PETRUS 1 3

Doyowa Motonibuḷoi

1 # Ep. 5:22; Kol. 3:18 Ná doman tua in moiko, bobay mita, kodu-koduduibí kon i buḷoi monimu, sinbá aka oyúon in kon sigad monia in diá mopirisaya kon habar nongkon i Allah, yo oaid monimu tua in mokopobaḻí kon i monia mopirisaya. Diá bidon paraḷu in moiko mosingog kon onu bo onu kon i monia, 2sin koontongan bidon monia kon oaidmu inta motuḻid bo motoindudui. 3#Tim.1. 2:9 Dikabí tongá koontongan kon ḷuai i moḷunat, ná umpama moḷambá kon buok andeka momaké in ḷambá ibanea mako, andeka mogiḷambung doman inta mongomahaḷ. 4Táe, ḷambáaibí bonu in gina monimu in ḷambá inta diá mogogu-goguyaat, tuata in budi inta mopia bo moonow in raian. Tuabí in ḷambá moḷunat inta kinoibog i Allah. 5Nanaabí in aid in bobay mita koagama inta noharap kon i Allah tungkuḷ intua. Mosia mopoḷunat in awak takin aid inta kodu-kodudui kon i buḷoi monia. 6#Kḻn. 18:12 Natuabí doman in ki Sara. Sia in motoindudui totok kon i Abraham ki buḷoinea, bo sinangoinea doman ki tuangnea. Moiko nion ki adíbí mita i Sara, aka umuran mogaid kon mopia bo diá doman moondok kon yagi-yagi.

7 # Ep. 5:25; Kol. 3:19 Moiko doman, ḷoḷaki mita komangartibí kon i buḷoi monimu poḷat doman monotaau kon mosia tua in intaubí mita inta moyangkó. Horomatbí in mosia, sin mosia tua in moyotakin monimu motarima kon tombuinag kobiagan inta mononoi nongkon i Allah. Aidaibí in naa sinbá diá in mokoḷamboi kon sambayang monimu.

Mororiga popisí in nogaid kon inta Mobanar

8Naa in kasimpulannea: utat mita poramuji mobiag motobatú kon tosingogon bo porasaan. Moiko in musti umuran mositabian ná doyowa mogutat. Moiko in musti doman mosituḷungan bo mokopoompá kon dodia. 9Inta moraat donaaibí tuḻían onu inta moraat, ande aka sibáan yo donaaibí monuḻí monibá. Táe poigumbí sinbá barakatan i Allah in intau mita inta nomia natua kon i monimu. Sin ki Allah in nogoiní kon i monimu, sinbá motarima in moiko kon barakat-Nea. 10#Mzm. 34:13-17 Kon bonu in Buk Motusi ain pinais nanaa,

“Intau inta moibog moumur in kobiagan

bo moibog doman mokorasa kon kobiagan mopia, yo

mustibí ḷukadannea in bibig sinbá diá mongonguman kon inta mongoraat

bo diá doman mongonguman kon inta diá totuu.

11Sia musti mokopoyayú kon inta moraat bo mogaid kon inta mopia;

sia in musti totu-totuu moramuji sinbá mokouḻí kon dodamean.

12Sin umuranbí indoian i Tuhan in intau mita inta dinumudui kon onu inta kinoibog-Nea,

bo umuranbí i Tuhan indongogan in sambayang mita monia;

táe ki Tuhan in moḷawangbí kon intau mita inta umuran mogaid kon onu inta moraat.”

13Ki inebí i moibog mopoaid in moraat kon inimu, aka mosanangbí in gina monimu mogaid kon inta mopia? 14#Mat. 5:10 Táe umpaka mokorasa kon roriga lantaran mogaid kon soaḷ mita inta mopia, táe mountungbí in moiko! Manangka intua donaaibí moondok kon i inekabí bo donaai doman umuran moḻia-ḻiaw in gina. #Yes. 8:12-13 15Táe kon bonu in ginamu, musti in moiko mobogoi in ponghoromatan tontaní inta moyokaan in kadudukan-Nea saḷaku Tuhan. Bo umuran pobasadia in motubag kon intau mita inta moibog mopoḻibó-ḻibó kon soaḷ inta nobaḻí dodoyonan in pirisaya monimu. 16Táe koaḷusbí in pototubag takin horomat. Ginamu in musti totu-totuu motuḻid, sinbá aka poponapudan uboḷ in moiko lantaran nobiag notompia saḷaku dumodudui i Kristus, dá intau inta noponapud in uboḷ tatua kon inimu buibí mooyá tontaní. 17Maníka mororiga lantaran nogaid kon inta mopia aka tuabí in kinoibog i Allah, dika in mororiga popisí in nogaid kon inta moraat. 18Sin ki Kristus tontaní in tongábí doman komintan minatoi#3:18: minatoi: nobayong in naska dungkuḷmai: nororiga. popisí in dosa mita intau. Tobatú intau inta diá kotaḷá; minatoi popisí in intau inta kotaḷá. Ki Kristus in nogaid kon tua sinbá kita in motaau-Nea diaan mayá kon i Allah. Sia in iḻimod kon kaadaan saḷaku intau, táe biniag bui kon bonu in Roho. 19Bo kon bonu in kaadaan-Nea saḷaku Roho tatua, Sia in minayá nopoyaput in Habar Mopia nongkon i Allah kon intau mita inta pinonjara: 20#Kḻn. 6:1–7:24 tuata in roho mita in intau inta diá motoindudui kon i Allah kon sempo i Nuh. Kon wakutu intua nosabar totok in ki Allah nogoḷat kon i Nuh dodai in nogaid kon kapaḷnea. Tongábí taya waḷu inta kon bonu in kapaḷ tatua in pinosaḷamat nongkon ḷunud inta moḷoben totok tatua. 21Dá bá kotaauandon monimu kon onu inta nobaḻídon tatua nobaḻí oḻinow in baptisan inta nokosaḷamat kon i monimu tanaa. Baptisan tatua in deeman tobatú upacara pondaritan kon bayongan inta nokotor kon awak, táe tua in dodandianbí kon i Allah inta nongkon bonu in ginamu inta mopia. Baptisan tatua in mokosaḷamat kon i monimu sin ki Yesus Kristus ain nobiag bui nongkon kinopatoian, 22bo ain namonik in soroga. Bo tanaa mako Sia ain nongawasa noyotakin i Allah bo nomarenta doman kon bayongan malaekat, bayongan mongongawasa bo bayongan ropot kon dunia naa.

Currently Selected:

PETRUS 1 3: INOMOG

Highlight

Copy