MATIUS 15
15
To ada-adat nu mompolee'
(Mrk. 7:1-13)
1Sanggombu na mian nu Farisi ka' toto piangkuka na Gulu' Agama lengkat mae i Yerusalem tinokamo hi Yesus. Aha nompokilawa hi Ia, 2“Kadaka' anu saja' mombatuki Belento molanggai to ada-adat nu mompolee'to? De mongkaanmo, aha madi' mombaso'i lima imoonanyo mombatuki atulan!”
3I Yesus nontaami, “Ka' kadaka' komiu suele molanggai palentah nu Tumpu, ola kalana mongka'oho' mombatuki to ada-adat nu mompolee' miu? 4#Kel. 20:12, 21:17, Im. 20:9, Ul. 5:16 Sabab Tumpu notatae, ‘O'adati na tuumaum ka' tinaum,’ ka' ‘Ihehemo na montalo-taloakon tuumaum, tinaum, tionyo o hukum mate.’ 5Panyo komiu mongajanakon: de mian motatae hi tu'anyonyo, ‘Apaa na anu tionyo kubee' hi tuuma ka' tina, sinombahkonkumo hi Tumpu Allah,’ 6saba' mian aijo' madi'mo daagi' o tuntut da mongadati tu'anyonyo. Jadi, kalana to ada-adat nu mompolee'um, komiu mongoa'imo dengke na potatae nu Tumpu. 7Komiu mian baleko'! Kona hondo apaa na anu tinaeakonmo i Yesaya mongkona komiu, aitumo,
8 #
Yes. 29:13
‘Sumo uuka na koonyo nu Tumpu:
To mia-mian haha aijo' ola ahi' monsombah Aku nu potatae,
panyo kinyonyoa nu aha majo'on lengkat hi beleng-Ku.
9Palasuma na aha monsombah Aku,
kalana atulan nu mian na nu ajan nu aha
kokoonyo pe'e aijo' atulan-Kumo.’ ”
Hahan mian timbali mahumimi'
(Mrk. 7:14-23)
10Lapas aijo' i Yesus nolaga to mia-mian ka' notatae hi aha, “Hongo da mangalati'! 11Anu minsoop i nganga' madi' mombau da mian aijo' mahumimi'; ola ahi' anu mosabat lengkat i nganga'nyo, aijo'mo na anu mompotimbali ia mahumimi'.”
12Lantas anu saja' mombatuki Yesus tinoka ka' notatae hi Ia, “Osumbu'mo nu Kita Tuuma saba' to mia-mian nu Farisi aijo' ingise'-ise'mo, tempo'nyo nohongo Kita Tuuma notatae sumo aijo'?”
13I Yesus nontaami, “Batu-batu pomulaon anu madi' sinu'an nu Tuumang-Ku i suluga' o bubutakon. 14#Luk. 6:39 Madi' timbali opalahatikan na to mia-mian Farisi aijo'. Aha aijo' mapisok montaka' anu mapisok; jadi, de mian mapisok montaka' mian mapisok ua-ua'aha timbali manabu' i uno nu bolo'.”
15I Petrus notatae, “Tulungi mae pojalasakon na kantuang aijo' hi kami, Kita Tuuma!”
16I Yesus nontaami aha, “Apaa komiu suele ma'isa mangalati'? 17Madi' osumbu' miu kalana anu minsoop i uno nu nganga' mintatau' i uno nu kompong, ka' lapas mae mosabatmo mule'? 18#Mat. 12:34 Panyo anu mosabat lengkat i nganga', aijo' pinolengkatannyo mae, lengkat i kinyonyoa; ka' aijo'mo na mombau mian timbali mahumimi'. 19Kalana lengkat i uno nu kinyonyoa lubat na pikilan-pikilan anu ma'idek, anu monsabapi mian mompatei, masala' mombau anu moko mahenyu, montomang, mombee'i sakisi baleko', ka' mompitana'akon. 20Hahan aijo' na monsabapi mian timbali mahumimi', ka' misa' mongkaan nu lima anu madi' o baso'i.”
Palesaya anu totu-totu'u nu samian na boune nu Kana'an
(Mrk. 7:24-30)
21Lapas aijo' i Yesus nompala'i tampat aijo', ka' namba i tano' ohani kota Tirus ka' Sidon. 22Samian na boune nu Kana'an lengkat mae i da'erah aijo', tinoka hi Yesus ka' nolo-noloboo', “Anak i Daud, kalibosi na aku! Anakku boune pininsoopanmo nu roh ma'idek. Ka'ada'annyo masakit hondo.”
23I Yesus madi' nontaami mau pe'e apaa hi boune aijo'. Lantas anu saja' mombatuki Yesus tinoka hi Ia ka' nompoita, “Kita Tuuma, sai na boune aijo' mamba. Ia ola saja' hengge' i hikunto!”
24I Yesus nontaami, “Aku sinai ola ahi' mamba hi bansa Israel, posi hi aha anu sala' na jalan.”
25Boune aijo' tinoka ka' tinolodupu i ahop hi Yesus ka' notatae, “Tulungi mae na aku, Kita Tuan.”
26I Yesus nontaami, “Madi' ma'ima' mongala kaanon nu to ana-anak, ka' o bahetakon hi dedeng.”
27“Totu'u Kita, Tuan”, tinaaman nu boune aijo', “Panyo dedeng pe'e mongkaan laaya' anu manabu' lengkat i meja' nu tuannyo.”
28Lantas aijo' i Yesus notataemo hi ia, “Kita Tina, totu'u daka' na palesayaum! Jadimo, apaa na anu nu ka'oho'!” Tempo'nyo aitu mule' anak boune aijo' i na'alinmo.
I Yesus nompa'alin da'isan na mian anu masakit
29I Yesus nompala'imo tampat aijo', lantas ilumajang nontuus biwi nu bone' i dowiwi nu Galilea. Lapas aitu Ia noliba' i sa'angu' na bungkutnyo, lantas sinumuhang i kiijo'. 30Da'isan na mian anu tinoka hi Ia nomboa to mia-mian anu pengko', anu mapisok, anu kapi', anu momo', ka' da'isan mule' na mian anu masakit, sangga'at. Aha nompo'una' mian haha aijo' i ahop hi Yesus, ka' Ia nompa'alinakon mian haha aijo'. 31Mian da'isan anu daagi' i kiijo' binangang hondo, salatan aha montoamo mian momo' notataemo, mian pengko' na'alinmo, mian anu kapi' ilumajangmo, ka' mian anu mapisok nontoamo. Lantas aha nompuji-puji'mo Tumpu bansa nu Israel.
I Yesus nombee'i mongkaan opat na madala na mian
(Mrk. 8:1-10)
32Lapas aijo' i Yesus nolaga anu saja' mombatuki Ia ka' notatae, “Aku molibos hi mian da'isan aijo'. Tolunsinaamo na kopinnyo aha nohingga-hinggat tiba aku, ka' uuka aha madi'mo ko kaanon. Aku madi' mongka'oho' mompojohok aha minsusule' mo'ohop dumo tolubuk i jalan.”
33Lantas anu saja' mombatuki Yesus nompokilawamo hi Ia, “Iyamae na kita timbali mohumpak kaanon i da'erah anu manintade aiya bau kapentingan nu mian ko da'isan aiya?”
34“Daagi' sangkuka na roti hi komiu?” pinokilawa i Yesus hi aha.
“Popitu',” tinaaman nu aha, “ka' ikan to ise-ise' daagi' pia-piangkuka na batunyo.”
35Lantas i Yesus nonsai mian da'isan aijo' da sumuhangmo i tano'. 36Lapas aijo' Ia nongala popitu' na roti ka' ikannyo, lantas Ia nompoitamo talima kase hi Tumpu. Lapas aijo', Ia nompuge-pugemo roti ka' ikan aijo' nu lima-Nyo, ka' binee'-Nyo hi anu saja' mombatuki Ia. Ka' binagi-bagiakonnyo hi mian da'isan aijo'. 37Iwi-iwi' na mian aijo' nongkaan sampe nobosu. Ilapas aijo' anu saja' mombatuki Yesus nolimu' labinyo nu anu kinaan nu aha aijo'. Iwi-iwi' popitu' na ponang nobuke'. 38Konjoo' nu mian, ola posi to momo'ane anu nongkaan tempo'nyo aijo', opat na madala na mian, ma'isa i lekeng na boune ka' to ana-anak.
39Lapas aijo', i Yesus nonsaimo mian da'isan aijo' minsusule'. Ia sinumake'mo i sa'angu' na duangan ka' namba nokiijo' i da'erah Magadan.
Currently Selected:
MATIUS 15: LAILOE
Highlight
Share
Copy
Want to have your highlights saved across all your devices? Sign up or sign in
