GENESIS 40
40
Yosep manarang riman nupin kare oloh tahanan
1Pire-pire katahie limbah due biti pelayan ain raja iete oloh je tukang menyadia taloh ihop tuntang oloh je tukang manyadia panginan mawi kasalan dengan raja. 2Te raja balait dengan due biti pelayae te, 3palus ewen inamean akan huang penjara intu human kapalan kare oloh je manjaga istana, intu eka Yosep inahan. 4Tahi kea ewen huang penjara te. Kapalan kare oloh je manjaga istana manyoho Yosep manantuani ewen due te.
5Hong ije alem oloh je tukang manyadia taloh ihop tuntang je manyadia panginan genep bitie uras nupi. Riman nupin ewen te dia sama. 6Metoh Yosep dumah talih ewen hanjewu jewue, ewen gitan kapehe awi pehe atei. 7Palus ie misek, “Mbuhen kare pahari paham susah andau toh?”
8Tombah ewen, “Alem endau ikei nupi, tuntang jaton ije je katawan rimae.”
Koan Yosep, “Baya Hatalla bewei je mawi oloh tau manarang riman nupi. Keleh sanan nupim te.”
9Oloh je tukang manyadia taloh ihop te hamauh, “Huang nupi te aku mite aton ije batang anggor intu hila baungku. 10Batang anggor te aton telo edae. Sana kare edae mandawen, balalu mangambang, palus buae masak. 11Metoh te aku kanjeran mimbing cangkir je hapan raja mihop, palus induangku bua anggor te tuntang ihamisku akan huang cangkir raja balalu inyarongangku akae.”
12Yosep hamauh, “Toh ie rimae: Telo edan te rimae telo andau. 13Hong telo andau tinai raja kareh malapas ikau. Ie kareh mampun ikau tuntang malian ikau akan gawim je solake. 14Tapi ingat aku amon pambelom ayum jari bahalap. Dohop nyampai tahiu aku akan raja, mangat ie malapas aku bara penjara toh. 15Awi, sapunae bihin aku inamput bara lewun oloh Ibrani. Tuntang intu hetoh kea, intu Misir toh, dia puji aku mawi taloh papa sampai patut inamean akan huang penjara.”
16Limbah oloh je tukang manyadia panginan te katawan je riman nupin oloh je tukang manyadia taloh ihop te bahalap, te ie hamauh dengan Yosep, “Aku nupi kea, aku mite aton telo karanjang rote je hasusun hunjun takolokku. 17Intu karanjang je pangkahunjun aton pire-pire macam wadai akan raja. Tapi kare burong dumah kuman wadai te.”
18Tombah Yosep, “Toh riman nupi te: Telo karanjang te rimae telo andau. 19Huang telo andau toh raja kareh manyoho oloh manetek kolokm palus mangkuak hantum intu ije tihang. Kare burong kareh kuman isim.”
20Telo andau limbah te iete andau raja hapus nyeloe. Ie mawi pesta hai akan hapus oloh ayue. Ie manyoho uka oloh je tukang manyadia taloh ihop tuntang oloh je tukang manyadia taloh kinan impalua bara penjara palus iimbit intu taharep hapus oloh istana. 21Oloh je tukang manyadia taloh ihop ilian akan gawie je solake. 22Tapi oloh je tukang manyadia panginan ihukum matei. Uras taloh te manjadi tumon auh je insanan Yosep. 23Tapi oloh je tukang manyadia taloh ihop te dia mingat Yosep tinai. Ie kalapean sama sinde dengan Yosep.
Currently Selected:
GENESIS 40: NIJ
Highlight
Share
Copy
Want to have your highlights saved across all your devices? Sign up or sign in
