GENESIS 41

Yosep manarang riman kare nupin raja Misir

1Limbah due nyelo tinai, raja Misir nupi, ie mangkeme arepe mendeng intu saran Sungei Nil. 2Salenga gitae uju kongan sapi je basepu-seput tuntang halinyau ampin upake, balua bara sungei te palus kuman oru intu saran sungei te. 3Limbah te uju sapi je beken lembut tinai, kare meto te paringkong toto tuntang batisa upak ngambit tulange ih. Kare sapi je paringkong te mendeng habambai dengan sapi je baseput, intu saran sungei te. 4Limbah te kare sapi je paringkong te kuman kare sapi je baseput nah. Palus raja misik bara tirohe. 5Limbah te ie tapatiroh palus nupi tinai. Hong nupie te ie mite uju kapating gandom je hasien tuntang masa-masak lembut bara ije kabatang. 6Limbah te lembut tinai uju kapating gandom je beken, mapi-mapis tuntang keang kambareot awi riwut padang pasir. 7Palus pating gandom je mapis te manelen kauju-uju pating je hasien nah. Limbah te raja tapisik hayak mangatawan je ie nupi. 8#Dan. 2:2 Hanjewue tinai raja mangkeme ruga-rugap usoke, tagal te ie manyoho oloh mantehau kakare tabit tuntang oloh pangaji intu Misir. Palus ie manyarita nupie akan ewen. Tapi jaton ije oloh je tau manarang riman nupi te.

9Limbah te oloh je tukang manyadia taloh ihop hamauh dengan raja, “Andau toh aku patut mangaku kasalangku. 10Bihin Raja balait dengan oloh je tukang manyadia taloh kinan tuntang dengangku. Palus ikei inamean akan huang penjara intu human kapalan kare oloh je manjaga istana. 11Huang ije alem ikei due nupi; nupi te dia sama rimae. 12Ije oloh tabela bangsa Ibrani aton intu hete dengan ikei kea. Ie pelayan ain kapalan oloh je manjaga istana te. Ikei manyarita nupin ikei akae, palus ie manarang riman nupi te. 13Kare taloh te uras manjadi tumon je insumae iete: Raja malian aku akan gawingku je helo, tapi mahukum matei oloh je tukang manyadia panginan.”

14Balalu raja manyoho oloh manduan Yosep. Ie bajeleng mampalua Yosep bara penjara. Limbah Yosep bagunting tuntang manakiri pakaiae, ie manaharep raja. 15Koan raja dengae, “Aku jari nupi, tuntang jaton ije biti oloh je tau manarang rimae. Aton je mangabar akangku je ikau toh tau manarang riman nupi.”

16Yosep tombah, “Dia ie aku, tempongku, tapi Hatalla je akan mansanan rimae je buah.”

17Palus raja hamauh, “Aku nupi je aku mendeng intu saran Sungei Nil. 18Balalu lembut bara sungei te uju sapi je basepu-seput tuntang ampin upake halinyau, palus kuman oru intu saran sungei te. 19Limbah te uju sapi je beken lembut tinai; kare meto te uras paringkong toto, tisa upak ngambit tulange ih. Dia puji aku mite sapi tumon te ampin kapapae hong hapus tanah Misir. 20Kare sapi je paringkong te kuman lepah lingis uju kongan sapi je baseput nah. 21Tapi limbah te kare sapi je paringkong te magon tetep paringkong. Palus aku tapisik bara tirohku. 22Limbah te aku tapatiroh tuntang nupi tinai. Aku mite uju pating gandom je hasien tuntang masak, lembut bara ije kabatang. 23Palus lembut kea uju pating gandom je mapis hayak kambareot keang awi riwut padang pasir. 24Pating gandom je mapis te manelen pating gandom je hasien nah. Aku jari manyarita kadadue nupingku te akan kare tabit, tapi jaton ije je tau manarang rimae.”

25Palus koan Yosep dengan raja, “Kadadue nupi te sama rimae; Hatalla jari mansanan akan tempongku narai taloh je akan ilaluse. 26Uju sapi je baseput te iete uju nyelo. Uju pating gandom je hasien te jete uju nyelo kea. Kadaduee te sama rimae. 27Uju sapi je paringkong, je lembut limbah te, hayak uju pating gandom je mapis tuntang je kambareot keang awi riwut padang pasir te iete wayah lau katahin uju nyelo. 28Kilau jari insanangku akan tempongku, Hatalla jari mamparahan akan tempongku narai taloh je handak ilaluse. 29Kareh dumah uju nyelo wayah kasanang akan hapus tanah Misir. 30-31Limbah te dumah tinai uju nyelo wayah lau. Palus wayah kasanang te kareh ingalapean samasinde, awi wayah lau te kareh paham toto, sampai jaton tinai gitan ampin kare awan kasiwoh petak. 32Nupin tempongku manjadi handue, jete rima je taloh te jari inukas awi Hatalla. Hatalla kareh malaluse bajeleng.

33Tagal te, keleh tempongku mintih ije biti oloh je pintar tuntang harati tuntang manenga akae kuasa hapan marentah lewu toh. 34-35Tempongku patut kea mangkat kare pagawai je beken. Ewen kea inenga kuasa mangat manduan ije bara lime bagian hasil getem gandom katahin uju nyelo wayah kasanang te. Hasil te iingkes intu kare lewu tuntang ihaga awi ewen. 36Gandom te kareh indu bakal panginan katahin uju nyelo wayah lau je kareh dumah hong tanah Misir. Tumon te oloh lewu dia akan matei balau.”

Yosep iangkat jadi gubernur intu Misir

37Raja tuntang kare pagawai ayue mangilak tirok Yosep te. 38Palus raja hamauh dengan ewen, “Dia baka olih itah sondau oloh beken je labih bahalap bara Yosep, awi ie impahayak awi roh Hatalla.” 39Raja hamauh dengan Yosep, “Hatalla jari mansanan kakare taloh toh akam. Jadi tarang je ikau labih pintar tuntang harati bara eweh bewei. 40#Gaw. Ras. 7:10 Aku handak mangkat ikau jadi gubernur. Hapus oloh tanahku handak manumon auh parentahm. Baya aku ih je labih kuasa bara ikau.” 41-42#Dan. 5:29 Limbah te raja mengkak tisin bara tunjoke je iukir cap karajaan. Jete ingkepae hong tunjok Yosep hayak hamauh, “Aku mangkat ikau jadi gubernur hapus tanah Misir.” Limbah te ie mangkepan intu Yosep ije jubah baputi tuntang lamos. Ie mangkepan ije rantai amas intu uyat Yosep. 43Palus inengae akan Yosep kareta kerajaan je nomor due hapae. Tantara je mahormat raja mananjong hila baun kareta te hayak mangkariak harajur, “Awas! Tenga jalan! Tenga jalan!” Tumon te Yosep ilantik jadi gubernur akan hapus tanah Misir. 44Koan raja dengae, “Aku toh raja, aku mansanan je luar bara parentahm jaton ije oloh hong hapus tanah Misir je tau mawi taloh en-en.” 45-46Palus raja manenga ije aran Misir akan Yosep, iete Sapnat-Paaneah. Ie kea manenga akae ije biti oloh bawi akan sawae, arae Asnat, anak Potipera, imam intu lewu Heliopolis.

Yosep telo puluh nyelo umure metoh ie nampara bagawi akan raja Misir. Palus Yosep haguet bara istana raja hayak mangaliling hapus karajaan. 47Hong katahin uju nyelo oloh are paham dinon malan, petak manenga hasil getem je malabien karee. 48Gandom te imumpong Yosep palus iingkes intu kare lepau lewu. Intu genep lewu te ie mingkes kare gandom hasil kare tana kaliling tanah te. 49gandom je imumponge te kalote karee sampai Yosep tende manarimae, awi karee kilau pasir intu saran tasik.

50Helo bara wayah lau te dumah, Asnat sawan Yosep manak due biti anak hatue. 51Koan Yosep, “Hatalla jari mawi aku kalapean dengan kare kasusahku tuntang dengan human bapaku.” Tagal te ie manggare anake je solake “Manase”.#41:51: Manase: Riman aran toh huang basa Ibrani iete: “mawi iete kalapean”. 52Ie hamauh tinai, “Hatalla jari manenga kare anak akangku hong wayah kasusahku.” Balalu ie manggare anake je kadue “Epraim”.#41:52: Epraim: Aran toh sama auh sewute dengan kotak Ibrani je rimae: “manenga kare anak”.

53Uju nyelo wayah kasanang je jari ingkeme oloh lewu Misir te hapus. 54#Gaw. Ras. 7:11 Te dumah tinai uju nyelo wayah lau, hasaroroi tumon je jari insanan Yosep. Oloh hapus kalunen buah lau paham, tapi hong hapus tanah Misir aton are gudang panginan. 55#Yoh. 2:5 Metoh oloh Misir nampara mangkeme lau, ewen balaku panginan bara raja. Palus raja manyoho ewen manalih Yosep tuntang manumon taloh je kareh irentah Yosep akan ewen. 56Metoh lau te sasar paham hayak tayap hapus tanah, Yosep muap kakare gudang tuntang manjual gandom akan oloh Misir. 57Bara hapus kalunen kare oloh dumah akan Misir uka mamili gandom bara Yosep, awi lau te paham babehat hete-hete.

Currently Selected:

GENESIS 41: NIJ

Highlight

Copy