MATIUS 19

Ajalan i Yesus mongkona poga'atan

(Mrk. 10:1-12)

1Salatan i Yesus noko taloakonmo iwi-iwi' aijo', Ia nompala'imo Galilea lantas namba i da'erah nu Yudea i santoa nu Kaunyo Yordan. 2Da'isan na mian anu nombatuki Ia, ka' Ia nompa'alinakon aha i kiijo'.

3Lantas to mia-mian Farisi tinoka kahanda' monsobai Ia. Aha nompokilawa, “Koonyo nu atulan nu agamanto, apaa timbali na mian mongga'atakon bengkele'nyo maumo sabab anu madi' mingkona?”

4 # Kej. 1:27, 5:2 I Yesus nontaami, “Pa' komiu ma'isa nombasa' i uno nu Kitab nu Tumpu tukoonyo anu Nompojadi mian, momonanyo Nompotimbalimo aha mo'ane ka' boune? 5#Kej. 2:24 Ka' ilapas aijo' Ia notataemo, ‘Aijo' nasababnyo mo'ane mompala'i tina tuumanyo, ka' mosa'angu' tiba bengkele'nyo, sahingga aha ohua' timbali sa'a-sa'angu'.’ 6Jadi aha misa'mo daagi' ohua' na mian, panyo tinimbalimo sa'a-sa'angu'. Aijo' nasababnyo apaa na anu pinosa' angu'akonmo nu Tumpu, madi' timbali nu ga'atakon nu mian.”

7 # Ul. 24:1-4, Mat. 5:31 Lantas to mia-mian nu Farisi nompokilawamo hi aha, “Desumo aitu kadaka' na i Musa nompokaumo mian mombee'i sulat poga'atan hi bengkele'nyo anu nu ga'atakon?”

8I Yesus nontaami, “I Musa mompoloas komiu mongga'atakon bengkele' miu, kalana komiu talalo susa' na o ajan. Panyo sabenannyo misa' sumo aitu na momonanyo. 9#Mat. 5:32, 1Kor. 7:10-11 Jadi, hongo pe'e na aiya: Ihe na mongga'atakon bengkele'nyo – padahan boune aijo' madi' lale mata – lapas aijo' mo'osoa mule' tiba boune sangga'at, mian aijo' masala'.”

10Sahingga anu saja' mombatuki Yesus notatae hi Ia, “De han po'osoan moto bengkele' sumo aijo', sahanyo bolimo mo'osoa.”

11I Yesus nontaami, “Madi' iwi-iwi' na mian timbali montalima potatae aiya, ola to mia-mian anu tinantukanmo nu Tumpu. 12Kalana daagi' ko mian anu madi' timbali mo'osoa, kalana aha memang pinohampe sumo aijo'. Daagi' suele ko anu madi' timbali mo'osoa, saba' ia binaumo nu mian sangga'at sumo aijo'. Ka' daagi' mule' ko anu mosi pile'i da madi' mo'osoa, da timbali mompojalan palentah nu Tumpu. Mian anu moko ala montalima pangajalan aiya, bakas da ia montalima.”

I Yesus nombalakati to ana-anak

(Mrk. 10:13-16, Luk. 18:15-17)

13Daagi' ko to mia-mian anu nomboa to ana-anak hi Yesus da Ia mompotudu lima-Nyo i buan nu ubak nu aha, ka' mondo'akon aha. Panyo anu saja' mombatuki Yesus nontambuha'i to mia-mian aijo'. 14Sahingga i Yesus notatae hi anu saja' mombatuki Ia, “Bakas na to ana-anak aijo' toka hi beleng-Ku! Boli montewa' aha, kalana to mia-mian anu susumo aiya na timbali mian anu palesayamo hi Tumpu.”

15Lantas i Yesus nompotudu lima-Nyo i buan nu ubak nu to ana-anak aijo', ka' binalakatannyo na aha. Lapas aitu Ia nambamo lengkat i kiijo'.

Olitau anu kaya

(Mrk. 10:17-31, Luk. 18:18-30)

16Daagi' ko sansinaan, samian na mo'ane tinoka hi Yesus. “Kita Tuumangku Gulu',” tukoonyo, “palabuatan anu ma'ima', apaa na tionyo kubau, da mohumpak kantumuu'an anu talakana' toka sidu-sidutu'?”

17I Yesus nontaami, “Kadaka' beleyum mompokilawa hi beleng-Ku mongkona apaa na anu ma'ima'? Ola, Sa'angu' na anu ma'ima'. De beleyum mongka'ima'i tumuu', beleyum tionyo mohongo to pale-palentah nu Tumpu.”

18 # Kel. 20:13-16, Ul. 5:17-20 “Palentah anu mosia na aijo'?” koonyo nu mian aijo'.

I Yesus nontaami, “Boli mompatei, boli masala', boli montomang, boli timbali sakisi baleko', 19#Kel. 20:12, Im. 19:18, Ul. 5:16 o adati na tuumaum ka' tinaum; ka' okalibosi na sangko mian sumo beleyum mongkalibosi posi butongum.”

20“Iwi-iwi' na palentah aijo' binatukankumo,” tinaaman nu mian olitau aijo'. “Apaa mule' na anu opalalui?”

21I Yesus notatae hi ia, “De beleyum mongkahanda'i da timbali mian anu madi' kokasala'annyo, lako' pobaluk iwi-iwi' na halata'um. Bee' na doinyo hi mian anu kasiasi, ka' beleyum mohumpakje halata' anu i suluga'. Lapas aijo', tokajemae mombatuki Aku!”

22Nohongo potatae aijo', olitau aijo' namba ka' sinusa' na kinyonyoa, kalana ia talalo kaya.

23Lantas i Yesus notatae hi anu saja' mombatuki Ia, “Aku motatae hi beleyum, susa' hondo na mian anu kaya timbali mian anu palesayamo hi Tumpu. 24Ka' aiya mule' na anu kahanda' Kutaeakon hi beleyum; lebe dengke sa'angu' na unta minsoop i bolo' nu paka'ut, ka' de mule' samian na anu kaya minsoop i Dunia Bu'ou nu Tumpu.”

25Salatan anu saja' mombatuki Ia nohongo potatae i Yesus aijo', aha binangangmo. “Desumo aitu”, tukoonyo nu aha, “ihe na timbali moko ala salamat?”

26I Yesus nontoa aha lantas notatae, “De mian, aijo' madi' opoko ala! Panyo de hi Tumpu, iwi-iwi' timbali.”

27Lantas i Petrus notatae, “Toamo, kami nompala'imo iwi-iwi' apaa da mombatukimo Kita Tuuma. Ka' apaa na anu otalimaje mami?”

28 # Mat. 25:31, Luk. 22:30 I Yesus notatae hi aha, “Palesayamo: I Dunia Bu'ou, Anak nu Mian sumuhangje i kasuhangan-Nyo anu talasanggo. Tempo'nyo aitu, komiu anu saja' mombatuki Aku, sumuhangje i sampulu' ka' ohua' na kasuhangan anu talasanggo, ka' momputusi sampulu' ka' ohua' na tulunan nu bansa Israel! 29Ka' batu-batu mian anu nompala'imo laigan, kabai utus mo'ane, kabai utus boune, kabai tina tuuma, kabai to ana-anak, kabai ale', kalana Aku, mian aijo' montalimaje mule' pinsa'atu lipat. Ka' ia montalimaje mule' kantumuu'an anu talakana' ka' sampe toka sidu-sidutu'. 30#Mat. 20:16, Luk. 13:30 Panyo da'isan na mian anu tempo' uuka tongkoimoona timbali anu tongkoimihi, ka' anu tempo' uuka tongkoimihi timbali anu tongkoimoona.”

Currently Selected:

MATIUS 19: LAILOE

Highlight

Copy