MATIUS 23

Pokinde' da o bala'ingati na to gulu-gulu' agama ka' to mia-mian Farisi

(Mrk. 12:38-39, Luk. 11:43,46, 20:45-46)

1Lantas i Yesus notatae hi mian da'isan ka' hi anu saja' mombatuki Ia, 2“To gulu-gulu' agama ka' to mia-mian Farisi nohumpak kuasa da montalangkan atulan i Musa. 3Kalana aijo' o hongo ka' o batuki iwi-iwi' na anu pinalentahkon nu aha. Panyo boli mombau apaa na anu nu bau nu aha, kalana aha madi' monjalanakon apaa na anu ingajan nu aha. 4Aha montuntut hahan anu mahan, ka' mombee'i to atu-atulan anu maboat, panyo sangkiding pe'e aha madi' montulungi mian anu monjalanakon. 5#Mat. 6:1, Ul. 6:8, Bil. 15:38 Iwi-iwi' anu nu bau nu aha ola da nu toa nu mian. Aha sangaja' mompake kahohon anu opake balado'a opobolaa ka' opo uli-ulit ka' mompomantan na jambu-jambu nu juba' nu aha! 6Aha mongka'ima'i tampat anu ma'ima' i bau-bauon ka' kulusi anu ma'ima' hondo i to lai-laigan pogalejaan. 7Aha sanang na o adati nu mian i pasan, da o laga ‘Tuumangku Gulu'’. 8Panyo komiu, boli mongka'oho' o laga ‘Tuumangku Gulu'’, kalana Gulu'um ola sa'angu', ka' komiu iwi-iwi' moto utus. 9Ka' boli komiu molaga, mau pe'e ola samian i dunia aiya, ‘Tuuma’, kalana Tuumaum ola samian, aijo'mo Tuuma anu Kiita' i Suluga'. 10Ka' boli komiu mongka'oho' olaga anu ‘Mompalentah’, kalana anu mompalentah komiu ola samian, aijo'mo Tomundo anu Momposalamat anu jinanji'mo nu Tumpu. 11#Mat. 20:26-27, Mrk. 9:35, 10:43-44, Luk. 22:26 Mian anu talalo daka' i totonga' miu, tionyo timbali bau pokauhonum. 12#Luk. 14:11, 18:14 Mian anu mohangkat butongnyo, o tauhakon, ka' mian anu montauhakon butongnyo o hangkatakon.”

I Yesus mongalu sipat anu mimpula-pula

(Mrk. 12:40, Luk. 11:39-42,44,52, 20:47)

13“Silakamo na komiu to gulu-gulu' agama ka' to mia-mian nu Farisi! Komiu saja' mombau pula-pula. Komiu ola monsaduakon da mian madi' totu-totu'u timbali mian anu palesayamo hi Tumpu Allah. Posi komiu pe'e madi' mongka'oho' mian anu palesayamo hi Tumpu, ka' mian sangga'at anu oka'oho', miu da boli palesaya.

[ 14Silakamo na komiu to gulu-gulu' agama ka' to mia-mian nu Farisi: Komiu ola ahi' mombau pula-pula. Komiu mongakali to balu-balu ka' mongagoi laigannyo ka' da bau pongkukubi ka'idekan aijo' komiu mompomantan balado'a. Aijo' nasababnyo komiu o hukum maboat!]

15Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mamba majo-majo'on motaap i ambai, ka' lumajang monsongkohi katano'an ola ahi' mombau samian da minsoop i agamaum. Ka' salatan mian aijo' ninsoopmo i agamaum, komiu monsaduakonmo ia salon nu nalaka. Lipat pinduan lebe ma'idek molingkudui komiu!

16Silakamo na komiu to pola-polaya' anu mapisok! Komiu mongajanakon sumo aiya, ‘De mian basumpa' monsanggo Laigan nu Tumpu, sumpa' nu mian aijo' madi' totu-totu'u! Panyo de ia basumpa' tiba sanggo nu mosoni' i uno nu Laigan nu Tumpu, sumpa' nu mian aijo' totu'u.’ 17Komiu to mia-mian ponga' anu mapisok! Iya na anu talalo palalu: Mosoni'nyo kabai Laigan nu Tumpu anu mompotimbali mosoni' aijo' susi'? 18Komiu mule' mongajanakon aiya, ‘De samian basumpa' tiba sanggo nu ponsombahkonan, sumpa' nu mian aijo' madi' totu'u; panyo de ia basumpa' tiba sanggo nu anu sinombahkon i tampat pinonsombahkonan aijo', sumpa' nu mian aijo' totu'u.’ 19Komiu talalo mapisok! Iya na talalo palalu? Anu sinombahkonnyo kabai tampat ponsombahkonan anu mompotimbali palasombahan aijo' susi'? 20Kalana aijo', de samian na basumpa' tiba sanggo nu tampat ponsombahkonan, ka' tiba sanggo nu iwi-iwi' anu sinombahkon i tampat aita'. 21Ka' de samian basumpa' tiba sanggo nu Laigan nu Tumpu, aijo' alati'nyo ia basumpa' tiba sanggo nu Laigan nu Tumpu aijo', ka' tiba sanggo nu Tumpu anu jojoong i kiijo'. 22#Yes. 66:1, Mat. 5:34 Ka' de samian basumpa' tiba sanggo nu suluga', aijo' alati'nyo basumpa' tiba sanggo nu kajojoongan nu Tumpu, ka' tiba sanggo nu Tumpu anu sumuhang i kajojoongan aijo'. 23#Im. 27:30 Silaka na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! To lampa-lampa sumo solasi, adas manis, ka' suele jintan, komiu mombee'i, de sampulu' na bahagian sambahagian hi Tumpu. Padahan hahan anu palalu hondo i uno nu to atu-atulan nu agama, sumo umpamanyo: Ka'adilan, mompahakali-kalibosi, ka' mohongo-hongo, madi' o palahatikan miu. Padahan aijo'mo na tionyo o bau miu, tiba madi' timbali mompojohok anu toto sangga'at. 24Komiu to pola-polaya' anu mapisok! Lalo i uno nu anu o inum miu na o tilis miu, padahan unta na o lonyom miu!

25Silaka na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! To mangko-mangko' ka' to lea-lean miu, o baso'i miu bele-belesi' na sambiha'nyo, padahan i unonyo koton hondo tiba to hahan anu i humpak miu ola pinakisa ka' pinalanguesan. 26Farisi mapisok! Baso'i pe'e bele-belesi' na anu i unonyo i to mangko-mangko' ka' to lea-lean miu da i sambiha'nyo timbali belesi' suele!

27 # Kis. 23:3 Silakamo na komiu to gulu-gulu' agama ka' to mia-mian Farisi! Komiu ola ahi' mombau pula-pula! Komiu sumomo to kubu-kubun anu o set mopute', i sambiha'nyo o toa ma'ima', padahan i unonyo mobuke' nu buku ka' iwi-iwi' anu to busi-busik. 28Sumo aitumo na komiu. I sambiha'nyo komiu o toa ma'ima' hi mian; panyo i unonyo komiu mobuke' nu kabaleko'an ka' mombahakon palentah.”

I Yesus nompoto'i pohukum to gulu-gulu' agama ka' to mia-mian nu Farisi

(Luk. 11:47-51)

29“Silakamo na komiu to gulu-gulu' agama ka' to mia-mian nu Farisi! Komiu ola ahi' mombau pula-pula! Komiu mombau tampat pongkubulan anu to ma'i-ma'ima' bau anu nu to nabi-nabi, ka' mombunga-bungai kubulan nu to mia-mian anu ma'ima' na kantumuu'annyo. 30Ka' komiu notatae, ‘De kami tinumuu' tempo'nyo daagi' ko mompolee' mami naipuan mae, kami madi' nombatuki aha mompatei to nabi-nabi.’ 31Jadi, posi komiu mangaku saba' komiumo na lee' nu to mia-mian anu nompatei to nabi-nabi! 32De sumo aitu janjulakonmo ka' baumo na to dosa-dosa' anu tinampu'unanmo nu mompolee' miu aijo'! 33Komiu ma'idek ka' lee' nu mian ma'idek! Mosia na komiu timbali momposalamat butong i hukuman nu nalaka? 34Hongo ima-ima': Aku monsaije hi komiu to nabi-nabi, to mia-mian pande, ka' to gulu-gulu'; sambahagian lengkat hi aha o pateije miu, ka' sambahagian anu sangga'at o salibje miu. Daagi' ko anu o sakisaje miu i uno nu laigan pogalejaan, ka' komiu mahantumput lengkat i sa'angu' na kota mokiijo' i kota sangga'at. 35Kalana aijo' komiu o hukum, kalana nompateimo mian iwi-iwi' anu madi' ko sala'nyo – lengkat pe'e nompatei i Habel anu madi' ko sala'nyo, tinoka i pinompateian i Zakharia anak i Berikia, anu pinatean miu i olot nu Laigan nu Tumpu, ka' i tampat ponsombahkonan. 36Palesayamo: Iwi-iwi' aijo' nu tanggungje nu to mia-mian tempo' uuka!”

I Yesus nolibos i Yerusalem

(Luk. 13:34-35)

37“Yerusalem, Yerusalem! To nabi-nabi pinateanmo. To posa-posaihon nu Tumpu pinahambunu'akonmo nu batu sampe i nate. Piangkukamo na Aku mongka'oho' molimu' iwi-iwi' mian nu kampungum, sumo tina nu manuk mongokobi sioknyo i aluk nu polipiknyo, panyo komiu madi' mongka'oho'! 38Kalana aijo', Tumpu madi' daagi' monjagai komiu. 39Osumbu'mo! O mulai tempo' uuka aiya, beleyum madi'mo daagi' montoa Aku sampe beleyum motatae, ‘Obalakatiakon na Ia anu tinokamo mae tiba sanggo nu Tumpu.’ ”

Currently Selected:

MATIUS 23: LAILOE

Highlight

Copy