Luk 7

Kkó Jisas des yóm tóbóng lówó yóm kfitan bè Rom

(Matyu 8:5-13)

1Tikóng deng ktolok Jisas yó kem tau, ominen hlós ebè syudad Kapérnaum. 2Ne wen kfitan nô bè yó lemwót bè Rom, wen sotu tau mò nmò béléen alì kenbong nawahen. Tey sidek kleed desen, móyónen tô matay. 3Tikóng gungolen Jisas yóm kfitan yó, gloken wen bè yó kem tuha gónó le gel galak yó kem Ju dóken ebè Jisas. Hangayen kul anì nan e hkó des yóm tau mò nmò béléen yó. 4Tahu se. Timbow le deng kól bè Jisas yó kem tuha yó, tey kehkodu le béléen, mon le mò du, “Là gbekem du ke là tnóbóng du yóm tau mdók kum edini ni. 5Ngem yóm tey kbong nawahen tekuy kem Ju, gloken hefdà gónó me gel stifun bélê me.”

6Ne tahu se, mung kul Jisas. Timbow le deng moni bè gónô yóm kfitan yó, bud wen kem ween dóken na a semlong kul. Ne yó tulón hwiten ebè Jisas, monen, “Béi dog hlós edini ne, Sér. Là kóen knóón ke huseki elem gónóu. 7Ne là kóen knóón snéen ke tô ou na a lemebet kóm. Olom tódô hemwit udél gu dyó ne, kaem tódô mkó he nim des nim tau tóbóng lówóhu ni. 8Lómón se béléu dou,” monen, “wen se kem tau hol geta sentahu gónóhu mogot, ne gel nimónu. Ne wen se kem sendalù dou nalak, ne sal gel nimón le ou. Sok monu mò yóm sotu, ‘Tu ne,’ tahu se, tódô kendel lemwót. Dalang se ke monu, ‘Géhéli,’ tódô kendel sut. Sok monu bè yóm heseku, ‘Nmoem nii,’ ne yó se tódô nmoen. Lómón yó se béléem kóm. Ke wen monem, sal dohò.”

9Timbow gungol Jisas yóm udél yóm kfitan yó, botong tnga. Ne ominen beklil smolu ebè yó kem tey tau wen lemolò du, monen mò kul, “Balù sotu bélê tekuy kem tau Israél, là kô deng wen tonu ke lómón ni kmò kehtahuhen.” 10Tódô le mulék yó kem tau semlong ke Jisas yó koni. Tikóng le kól bè gónô, tódô ton le yóm tau tehe gemnóm des tódô hlingas.

Bud kehlowil Jisas yóm ngà logi yóm libun bolu

11Là legenen bè yó, mógów Jisas ebè yóm sotu benwu boluyen Nain, mung du yó kem gel lemolò du dalang se yó kem tey tau wen. 12Timbow le deng moni bè bak sut yóm benwu yó, tódô geslong le yó kem tau semtihang matay. Yóm tau matay yó, tek són du ngà logi yóm libun bolu. Tey dê tau mung ke yéen na a tô lembeng du. 13Timbow ton Jisas yóm yéen, tey kkoduhen du, monen, “Béi abay mkik.” 14Omin Jisas mógów ebélê le, ne nnoken ta yóm gónó le semtihang du, ne tódô le se htengen mdà yó kem tau semtihang du. Mon Jisas mò yóm ngà logi deng matay yó, “Ó Man, btiki ne.” 15Ne tahu se, tódô hboluk myón yóm ngà logi yó, ne mudél. Omin Jisas bud mon du mò ke yéen, “Ni ngaem.”

16Tódô le se gotu likò yó kem tau mton du, mung du yóm tey kdóyón le ke Dwata, mon le, “Deng sut lem blóng tekuy yóm tugod Dwata alì mfasang.” Mon kem dumu, “Deng kól lem blóng tekuy ne Dwata nan e lenwà kem kun tau.” 17Ne tódô lenngeben yóm klamang yóm benwu le gónón e glalag yóm nmò Jisas yó, kkólen bè yó kem dumu benwu hmilol du.

Yóm na a kehsólók Jan ke Jisas

(Matyu 11:2-19)

18Wen bè yó kem lemolò ke Jan hgefet du ebéléen yó kem gel nmò Jisas. Bè yóm kungol Jan du, gloken tmaba lewu bè yó kem gel lemolò du 19mò hógówen ebè Jisas anì snólók le béléen ke deng duhen du ne yóm tau hógów Dwata tehe gel tulónen, duhen ke na le na nangat he. Tahu se, lemwót le.

20Tikóng le gefet ditu bè Jisas, yó mon le mò du, “Ni nógów me ni, dóken mi yóm Jan gel mabtays. Tô nan e hsólók kum ke deng duhen uu ne kun yóm tau hógów Dwata tehe gel tulónen, duhen ke na me na nangat he?”

21Bè yóm kgefet le bè Jisas yó kem tau hógów Jan yó, tolo lel Jisas hkó yó kem dê kay des bè yó kem tau, ne hdóhen se yó kem busaw gel malak yó kem tau. Ne yó kem butô gotu htonen lu. 22Ne bnalà Jisas yó kem tau hógów Jan ebéléen, monen mò kul, “Mulék ye ne, na ye e tulón ke Jan yó kem deng ton ye, ne yóm deng gungol ye. Yóm tau butô tódô bud mton, yóm tau hikot tódô bud gógów, yóm tau gemnóm des mifù tódô gotu mkó, yóm tau bokong tódô bud mungol, ne yóm tau deng matay tódô bud mowil. Ne sotuhen,” monen, “yóm Tulón Hyu lemwót gu bè Dwata, deng gefet bè yó ne kem tau élél. 23Tey kligal le kul yó kem tau ke là megewu nawa le dou.”

24Kogol yóm kulék le gu bè Jisas yó kem tau hógów Jan yó, omin Jisas tmulón ke Jan lem blóng yó kem tey tau sbung, monen, “Bè yóm tehe gel kógów ye ebè Jan bè yóm benwu laen dù tau menwu du, tedu se tô nóyô hnebel mata ye du? Yóm bnes tendo mung mgafil bè lenos kô? Là kô yó du. 25Tedu se tô hnebel mata ye du? Yóm tau knóón knesen kô? Là yó du. Tek són yó gónó ye mton du yóm tau knóón knesen ne yóm tau mdengen ktauhen, tek són lem gónô bong yóm tau hol geta. 26Tedu se hol tô hnebel mata ye du bè yóm tehe gel kógów ye ebéléen yó? Tugod Dwata kô? Tahu se, tau tugod Dwata yóm Jan. Okóm yóm nmoen, mkay senta yóm kun nmò yóm tugod Dwata, 27yakà béléen du gónón e gbak yóm tehe hsulat Dwata ekni, yóm monen, ‘Wen hógówu tukô gna kóm mò eles hemgifat du yóm lanem.’#7:27 7:27 Malakay 3:1.

28Tódô tulónu kuy ktahuhen,” mon Jisas, “laen kô dù tau talak tonok ke geta senta Jan. Okóm ke sok deng sut yóm kdaw kogot Dwata tau, balù yó hem tau nogot Dwata alì glaan bè kdéen, ewenem botong geta senta Jan.”

29Ni kem tulón Jisas ni, tey dê tau hmungol du kkólen bè yó kem tau fen gel mtuk bwis. Lu se yó kem tau deng hbabtays ke Jan abay se deng dilô le yóm tey kehyuhen yóm hlolò Dwata kul, ne deng le mimón. 30Okóm yó kem Farisi ne yó kem gel tmolok hlau, lu se yó kem tau deng tehe kembê du yóm kóyô Dwata bélê le, ne là kô le dog hbabtays.

31Bud mon Jisas, “Tedu de kmò kehlingónu kuy yu kem tau kmoen ni? 32Hol ye mkél bè yó kem ngà là mdengen lem fedyan, tnaba le yó kem dumu le, mon le, ‘Deng me hningón mulu, lel me tembol, là sem dog ye móyô madal. Ne deng me hningón modung, lel me lemanu, là sem dog ye langag.’ 33Ngem yó dém kkól Jan lem blóng ye,” mon Jisas, “gel fasting se kun, ne là kóen minum yóm ninum lóbô. Okóm deng mom yó slón ye du ‘Tau nalak busaw.’ 34Bè yóm deng kkól yóm Ngà Tau,” mon Jisas, “gel mken se, ne gel minum lómón se yóm kuy. Okóm mom senlón ye, gel mon ye, ‘Ngem dé yóm tau yóó, tey bong kkenen, ne tey bong kinumen. Deng mom niten swè yó kem tau gel mtuk bwis, ne yó kem dumu tau gemsalà.’ 35Ewenem yó,” mon Jisas, “sana kegfanen bè klowil yó kem tau mimón yóm tey khulung Dwata mit tau.”

Kehegsel yóm sotu libun bè Jisas

36Wen sotu Farisi nwiten Jisas ebè gónóen. Ne tahu se, mung du Jisas, ne seyón mken bélê le. 37Bè yóm benwu yó, wen sotu libun hdóyón. Timbow gungolen yóm kken Jisas bè gónô yóm Farisi yó, gloken na a semmang du bè yó, ne nwiten yóm sobuy botu boluyen alabastér, hnok yóm hboo alì mebtes minggel boohen. 38Yóm kkólen bè yó, tódô mdà klohok ti Jisas, ne mkik. Gotu temdak ete ti Jisas yóm lewoken, ne bud ifuhen du weken, gloken melek tihen ne twélen du yóm hboo yó koni.

39Timbow ton yóm Farisi mit ke Jisas nim nmoen ni, yó hendemen, “Ke tahu tau tugod Dwata nim Jisas ni, hol là galu ke là tngónen du nim libun mogot du ni, ne yóm sidek gel nmoen.”

40Ne tódô hebkó mudél ebéléen se Jisas, monen, “Ó Wè Simun, wen tô tulónu kóm.”

Ne mon Simun se, “Tulónem dou sen, Sér.”

41Wen henfeng Jisas béléen, monen, “Wen sotu tau gel hutóng, ne wen lewu tau na a mutóng béléen. Yó nutóng yóm sotu, limu latu. Ne yó nutóng yóm sotu, limu folò. 42Timbow là gembayad le yó kem lewu tau mutóng yó, tódô hnifóten bélê le yóm tehe nutóng le béléen yó. Bè kóm kehedem du,” mon Jisas mò ke Simun, “mahi du de bélê le yó kem lewu tau mutóng yó yóm gotu nawahen ebè yóm tau fun filak?”

43Mon Simun, “Déke yóm bong hnifóten béléen.”

Mon Jisas se, “Tahu se yóm monem yó.” 44Ominen beklil ebè yóm libun, okóm nan na bud mudél ebè Simun, monen, “Lómón se ni nem libun nii. Bè kotunu bè gónóem, là kô dog benlayem do él mò olob tihu, igoen yó sana gel adat tekuy. Okóm nim libun nii, deng mom lewoken yóm timbang olob tihu, ne ifuhen du weken. 45Là kô dog nelekem do yóm kotunu béléem, igoen yó sana kut gel kesfódó. Là kun nim libun nii, tódô mung bè khuseku, là kô dog kóhen du keleken tihu. 46Lelen là dog wen hnolo hetwélem te kuluhu, igoen yó sana kut gel kessadat. Okóm deng mom du fen temwél ete tihu yóm hboo alì mebtes. 47Yó gónóhu mon du mò kóm,” mon Jisas, “bè yóm alì kgotu nawahen do, yó se gónóhen gdilô yóm deng kehlifót Dwata du ne yó kem tey dê salaen. Okóm yóm tau tehe udì yóm salà deng heflifóten, bud udì se yóm nawahen ebè Dwata.” 48Ne omin Jisas mudél ebè yóm libun, monen mò du, “Yó ne, Lenibun, deng hnifótu ne yó kem salaem.”

49Yó mon nawa le ni kem dumu tau seyón ke Jisas ni, mon le, “Tmau du de mni? Tódô tô hmifót salà.”

50Ne bud mon Jisas ebè yóm libun yó, monen, “Yóm kehtahuhem béléu, yó se lemwà kóm lem salaem. Muléki ne, Dwata he henek nawahem.”

Currently Selected:

Luk 7: tbl

Highlight

Copy