tendo hnô le lem hendem le ne tódô henlel le se hemtahu du efet tey kbungu le.”

Yóm hlingón bè yóm solok

(Mark 4:21-25)

16Ne bud mon Jisas mò kul, monen, “Laen kô dù tau hemtom solok ke mom bud hnokoben, duhen ke mom suen bè gónón glilung. Okóm ke wen tau hemtom solok, tódô hyónen bè gónón mfatu anì ton le layagen yó kem tau husek. 17Yóm gebnos nim kmoen ni, angat gfan ne yóm gel gbuni nim kmoen ni, bud gfan elem hulin kdaw. 18Yó gónóm mon, hol ten-gama ye dé kmò khungol ye. Abay se yóm tau deng wen gwahen, angat tendo bud gel tennù Dwata béléen yóm gwahen yó. Okóm yóm tau là suen du lem hendemen yóm deng gungolen, balù yóm udì deng tehe gna tngónen, angat tódô bud kó Dwata béléen. Ofo kun hemdem du ke deng wen gwahen, okóm laen duen.”

Kebel le ke Jisas le yéen ne kem twolihen

(Matyu 12:46-50; Mark 3:31-35)

19Ne sut bè Jisas se yéen ne yó kem twolihen, són duen là kô le dog gehdulen ebéléen, abay se tey tau wen sembung du. 20Ne wen tau mon du mò ke Jisas, monen, “Tu dé yéem ne kem twolihem, mdà le ditu bè lewà, móyô le ston kóm kun.” 21Ne mom yó mon Jisas ebè yóm kdê le, monen, “Yó se tau hmungol yóm Udél Dwata ne mimón du, du se yéu ne kem twolihu.”

Keteflok Jisas yóm lenos bong

(Matyu 8:23-27; Mark 4:35-41)

22Sotu kdaw bè yó, motun elem ówóng Jisas, mung du yó kem gel lemolò du, ne monen mò kul, “Hlós tekuy ne efatu lanaw.” Ne tahu se, lemwót le. 23Yóm igò le mówóng, fen tungô ke Jisas. Nan e mbel te lanaw yóm tey lenos bong, ya tey kewóken, botong glem él yóm ówóng le ne tek udì duen gónó le tô lemneb.

24Ne bentik le Jisas, mon le, “Ó Sér, hatay tekuy ni.”

Ne hboluk btik se Jisas, ne tonen yóm tey lenos ne yóm tey lewók, ne tódô monen, “Botongen ne.” Ne tahu se, tódô sen-gengen se teflok yóm lenos, ne menek gu talak lanaw. 25Ne mon Jisas mò kul, “Na, nô se kehtahu ye béléu du?”

Ya tey ketnga le, lel le likò, sentulón le, mon le, “Tau du de mni? Tódô mudél ebè yóm lenos ne yóm lewók, ne tódô nimón le se.”

Kehdó Jisas yóm busaw nalak yóm tau

(Matyu 8:28-34; Mark 5:1-20)

26Ngang le mówóng le Jisas efet le dmuung bè kilil yóm benwu boluyen Girasa, benwu stimbang bè prubinsya Galili. 27Yóm kduung le bè yó, omin Jisas kmó ebè kilil. Ne wen sotu tau nalak busaw lemebet du lemwót bè yóm benwu yó. Deng tey legen ne là bud keseken nes nim tau ni, ne là se gel nô bè gónô. Són bè yó kem kilib gónó le gel lembeng gónóhen gel nô. 28Mung unihen mton ke Jisas, tódô hendlaen lemangat, ne hegluduk bè soluhen, ne hgelen udélen, monen, “Ó Jisas, uu se yóm Ngà Dwata, yóm Dwata alì geta bè kdéen. Tedu de hendufem béléu? Henkoduhu béléem, béem tnafak ou.” 29Yó gónón mon du yóm monen yó, abay se deng gegna kehdó Jisas du bè yóm tau nalaken. Bà mon se, deng hilu duléken ne tódô gel mówóng du yóm busaw malak du yóm tau yó. Là bangen du yóm gel kfét le du kdina kem sigelen ne kem tihen, lel le eles gel mentey du, ewenem botong benkasen. Són ebè yóm benwu laen dù tau menwu du gónón e liwà lanen gel mówóng du yóm busaw malak du yó.

30Yó ne snólók Jisas yóm busaw malak du yóm tau yó, monen, “Tedu de boluyem?”

Bnalaen se, monen, “Yó boluyu Genged.” Yó gónón mon du yóm yó, abay se tey genged busaw malak du yóm tau yó. 31Yó henkodu le bè Jisas béen tagad hulék lu elem sol leyóng, yóm kul gónó nô lem tonok. 32Bè yóm kdaw yó, kulel se keswól le talak bilil yó kem tey sdô wen, uma kóm geblà klayuken bélê le. Hkodu le bè Jisas yó kem busaw anì hfuseken lu ebè tu kem sdô. Ne tahu se, hlus Jisas lu. 33Tódô tebel le yóm tau nalak le yó koni, ne husek le ebè tu kem sdô. Kewót le se kul yó kem tey sdô wen yó, tódô le gotu sedlu mlóy mosol ebè tubaw kbu, ne gotu le gekmó elem lanaw, ne gotu le lemneb yóm kdê le.

34Timbow ton yó kem tau gel semgyok yó kem sdô, gotu le mlóy ebè yó kem benwu moni bè yó ne bè yó kem dumu tau gmónô hmilol, na le e tulón kul yóm deng ton le. 35Mung kungol kem tau du nim tulón ni, tódô le gotu seguku gu ditu na le e hnénég yó kem deng tulón le kul. Timbow le gdofì bè Jisas, tódô ton le se yóm tau tehe nalak busaw myón klohoken. Deng bud lemsek nes, ne deng bud hyu kehedemen. Ya tey klikò le yó kem tau sguku ebè yó yó. 36Yó kem tau mton du, bud lu se fen alì tmulón du kul yóm kmò kehdó Jisas yó kem busaw.

37Ya tey sidek klikò le yóm kdéen tau menwu bè yó. Yó gónó le mon du mò ke Jisas, “Yake mdóhi kum bè ni.” Tahu se, lemwót le Jisas, bud le motun elem yóm ówóng, ne mulék le. 38Yóm tau tehe nalak busaw yó koni, tey kehkoduhen bè Jisas anì mung du. Okóm mom mon Jisas mò du, 39“Tódói mulék ne ebè gónóem anì tulónem kul yóm deng nmò Dwata béléem.” Ne tahu se, mulék yóm tau yó. Tódô lenngeben yóm benwu le gónón e tmulón du yóm deng nmò Jisas béléen.

Kkó Jisas des yóm libun mdù nesen, ne klowilen yóm ngà libun deng mlef

(Matyu 9:18-26; Mark 5:21-43)

40Timbow le deng bud gefet fi fatu yóm lanaw le Jisas, tey khódó le du yó kem tey tau wen eles semsangat du bè yó. 41Wen sotu tau sut bè yó boluyen Jarus, tau wen glalen bè yóm kul gónô gel stifun bè yó. Tódô hegluduk bè solu Jisas, ne tey kehkoduhen béléen anì hol slob bè gónóen, 42abay se deng heslaf yóm ngaen libun. Blaem tek són yó ngaen, deng dô wen sfolò lewu ne halayen. Tahu se, tódô mung du Jisas.

Yóm igoen mógów, tey tau wen seklot ebéléen. 43Wen sotu libun gemnóm des tenbalung huli ke Jisas. Deng sfolò lewu halay kegenen gemnóm du yóm desen yó. Tey deng bong ne filak gamaen bè yó kem duktur, ewenem laen kô dù tul kkóhen. 44Mógów huli ke Jisas nim libun ni, ten-gafit nduen yóm nesen. Mung unihen gemdù du, tódô sennganen se teflok yóm litô gu béléen.

45Tódô henmung snólók Jisas se, monen, “Mau du de nim mdù dou ni koni?”

Tódô ket tau gotu hlalà. Ne yó mon Pitér mò ke Jisas, “Bong ni dum tey tau seklot ebéléem ni, Sér.”

46“Là,” mon Jisas, “wen tau mdù dou koni. Tódô gnómu wen ktued hkó des lemwót gu béléu.” 47Timbow gungol yóm libun yóm mon Jisas yó, tódô setbol kkelen na a hegluduk bè solu Jisas. Tódô benkasen lem blóng yó kem tey tau yóm dalil gónóhen temgafit mdù yóm nes Jisas, ne yóm tódô henmung keteflok yóm desen. 48Mon Jisas mò du, “Yóm kehtahuhem béléu, Lenibun, yó se gónón mkó yóm desem. Tu ne, muléki. Dwata he henek nawahem.”

49Yóm igò Jisas tolo stulón du yóm libun yó, wen tau sut bè yó lemwót bè gónô Jarus, monen mò du, “Là bud gafitem du ne yóm ngaem. Bê tekuy dog bud hnala ne Jisas.”

50Okóm gungol Jisas yóm tulónen, ne monen mò ke Jarus, “Béen tafa nawahem. Tódô hentahuhem ou, ne angat bud mulék hyu he yó tum ngaem.”

51Bè yóm kkól le bè gónô Jarus, là dog nwit Jisas kul elemen yó kem dumu tau, són Pitér ne Jan ne Jim, ne són kem tuha yóm ngà. 52Tey tau wen bè yó, lenangag le yóm ngà deng matay. Okóm mudél ebélê le Jisas, monen, “Bê ye mkik dé. Là kóen matay yóm ngà, olon tungô.”

53Deng mom henkéng le Jisas, abay se deng tódô ton le katayen yóm ngà yó. 54Tikóng kól klohok yóm ngà matay Jisas, ominen mogot bè sigelen, ne tnabahen, monen, “Ó Bun, btiki ne.” 55Ne tahu se, tódô henmungen se bud mnawa yóm ngà yó, ne tódô kendel btik. Ne mon Jisas mò yó kem tuhahen, “Henken ye.” 56Ya tey ketnga yó kem tuhahen. Okóm tey mget kmon Jisas du mò kul, “Hol bê ye abay tulón yóm deng nmou bélê ye ni.”

Currently Selected:

Luk 8: tbl

Highlight

Copy