GENESIS 38

Yuda tuntang Tamar

1Kira-kira metoh te Yuda mindah malihi kare paharie palus melai omba dengan Hira, ije biti oloh hatue bara lewu Adulam. 2Hete Yuda hakasene dengan ije biti bawin oloh Kanaan, anak Sua, balalu ewen kawin. 3Anak ewen je solake hatue, inenga arae Er awi bapae. 4Anake je kadue, hatue kea, inenga arae Onan. 5Anak je katelo mahin hatue, inenga arae Sela. Metoh Sela inakan, Yuda kanjerae intu Kesib.

6Yuda mangawin Er, anake je bakas dengan Tamar. 7Er te papa hadate, sampai Tuhan balait dengae tuntang mampateie. 8Palus Yuda hamauh dengan Onan andi Er, “Talih balo ain kakam, pahinje arepm dengae. Lalus kapatutm dengae, awi ikau andi banae. Tumon te kakam tau mandino turonan.” 9Tapi Onan katawan je kare anake kareh dia akae. Awi te genep ie marantep balo ain kakae te, ingana kiha akan hila luar, mangat kakae dia tau dinon turonan. 10Gawi te mawi kalait Tuhan, Tuhan mampatei ie kea. 11Palus Yuda hamauh dengan Tamar manantue te, “Lius buli akan human oloh bakasm. Keleh melai hete sampai anakku Sela hai.” Ie hamauh kalote awi mikeh ela-ela Sela kareh impatei Tuhan kea, tumon kadadue kakae te. Tamar palus buli akan human oloh bakase.

12Pire-pire katahie limbah te sawan Yuda matei. Limbah katika manatum lepah, Yuda mimbit Hira, sobate bara Adulam te, haguet akan Timna, eka kare tabirie inggunting bulue. 13Tamar dinon kabar je Yuda empoe handak dumah akan Timna manggunting bulun kare tabirie. 14Palus ie manakiri pakaian baloe dengan pakaian beken. Baue inyanduronge, balalu ie mondok intu lawang lewu Enaim, intu jalan manintu Timna. Tamar katawan toto je Sela, anak Yuda je busu, jari hai, tapi ie hindai kawin dengan anak tabela te.

15Metoh Yuda mite Tamar, nyewute oloh bawi te ije biti lontei, awi baue inyanduronge. 16Palus Yuda manokepe intu saran jalan te, balalu hamauh, “Pire je lakum?” Ie dia katawan je oloh bawi te manatue kabuat.

Tamar tombah, “Mana ikau ih madoe”

17Yuda hamauh tinai, “Aku handak manenga akam ije kongan kambing tabela.”

Tombah Tamar, “Tau, asal aton sanda, sampai tuan mangirim kambing te.”

18“Andau narai?” Yuda misek.

Tombah Tamar, “Tenga akangku cap ayum dengan talie tuntang tongkeh je aton dengam kau.” Yuda manenga kare taloh te akae. Palus ewen hinje, te Tamar batihi. 19Tamar buli akan humae tuntang mengkak sandurong baue, balalu mangkepan pakaian baloe tinai.

20Pire-pire katahie limbah te Yuda manyoho Hira, sobate, magah kambing te palus balaku lian kare taloh je inengae kilau sanda. Tapi Hira dia olih manyondau oloh bawi te. 21Hira mise-misek oloh intu Enaim, “Intu kueh lontei je bahut mentai intu saran jalan toh?”

“Dia puji aton lontei intu hetoh,” tombah ewen.

22Hira palus buli manalih Yuda tuntang hamauh, “Aku dia olih sondau oloh bawi te. Tumon auh kare oloh hete, dia puji aton lontei intu hete.”

23Koan Yuda, “Nauh kare ramo te intu ie, asal itah dia impahawen. Aku jari handak mambayar ie, tapi ikau dia olih sondau ie.”

24Kira-kira telo bulan limbah te Yuda dinon kabar je Tamar manantue jadi lontei tuntang jari batihi.

Balalu Yuda hamauh, “Duan ie palus nusul sampai matei!”

25Metoh Tamar iimbit balua, ie mangirim peteh akan empoe, koae, “Aku jari impatihi awi oloh je tempon kare taloh toh. Riksa eweh tempon cap dengan talie tuntang tongkeh toh.”

26Yuda kasene kare ramo te palus hamauh, “Oloh bawi toh dia bara kasalan. Aku dia malalus kapatutku dengae. Sapunae aku mangawin ie dengan anakku Sela.” Yuda dia puji tinai marantep Tamar.

27Metoh jari sampai katikae Tamar luas, ie manak anak tatop due. 28Metoh ie luas, ije bara anak te moloh lengee, palus bidan mimbing lengee tuntang mametenge hapan lawai bahandang. Koae, “Anak toh inakan labih helo.” 29Tapi awau te manyintak lengee haluli, palus awau je ijee tinai inakan labih helo. Bidan hamauh, “Tumon te ampim hajajuan arepm balua!” Anake je inakan helo te inenga arae Peres.#38:29: Peres: Riman aran toh huang basa Ibrani iete: “manjojo balua”. 30Limbah te harue andie je lengee aton lawai bahandang te inakan. Ie inenga arae Serah.

Currently Selected:

GENESIS 38: NIJ

Highlight

Copy