EKSODUS 15

Nyanyin Moses

1 # Pang. 15:3 Palus Moses tuntang kare oloh Israel manyanyi nyanyi toh hapa manara aran Tuhan,

“Aku handak manyanyi akan Tuhan,

tagal Ie jari manang hai.

Uras kuda dengan oloh je manongkange

injakahe akan tasik.

2 # Mas. 118:14; Yes. 12:2 Tuhan pandohopku je abas;

ie je manyalamat aku,

Ie Hatallangku, aku handak manara aran Aie,

Hatalla je inyembah tato hiangku,

aku mampahai Ie.

3 Tuhan te pangkalima je gagah,

Tuhan, jete aran Aie.

4Tantara Misir tuntang kakare karetae

injakahe akan tasik.

Kare perwira je paling gagah

leteng intu Tasik Raruju.

5Ewen inelen awi tasik je handalem,

tuntang kilau batu leteng akan pendae.

6Kaabas Aim paham, mampahengan o Tuhan,

Ikau mawi musoh lepah lingis.

7Hapan kuasan Aim je hai

Ikau mambinasa kakare je malawan Ikau.

Kasangit Aim hagandang sama kilau apui

tuntang mangehu ewen sama kilau tampilai.

8Tasik ihimon Awim, danum hagalombang gantong,

mendeng tagap kilau dinding,

sampai penda tasik tau ihoroi.

9Koan musoh, ‘Ewen kareh inggoangku tuntang inyingkapku,

injawutku padangku, tuntang impalomosku ewen.

Palus kakare ramon ewen irampasku,

imbagi-bagiku tuntang

aku mangkeme kamangate sampai peda.’

10Tapi Tuhan baya hapan sinde nahaseng

bewei ie mampadumah andau je basial akan Misir.

Ewen leteng kilau timah je babehat huang danum hai je hamok hagalombang.

11Hatalla je kueh je tau mananding Ikau,

o Tuhan je pangkahai tuntang barasih?

Eweh tau mawi taloh heran

tuntang gawi hai kilau Tuhan?

12Ikau mantajok lengen Aim gantau,

palus lilap musoh inelen petak.

13Ikau mimbit bangsa je jari inyalamat Awim toh,

awi Ikau baketep dengan janjin Awim.

Hapan kaabas hai ewen ingalindong Awim

tuntang ingagalan Aim akan tanah Ayum je barasih.

14Kare bangsa mahining tuntang hagenjeh;

oloh Pilistin tuntang kare kapal Edom tarewen.

15Oloh Moab je gagah harujut,

oloh Kanaan mikeh.

16Ewen paham mikeh

mite kaabas Tuhan.

Metoh ungkup Ayum mahalau, musoh dia olih manahan;

palus liwus bangsa je jari imbebas Awim.

17Palus Israel iagah Awim

akan eka je iintih Awim akan eka Ikau melai.

Ewen manetep intu bukit Ayum je barasih,

intu huma je imangun Awim kabuat.

18Ikau je Tuhan, Raja,

je marentah palus katatahie.”

Nyanyin Miryam

19Katika oloh Israel dimpah tasik, ewen mananjong intu petak je teah. Tapi metoh kare kareta Misir dengan kuda tuntang oloh je manongkange tame akan huang tasik, Tuhan mawi danum mahasor haluli sampai ewen leteng.

20Palus Miryam, ije biti nabi bawi, kaka Aron manduan tarabange, tuntang uras oloh bawi omba mamanto tarabang sambil manari. 21Miryam manyanyi akan ewen,

“Nyanyi akan Tuhan,

tagal Ie manang hai.

Uras kuda tuntang oloh je manongkange

injakahe akan huang tasik.”

Danum bapait

22Limbah te Moses mimbit bangsa Israel bara Tasik Raruju manintu padang pasir Sur. Katahin telo andau ewen mananjong mahoroi padang pasir, jaton sondau danum. 23Palus ewen sampai ije eka arae Mara. #15:23: Mara: Riman aran toh huang basa Ibrani iete “bapait”. Tapi danum intu hete bapait toto, sampai dia olih iihop. Tagal te eka te inampa arae Mara, rimae bapait. 24Palus kare oloh te bakotok dengan Moses tuntang misek, “Narai je kareh ihop itah?” 25Moses balakudoa toto-toto intu Tuhan, palus Tuhan mamparahan akae ije katetek kayu. Kayu te injakah Moses akan danum, balalu danum te jadi batawah, sampai olih iihop.

Intu eka te Tuhan manenga kare atoran akan ewen, tuntang intu hete kea Ie maningkes ewen. 26Koan Tuhan, “Tumon auh-Ku toto-toto, tuntang lalus taloh je tumon tirok-Ku bahalap; tumon uras kare parentah-Ku. Amon keton mawie tumon te, keton dia ihukum-Ku hapan kare penyakit je iawi-Ku dengan oloh Misir. Aku toh Tuhan je mampakeleh ikau.”

27Limbah te ewen sampai intu ije eka je arae Elim. Intu hete aton due walas tahasak danum tuntang uju puluh batang kayu korma. Ewen mampendeng kemahe tokep danum te.

Currently Selected:

EKSODUS 15: NIJ

Highlight

Copy