Luk 10

Khógów Jisas yó kem hitu folò lewu tau

1Kogolen bè yó, wen hitu folò lewu tau bud nélék Jisas, ket ne lewu kmò khógówen kul, hegnahen lu ebè tu kem benwu gónón angat e mógów. 2Yó monen mò kul, “Yóm khógówu kuy ni, lómón ke na ye e muta, ne tey lamang yóm nuta ye, són duen là holen wen tau muta du. Hol ye mni dé, bè yóm fun nuta anì bud wen tau hógówen mò muta. 3Lemwót ye ne. Nim khógówu kuy ni, hol lómón ke yó kem ngà ubiha hógówu elem blóng tu kem ógóf lóbô lem bnes boluyen wolf. 4Bê ye abay mit filak duhen ke bag duhen ke tlumfà. Bê ye hegen kestulón ye bè yó kem tau geslong ye bè lan.

5Ke wen gónô gónó ye husek, yó tanay mon ye mò yó kem tau nô lemen, ‘Dwata he hol henek nawa ye.’ 6Ke wen tau menek nawahen bè yóm gónô yó, ne ke hnódó le yu, angat tódô nô bélê le se yóm kenek nawa lemwót bè Dwata. Okóm ke laen dù tau hmódó kuy bè yó, là se henek Dwata du nawa le. 7Yó se tanay gónô gónón wen hmódó kuy, yó se mò gónó ye mefet efet kól bè kulék ye. Yó se hken le kuy, yó se tódô ken ye, abay se yóm tau mò nmò, knóón ke wen ofolen. Bê ye abay mili bè kem dumu gónô.

8Sok wen benwu gónó ye sut, ne ke hnódó le yu bè yó, sok wen hken le kuy, yó se tódô ken ye. 9Hkó ye des yó kem tau gemnóm des bè yó. Ne mon ye mò yó kem tau bè yóm benwu yó, ‘Deng moni bélê ye ne yóm kogot Dwata tau.’ 10Okóm ke là wen hmódó kuy bè yóm benwu gónó ye gsut, hewà ye ebè yó kem lan, ne yó mon ye bè yó kem tau bè yó, 11‘Nim tonok lemwót bè kuy benwu demket bè ti me ni, klé me mò ilô yóm angat ktafak Dwata kuy. Okóm ni bê ye abay klifót, deng tô moni bélê ye ne yóm kogot Dwata tau.’ 12Bede yó tulónu kuy,” mon Jisas, “ke deng kól yóm kdaw kkukum Dwata tau, angat tey bong ktafaken kul yó kem tau bè yóm benwu là hmódó kuy yó senta yóm angat ktafaken yó kem tau bè syudad boluyen Sodom, yóm benwu tódô hensulék genlà Dwata.”

Kudél Jisas yó kem tau là hemtahuhen

(Matyu 11:20-24)

13Bud mon Jisas, “Nawaw nim yu, kem tau bè Kurasin, nawaw yu snéen kem tau bè Bitsayda. Ke deng tehe ton yó kem tau là Ju le bè Tayal ne bè Sidon ni kem hentaw ton deng nmou lem blóng ye ni, là kô gbek le du ke là lemsek le nes sakù, ne bnulus le kohù lówó le mò ilô yóm deng kehegsel le, ne yóm deng kkogol le yó kem sidek gel nmò le. 14Sok kól yóm kdaw angat kkukum Dwata tau, gulé he ktafaken kuy senta yóm ktafaken yó kem tau bè Tayal ne bè Sidon. 15Dalang se kuy, yu kem tau bè Kapérnaum,” mon Jisas. “Ilóem kmon ye ke gefet bè longit yóm alì kehegeta ye knô. Ngem kà angat tudà Dwata kuy elem lanaw ofi he.”

16Ne bud mudél Jisas bè yó kem lemolò du, yó monen mò kul, “Bè nim khógówu kuy ni, yó se hmungol kuy, lómón ke ou se yóm hnungolen. Yó se kembê kuy, hol lómón se ke ou yóm kenbéen. Ne ke kenbéen ou yóm tau, hol lómón ke kenbéen snéen yóm hógów dou.”

Kkól yó kem hitu folò lewu tehe hógów Jisas

17Legen udì bè yó, bud mulék yó kem hitu folò lewu deng hógów Jisas yó, ya tey kehligal le, mon le mò ke Jisas, “Là bangen du, Sér, yó kem busaw tódô le gotu mdó, botong kimón le kum lan me gel moluy kóm.”

18Mon Jisas se kun, “Tódô tonu Seitan lómón tô silà yóm kehebtangen gu bè longit. 19Ngem, lemwót bè yóm kwalis deng blayu kuy,” monen, “là kô le bud lóbô bélê ye ne yó kem ulal, anien ke gdà ye lu, dalang se yó kem syufón. Ne balù sentenga se kun kgis yóm hohon tekuy Seitan, là kóen matù bélê ye. 20Okóm,” monen, “bê ye mom kat alì hnigal se yóm deng kimón le kuy yó kem busaw. Yó dé hol hnigal ye, yóm boluy ye deng snulat Dwata bè longit.”

Kdóyón Jisas ke Dwata

(Matyu 11:25-27; 13:16-17)

21Bè yóm keseyón le yó, tey kehefligalen ke Jisas yóm Tulus Dwata, yó monen, “Ó Mà, uu se yóm mogot longit ne tonok. Bong kdóyónu kóm, abay se deng wen hegfanem bè yó kem tau laen dù hennagien, okóm bè yó kem tau wen hennagien, là kô heglilebem du bélê le. Duhen yó se, Mà, yóm deng kóm kóyô kehlan du.”

22Bud mon Jisas mò kul, “Deng gotu tódô hkem Mà dou kdéen. Là kô wen tau temngón du yóm Ngà Dwata, tek són Maen. Ne là kô wen tau temngón du yóm Maen, tek són yóm Ngaen, ne tek són yó kem tau deng néléken mò gónóhen hetngón du.”

23Omin Jisas beklil ebè yó kem gel lemolò du, ne wen tulónen kul tek són lu, monen mò kul, “Tey hyu kuy abay se deng ton ye ni kem deng ton ye ni. 24Tódô tulónu kuy ktahuhen,” monen, “tey dê bè yó kem tehe tugod Dwata ekni ne yó kem tehe tau hol geta gel tô hemdeen mton du ni kem kuy ton ni, okóm là kô ton le du. Tô hendeen hnungol le se kul yóm kuy deng gungol ni, okóm là gungol le du.”

Yóm hlingón bè yóm tau lemwót bè Samarya

25Wen sotu bè yó kem gel tmolok hlau sut bè Jisas, wen snólóken béléen mò gónón tmilów du, monen, “Wen tô snólóku béléem, Sér,” monen. “Tedu de tô nmou du anì gutahu yóm klowil laen dù sónen?”

26Bnalà Jisas se, monen, “Tedu de yóm monen bè Sulat Dwata? Tedu de kmò ketngónem du?”

27Ne bnalà yóm tau yó, monen, “Yó monen, ‘Hol kenbong nawahem Dwata, yóm gónóhem mogot. Hotuhem nawahem ebéléem. Hotuhem gelem mimón du. Béem kó lem hendemem yóm kun kóyô.’ Ne sotu monen, ‘Hol kenbong nawahem kem dumuhem lómón yóm kbong nawahem yóm kóm knô.’#10:27 10:27 Hlau 6:5, Hlolò 19:18.”

28Ne yó mon Jisas mò du, “Tahu se yóm monem. Ke nmoem yóm monem yó, angat wen kóm klowil laen sónen.”

29Okóm yóm tau tmolok hlau yó, tô hemtedeng knô. Yó gónón mon du mò ke Jisas, “Tmau du se mò bang dumuhu du?”

30Bè yóm kbalà Jisas du, wen tutul tulónen du, monen, “Wen sotu Ju lemwót bè Jirusalim mógów mool ebè Jiriku, tek sotuhen. Yóm kógówen yó, wen kem tau mnagaw glebeten bè lan, ne tey kboug le du. Gotu nlus le béléen kem nesen, song tebel le deng tek udì gónón matay.

31Yóm igoen masà bè yó, geslaen se klanen bè yó yóm sotu tau gel demsù ebè Dwata. Ne tonen yóm dumuhen Ju masà bè yó, mom senyaten, ne tódô hekteng miwes. 32Senged se yóm sotu tau mius bè yó. Tau semfu gu bè yóm tehe Libay, kem tau gel tmóbóng bè Gónô Dwata. Tonen yóm dumuhen Ju masà bè yó, mom senyaten, ne tódô bud hekteng miwes se kun.

33Là legenen bè yó, bud sut bè yó sotu tau, bede là Juhen, tau lemwót bè Samarya se kun. Timbow tonen yóm tau masà bè lan yó, ya tey kkoduhen du. 34Tódô hekteng mógów ebéléen anì bnulungen ne hnungesen yó kem halien, ominen mkay du eta yóm kudaen, ne hgefeten ebè yóm gónô gónó le gel mefet yó kem tau mógów, ne bè yó gónóhen semgifà du. 35Tikóng hayahen bè yó, wen filak blayen yóm tau fun gónô, ne monen mò du, ‘Fen sen-gifaem dou nim tau ni. Ne ke bud wen filak gamaem béléen, tenlesu béléem he kesoke bud semfulék.’ ”

36Ne yó bud mon Jisas ebè yóm tau smólók yó, monen, “Bè kóm kehegnóm du, mahi du de bè ni kem tlu tau tulónu kóm ni yóm dmumu du yóm tau bnoug yó kem tau mnagaw?”

37Ne mon yó sem tau tmolok hlau yó koni, “Yóm tau fen kmodu du, tu se dmumu du.”

Ne yó mon Jisas mò du, “Yó se mò dnalangem.”

Kauy Jisas kul le Marta ne Midi

38Bud le hlós mógów le Jisas ne yó kem gel lemolò du. Sut le bè yóm sotu benwu udì gónóhen nô yóm sotu libun boluyen Marta, ne tey khódóhen kul bè gónóen. 39Ne wen se twolihen boluyen Midi. Lemwót ke Midi kun, fen myón klohok ti Jisas, hnungolen yóm toloken. 40Bong ke Marta kun fen hentifesen kmò kehkenen kul. Tikóng deng tmakas, yó gónón mógów ebè Jisas, monen mò du, “Ó Sér, là hendemem du kô yóm klaen dù dumuhu hemtifes ken bélê ye? Dókem do edini Midi mò tmóbóng do.”

41Okóm bnalà Jisas, monen, “Tey Marta, tey dê lenóngón nawam se kóm. 42Tek sotu se yóm bong muhen, duhen yóm deng kun nélék Midi, yóm laen dù bud gemwa du béléen.”

Currently Selected:

Luk 10: tbl

Highlight

Copy