GENESIS 39

Yosep tuntang sawan Potipar

1Yosep jari imbit akan Misir awi kare oloh Ismael te. Ie injual akan Potipar, ije biti pagawai ain raja, kapalan kare oloh je manjaga Istana. 2#Gaw. Ras. 7:9 Tuhan mandohop Yosep sampai ie harajur mandino hasil huang kare gawie. Ie melai intu human tuan aie, oloh Misir te. 3Tuan aie mite je Tuhan mandohop Yosep, awi te Yosep mandino hasil huang kare taloh je iawie. 4Potipar sanang dengan Yosep palus mangkat ie jadi rewar humae. Palus inyohoe Yosep manantuani hapus humae tuntang kare ramoe. 5Bara metoh te, tagal Yosep, Tuhan mamberkat human oloh Misir te; tamput kea uras taloh handiai je ayue buah berkat, aloh je intu huma atawa je intu tana. 6Uras taloh je ayun Potipar imercayae dengan Yosep. Tumon te Potipar samasinde dia paduli tahiu humae, suali tahiu panginae.

Yosep gagah hayak bakena. 7Limbah pire-pire katahie, sawan Potipar nampara nahuang dengan Yosep. Oloh tabela te imbite hinje batiroh. 8Yosep dia maku hayak hamauh dengae, “Ela, Nyonya, tuan Potipar jari mamercaya uras panataue dengangku. Ie dia paduli en-en tinai intu humae toh. 9Intu hetoh kuasangku sama kahaie dengan kuasae. Jaton ije je dia inyarahe akangku, suali Nyonya. Dia baka aku tau mawi gawi papa tumon te tuntang badosa dengan Hatalla.” 10Aloh sawan Potipar ngatau Yosep sining andau, oloh tabela te tetep dia maku batiroh dengae.

11Sinde andau metoh Yosep tame akan huang huma handak nguan gawie jaton ije biti oloh intu hete. 12Sawan Potipar manjijit Yosep intu jubahe tuntang hamauh, “Ayo itah hinje batiroh.” Yosep bagagah tuntang olih lapas, palus hadari balua, tapi jubahe tapalihi intu lengen oloh bawi te. 13Metoh sawan Potipar mite je Yosep jari hadari tuntang jubahe tapalihi, 14ie mantehau kare reware hayak hamauh, “Item! oloh Ibrani je iimbit banangku akan huma toh, manawah itah. Ie tame kamarku tuntang handak hinje aku, tapi aku mangkariak hai auhku. 15Metoh mahining tangkariaku, ie hadari balua tuntang jubahe tapalihi.”

16Palus sawan Potipar mingkes jubah te sampai banae buli. 17Metoh banae buli, ie balalu mansuman taloh te akae, koae, “Oloh Ibrani je imbitm akan hetoh te, tame akan huang kamar manawah aku. 18Tapi metoh aku mangkariak, ie hadari balua tuntang jubahe tapalihi.”

19Potipar paham balait. 20Ie bajeleng manyoho manyingkap Yosep tuntang inamean akan huang penjara, eka kare tahanan raja ingurong. 21#Gaw. Ras. 7:9 Tapi Tuhan mandohop Yosep tuntang harajur sinta ie, sampai kapala penjara rajin dengae. 22Yosep imercaya awie uka maharagu kare oloh tahanan je beken tuntang manantuani hapus gawi huang penjara te. 23Kapala penjara te dia tinai manantuani kare taloh je jari imercaya dengan Yosep. Awi Tuhan mandohop Yosep sampai ie tau mandino hasil huang kare gawie.

Currently Selected:

GENESIS 39: NIJ

Highlight

Copy