Tekang Kbuten 34

Yóm gfà Dina

1Wen sotu ngà Liya libun bè Jakub boluyen Dina. Sotu kdaw, lemwót Dina nauyen yó kem libun bè yó bè Kanan. 2Tikóng ton Sékém yóm ngà Hamor, yóm tau hol geta bè yó kem tau Hibayt tódô kenfóen, ominen gmaga semtungô du. 3Okóm tey kbong nawa Sékém ke Dina yóm ngà Jakub libun yó. Tey kehlinggelen stulón du anì wen nawa Dina ebéléen se kun. 4Duhen yó, stulón ke maen Sékém, monen mò du, “Ó Mà, yake nwahem dou yóm libun ni mò yehenu.”

5Ne bè yóm kungol Jakub du yóm là bud kólós Dina lemwót bè yóm deng nmò Sékém béléen, laen kô dù tagad nmoen, nahen nangat kkól yó kem ngaen logi, abay se tolo le hótób safì. 6Lemwót Hamor mà Sékém, mógów ebè Jakub anì stulón le gbak bè yó kem ngà le. Bè yóm kkól Hamor bè yó, kól le se kul yó kem ngà Jakub logi gu le bè yóm gónó le hótób ógóf. 7Timbow gungol le nim gfà Dina ni, ya tey sidek kegbeng lem le ne tey kebut le lemwót bè yóm nmò Sékém bè yóm libun le, abay se yóm nmò Sékém yó, henyaken yó kem fes lówó Jakub mlan bè yóm kmoen du yóm alì sidek bélê le.

8Okóm yó mon Hamor mò kul, monen, “Hol tahu niwol ngau Sékém yóm ngaem libun. Ke yó dum hyu bélê ye, hyehen ye du. 9Bong hyu se ke gotu hyehen ye bélê me yó kem kuy ngà libun, ne bud hyehen me lu bélê ye snéen yó kem kum ngà libun. 10Gbek ye menwu lem blóng me, balù kihu benwu nóyô ye. Menwu ye dini, ne gbek ye mò udél swa bélê me snéen, ne gbek ye ma tonok bélê me.”

11Yó bud udél Sékém se kun bè mà Dina ne bè yó kem logihen, monen, “Ke yó dum hyu bélê ye, hyehen ye dou ne Dina, ne balù kihu hni ye béléu, angat blayu kuy. 12Balù nô kbong yóm sunggud hni ye béléu, angat gotu blayu kuy, syan ke hyehen ye dou yóm libun yó.”

13Okóm yó nmò yó kem logi Dina, snukat le Sékém lewu le maen Hamor lemwót bè yóm deng nmò Sékém bè libun le. 14Yó mon le mò kul le Sékém, “Là gbek me du ke tô hyehen me yóm kum libun bè yóm logi là tnulien. Ke yó nmò me, hol kenyak bong bélê me. 15Okóm són gónó me móyô kóm, ke ket logi bélê ye, gotu le htulì, lómón yóm kum. 16Omin me yó angat hyehen du kuy yó kem ngà me libun, ne angat bud hyehen ye bélê me se yó kem kuy ngà libun, ne menwu me lem blóng ye anì baling tekuy ssotu. 17Okóm ke là hnungol ye kum, ne ke là htulì ye, nwa me yóm ngà me libun, ne mdó me.”

18Tahu se, henmóyô le Hamor lewu le Sékém yóm hlolò le kul yó. 19Lemwót bè yóm alì kbong nawa Sékém ke Dina, tódô kendel nmoen yóm hmò le du yó kem logi Dina. Yóm Sékém ni, du se hol nadat yóm kdê fes lówóhen. 20Duhen yó, lemwót Hamor lewu le Sékém, mógów le ebè bak tikeb yóm syudad le, stulón le bè yó kem tau malak bè yóm syudad yó, mon le mò kul, 21“Ni kem tau ni, hulung le mit swè bélê me. Hnô tekuy lu bè ni ne lem blóng tekuy, ne gbek le mò udél swa bélê tekuy. Yakà teyen lamang nim tonok tekuy mò gónó le nô. Gbek tekuy myehen yó kem ngà le libun, ne gbek le se myehen bè yó kem ngà tekuy libun. 22Okóm són gónó le móyô nô lem blóng tekuy ne ssotu bélê te ke lolò tekuy yóm hlolò le, duhen ke gotu tekuy htulì yóm kut kwen, lómón yóm kul. 23Ke nmò tekuy nim ni, kdê yó kem ógóf le ne kdê kem nfun le, angat tekuy funen. Henmóyô tekuy ne nim hlolò le kut ni anì nô le lem blóng tekuy.”

24Tahu se, móyô le, ne gotu le htulì yóm kdéen logi bélê le. 25Okóm bè yóm getluhen kdaw yóm igoen tolo hdék yóm halì le, lemwót yó kem lewu ngà Jakub logi Simyun ne Libay, nit le sudeng le, ne tódô le husek lem yóm syudad, ne laen kô dù tau hemdem du ke wen sidek nmò le. Gotu hnatay le yóm kdê logi bè yó, 26gomong hnatay le Hamor lewu le Sékém. Omin le ma ke Dina bè gónô Sékém, ne nwit le mulék. 27Omin le bud husek se kul yó kem dumu ngà Jakub logi, gotu negef le kdê yó kem kimu nô lem yóm syudad yó lemwót bè yóm là bud kólós Dina, yóm libun le. 28Gotu nwa le yóm kdê ubiha le ne kem safì le ne kem kudà asnu le. Bud nwa le snéen kdê yó kem nô lem syudad le, dalang se yóm kdê ton le ditu bè yóm tonok gónó le mò hulu. 29Gotu negef le yóm kdê kendengen le, gomong kem yehen le ne kem ngà le, kkólen bè yó kem kdê nô lem gónô le, gotu negef le.

30Bè yóm ketngón Jakub du yóm deng nmò le Simyun ne Libay, yó monen mò kul, “Olo ye mit dou sbeweg lem nim benwu ni. Nim nmò ye ni, lómón ke ou yóm nmò ye boo bolok bè yó kem tau bè nim benwu ni bè kem tau Kanan ne bè kem tau Pirisayt. Ke ssotu nawa le mundug tekuy, ngem kà gotu hnatay le tekuy igò tekuy là hol wen.”

31Okóm yó balà le ke mà le, mon le, “Ilóem tódô bayà tekuy ne kô ke nmò le libun hdóyón yóm libun me?”

Currently Selected:

Tekang Kbuten 34: tbl

Highlight

Copy