Luk 6

Ktolok Jisas lan yóm Kdaw Kehegnô

(Matyu 12:1-8; Mark 2:23-28)

1Sotu kdaw bè yó, lemwót le Jisas ne yó kem gel lemolò du, mlan le hlalak yóm tniba, bede geblà bè yóm Kdaw Kehegnô. Lemwót yó kem gel lemolò du, slob le ma bungu halay gu talak tniba, ne hnilu le, omin le mken du. 2Okóm wen kem Farisi smólók kul, mon le, “Moen de ke nmò ye yóm gónó ye gemgulé du yóm hlau tekuy bè Kdaw Kehegnô?”

3Fen bnalà Jisas lu, monen, “Deng hónô senfala ye yóm tehe nmò Dabid ne yó kem tauhen bè yóm tehe kbitil le. 4Tódô husek Dabid elem yóm Gónô Dwata, ne nwahen yóm mambang deng blay le ebè Dwata, ne ominen mken du, ne benlayen se yó kem tau nalaken. Blaem bè yóm hlau tekuy, là kóen hyu kken tau hkawang du yóm mambang yó, tek són yó kem tau gel demsù ebè Dwata gel mken du. Ewenem, là kô duón Dwata du kul yóm kken le du.” 5Ne bud mon Jisas mò kul, “Yóm Ngà Tau, du se wen kwalisen tmolok du kuy yóm hyu mò du bè yóm Kdaw Kehegnô.”

Kkó Jisas des bè Kdaw Kehegnô

(Matyu 12:9-14; Mark 3:1-6)

6Bud sotu kdaw bè yó, bud Kdaw Kehegnô snéen, husek Jisas elem yóm sotu gónó le gel stifun yó kem Ju, ne tmolok bélê le. Wen sotu tau nô bè yó kimoy sigel kwananen. 7Wen se kem Farisi nô bè yó kkólen bè yó kem tau gel tmolok hlau. Ne gel tenngel le Jisas anì ton le ke wen tau hkóhen desen bè yóm Kdaw Kehegnô mò dalil le dmuón du. 8Okóm deng eles tngón Jisas ne yóm nô lem hendem le, ewenem yó tódô monen mò yóm tau deng kimoy sigelen, “Ó Wè, mógówi edini kun béléu.” Tahu se, mógów ebè Jisas yóm tau yó. 9Ne mon Jisas mò yó kem tau sbung, “Wen snólóku bélê ye. Tedu se yóm bang nmò bè yóm Kdaw Kehegnô anì là gsalà tekuy du yóm hlau tekuy? Hyu kô ke tnóbóng tekuy kem dumu tekuy, duhen ke hensidek tekuy lu? Ke lenowil tekuy sotu tau, duhen ke hnatay tekuy?” 10Ne gotu sen-glaf tenngelen lu. Ne ominen haking ebè yóm tau kimoy sigelen, monen mò du, “Ó Wè, bentolem sigelem.” Ne tahu se, bentolen, hol lómón ke là tehehen kimoy. 11Ya tey sidek kebut le ke Jisas yó kem Farisi ne yó kem tau gel tmolok hlau bè yóm nmoen yó. Kewóten bè yó ne, tendo sensatul le yóm kmò le ke Jisas.

Kélék Jisas yó kem sfolò lewu mò gel hógówen

(Matyu 10:1-4; Mark 3:13-19)

12Sotu kdaw bè yó, tódô mógów elem bulul Jisas anì nan e mni bè Dwata. Tódô suloyen buteng mni. 13Tikóng mwas bè yó, ominen htaba yó kem tau gel lemolò du, ne sfolò lewu yóm néléken bélê le mò gel hógówen. Ne boluyen kul aposol. 14Yó boluy le: Simun (yóm boluyen du Pitér) ne Andru (twoli Pitér). Ne Jim ne Jan, Filip ne Bartulumyu, 15Matyu ne Tumas, ne yóm sotu Jim (ngà Alfiyus) ne bud yóm sotu Simun (yóm tau tehe mung mofin yóm kul benwu), 16ne Judas (ngà yóm sotu Jim), ne bud yóm Judas Iskariyut (yóm fen bemlay sumóng ke Jisas).

Kkó Jisas des yó kem tau

(Matyu 4:23-25)

17Omin Jisas mosol, mung du yó kem tau lomi néléken mò hógówen yó koni. Mdà bè yóm gónón datal, ne tey dê yó kem dumu tau gel lemolò du nô béléen bè yó. Tey dê kem dumu tau deng kól bè yó snéen lemwót gu bè klamangen prubinsya Judiya, ne gu bè syudad Jirusalim, ne wen se lemwót bè yó kem syudad bè kilil mohin boluyen Tayal ne Sidon. 18Yó nógów le na le e hnungol yóm ktolok Jisas ne na le e hkó du yó kem des le. Gotu le mógów ebè yó snéen yó kem tau nalak busaw, ne gotu hdó Jisas yó kem busaw yó. 19Tódô kdê yó kem tau gemnóm des, gotu tô na a mdù ke Jisas, abay se wen yóm ktued hkó des lemwót béléen. Ne tódô gotu mkó se des le yó kem tau gemdù du.

Ktolok Jisas yó kem tau gel lemolò du

(Matyu 5:1-12)

20Ne omin Jisas smolu ebè yó kem tau gel lemolò du, ne yó udélen ebélê le, monen,

“Tey kehyuhen bélê ye kuy, yu kem tau élél,

abay se deng ye sana gmung ne bè yó kem tau nogot Dwata.

21Tey kehyuhen bélê ye kuy, yu kem tau bitil nim kmoen ni,

abay se angat ye gemtu.

Tey kehyuhen bélê ye kuy, yu kem tau gel mkik nim kmoen ni,

abay se angat ye kmuli.

22Tey kehyuhen bélê ye ke gel knutó nawa le yu yó kem tau lan ye lemolò yóm Ngà Tau. Mom hyu nawa ye he ke kenbê le yu, ne ke gel hennê le yu, ne ke gel sidek kestulón le kuy.

23Hol tódô hnigal ye ke lómón yó nmò le bélê ye, abay se deng wen tey ofol deng eles fan Dwata kuy bè longit. Yó kem nmò le bélê ye yó, senged bè yóm kul tehe nmò yó kem fù le bè yó kem gna tugod Dwata ekni.

24Okóm yu kem tau wen kendengenen ni kmoen ni, tey kodu ye kuy,

abay se angat laen kô dù bud sfuhen yóm kendengen ye yó.

25Tey kodu ye kuy kem tau gel hebsow ni kmoen ni,

abay se angat ye mulék bitil.

Tey kodu ye kuy kem tau tendo gel hligal kmuli ni kmoen ni,

abay se angat ye mulék langag.

26Tey kodu ye kuy kem tau gel sendóyón kem dumu tau ni kmoen ni. Senged snéen ekni yóm tehe gel kesdóyón yó kem tehe fù le yó kem tau tehe gel lembù tmugod ke Dwata.”

Kenbong tekuy nawa yó kem hmohon tekuy

(Matyu 5:38-48; 7:12a)

27“Okóm ni monu mò kuy, yu kem tau hmungol dou,” mon Jisas. “Kenbong ye nawa yó kem hohon ye, hol henyu ye kmò ye ebè yó kem tau gel kmutó nawa kuy. 28Mom hni ye bè Dwata dé yó kem tau hemnulà kuy, ne utóm ye lu bè Dwata yó kem tau sidek nmò le bélê ye. 29Yóm tau ke tenféen yu bè doli hifi ye, bud bayà ye du dolihen. Yóm tau ma kgal ye, bê ye ngali du yóm gewuhen lafin. 30Ke mni bélê ye yóm tau, benlay ye. Ne ke tódô nahen yóm kimu ye, bê ye bud snolò. 31Yó se kuy nóyô nmò tau bélê ye, yó se kuy gna nmò bélê le.

32Ke són yó olo tô kenbong nawa ye, són yó kem tau gel kembong nawa kuy, lugi ye hemdeen du ke tô tnóbóng Dwata yu. Anì se yó du kem tau mò sidek, sana kul kbong nawa yó kem kembong nawa kul. 33Ke són yó tô gónó ye e hemyu kmò ye, són ebè yó kem tau hyu kmò le ebélê ye, lugi ye hemdeen du ke tô tnóbóng Dwata yu. Anì se yó du kem tau mò sidek, lómón se yó kul gel nmò. 34Ke són yó tô hutóng ye, són yó kem tau gembek mayad, lugi ye hemdeen du ke tô tnóbóng Dwata yu. Anì se yó du kem tau sidek nmò le, sana kul khutóng yó kem dumu le mò sidek, syan ke angat le bud mayad.

35Okóm kuy du,” mon Jisas. “hol kenbong ye nawa yó kem hohon ye, hol henyu ye kmò ye ebélê le. Ke hutóng ye, bê ye bud snolò. Ke lómón se ni gel nmò ye, tey angat ofol ye, ne angat ngaen yu yóm Dwata alì geta bè kdéen. Abay se yóm Dwata, balù yó he kem tau laen dù nawa skodu bélê le ne yó kem tau sidek nmò le, ewenem sana tey kkoduhen kul. 36Hol knodu ye kem dumu ye tau lómón yóm kun kkodu kem tau yóm Mà tekuy bè longit.”

Bê tódô gel hendeng kun kmò sotu tau

(Matyu 7:1-5)

37“Bê ye abay tódô hendeng kul kmò kem dumu ye tau,” mon Jisas, “anì là tódô hendeng Dwata du se yóm kuy kmò. Bê ye abay tódô tnuled kem dumu ye ke wen salà le anì là tódô tnuled Dwata kuy. Hol hnifót ye kem dumu ye ke gemsalà le bélê ye anì hnifót Dwata se yu ke wen kuy salà. 38Benlay ye kem dumu ye anì benlay Dwata yu se kuy. Tey hyu klemen du bélê ye yóm blayen kuy, nnoken elaan, kninsigen, ne hebésen. Yó se kbong yóm kuy blay, yó se bud kbong yóm blayen kuy.”

39Ne wen bud hningón Jisas bélê le, monen, “Yóm tau butô, là kô gbeken malak yóm dumuhen butô. Ngem kà tódô le geblos elem sol yóm lewu le. 40Yóm tau ke hanà tolo dmalang, là kóen geta senta yóm tau tmolok du. Okóm yóm tau ke deng megtolok, angat guliten yóm tau tmolok du.”

41Ne bud sotu hningón Jisas bélê le, monen, “Moen de ke snolò tenngel ye huling kem dumu ye igoen tolo wen bótóng geblekel lem yóm kuy mata? 42Tedu kmò kton ye mkó du se yóm huling kem dumu ye ke tolo wen bótóng geblekel lem yóm kuy mata. Yu kem tau gel hemtedeng knô, na ye na gna kó dé yóm tey geblekel lem yóm kuy mata anì hyu kton ye mkó du yóm huling kdumu ye.”

Dilô bè kbunguhen yóm koyu

(Matyu 7:16-20; 12:33-35)

43Ne bud wen sotu tulón Jisas kul, monen, “Yóm koyu hyu, hyu se kbunguhen. Dalang se yóm koyu sidek, sidek se kbunguhen. 44Kihu koyu, tódô dilóem bè bunguhen. Yóm koyu semnual, là kóen mungu soging. Dalang se yóm leteng, là kóen mungu kmatì. 45Yóm tau hyu, hyu se kebkóhen lemwót bè yóm hyu nô lem hendemen. Yóm tau sidek, sidek se kebkóhen lemwót bè yóm sidek nô lem hendemen. Yó se gel nô lem hendem yóm tau, yó se gel lemwà bè sumóngen.”

Yóm hlingón bè yó kem lewu tau hemdà gónô

(Matyu 7:24-27)

46Ne sotu bud tulón Jisas kul, monen, “Moen de ke gel mon ye ou yóm gónó ye mogot okóm là kô gel nimón ye do? 47Yóm tau ke mógów ebéléu, ne hnungolen yóm udélu, ne nimónen, tulónu kuy gónón e mkél. 48Du se mkél bè yóm tau hemdà gónô, tey ngelem sol okol heheken, hdaen te botu. Timbow lenumfak yóm tey dunuk bong yóm gónô yó, là kóen na a kmingò, abay se deng eles mbegel kehdaen du yóm funen. 49Okóm yóm tau hmungol yóm udélu,” mon Jisas, “ne ke là nimónen du, du se mkél bè yóm tau hemdà gónô hluda, là ngelem okol heheken. Tikóng sut dunuk, lenumfaken yóm gónô yó, ya tey sidek kegbaen.”

Currently Selected:

Luk 6: tbl

Highlight

Copy