PETRUS 1 4

Kobiagan Mobagu

1Lantaran ki Kristus ain nokorasa kon roriga in awak naa, dá tua in musti umuran kon gina mako bá umuran moropot in pirisaya monimu. Sin ki ine inta nokorasadon kon roriga in awak, yo diá bidon in sia mogaid kon dosa. 2Manangka intua, kobiagdon in moiko kon singgai moiduduimai podudui in onu inta kinoibog i Allah, bo deemanbí dumudui kon ibog in intau. 3Sin nobayongdon totok in wakutu inta pinaké monimu nogaid kon onu inta kinoibog in intau mita inta diá nonotaau kon i Tuhan. Diá mopia in kobobiag monimu. Moiko in dinumudui kon ibog in awak, monginum dapot in moḷoḷangu, umuran mogaid kon rame inta diá in baragunanea, monginum moyotakin bo mosumba kon berhala inta ilarang i Tuhan. 4Tuamai intau mita inta diá nonotaau kon i Tuhan, noherang sin moiko in nobiagbí ná kobobiag monia, inta umuran mogaid kon dosa in pomuḷoi mako. Manangka intua mosia in moningkuḻe kon i monimu. 5Táe mosiabí in motanggungjawab kon bayongan tua kon tayowon i Allah inta ain nobasadia mohakim kon intau inta nobiag bo intau inta ain minatoi. 6Manangka intua Habar Mopia pinotaau domandon kon intau mita inta ain minatoi. Makusudnea bá mosia in adilon doman ná intau mita inta koawakpa, bo roho monia in mobiagdon podudui kon ibog i Allah.

Kobobiag intau in Keresten

7Kopaḷutan in yagi-yagi motoyongdon. Tuamai ḷukadaidon kopira in awak monimu bo umuran mokopoonow kon raian sinbá moiko in motaau mosambayang. 8#Ams. 10:12 Tongá soaḷ tanaa inta totok in moponting, moiko in musti totu-totuu mositabian tobatú bo tobatú, sin aka moiko bo mositabian dá mangaḻenea kon tua moiko in moibog doman mosiampungan. 9Bo moiko in musti motaau mosipasiaran kon baḷoi takin diá mogamui. 10Moiko in komintan bidon nokouḻí kon totabi mita inta noyo-noyoposi nongkon i Allah. Tuamai saḷaku mogogaid mita inta mopia pakédon kopira in onu inta ain pinonotabi i Allah tatua sin pogaid kon kopontingan moyotakin. 11Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

Motarima kon Roriga saḷaku intau Keresten

12Utat mita inta kotabiku! Tanaa in moiko mororiga totok sin ponungkuḷan kon i monimu. Táe dikabí moherang, naonda bo oyúon inta totok motoyang in nobaḻí kon inimu. 13Mokoposanangbí kon gina sin moiko in nokorasadon kon ná inta ain kinorasaan i Kristus. Dá aka kamuliaan i Kristus popoontongdon, yo totokbí in mopia in gina monimu. 14Kopiabí in gina monimu aka singkuḻeon sin popisí in mopirisaya kon i Kristus, tua in mangaḻenea Roho momulia inta Roho i Allah in umuranbí kotaki-takin monimu. 15Dikabí tobatúmai kon sigad monimu, rorigaan sin popisí in moḷoḻimod in sia, andeka mononakow, andeka nogaid kon inta moraat, andeka intau inta moibog kumapog kon urusan in intau ibanea. 16Táe aka moiko bo rorigaan popisí in mopirisaya kon i Kristus, dá dikabí in moiko mooyá. Posukurdon kon i Allah, sin moiko in nodia kon tangoi i Kristus.

17Sin naa bidon wakutu i Allah momangkoi mohakim kon dunia naa. Bo umatbí i Allah inta muna-munamai hakimon. Dá aka kita inta mopirisaya bo hakimon doman, yo onu in mobaḻí kon i monia inta diá mopirisaya kon Habar Mopia nongkon i Allah tua? 18#Ams. 11:31 Kon bonu in Buk Motusi ain pinais nanaa,

“Aka intaupa mita inta mopia mororiga doman totok in posaḷamaton,

yo onudon degá in mobaḻí kon i monia inta diá mopirisaya kon i Tuhan bo inta mogaidmai kon dosa!”

19Manangka intua intau inta iroriga podudui in ibog i Allah, kobiagbí mokopotoḷutui in sia, bo posarakaidon in kobiagannea kon i-Nia inta nomia kon i monia, sin Sia in umuranbí mogaid kon onu inta ain pinodandi-Nea.

Currently Selected:

PETRUS 1 4: INOMOG

Highlight

Copy