MATIUS 14

Kasilakan I Yohanes anu Mompalamandikan

(Mrk. 6:14-29, Luk. 9:7-9)

1Tempo'nyo aitu i Herodes mongkuasai lipu' nu Galilea, nohongo lele i Yesus. 2I Herodes notataemo hi to paga-pagawenyo, “Tantu aiya i Yohanes anu Mompalamandikan po'ule'mo tinumuu'! Aijo' na sababnyo Ia ko kuasa mombau anu okabangangi.”

3 # Luk. 3:19-20 Kalana toho'mo i Herodes nompokau da i hakop na i Yohanes, ka'pinungu na ia ka' pinosoop i uno nu talungku'. I Herodes nombau sumo aitu, kalana han i Herodias bengkele' nu utusnyo, aijo'mo i Filipus. 4#Im. 18:16, 20:21 Kalana toho'mo i Yohanes nontaeakon sumo uuka hi Herodes, “Madi' timbali beleyum mo'osoa tiba i Herodias!” 5Sabenannyo i Herodes mongka'oho' mompatei i Yohanes, panyo ia mabuhuk hi to mia-mian, kalana aha monsangka i Yohanes nabi.

6Tempo'nyo i Herodes molame'akon sinaa ka' taun kinahampeannyo, anak boune i Herodias nanari i ahop nu mian da'isan. Ia nanari talalo nomposanang kinyonyoa i Herodes, 7sahingga i Herodes binajanji' hi ia tiba sumpa', koonyo apaa na anu nu poita obee'je hi ia.

8Kalana sinale'anmo nu tinanyo, langkoyang aijo' notataemo, “Kupoita ubak i Yohanes anu saja' Mompalamandikan obee'akon mae hi belengku uuka aiya ka' osake' mae i dulang!”

9Nohongo poitaon aitu, i Herodes nolibosmo hondo. Panyo kalana ia binasumpa'mo i ahop nu mian anu pinasonyo toka i lameannyo, ia nompalentahkonmo da poitaon nu langkoyang aijo' opo daagi'. 10Ia nonsai mian mamba mokiijo' i talungku' da mongkolong mae ubak i Yohanes. 11Lapas aitu ubak i Yohanes binoa pinotimpas i dulang, ka' binee' hi langkoyang aijo'. Lantas langkoyang aijo' nomboa mule' hi tinanyo. 12Salatan sumo aitu anu saja' mombatuki Yohanes tinokamo nongala mayat i Yohanes ka' i lamunnyo. Lantas aha namba nompoto'iakon han aijo' hi Yesus.

I Yesus nombee'i mongkaan olima' na madala na mian

(Mrk. 6:30-44, Luk. 9:10-17, Yoh. 6:1-14)

13Tempo'nyo i Yesus nohongo lele aijo', Ia sinumake' i duangan posi sausa'nyo ka' nompala'i tampat aijo', da mamba mokiijo' i tampat anu liing. Panyo salatan ihongo nu to mia-mian na han aijo', aha nompala'i kota-kota nu aha ka' namba nompayuntun i Yesus nontulu jalan katano'an. 14Tempo'nyo i Yesus ilumobos lengkat i duangan ka' nontoa mian da'isan aijo', Ia nolibosmo hi aha. Lantas Ia nompa'alin to mia-mian anu masakit kiijo' hi aha.

15Tompasi'mo na sinaa, anu saja' mombatuki Yesus tinokamo ka' notatae hi Ia, “Sinaa aiya tompasi'mo ka' tampat aiya mosi panintade. Sahanyo kita Tuuma monsai to mia-mian aiya mamba, da timbali mongoli kaanon i to kampu-kampung.”

16“Bolimo aha mamba”, koonyo i Yesus, “Komiumo na mombee'i aha mongkaan.”

17“Hi kami ola ahi' olima' na roti ka' ohua' na ikan!” Tinaaman nu anu saja' mombatuki Yesus aijo'.

18“Boa mae na aijo',” koonyo i Yesus. 19Lapas aitu Ia nonsai mian da'isan aijo' da sumuhang i hemput. Lantas Ia nongala olima' na roti ka' ohua' na ikan, ka' nonsinda langit ka' nompoita balakat hi Tumpu. Lapas aijo' Ia nompuge-puge roti aijo' nu lima-Nyo ka' nombee' hi anu saja' mombatuki Ia da obagi-bagiakon hi mian da'isan aijo'. 20Aha iwi-iwi' nongkaan sampe nobosumo. Lapas aijo' anu saja' mombatuki Yesus nolimu' labinyo nu anu kinaan aijo', daagi' sampulu' ka' ohua' na ponang nobuke'. 21Anu nongkaan tempo'nyo aitu kugantang olima' na madala na mian, aitu ma'isa pe'e binilang na boune ka' to ana-anak.

I Yesus i lumajang i bawo nu uee

(Mrk. 6:45-52, Yoh. 6:16-21)

22Lapas aijo' i Yesus nonsaimo anu saja' mombatuki Ia da sumake'mo i duangan, ka' momonanyo motaap pe'e i dowiwi, hau-haunyo Ia nonsaimo mian da'isan aijo' da minsusule'mo. 23Salatan mian da'isan aijo' mambamo, i Yesus noliba'mo i sa'angu' na bungkutnyo sausa'nyo da balado'a. Tempo'nyo aitu pinihimo, i Yesus daagi' kiijo' mae sausa'nyo. 24Hau-haunyo aijo' duangan anu sinake'an nu anu saja' mombatuki Yesus najo'onmo i totonga' nu dowiwi. Duangan aijo' ningkele-kelenjuangmo sinantip nu bokon, kalana baleba' nu ahopi nu duangan. 25Ohanimo jam totolu' ka' jam anomo subu, i Yesus tinokamo hi aha i lumajang i bawo nu uee. 26Salatan anu mombatuki ia, nontoa ia i bawo nu uee aha tinolokengkengmo hondo, “Kadudu!” Noloboo'mo na aha ka' nabuhukmo.

27Panyo i Yesus lau-laus nontaami, “Potanang! Aku i Yesus. Boli mabuhuk!”

28Lantas i Petrus notatae, “De Beleyum totu'u i Yesus, saimae na aku lumajang i bawo nu uee.”

29“Toka mae,” Tinaaman i Yesus. Jadi i Petrus i lumobos lengkat i duangan, ka' i lumajang i bawo nu uee, ka' tinoka hi Yesus. 30Panyo salatan i Yesus nontoa, palias na kinodaka'nyo na baleba' i dowiwi aijo', ia nabuhukmo ka' nontampu'unimo tinonu'. “Tumpu, tulung!” ia noloboo'.

31I Yesus nalia-lia' na nonguluakon lima-Nyo ka' nontoongi ia, ka' notatae, “Petrus, Petrus, beleyum aiya ma'isa talalo palesaya. Kadaka' beleyum bata-bata hi beleng-Ku?”

32Lantas ua'aha aijo' sinumake'mo i duangan aijo' ka' baleba' binelentimo. 33Sahingga anu saja' mombatuki Yesus tinolodupu ka' nonsombah Ia. Aha notatae, “Totu'u Tumpu Anak nu Tumpu!”

I Yesus nompa'alinakon to mia-mian anu masakit i Genesaret

(Mrk. 6:53-56)

34Tempo'nyo aha tinoka i santoa nu dowiwi, aha i lumajang tano' nokiijo' i Genesaret. 35Ka' tempo'nyo to mia-mian i kiijo' nontoa taalu' anu tinoka aijo', i Yesus. Aha noleleakonmo lele aijo' i songko-songko na da'erah ka' anu mompaha ohani kota aijo'. Lantas iwi-iwi' na mian anu masakit binoamo hi Yesus. 36Ka' aha nompoita hi Ia da timbali montiik juba'-Nyo, mau ola puusnyo. Lantas iwi-iwi' na anu montiik na'alinmo.

Currently Selected:

MATIUS 14: LAILOE

Highlight

Copy