MATIUS 24

I Yesus nonsisikmo Laigan nu Tumpu mohobo'

(Mrk. 13:1-2, Luk. 21:5-6)

1Salatan i Yesus nompala'imo Laigan nu Tumpu, anu saja' mombatuki Ia tinoka hi Ia ka' nontiju' Laigan nu Tumpu aijo'. 2I Yesus notatae hi aha, “Tinoamo miu iwi-iwi' aijo'? Da osumbu'mo, madi' ko sa'angu' pe'e na batu nu laigan aijo' na tasusun i tampatnyo, iwi-iwi' o hobo'akon.”

Kasusa'an ka' ponsakisa'an

(Mrk. 13:3-13, Luk. 21:7-19)

3Lapas aitu, i Yesus namba i Bungkutnyo nu Zaitun, ka' hau-haunyo Ia suha-suhang, anu saja' mombatuki Ia tinoka ka' binisala tiba Ia mongkona posi aha. “Poto'i mae hi kami hipian na iwi-iwi' aijo' timbali,” koonyo nu aha hi Ia, “Apaa na bau pongoosian salaku tanda katokaanmo nu kita Tuuma, ka' sinaa imihinyomae?”

4I Yesus nontaami, “Jaga mae, boli sampe komiu o akali. 5Kalana da'isan na mian anu toka mae mongala sanggong-Ku ka' motatae, ‘Akumo na Tomundo anu Momposalamat!’ Da'isan na mian nu akali nu aha. 6Komiu mohongoje lintup nu pahampatean ka' lele nu pahampatean, panyo boli mabuhuk. Kalana hahan aijo' tionyo timbali, panyo aijo' misa' alati'nyo tempo'mo nu kakiamatan. 7Bansa sa'angu' mahampate mongewa bansa sangga'at, ka' negara sa'angu' montumbuhi negara sa'angga'at. Iyayamae timbalimo na kapo'ohopan ka' luulu'. 8Iwi-iwi' aijo' sala'je pontampu'uniannyo, sumo sakit anu ingoa'an nu samian na boune tempo'nyo kahanda'mo mohampeakon.

9 # Mat. 10:22 Lapas aitu, komiu o hakop ka' o bee' da o sakisa ka' o patei. Songko-songko na dunia mongka'idekimo komiu, kalana komiu anu mombatuki Aku. 10Tempo'nyo aitu da'isan na mian madi'mo palesaya, mombiabiangakonmo agama, palangues, ka' mompaha ka'ika'idekimo samian ka' sangga'at. 11Da'isan na to nabi-nabi anu madi' totu'u toka ka' mongakali da'isan na mian. 12Ka'idekan mompaka hebatmo na molele, ahennyo da'isan na mian madi'mo daagi' kokalibosan. 13#Mat. 10:22 Panyo mian anu balatahan toka i mihinyo, timbali o posalamat. 14Ka' Lele Ma'ima' mongkona mosia na Tumpu mompalentah o polele i songko-songko na dunia, da iwi-iwi' na mian mohongo. Lapas aitu, tokaje na kakiamatan.”

Ka'idekan anu monsilakai

(Mrk. 13:14-23, Luk. 21:20-24)

15 # Dan. 9:27, 11:31, 12:11 “Komiu montoaje ‘Ka'idekan anu monsilakai,’ sumo anu tinaloakonmo i Nabi Daniel, tinuminjo i tampat anu Susi'. (Tulisan toka hi topo anu mombasa': Palahatikan apaa na alati'nyo!) 16Tempo'nyo aitu, mian anu daagi' kiijo' i Yudea tionyo malai i bungkutnyo. 17#Luk. 17:31 Mian anu kiita' i loteng nu laigan, bolimo mintau' mongala apa-apaa i uno nu laigan. 18Mian anu i ale', bolimo minsusule' da mongala juba'nyo. 19Palias na ko ide'nyo na sinaa aijo' kona hi boune anu poboa, ka' tina anu daagi' momposusu anaknyo! 20Balado'a da boli sampe komiu malai i tempo' ehua kabai i tempo' sinaa nu Sabat! 21#Dan. 12:1, Why. 7:14 Tempo' nu sinaa anu ma'idek hondo aijo' daagi' ko kasusa'an anu daka' sumo anu ma'isa toho' tinimbali lengkat pe'e i tampu'unan nu dunia toka tempo' aiya, ka' madi'mo mompo'ule' timbali. 22De Tumpu madi' mompokodo' tempo'nyo; saba' madi' ko samian pe'e anu salamat. Panyo kalana mian, anu palesayamo hi Ia Tumpu, nompokodo'mo tempo'nyo aijo'.

23Tempo'nyo aitu de daagi' ko mian motatae hi komiu, ‘Toa, Tomundo anu Momposalamat aijo' daagi' i aiya!’ kabai ‘Ia daagi' i aijo'!’ – boli o palesaya na mian aijo'. 24Kalana tokaje mae na anu momposalamat padahan anu madi' totu'u, ka' to nabi-nabi anu madi' totu'u. Aha mombau palabuatan-palabuatan anu o palias, ka' hahan anu okabangangi bau pongakali, de timbali, mau mian anu palesayamo hi Tumpu suele. 25Jadi, o inau'! Aku mompoto'imo hi komiu i moonanyo ma'isa pe'e han aijo' jadi saidi' mae.

26 # Luk. 17:23-24 De mian motatae hi komiu, ‘Toa, Ia daagi' aijo' i padang bolaa!’ – boli komiu mokiijo'. Kabai motatae, ‘Toa, Ia matisuluk i uno nu kaman aiya!’ – boli palesaya. 27Sabab katokaan nu Anak nu Mian sumo sahaya nu kilat majingka lengkat i Kabete'an, ka' majingka toka i Kinsoban.

28 # Luk. 17:37 Iya na daagi' ko bangke'nyo, i kiijo' daagi' ko tomonsi' montoluk bangke'nyo.”

Katokaan Anak nu Mian

(Mrk. 13:24-27, Luk. 21:25-28)

29 # Yes. 13:10, 34:4, Yeh. 32:7, Yl. 2:10,31, 3:15, Why. 6:12-13 “Madi' pin salatan kasusa'an aijo' lapasmo, batu nu sinaa pinikatmo, ka' bitu'on madi'mo ko sahayanyo. To manda-mandala' nanabu'mo lengkat mae i langit, ka' anu mongkuasai langa kalangkabutmo. 30#Dan. 7:13, Za. 12:10-14, Why. 1:7 Lapas aijo' tanda Anak nu Mian otoamo aita' i langit. Tempo'nyo aitu iwi-iwi' na bansa i dunia humaangmo. Aha montoamo Anak nu Mian toka aita' i bawo nu kundom tiba kuasanyo anu daka' hondo. 31Tolompet anu daka' pino'onyi'mo, ka' Anak nu Mian monsaimo to mala-malaikat-Nyo molimu' mian-Nyo anu palesayamo lengkat mae i pasu' alam opat nu dunia, lengkat mae i puus nu langit sa'angu', toka i puus nu langit sangga'at.”

Pangajalan mongkona nu kau' ara

(Mrk. 13:28-31, Luk. 21:29-33)

32“De pangajalan mongkona kau' ara. De to panga-panga'nyo to die-die' molunoumo ka' maluano'mo ka' montampu'unimo minsumpe, osumbu'mo miu saba' tempo' nu posinaa ohanimo. 33Sumo aitumo de komiu montoa hahan apaa na anu jinadimo, aijo' osumbu'mo miu, saba' tempo'nyo ohanimo hondo. 34Osumbu'mo! Hahan aijo' jadi ma'isa pe'e to mia-mian anu tumuu' tempo' uuka aiya nate iwi-iwi'. 35Langit ka' tano' lanjap, panyo potataeng-Ku tataap sampe toka sidu-sidutu'.”

Madi' ko anu monsumbu' sinaa ka' jamnyo

(Mrk. 13:32-37, Luk. 17:26-30,34-36)

36“Madi' ko anu monsumbu' hipian na sinaanyo ka' jamnyo, to mala-malaikat i suluga' madi' monsumbu', Anak pe'e nu Tumpu madi' monsumbu', ola Tuuma i suluga' na anu monsumbu'. 37#Kej. 6:5-8 De Anak nu Mian tokamo, lupanyo sumo tempo'nyo i Nuh naipuan mae. 38I sinaa ma'isa pe'e kino iyaba' daka' aijo', to mia-mian mongkaan monginum, ka' mo'osoa. Sumo aitumo na saja' binau sampe tinokamo na sinaa i Nuh ninsoop i uno nu kapan. 39#Kej. 7:6-24 Tempo'nyo iyaba' aijo' noleetabi aha iwi-iwi', atina'je ka' aha nonsumbu' apaa na anu tinimbali. Sumo aitumo suele na lupanyo saidi' mae de Anak nu Mian tokamo. 40Tempo' aitu ua'aha na mian hau-haunyo mokalaja i ale': Samian o boa, ka' samian mule' o pala'i. 41Ua'aha na boune hau-haunyo monggiling gandum: Samian o boa, ka' samian mule' o pala'i. 42Jadi, obala'ingati, kalana komiu madi' monsumbu' hipian na Tumpu miu toka. 43#Luk. 12:39-40 O inau' na aiya! De tumpu nu laigan monsumbu' jam sangkuka pihi na anu montomang toka, ia madi' timbali hoyot, da anu montomang aijo' madi' minsoop i laigannyo. 44Kalana aijo', komiu suele balasadia. Saba' Anak nu Mian toka tempo' nu anu madi' osangka-sangka miu.”

Posaihon anu mohongo-hongo ka' posaihon anu madi' mohongo-hongo

(Luk. 12:41-48)

45Koonyo mule' i Yesus, “Desumo aitu, posaihon anu mosia na anu mohongo-hongo ka' anu pande? Ia na anu o hangkat nu Tuannyo da timbali kapala nu to posa-posaihon sangga'at, da mombee'i aha mongkaan toka i tempo'nyo. 46Palias na kosanangnyo nu posaihon aijo' de tuannyo minsusule'mo mae, ka' montokai mae ia hau-haunyo mombau kalaja'anyo. 47Palesayamo, tuan aijo' mompalesayakon iwi-iwi' na halata'nyo hi posaihon aijo'. 48Panyo de posaihon aijo' ma'idek, ia motatae i uno nu kinyonyoanyo, 49‘Tuanku daagi' pin minsusule'je mae,’ lantas ia nontampu'unimo nondoke to posa-posaihon sangga'at, ka' mongkaan monginum tiba to mia-mian anu saja' malangu. 50Lapas aitu tuannyo ninsusule'mo mae i sinaa ka' jam anu madi' sinangka-sangka. 51Saba' posaihon-posaihon aijo' pinahandokeakon totu-totu'u nu tuannyo ka' ingalin nokiijo' i tampat nu to mia-mian anu palangues. Aha humaang ka' mongoa'i sansala i kiijo' mae.”

Currently Selected:

MATIUS 24: LAILOE

Highlight

Copy