Luk 5

Kélék Jisas yóm tanay tau mò lemolò du

(Matyu 4:18-22; Mark 1:16-20)

1Sotu kdaw bè yó, mdà Jisas bè kilil yóm lanaw Ginésarit na a tmolok Udél Dwata. Tey genged tau segdendel ebéléen na a hmungol du. 2Wen lewu ówóng ton Jisas deng hetów bè kilil yóm él. Deng le kmó ne yó kem fun le, nolob le yó kem huket le. 3Ne tódô motun elem yóm sotu ówóng Jisas, yóm kun ówóng Simun, ne htuluden du anì mayuk udì bè kililen. Ne tahu se. Omin Jisas myón lemen na a tmolok yó kem tey tau wen.

4Kogol yóm ktoloken, monen mò ke Simun, “Bud ye mówóng etu dé bè gónón ngelem ne bud ye hmuket anì wen guta ye.”

5Ne bnalà Simun se, monen, “Deng suloy me buteng ne, Sér, hgel hmuket, laen kô dù guta me. Okóm ke yó monem, na me na bud hmuket sen.” 6Ne tahu se. Bot le lem él huket le. Tódô wen tey tawan le, botong ksê yóm huket le. 7Ne kendel knobil le yó kem dumu le nô bè yóm sotu ówóng mò na a tmóbóng kul. Tahu se, tódô gotu hennok le utón yó kem lewu ówóng le yó, botong le tô lemneb.

8Bè yóm kton Simun Pitér du yóm yó, botong tódô na a mtud bukol bè solu Jisas, yó monen, “Béi hloni ebéléu, Sér, yakà tauhe gemsalà.” 9Ya tey sidek ketngahen du yóm tey kwen utón guta le, dalang se yó kem tau mung du. 10Senged se kul yó kem dumuhen hmuket nô bè yóm sotu ówóng, le Jim ne Jan, kem ngà Sibidi, tey ketnga le se kul.

Ne mudél Jisas ebè Simun, monen, “Béi abay likò. Nbuten ni wen ne tles hmou kóm, hebelu uu tau mò lemolò do.” 11Ne tikóng deng bud otun le ete kembu yó kem ówóng le, tódô gotu tebel le yóm kdéen, ne lolò le Jisas.

Kekó Jisas yóm des mifù

(Matyu 8:1-4; Mark 1:40-45)

12Sotu kdaw, nô bè yóm sotu benwu Jisas gónóhen nô yóm sotu tau gemnóm des mifù. Bè yóm ktonen ke Jisas, tódô na a hegdungul bè soluhen, ne hkodu béléen, monen, “Ó Sér, ke yó dum móyói, kaem gbekem tódô hkó du nim desu ni.”

13Tahu se, tódô nnok Jisas yóm tau yó, monen, “Móyóe tmóbóng kóm. Mkó ne desem.” Ne tahu se, tódô sen-gengen se mkó béléen yóm des mifù yóm tau yó. 14Tey mget kmon Jisas du mò du, “Hol béem abay tulón yóm deng nmou béléem ni. Tódói hekteng mógów ebè tum tau gel demsù ebè Dwata nam e hetngel du lówóhem. Elesi se mit mò dsuem anì nmoem yóm sotu hlau Musis ekni mò gónó le milô du yó kem dumu tau yóm deng kkó yóm desem.” 15Okóm mom temnù ne yóm alì kehból le du yóm gel nmò Jisas, ne deng mom lenwéen yóm tau na a hmungol du, lel le hkó du béléen yó kem des le. 16Okóm ke Jisas, tódô gel hlana lem blóng le, hetsik sónen du na a gel mni bè Dwata.

Kekó Jisas yóm des yóm tau matay sfu lówóhen

(Matyu 9:1-8; Mark 2:1-12)

17Sotu kdaw bè yó, bud tmolok Jisas, ne wen se kem Farisi ne yó kem tau gel tmolok hlau myón bè yó. Lemwót le bè ket benwu snakuf Galili ne Judiya, kkólen bè yóm syudad boluyen Jirusalim. Ne nô bè Jisas yóm ktued Dwata gel hkó des. 18Bè yóm igoen tolo tmolok, wen tau matay sfu lówóhen sentihang le ebéléen. Tô nwit le elem gónô anì tô na le e hasà bè soluhen. 19Okóm laen dù bang ton le lan le mit du husek, bà mon se yóm tey tau tendo sembung du. Ne yó tódô nmò le, nit le eta ketef. Ne wen se gónó le hemnas du ditu ta bè yóm gónó Jisas seblà nô, ne tódô tuntun le ebè Jisas yóm tau là gógówen yó koni. 20Tikóng ton Jisas yóm alì kehtahu le béléen, yó gónón tódô mon du ebè yóm tau là gógówen yó, “Deng hnifótu ne, Wè, yó kem salaem.”

21Bong yó kem gel tmolok hlau ne yó kem Farisi, bè yóm kungol le du yóm udél Jisas yó, yó hendem le, “Tmau du mni? Mom hsengeden knóen bè Dwata. Laen kô dù tau gembek hmifót salà, tek són sem Dwata.”

22Tódô tngón Jisas yóm nô lem hendem le, yó gónón mon du mò kul, “Moen de ke lómón yó yóm kehedem ye ebéléu? 23Là kóen na a mahil mon du, ‘Hnifótu ne yó kem salaem.’ Ne là se kóen mahil mon du, ‘Btiki, ne mógówi.’ 24Ni naw hol hton kuy yóm kwen kwalisen hmifót salà yóm Ngà Tau yóm igoen tolo nô te tonok.” Ne omin Jisas bud mudél ebè yóm tau matay sfu lówóhen yó koni, monen mò du, “Mdai ne, ne nitem yóm gónó le semtihang kóm yóó, ne muléki ebè gónóem.”

25Ne tahu se, tódô btik yóm tau là gógówen yó koni, ne nwahen yóm tehe gónó le semtihang du, ne tódô mulék ebè gónóen. Ya tey kdóyónen ke Dwata. 26Ya tey sidek ketnga yó kem tau deng mton du, lel le likò. Gbót dóyón le Dwata, yó mon le, “Tey hentaw ton nim deng ton tekuy kemdaw ni.”

Ktaba Jisas ke Libay mò lemolò du

(Matyu 9:9-13; Mark 2:13-17)

27Kogolen bè yó, bud lemwót Jisas. Bè yóm kógówen, tódô tonen yóm sotu tau fen gel mtuk bwis boluyen Libay, myón bè fsinaen. Bè yóm kton Jisas du, tódô monen mò du, “Ó Wè Libay, loloem o.” 28Ne tahu se, tódô gotu tebel Libay yóm kdê nmoen, ne loloen Jisas.

29Kewót Libay bè yó, wen ken bong nmoen bè gónóen mò gónóhen tminok ke Jisas. Tey dê bè yó kem dumuhen gel mtuk bwis ne yó kem dumu tau snéen, gotu le seyón kul mken bè yó. 30Timbow ton le lu yó kem Farisi ne yó kem dumu le gel tmolok hlau, tódô le mógów ebè yó kem tau lemolò ke Jisas, ne mon le mò kul, “Moen de ke deng ye mom segbót mken bè tu kem tau gel mtuk bwis ne yó kem dumu tau gemsalà yóó?”

31Ne fen bnalà Jisas lu, bede hningónen, monen, “Yóm tau ke laen dù desen, là kô snoloen du yóm tau mulung. Són yóm tau wen desen mebel du. 32Yóm nógówu edini ni, là tnabahu kul yó du kem tau tedeng kmò le anì hegsel le. Okóm yó dé tnabahu yó kem tau gemsalà.”

Ktolok Jisas lan yóm fasting

(Matyu 9:14-17; Mark 2:18-22)

33Wen kem tau mudél ebè Jisas, yó mon le mò du, “Gel ton me bè yó kem tau gel lemolò ke Jan ne yó kem tau gel lemolò yó kem Farisi, ket kiwól le gel fasting, ne gel le mni bè Dwata. Okóm yó kem gel lemolò kóm, moen de ke là nmò le du kul?”

34Ne bnalà Jisas lu, bede hningónen, monen, “Ke wen tau mò ken bè mulu, là gbek le du ke là gbót le mken yó kem tau hol baken ke tolo nô bélê le yóm logi myehen. 35Okóm angat wen kdawen tódô kó le bélê le yóm logi myehen. Yó he kton ye kul fasting.”

36Ne wen bud tulón Jisas kul bè yóm là kehyu sembool du yóm kun tolok bè yóm tolok gna, bede bud hningónen, monen, “Laen kô dù tau se ke namà kenséen yóm nes lomi mò klefengen bè yóm nes bolok. Ke yó tô nmoen, ten-geeden mamà yóm nes lomi, blaem là kóen seklóón ebè yóm nes bolok. 37Ne sotuhen,” monen, “laen kô dù tau ke ilihen elem yóm sning kulit ógóf deng legen yóm tifas hanà lomi. Ke ni se nmoen ten-geeden heksê yóm sning kulit, mom gamà yóm tifas nô lemen ne laen kô bud muhen yóm sning. 38Yó dé kun yóm tifas ke hanà tolo lomi, ilihem bè yóm sning kulit ógóf hanà tolo lomi snéen. 39Laen kô dù tau,” monen, “ke deng knalamen minum yóm tifas deng legen ke tô bud minum yóm tifas hanà lomi. Yó gel monen, ‘Mom hyu he yóm deng legen.’ ”

Currently Selected:

Luk 5: tbl

Highlight

Copy