MATIUS 21

Pinopodaka' na i Yesus ninsoop i Yerusalem

(Mrk. 11:1-11, Luk. 19:28-40, Yoh. 12:12-19)

1Salatan Yerusalem ingohanimo, aha tinokamo i Betfage i Bungkutnyo nu Zaitun. I kiijo' i Yesus nonsai ua'aha na mian anu saja' mombatuki Ia lumajang namba i moona. 2“Lako'mo i kampung anu moona otokai aijo',” pinotuun i Yesus hi aha. “Otoaje miu na sa'angu' na keledai sego-segot tiba anaknyo. Bukai ohu-ohua' ka' boa mae. 3De daagi' ko mian mompokilawa apa-apaa, poto'iakon hi mian atina', ‘Tumpu mompalaluimo’, saba' mian aijo' sampaje mompobee' keledai aijo' oboa mae.”

4Han aijo' sumo aitu da jadi apaa na anu tinaeakonmo nu nabi sumo uuka,

5 # Za. 9:9 “Taeakon hi Sion,

Tomundo'um tinokamo hi komiu.

Ia madi' kotige-tige ka' sinumake' i sa'angu' na keledai,

sa'angu' anak nu keledai anu daagi' ise'.”

6Lapas aijo' ua'aha na anu saja' mombatuki Ia ka' nombaumo sumo anu pinotuunakon i Yesus hi aha. 7Aha nomboa keledai aijo' tiba anaknyo. Lantas tonga' nu keledai haha aijo' ilatasan nu aha tiba juba' nu aha. Lapas aijo', i Yesus sinumake'mo. 8Da'isan na mian kiijo' mae nontalabakon to juba-juba' nu aha i jalan, ka' to mia-mian sangga'at nonsolui to panga-panga' ise' nu kau', ka' pinolatas i totonga' nu jalan. 9#Mzm. 118:26 Mian da'isan anu ilumajang i moona ka' anu i mihi hi Yesus molo-moloboo', “Tumuu'mo na Anak i Daud! Obalakatiakon na Ia anu tinoka tiba sanggo nu Tumpu! Puji' na Tumpu Anu Matangkas na Kuasanyo!”

10Lantas salatan i Yesus ninsoopmo i Yerusalem, songko-songko na kota aijo' kinalangkabutmo. “Aiya, ihe?” to mia-mian i kota aijo' nompaha poki-pokilawamo.

11“Ia Nabi Yesus, lengkat mae i Nazaret i Galilea,” tinaaman nu mian da'isan anu nonsampo jalan i Yesus.

I Yesus ninsoop nokiijo' i Laigan nu Tumpu

(Mrk. 11:15-19, Luk. 19:45-48, Yoh. 2:13-22)

12Lapas aijo' i Yesus ninsoop nokiijo' i Laigan nu Tumpu ka' nolaa' iwi-iwi' na mian anu mobalu-baluk i kiijo'. Ia nombalikakon to meja-meja' anu pontolosian doi, ka' to bangku-bangku nu anu mompobaluk tomonsi' malapati'. 13#Yes. 56:7, Yer. 7:11 Lantas Ia notataemo hi to mia-mian aijo', “I uno nu Kitab nu Tumpu tinulis, Tumpu notatae, ‘Laigan-Ku osanggohi laigan tampat balado'a.’ Panyo komiu mompotimbalimo petaa nu tololang!”

14To mia-mian anu mapisok ka' anu lupe tinoka hi Yesus i Laigan nu Tumpu, ka' Ia nompa'alin aha. 15Panyo Kapala nu to Ima-imam ka' to gulu-gulu' agama notambuha'mo nontoa anu okabangangi, anu binau i Yesus. Ka' aha notambuha' suele nohongo to ana-anak binalame-lame'mo i Laigan nu Tumpu, “Tumuu'mo na Anak i Daud!”

16 # Mzm. 8:3 Aha notatae hi Yesus, “Beleyum nohongo apaa na anu tinaloakon nu aha?”

“Ii' Aku nohongo,” tinaaman i Yesus. “Ma'isa toho' komiu nombasa' ayat Kitab nu Tumpu aiya: ‘To ana-anak ka' bungamea' Ingajannumo montaeakon pompuji' anu talakana'’?”

17Lapas aijo', i Yesus nompala'i aha, lantas nambamo i kota Betania ka' i hoyot sinampahu i kiijo' mae.

I Yesus nongkutuki nu kau' ara

(Mrk. 11:12-14,20-24)

18Dodododopnyo daagi' subu-subu aha nambamo mokiijo'mo minsusule' i kota, i Yesus no'ohopmo. 19Ia nontoa sangkau na kau' ara i sambiha' nu jalan. Ia namba i pu'unnyo, nu kau' aijo', panyo madi' nohumpak sa'angu' pe'e na bua'nyo, boli mompiakon hohonnyo. Lantas i Yesus notatae i kau' aijo', “Oko madi'mo daagi' mimbua'!” Lau-laus kau' ara aijo' nagayou.

20Salatan anu saja' mombatuki Yesus nontoa kajadian aijo', aha binangangmo hondo. “Mosia na kau' ara aijo' timbali lau-laus nanggas sampu-sampu'un?” pinokilawa nu aha.

21 # Mat. 17:20, 1Kor. 13:2 “Totu'u” tinaaman i Yesus, “De komiu palesaya ka' madi' bata-bata, komiu timbali mombau apaa na anu Binaungkumo i kau' ara aiya. Ka' misa' ola aijo', aitu pe'e komiu timbali motatae i bungkutnyo aiya, ‘Talahangkat ka' tongalin mokaiyong i uno nu ambai’; saba' han aijo' tionyo timbali. 22Mau mule' apaa na anu opoita miu i uno nu do'aum, tionyo o humpak miu, asan komiu palesaya.”

Anu mompokilawa mongkona hak i Yesus

(Mrk. 11:27-33, Luk. 20:1-8)

23Lapas aijo', i Yesus ninsusule' i Laigan nu Tumpu, lantas ninsoop ka' nongajan i kiijo'. Tempo'nyo Ia hau-haunyo mongajan, Kapala nu to Ima-imam ka' to pola-polaya' nu Yahudi tinokamo hi Ia ka' nompokilawa, “Apaa na alasan nu Beleyum mombau iwi-iwi' aiya? Ihe na nombee'i hak aiya hi Beleyum?”

24I Yesus nontaami, “Aku suele kahanda' mompokilawa hi komiu. Ka' de komiu montaami, Aku montaeakonje hi komiu tiba hak ihe na Aku mombau hahan aiya. 25I Yohanes mompalamandikan tiba hak ihe? Tumpu kabai mian?”

Lantas Kapala nu to Ima-imam ka' to pola-polaya' nu Yahudi aijo' nontampu'unimo nombisalakon kiijo' hi aha, “De kita montaeakon, ‘Tiba hak nu Tumpu,’ Ia motatae, ‘Desumo aitu, kadaka' komiu madi' palesaya hi ia?’ 26Panyo de o taeakonto, ‘Tiba hak nu mian,’ kita mabuhuk hi mian da'isan, kalana aha iwi-iwi' monsangka i Yohanes samian na nabi.” 27Jadi aha nontaami, “Kami madi' monsumbu'.”

Lantas i Yesus notatae hi aha, “Desumo aitu, Aku suele madi' montaeakon hi komiu tiba hak ihe na Aku nombau iwi-iwi' aiya.”

Kantuang mongkona ua'aha na anak

28“Uuka, mosia na pikilannum mongkona han aiya?” lau-laus i Yesus notatae. “Daagi' ko samian na tuuma anu ko anaknyo ua'aha na mo'ane. Mian aijo' namba hi anaknyo anu tumpe ka' notatae, ‘Anak, lako'mo mamba pokalaja i ale' nu anggur sinaa uuka.’ 29‘Aku madi' mongka'oho',’ tinaaman nu anak aijo'. Panyo madi' pinin nongabali'mo na pikilannyo ka' namba i ale' nu anggur aijo'. 30Lapas aitu tuumanyo namba hi anaknyo anu ko'ohua'nyo, ka' nontaeakon makisut anu susumo uuka. ‘Ma'ima'mo kita Tuuma,’ tinaaman nu anak ko'ohua'nyo aijo'. Panyo ia madi' namba. 31Jadi, ua'aha na anak aijo', ihe na anu nombau pongka'oho' nu tuumanyo?”

“Anu tumpe,” tinaaman nu Kapala nu to Ima-imam ka' to pola-polaya' nu Yahudi aijo'.

Lantas i Yesus notatae hi aha, “Palesayamo: Anu saja' montage hasin, ka' to bou-boune anu masala' na tongkoimoona timbali mian anu palesayamo hi Tumpu ka' de mule' komiu. 32#Luk. 3:12, 7:29-30 Kalana i Yohanes anu Mompalamandikan tinoka, ka' nompotiju' hi komiu mosia na tumuu' anu nu kahanda'i nu Tumpu, panyo komiu madi' mongka'oho' palesaya i pangajalannyo; panyo anu saja' montage hasin ka' to bou-boune masala' palesaya hi ia. Panyo mau mule' komiu nontoamo iwi-iwi' aijo', komiu madi' ahi' mombali'i pikilan miu ka' madi' palesaya hi Tumpu.”

Kantuang mongkona anu mombau ale' nu anggur

(Mrk. 12:1-12, Luk. 20:9-19)

33 # Yes. 5:1-2 “Hongo na kantuang anu sa'angu' aiya mule'”, koonyo i Yesus. “Samian na tumpu nu tano' nonsu'ani sa'angu' na ale' nu anggur. Ia nompagan titikub, ka' nongkeke bolo' bau pompo' una'an tampat pompeeti anggur, ka' mule' nompotinjo pontamongian. Lapas aijo', ia nontamboakon ale' nu anggur aijo' hi aha anu mokalaja, lantas namba i lipu' sangga'at. 34Salatan tinokamo na tempo'nyo nu pontipuan bua'nyo nu anggur, tumpu nu tano' aijo' nonsai to posa-posaihonnyo mamba hi anu mongkalaja ale' aijo', da montalimakon baginyo. 35Panyo anu mongkalaja ale' aijo' nohakop to posa-posaihon nu tumpu nu tano' aijo': Samian binobotan, sangga'at pinatean, ka' sangga'at mule' pinahambunu'akon nu batu. 36Tumpu nu tano' aijo' nonsai mule' to posa-posaihon sangga'at, lebe da'isan molingkudui anu momona. Panyo aha suele binau sumo anu momona. 37Imihinyo tumpu nu tano' aijo' nonsai namba hi aha, me posi anaknyo. ‘Tantu anakku na o adati,’ ia binapikin. 38Panyo salatan anu mokalaja ale' aijo' nontoa anak nu tumpu nu tano' aijo', aha notatae samian ka' samian, ‘Toa, aiyamo na ia anu montoongi pusaka'nyo. Imbo' da o patei na ia, da kita na mohumpak pusaka'nyo!’ 39Saba' anak aijo' i hakop ka' ingalin i sambiha'nyo ka' pinatean.”

40I Yesus nompokilawa, “Jadi, de tumpu nu ale' nu anggur aijo' minsusule'mo mae, apaa na anu tionyo nu bau hi anu mokalaja aijo'?”

41Aha nontaami, “Tantu ia mompatei to mia-mian ma'idek aijo', lantas montamboakon ale' nu anggur aijo' hi mian sangga'at anu mongka'oho' mombee'i sangga'at na hasin nu tano' aijo' hi ia de tokamo na tempo'nyo.”

42 # Mzm. 118:22-23 Saba' i Yesus notatae hi aha, “Ma'isa toho' komiu nombasa' anu tinulis i uno nu Kitab nu Tumpu?

‘Batu anu madi' opake nu tukang bangunan

tinimbalimo batu anu talalo o palalui.

Sumo aijo' na palabuatan nu Tumpu;

palias na ko ima'nyo!’ ”

43“Jadi, o inau'mo,” koo-Nyo i Yesus, “Iwi-iwi' na hak salaku mian anu palesayamo hi Tumpu, o alamo atina' hi komiu ka' obee' hi sa'angu' na bansa anu montuluti to pale-palentah nu Tumpu. [ 44Mian anu manabu' i batu aijo', tionyo hansun; ka' mian anu nu tuda' nu batu aijo' nu diodos tinimbali abu'.]”

45Salatan Kapala nu to Ima-imam ka' to mia-mian Farisi nohongo kantuangan i Yesus aijo', sinumbu'mo nu aha na i Yesus taalu' monsisik aha. 46Jadi aha binala usahamo mohakop Ia. Panyo aha mabuhuk hi mian da'isan aijo', kalana mian da'isan aijo' monsangka i Yesus samian na nabi.

Currently Selected:

MATIUS 21: LAILOE

Highlight

Copy