Tekang Kbuten 35

Yóm bud kolu Dwata ke Jakub bè Bétél

1Yó udél Dwata ebè Jakub, monen, “Ó Jakub, géhéli mili ebè Bétél ne menwuhi bè yó. Budi semsodò botu mò gónóm demsù ebéléu bè yó. Ou se yóm Dwata tehe hegfan béléem bè yóm tehe kehlóyem hlayuk bè twoguhem Iso.”

2Tahu se, lemwót Jakub ne yó udélen ebè yó kem fes lówóhen ne ebè kdê yó kem tau nô béléen, monen, “Gotu kó ye yóm kdéen dwata lennged lemwót bè tólóng benwu deng nô bélê ye. Dyo ye anì mólós ye ne lesek ye yóm nes mólós mò gónó ye hegfan du tek són Dwata yóm hol nimón ye. 3Mdó tekuy bè ni,” mon Jakub, “ne mógów tekuy etu bè Bétél. Bè yó gónóhu mò du yóm mò gónó demsù ebè Dwata, yóm Dwata tehe tmóbóng dou bè yóm tehe kwen gfau, ne deng eles tendo nô béléu snéen kihu gónóhu e solu.”

4Tahu se, gotu blay le ke Jakub kdéen dwata lennged nô bélê le lemwót bè tólóng benwu ne kdê yó kem tdé le, gotu lebeng Jakub lu laan yóm koyu boluyen ok moni bè Sékém. 5Bè yóm kdó Jakub ne yó kem ngaen logi bè yó bè Sékém, là kô ktes le kul yó kem tau hmilol bè yó abay se wen tey klikò le lemwót bè Dwata. 6Bè yóm kewót le Jakub ne yó kem tauhen, ngang le mógów efet le kól bè yóm benwu boluyen Lus. Ne ni kmoen ni, yó boluyen yóm benwu yó, Bétél, benwu snakuf Kanan. 7Omin Jakub semsodò botu bè yó mò gónón demsù ebè Dwata ne yó boluyen du yóm benwu yó, “Bétél, kun benwu Dwata,” abay se bè yó tehe gónó Dwata hegfan béléen bè yóm tehe kehlóyen hlayuk bè twoguhen.

8Bè yóm knô le bè yó bè Bétél, matay Dibura, yóm libun tehe gel semgyok ke Ribika#35:8 Yóm Ribika tulónen ni, du se yê Jakub. lemwót bè hanà kudien. Ne lebeng le laan yóm koyu ok fi leged Bétél. Ne yó boluy le du yóm koyu gónón lebeng yó, “Ok Gónó Langag.”

9Bè yóm deng kulék Jakub gu bè Misuputamya yó, bud hegfan béléen Dwata ne bud wen oluhen du. 10Yó mon Dwata mò du, “Jakub se yóm boluyem, okóm lenwóten ni yó tles boluyem Israél.” Duhen yó, yó tles boluy Dwata ke Jakub Israél.

11Ne yó mon Dwata mò du, “Ou se yóm Dwata laen dù là gbeken du. Holi mból anì baling ye sotu but benwu alì mbegel efet dê dumu but tau ne wen kem tau hol geta semfu gu béléem. 12Yóm benwu ni, deng tehe hfunu ke téméem Abraham ne maem Isak, ne ni bud hfunu kóm snéen dalang se yó kem angat semfu gu béléem.” 13Timbow deng kudél Dwata ebè Jakub, ominen tmagak du.

14Bè yóm gónó Dwata mudél ebéléen yó koni, wen botu hteg Jakub mò heftulón du bè nawahen. Ne wen yóm gel ninum le ne yóm hnolo ulib twélen tahen mò gónón hetfing du ebè Dwata. 15Yó boluyen du yóm benwu yó, Bétél.

Katay Rakél

16Kewót le Jakub bè yó bè Bétél ne yó kem fes lówóhen, hlós le ebè Ifrat. Bè yóm igò le tolo mayuk bè Ifrat he, kmuleng blutut Rakél ne mima yóm ksut blututen. 17Timbow deng alì sidek kdesen yóm blututen, yó monen mò du yóm libun mwa ngà, “Béi hlikò, Rakél, bud logi yóm ngaem.” 18Okóm yó hol són alu udél Rakél, monen, “Yó boluyu du yóm ngà ni, Binoni.”#35:18a Yó lanen bè udél Hibru yóm boluy Binoni, “ngà bemlay klangag.” Ominen yó matay. Okóm yó kun boluy du maen, Bindyamin.#35:18b Yó lanen bè udél Hibru yóm boluy Bindyamin, “ngà mò sigel kwananu.”Bè yóm katay Rakél, lebeng le bè yóm kilil lan mógów ebè Ifrat. Yóm kmoen ni, yó boluyen yóm benwu yó, Bitlihim. 19Bè yóm katay Rakél, lebeng le bè yóm kilil lan mógów ebè Ifrat. Yóm kmoen ni, yó boluyen yóm benwu yó, Bitlihim. 20Omin Jakub hemdà sotu botu bè yó mò heftulón du bè nawan. Efet yóm kmoen ni, yóm botu yó ilô yóm gónón lebeng Rakél.

21Bud kewót le Jakub bè yó, slong le bud kmamfù deng le kól bè yóm benwu sentu yóm gónô geta boluyen Idér.

Yó kem ngà Jakub

22Bè yóm knô le Jakub bè yó bè Idér, lemwót Rubén sentungóen bè yóm sotu libun nmu maen boluyen Bilha. Ya tey sidek kbut Jakub bè yóm kungolen du. Yóm Jakub, wen sfolò lewu ngaen logi.

23Yó ngaen bè Liya, duhen Rubén, du se hol ngà Jakub twogu, ominen tmodol Simyun ne Libay ne Juda ne Isakar ne Sibulun.

24Yó ngaen bè Rakél, duhen Jusif ne Bindyamin.

25Yó ngaen bè Bilha yóm hesek Rakél, duhen Dan ne Naftali.

26Yó ngaen bè Silpa yóm hesek Liya, duhen Gad ne Asér. Ni kem ngà logi ni, tehe le sut bè Misuputamya.

Katay Isak

27Kewót Jakub bè yó mulék ebè maen Isak bè Mamri, yóm benwu moni bè Hibron. Yó se yóm benwu hol kul gónó menwu le Abraham ne Isak. 28Yó kegenen tau Isak, botong lematu bud wolu folò halayen. Tey deng gsengel ktuhahen bè yóm katayen. 29Ne lebeng yó kem lewu ngaen, Iso ne Jakub.

Currently Selected:

Tekang Kbuten 35: tbl

Highlight

Copy