MATIUS 22
22
Kantuang mongkona bau-bauon po'osoan
(Luk. 14:15-24)
1I Yesus notatae mule' hi mian da'isan mompake kantuang, 2tukoo-Nyo, “De Tumpu mompalentah, ka'ada'annyo sumomo kantuang aiya: Samian na tomundo nombau bau-bauon po'osoan nu anak mo'anenyo. 3Tomundo aijo' nonsai to poka-pokauhon mamba molabot to mia-mian anu i laga da toka i bau-bauon aijo'. Panyo aha anu i laga aijo' madi' mongka'oho' toka. 4Lapas aijo', tomundo aijo' nonsai mule' to poka-pokauhonnyo sangga'at. Pinoto'inyo hi aha: ‘Opoto'iakon hi aha anu i laga aijo': Kaanon nu bau-bauon sinadiamo. Sapi', ka' ana-anak nu sapi'ku anu talalo ma'ima' kinolotmo. Iwi-iwi' sinadiamo. Imbo'mo da mokiijo' i bau-bauon po'osoan!’ 5Panyo aha anu i laga aijo' madi' mompajuli. Aha namba i posi pakalaja'annyo toto samian – samian namba i ale'nyo, anu sangga'at namba i usahanyo; 6ka' anu sangga'at mule' nohakop to posa-posaihon nu tomundo aijo', lantas nomboboti ka' nompatei aha. 7Salatan tomundo aijo' nohongo han aijo', ia pinusa hondo. Ia nonsai suludadunyo da mompatei anu lewa' mompatei aijo' ka' nompapui kota nu aha. 8Lapas aijo' ia nolaga to poka-pokauhonnyo, lantas notatae, ‘Bau-bauon po'osoan sinadiamo, panyo aha anu i laga madi' pantas. 9Lako'mo uuka mokiijo' i jala-jalan anu ewa, ka' laga mae da'i-da'isan na mian mamba i bau-bauon po'osoan aiya.’ 10Saba' to posa-posaihon aijo' nambamo. Aha nokiijo' i jala-jalan anu ewa, lantas nolimu' iwi-iwi' na mian anu kinabot nu aha, anu ma'ima' mau anu ma'idek. Sahingga nobuke' na laigan nu bau-bauon po'osoan aijo' tiba to mia-mian anu i laga.
11Lantas tomundo aijo' ninsoop ka' lewa' montoa to mia-mian anu i laga. Ia nontoa ko samian i bau-bauon aijo' anu madi' nompake pakean nu bau-bauon. 12Lantas ia nompokilawa hi mian aijo', ‘Sangalu, mosia na beleyum timbali minsoop i aiya madi' nompake pakean nu bau-bauon?’ Mian aijo' madi' noko ala nontaloakon apa-apaa. 13#Mat. 8:12, 25:30, Luk. 13:28 Lantas tomundo aijo' notatae hi to poka-pokauhonnyo, ‘Segoti na tengke ka' lima nu mian aiya, ka' alin na ia i sambiha'nyo i tampat anu pikat. I kiijo' daagi' ko anu tumando' ka' sansala.’ ”
14Lantas i Yesus nompomingkot kantuang aijo' sumo aiya, “Da'isan na anu o laga, panyo sangkiding na anu o pile'i.”
Han mombayan hasin
(Mrk. 12:13-17, Luk. 20:20-26)
15Lapas aijo', to mia-mian nu Farisi namba binasale' hingga-hinggat mongkona mosia na aha mompoki-pokilawa i Yesus da o humpak na kasala'annyo. 16Saba' aha nonsai anu saja' mombatuki aha mamba hi Yesus tiba to pia-piangkuka na mian anu monsangaja'i Herodes. To mia-mian aijo' notatae hi Yesus, “Tuumangku Gulu', osumbu' mami na kita Tuuma madi' mongakali. Kita Tuuma mongajan totu-totu'u mongkona kahanda' nu Tumpu hi mian, madi' mompajuli pikilan mau pe'e pa' ihe, sabab kita Tuuma madi' mompile'i mian. 17Kalana aijo', soba kita Tuuma taeakon hi kami: De mombatuki atulan nu agamanto, timbali na mombayan hasin hi Tomundo kabai madi'?”
18I Yesus monsumbu' tanga'an nu aha anu ma'idek aijo', jadi Ia notatae, “He to mia-mian anu geguan! Kadaka' komiu molio-lio kasala'an-Ku? 19Soba potoa mae hi belengku na takean nu doi anu opake miu bau pombayan hasin!”
Lantas aha nombee' hi Ia santake na doi salaka. 20I Yesus nompokilawa hi aha, “Gambalan ka' sanggo ihe na aiya?”
21“Tomundo,” tinaaman nu aha.
Saba' i Yesus notatae hi aha, “Desumo aitu, bee'mo hi Tomundo apaa na anu i Tomundo, ka' hi Tumpu apaa na anu nu Tumpu Allah.”
22Salatan aha nohongomo katalangan aijo', aha binangangmo. Sahingga aha nambamo nompala'i i Yesus.
Han anu po'ule' tinumuu' lengkat i kapatean
(Mrk. 12:18-27, Luk. 20:27-40)
23 #
Kis. 23:8
I sinaa aitu mule' to pia-piangkuka na mian nu Saduki tinokamo hi Yesus. Aha mian anu mongakui, saba' mian mate madi' mo mompo'ule' tumuu'. 24#Ul. 25:5 “Kita Tuumangku Gulu',” koonyo nu aha “I Musa nongajanakon sumo uuka: De samian na mo'ane mate, ka' ia madi' ko anak, utusnyo tionyo mo'osoa tiba balunyo da mombee'i lee' hi mian anu natemo aijo'. 25Daagi' ko aha popitu' na moto utus anu jinojoong i aiya. Anu tumpe no'osoa, lantas i nate madi' kino anak. Saba' balunyo anu pinala'iannyo binaumo osoa nu utusnyo. 26Utusnyo aijo' madi' pinin i nate mule' madi' kino anak. Han anu pokakana jinadi mule' sumo aitu tiba utusnyo anu ko totolu'nyo, ka' sumo aitumo na jinadi toka-toka hi anu ko popitu'nyo. 27Kahimpusannyo boune aijo' i nate suele. 28Jadi, tempo'nyo mian mate po'ule'mo opotumuu', bengkele' ihe na boune aijo'? Kalana aha popi-popitu' no'osoamo tiba ia.”
29I Yesus nontaami, “Komiu ilipunmo hondo, kalana komiu madi' mangalati' i Kitab nu Tumpu, mau pe'e kuasa nu Tumpu Allah. 30Kalana de mian mate po'ule'mo tumuu', aha madi'mo daagi' mo'osoa panyo aha tumuu'mo susumo malaikat i suluga'. 31Ma'isa toho' komiu nombasa' apaa na anu tinaeakonmo nu Tumpu Allah mongkona mian mate po'ule' opotumuu'? Tumpu notatae, 32#Kel. 3:6 ‘Akumo na Tumpu i Abraham, Tumpu i Ishak, ka' Tumpu i Yakub.’ Tumpu aijo' misa' Tumpu nu mian mate. Ia Tumpu nu mian tumuu'!”
33Salatan mian da'isan aijo' nohongo katalangan i Yesus, aha binangang hondo i pangajalan-Nyo.
Palentah anu o palahatikan
(Mrk. 12:28-34, Luk. 10:25-28)
34Tempo'nyo to mia-mian nu Farisi nohongo saba' i Yesus nombaumo to mia-mian nu Saduki madi'mo daagi' moko ala motatae apa-apaa, aha nosa'angu'mo. 35#Luk. 10:25-28 Samian anu kiijo' hi aha, aijo'mo samian na gulu' agama saja' mompokilawa i Yesus, mompagala molio da ohumpak na kasala'an. 36“Tuumangku Gulu',” na koonyo, “Palentah iya na anu talalo o palahatikan i uno nu atulan nu agama?”
37 #
Ul. 6:5
Tinaaman i Yesus, “Kalibosi na Tumpuum nu kinyonyoaum totu-totu'u, ka' iwi-iwi' na pikilannum. 38Aijo'mo na palentah anu talalo o palahatikan ka' anu talalo opopohimona! 39#Im. 19:18 Palentah anu ko'ohua'nyo pokakanamo tiba anu i moona aijo'. Kalibosi na bubuu' komiu, sumomo beleyum mongkalibosi posi butongum. 40Iwi-iwi' na atulan nu agama anu binee' i Musa, ka' ajalan nu to nabi-nabi, mimpu'u i palentah anu ohu-ohua' aijo'.”
Tomundo anu Momposalamat
(Mrk. 12:35-37, Luk. 20:41-44)
41Hau-haunyo to mia-mian nu Farisi daagi' binala gombu i kiijo', i Yesus nompokilawa hi aha, 42“Mosia na pikilan miu mongkona Tomundo anu Momposalamat? Lee' ihe na Ia?”
“Lee' i Daud,” tinaaman nu aha.
43“Desumo aitu,” koonyo i Yesus, “apaa nasababnyo Roh nu Tumpu nombee'i pikilan hi Daud da nonsanggo Tomundo anu Momposalamat ‘Tumpu’? Sabab i Daud notatae,
44 #
Mzm. 110:1
‘Tumpu notatae hi Tumpungku:
Suhangmo i sasu koanan-Ku,
sampe Aku mombau sampo bali' miu matundu' hi komiu.’
45Jadi, de i Daud monsanggo Tomundo anu Momposalamat aijo' ‘Tumpu’, mosia na timbali Ia lee' mae i Daud?”
46Madi' ko samian pe'e na noko taami i Yesus. Ka' lengkat pe'e i sinaa aitu, madi'mo daagi' ko anu baani mompokilawa apa-apaa hi Ia.
Currently Selected:
MATIUS 22: LAILOE
Highlight
Share
Copy
Want to have your highlights saved across all your devices? Sign up or sign in
