EKSODUS 14
14
Dimpah Tasik Raruju
1Limbah te Tuhan hamauh dengan Moses, 2“Soho oloh Israel haluli tuntang mampendeng kemahe intu hila baun lewu Pi-Hahirot, helat lewu Migdol dengan Tasik Raruju, tokep lewu Baal-Sepon. 3Raja Misir kareh manyangka oloh Israel kanjerae mangombang lewu toh tuntang layang intu padang pasir. 4Aku handak mawi ie badungil sampai ie manggoang keton. Tapi Aku kareh mamparahan kuasang-Ku akan raja Misir tuntang tantarae, ewen kareh katawan je Aku toh Tuhan.” Palus oloh Israel mawie kilau je irentah Tuhan akan ewen.
5Metoh raja Misir mahining je oloh Israel te jari hadari, ie dengan kare pagawai ayue manyasal tuntang hamauh, “Narai je iawi itah? Mbuhen itah nalua kare oloh Israel te haguet sampai itah nihau kare jipen?” 6Palus raja manatap kareta parang tuntang tentara. 7Ie haguet mahapan uras kare karetae je aton, jahawen ratus kareta je pangkahalape, je ihapan awi kare perwira ayue. 8Toto Tuhan mawi raja badungil, sampai ie manggoang oloh Israel je metoh hong jalananae haguet bara tanah te hong kalindong lengen Tuhan. #14:8: hong kalindong lengen Tuhan atawa hapan kamanang. 9Tantara Misir dengan kakare kuda, kareta tuntang oloh je manongkange manggoang oloh Israel, tuntang manjake ewen intu eka kemah ewen hong saran tasik tokep Pi-Hahirot.
10Metoh oloh Israel mite raja Misir tuntang tantarae dumah, ewen paham mikeh hayak mangkariak intu Tuhan balaku dohop. 11Koan ewen dengan Moses, “En intu Misir jaton kubur, sampai ikau mimbit ikei mangat matei intu eka toh? Item hasil gawim te! 12Ikei jari mansanan intu Misir je taloh toh kareh manjadi! Ikei harajur mansanan akam uka ikau ela manderoh ikei, tapi manalua ikei tetep jadi jipen intu Misir. Labih bahalap jadi jipen intu kanih bara matei intu padang pasir toh!”
13Tombah Moses, “Ela mikeh! Keleh tanggar atei! Keton kareh mite en taloh je iawi Tuhan hapa manyalamat keton. Oloh Misir je gitan keton toh, dia baka tau keton mitee tinai. 14Tuhan kareh hakalahi akan keton, keton dia usah mawi taloh en-en.”
15Koan Tuhan dengan Moses, “Mbuhen ikau mangkariak balaku dohop? Soho oloh Israel marajur tanjonge! 16Gatang sokahm, tajok akan hunjun tasik. Palus danum kareh hambilang tuntang oloh Israel tau dimpah tasik tuntang mananjong intu pendae intu huang palempang tasik je teah. 17Oloh Misir kareh iawi-Ku badungil sampai ewen marajur manggoang oloh Israel. Aku kareh mamparahan kuasang-Ku akan raja Misir, kawan tantarae, kare kareta dengan kare oloh je manongkange. 18Te oloh Misir kareh katawan je Aku toh Tuhan.”
19Palus malekat Hatalla, je aton hila baun tantara Israel, bindah akan likut. Tihang baunandau bindah kea sampai aton 20intu helat kawan tantara ain oloh Misir dengan kawan tantara ain oloh Israel. Baunandau te mampalembut kakaput, #14:20: Baunandau … kakaput: Hai kemungkinan jete riman auh te. sampai ije ale-alem kawan tantara due-due te dia tau hakatokep.
21Palus Moses mantajok lengee akan hunjun tasik, tuntang Tuhan manampa riwut timor je manampur kancang sampai danum tasik undur. Ije ale-alem riwut te manampur, tuntang mobah tasik jadi petak je teah. 22#1 Kor. 10:1-2; Ibr. 11:29 Danum hatantilang bagi due, tuntang metoh oloh Israel dimpah tasik, ewen mananjong intu eka je teah, danum sambil gantaue sama kilau dinding ampie. 23Oloh Misir dengan kakare kuda, kareta tuntang oloh je manongkange tetep manggoang hayak manuntut oloh Israel akan bentok tasik. 24Tokep katika matanandau lembut Tuhan manampayah bara tihang apui tuntang baunandau manintu tantara Misir tuntang manderohe. 25Ie mawi kare roda karetan ewen leket, sampai ewen bahali toto miar. Koan oloh Misir, “Tuhan hakalahi akan oloh Israel malawan itah. Keleh itah hadari bara hetoh!”
26Koan Tuhan dengan Moses, “Tajok lengem akan tasik, te danum kareh haluli tuntang mampaleteng oloh Misir, kare kareta tuntang kare oloh je manongkange.” 27Palus Moses mantajok lengee akan hunjun tasik tuntang metoh matanandau lembut, danum haluli akan ampie je solake. Oloh Misir bahimat manyalamat arepe, tapi Tuhan mampaleteng ewen akan tasik. 28Danum tasik haluli hayak mampaleteng kare kareta, kare oloh je manongkange, tuntang hapus tantara Misir je manggoang oloh Israel akan bentok tasik, sampai ewen matei lepah. 29Tapi metoh oloh Israel dimpah tasik, ewen mananjong intu petak je teah, tuntang danum kilau dinding intu sambil gantaue.
30Andau te Tuhan manyalamat bangsa Israel bara oloh Misir je manyarang ewen, tuntang ewen mite kare hantun oloh Misir halelek intu saran tasik. 31Metoh oloh Israel mite kilen ampie Tuhan je dengan kuasan Aie je hai mampakalah oloh Misir, ewen hengan toto palus percaya Dengae tuntang dengan Moses, rewar Tuhan te.
Currently Selected:
EKSODUS 14: NIJ
Highlight
Share
Copy
Want to have your highlights saved across all your devices? Sign up or sign in
