MATIUS 20
20
Kantuang mongkona anu mokalaja i ale' nu anggur
1“De Tumpu mompalentah, ka'ada'annyo sumomo kantuang aiya: Samian na tumpu nu ale' nu anggur nosabat tempo'nyo daagi' subu, molio mian anu mokalaja i ale' nu anggurnyo. 2Salatan ia sinetujumo mombayan aha sa'angu' na doi salaka sansinaa, ia nonsaimo aha mokalaja i ale' nu anggurnyo. 3Jam osio' daagi' subu, tumpu nu ale' aijo' namba mule', ka' nontoa to pia-piangkuka na mian anu daagi' hau-haunyo ola mahalajangan i pasan. 4Lantas ia notatae hi aha, ‘Lako'mo na komiu mokalaja i ale' nu anggurku. Aku mombayanje komiu nu tamboo anu pantas.’ 5Ka' aha mule' i nambamo. Jam sampulu' ka' ohua' sonsu'un na sinaa ka' suele jam totolu' mamalom, tumpu nu ale' aijo' nosabat mule', ka' nombau mule' anu sumo aijo'. 6Ka' kila-kila jam olima' ohanimo makakinsap na sinaa, ia nosabat mule' ka' nontoa daagi' ko mian anu mahalajangan. Lantas ia nompokilawa hi aha, ‘Kadaka' komiu sansinaamo na saintinjo i aiya, madi' ko anu obau apa-apaa?’ 7To mia-mian aijo' nontaami, ‘Madi' ko mian anu mombee'i pakalaja'an hi kami.’ ‘Desumo aijo'’, koonyo nu tumpu nu ale' aijo', ‘lako'mo na komiu mokalaja i ale' nu anggurku.’
8 #
Im. 19:13, Ul. 24:15 Ohanimo malom, tumpu nu ale' nu anggur aijo' notatae hi mandonnyo, ‘Lagamo na anu mokalaja aijo' ka' bayanmo na tamboo nu aha toto samian, otampu'uni lengkat hi mian anu ninsoop i mihi toka hi aha anu moona ninsoop.’
9Lantas tinokamo na anu nokalaja, mulai anu nokalaja lengkat i jam olima' ohani malom. Aha toto samian nontalima sa'angu' na doi salaka. 10Lapas aitu tinoka mule' na anu mokalaja, anu tinamboan lengkat pe'e subu. Aha binapikin, aha tantu nontalima molabi. Padahan aha ola ahi' binee'an suele sa'angu' na doi salaka. 11Tempo'nyo nontalima doi aijo', aha notusa'mo hi tumpu nu ale'. 12‘Anu nokalaja tinoka i mihi aijo' ola nokalaja sajam. Panyo kami nokalaja sinansinaa i panas anu talalo masingit, panyo kita Tuan nombayan aha pokakanamo sumo kami!’ 13Tumpu nu ale' nu anggur aijo' nontaami, hi sala'samian anu aijo' hi aha, ‘Sangalu, aku madi' ko sala' hi komiu. Te misa' beleyum sinetujumo montalima tamboo mokalaja sansinaa ohua' na doi salaka? 14Jadi, alamo na tamboo miu, ka' lako'mo. Aku totu'u ko kahanda' mombee'i mian anu minsoop i mihi aijo', tamboonyo anu pokakana tiba anu binee'ku hi beleyum. 15Apaa aku madi' timbali mombau posi pongka'oho'ku i posi anungku? Kabai beleyum madi' sanang kalana aku manonong?’ ”
16 #
Mat. 19:30, Mrk. 10:31, Luk. 13:30 Lantas i Yesus po'ule' notatae, “Sumo aitumo na to mia-mian anu tongkoimihi, timbali anu i moona, ka' to mia-mian anu i moona timbali anu tongkoimihi.”
I Yesus binasisik ko pintolunnyo mongkona kasilakan-Nyo
(Mrk. 10:32-34, Luk. 18:31-34)
17Tempo'nyo i Yesus nokiijo' i Yerusalem, i totonga' nu jalan, Ia nolaga sampulu' ka' ohua' anu saja' mombatuki Ia nosi pogombumo. Lantas Ia notatae hi aha, 18“Hongo! Kita uuka mokiijo'mo i Yerusalem. I kiijo' mae Anak nu Mian obee'mo hi Kapala nu to Ima-imam ka' to gulu-gulu' agama. Lantas Ia o hukummo mate, 19lapas aijo' obee' hi to mia-mian anu misa', Yahudi. Aha mompopo'ambangmo Ia, ka' mongkabisa'i Ia, ka' mule' monsalibmo Ia. Panyo ko totolu'nyo na sinaa, Ia po'ule'mo o potumuu'.”
Poitaon nu tina i Yakobus ka' i Yohanes
(Mrk. 10:35-45)
20Ilapas aitu, bengkele' i Zebedeus tinoka tiba to ana-anaknyo hi Yesus. I ahop hi Yesus, ia tinolodadupu ka' nompoita apa-apaa.
21“Kita Tina, mongka'oho' apaa?” pinokilawa i Yesus.
Bengkele' i Zebedeus aijo' nontaami, “Aku mongkahanda'i ohua' na anakku aiya, sumuhang i kowi ka' koanan nu Kita Tuuma, de Kita Tuuma saidi' mae timbali Tomundo mule'.”
22“Komiu madi' monsumbu' apaa na anu opoita miu,” koo-Nyo i Yesus hi aha. “Opoko ala miu na monginum i mangko' kasansala'an anu tionyo Ku'inum?”
“Opoko ala,” tinaaman nu aha.
23I Yesus notatae, “Memang komiu monginumje suele i mangko'-Ku. Panyo mongkona ihe na anu sumuhang i kowi ka' i koanan-Ku, aijo' misa' kuasang-Ku na montantukan. Tampat-tampat aijo' bau tampat nu to mia-mian anu tinantukanmo nu Tuumang-Ku.”
24Salatan aha sampulu' anu saja' mombatuki ia sangga'at nohongo han aijo', aha pinusa hi aha ohua' na moto utus aijo'. 25#Luk. 22:25-26 Kalana aijo', i Yesus nolaga aha iwi-iwi' lantas notatae, “Komiu monsumbu', to pola-polaya' bansa anu madi' monsumbu' Tumpu monsansala layatnyo. Ka' to mia-mian daka' nu aha momposala' aha. 26#Mat. 23:11, Mrk. 9:35, Luk. 22:26 Panyo komiu madi' timbali sumo aijo'. Ola ahi' mian anu mongka'oho' timbali daka' atina' hi komiu, tionyo timbali posaihonum.
27Ka' mian anu mongka'oho' timbali tongkoimoona atina' hi komiu, tionyo timbali posaihonum. 28Pokakana sumo Anak nu Mian aijo' suele Ia toka misa' da okalibosi, panyo da mongkalibosi, ka' mombee' nyawa-Nyo bau pompobebas mian da'isan.”
I Yesus nompa'alin ua'aha na mian mapisok
(Mrk. 10:46-52, Luk. 18:35-43)
29Tempo'nyo aha nompala'imo Yerikho, da'isan na mian mombatuki Yesus. 30Ua'aha na mian mapisok hau-haunyo sumuhang i sohipi' nu jalan. Tempo'nyo aha nohongo taalu' i Yesus notulumo, aha noloboo', “Anak i Daud, kalibosi mae na kami!”
31Mian da'isan anu daagi' i kiijo' nontambuha'i aha, ka' nontewa'aha pomohokot. Panyo aha noloboo' nompaka pantiilan, “Kita Tuan, Anak i Daud, kalibosi mae na kami!”
32Lantas i Yesus binelenti ka' nolaga aha. “Apaa na anu oka'ima'i miu, Kubau hi komiu?” pinokilawa i Yesus.
33Aha nontaami, “Kita Tuan, kami mongkahanda'i montoa!”
34I Yesus nolibos hi aha, lantas tiniiknyo na mata nu aha. Tempo'nyo aijo' pe'e aha timbalimo nontoa. Lantas aha nombatukimo Yesus.
Currently Selected:
MATIUS 20: LAILOE
Highlight
Share
Copy
Want to have your highlights saved across all your devices? Sign up or sign in
