MATIUS 13

Kantuang mongkona samian anu monsa'u bine'

(Mrk. 4:1-9, Luk. 8:4-8)

1I sinaa aijo' mule' i Yesus nompala'imo laigan aijo', lantas namba i biwi nu Dowiwi ka' sinumuhang i kiijo'. 2#Luk. 5:1-3 Da'isan hondo na mian anu sinilimu' nontiikubi i Yesus, kalana aijo' Ia namba sinumuhang i uno nu duangan, panyo mian da'isan aijo' tinuminjo i biwi nu bone'. 3Lantas i Yesus nongajan manjoo' na han hi aha, nompake kantuang.

“Samian na topo ale' namba nonsau bine',” sumo aitu na i Yesus nontampu'uni sisikon-Nyo. 4“Hau-haunyo nonsau, daagi' ko bine' anu nanabu' i jalan. Lantas tomonsi' tinoka ka' bine' ningkot tinoluknyo. 5Daagi' ko anu nanabu' i tampat anu ko batunyo, anu tano'nyo sangkiding. Bine' haha aijo' malia' na tumuu' kalana tano'nyo sangkiding. 6Panyo salatan sinaa tolohangkatmo, bine' anu sala'je tumuu' aijo' magayou, lapas aijo' ia manggas ka' mate, saba' bakatnyo madi' talalo maleeng. 7Daagi' mule' ko bine' anu nanabu' i totonga' nu tano' anu sompiniton. Sompinit anu hii'on aijo' tumuu' ka' mongepet anu sala'je tumuu' aijo' sampe ia mate. 8Panyo daagi' mule' ko bine' anu nanabu' i tano' anu molumba', lantas nimbua'; daagi' ko anu sa'atu, daagi' ko anu anom pulu', ka' daagi' ko anu lipat tolumpulu'.”

9Lapas na Ia nonsisikakon kantuang aijo' i Yesus notataemo, “De ko bihing pohongomo!”

Kadaka' i Yesus mompake kantuang

(Mrk. 4:10-12, Luk. 8:9-10)

10Lapas aijo' anu saja' mombatuki Yesus tinoka ka' nompokilawa hi Ia, “Kadaka' Kita Tuuma mompake kantuang de motatae hi mian da'isan?”

11I Yesus nontaami, “Kalana komiu binee'anmo balakat da monsumbu' lahasia anu mongkona mosia na Tumpu mompalentah, panyo aha i madi'. 12#Mat. 25:29, Mrk. 4:25, Luk. 8:18, 19:26 Kalana mian anu daagi'mo, timbali obee'i lebe manjoo' mule', ka' anunyo na saidi' mae molabi. Panyo mian anu madi' ko apa-apaa, saba' sangkiding anu daagi' hi ia po'ule' o'ala. 13Aijo'mo na sababnyo Aku mompake kantuang de motatae tiba mian da'isan, kalana aha montoa, panyo sumo mian anu madi' montoa; aha mohongo, panyo sumo mian anu madi' mohongo, ka' madi' mangalati'. 14#Yes. 6:9-10 Tiba han aijo' jinadimo apaa na anu pinoto'i Nabi Yesaya,

‘Tumpu notatae:

Aha saja' mohongo

panyo madi' mangalati';

aha saja' mompalahatikan

panyo madi' monsumbu' apaa na anu jinadimo.

15Kalana pikilan nu to mia-mian aiya tinatumpumo,

bihing nu aha nabongonmo ka' mata nu aha pinipidi'akonmo.

Aiya jinadi da mata nu aha boli montoa,

bihing nu aha boli mohongo,

pikilan nu aha boli mangalati'

ka' boli po'ule' minsusule' mae hi beleng-Ku,

lantas Aku mompa'alin aha.’ ”

16 # Luk. 10:23-24 “Panyo palias na ka'untungan miu,” koonyo i Yesus hi anu saja' mombatuki Ia, “Kalana komiu totu'u nontoa ka' nohongo. 17Jaga mae, da'isan na nabi ka' mian anu tulut hi Tumpu mongkahanda'i montoa anu tinoa miu uuka aiya, panyo aha madi' montoa. Aha mongka'oho' mohongo apaa na anu i hongo miu uuka aiya, panyo aha madi'mo daagi' mohongo.”

I Yesus nontalangkan kantuang, samian anu topo monsa'u bine'

(Mrk. 4:13-20, Luk. 8:11-15)

18“Hongo pe'e apaa na alati'nyo nu kantuang mongkona anu monsa'u bine' aijo'. 19Bine' anu nanabu' i jalan sumomo to mia-mian mohongo lele mongkona mosia na Tumpu mompalentah, panyo madi' mangalati'. Anu Ma'idek aijo' tinoka ka' nongagoi apaa na anu daagi' pinoto'i i uno nu kinyonyoa nu aha. 20Bine' anu nanabu' i tampat anu manjoo' na batu, sumomo to mia-mian anu mohongo lele aijo', ka' lau-laus montalima tiba sanang na kinyonyoa. 21Panyo lele aijo' madi' mimbakat i uno nu kinyonyoa nu aha, sahingga madi' montahan pin. Salatan aha mongoa'imo susa' kabai o sakisa, kalana lele aijo', lau-laus aha moojalo. 22Bine' anu nanabu' i totonga' nu sompinit, sumomo to mia-mian anu mohongo lele aijo', panyo bata-bata mongkona kantumuu'an nu aha, ka' mongka'oho' tumuu' molabi. Kalana aijo' lele anu lengkat mae hi Tumpu, ola o piiti i kinyonyoa nu aha, sahingga madi' mimbua'. 23Ka' bine' anu nanabu' i tano' anu molumba', sumomo to mia-mian anu mohongo lele aijo' ka' mangalati'. Aha mimbua' manjoo', daagi' ko anu sa'atu, daagi' ko anu anom pulu', ka' daagi' ko anu tolumpulu' lipat na hasinnyo.”

Kantuang mongkona to pada-padang i totonga' nu gandum

24I Yesus monsisikakon mule' sa'angu' na kantuang hi mian da'isan, koo-Nyo, “De Tumpu mompalentah, ka'ada'annyo sumo kantuang aiya: Samian na topo ale' monsa'u bine' anu ma'ima' i ale'nyo. 25Daagi' kino sampahuan, salatan iwi-iwi' na mian ihoyotmo sampobali' nu topo ale' aijo' tinoka nonsau bine' nu padang i totonga' nu gandum aijo', ka' ia namba. 26Salatan anu sinau aijo' tinumuu'mo, ka' bunganyo i lubatmo kinantoaanmo suele na padang haha aijo'. 27Lantas to mia-mian anu mongala tamboo hi anu mongale' aijo' tinokamo hi anu mongale' aijo' ka' notatae, ‘Te misa' kita Tuan na nonsau bine' anu ma'ima' aijo' i ale' i Tuan? Mosia na jadinyo sampe ko to pada-padangnyo aijo' mae?’ 28Anu topo bau ale' aijo' nontaami, ‘Aijo' palabuatan nu anu monsampo bali'.’ Lantas to mia-mian anu mongala tamboo i ale' aijo' po'ule' nompokilawa, ‘Tuan timbali na kami mamba mombubuti padang aijo'?’ 29‘Madi',’ tinaamannyo, ‘Kalana padang haha aijo' de o bubutimo, tantu gandumnyo suele tombubutmo. 30Pojohokmo na padang haha aijo' tumuu' hingga-hinggat toka tempo'nyo mompadak. Tanda'i, kutaloakonje hi to mia-mian anu mompadak'. Limu'akon pe'e na padang haha aijo', obutu'i ka' o papui. Lapas aijo' limu' na gandumnyo, ka' o uno i uno nu alang.’ ”

Kantuang mongkona batu nu sasawi

(Mrk. 4:30-32, Luk. 13:18-19)

31I Yesus nonsisik mule' sa'angu' na kantuang hi mian da'isan, koonyo, “Bisuannyo Tumpu mompalentah, ka'ada'annyo sumomo kantuang aiya; sa'angu' na batu nu sasawi ingala nu samian, lantas sinau i ale'nyo. 32Batu nu sasawi aijo'mo bine' anu ise' hondo. Panyo de tumuu'mo, ia timbalimo anu talalo daka' i totonga' nu anu pinaha su'an. Ia timbalimo kau', sahingga to tomo-tomonsi' toka mimpeta i to panga-panga'nyo.”

Kantuang mongkona ragi

(Luk. 13:20-21)

33Daagi' ko sa'angu' na kantuang sangga'at anu sinisikakon i Yesus hi mian da'isan. “Bisuannyo Tumpu mompalentah, ka'ada'annyo sumomo ragi anu ingala nu samian na boune, lantas ginalo'akon tiba patom pulu' na liter na labu nu tiligu sampe mo'insu' iwi-iwi'!”

Kadaka' i Yesus mompake kantuang

(Mrk. 4:33-34)

34Iwi-iwi' ingajanakon i Yesus hi mian da'isan mompake kantuang. 35#Mzm. 78:2 Salatan sumo aijo' tinimbalimo na anu tinaloakon nu nabi,

“Aku mompake kantuang de motatae tiba aha:

Aku mompoto'ije hahan anu sulu-suluk daagi' pe'e u'utu mae jinadi na dunia aiya.”

I Yesus nontalangkan kantuang mongkona to pada-padang i totonga' nu gandum

36Lapas aitu i Yesus nompala'imo mian da'isan aijo', lantas ninsoop i laigan. Anu saja' mombatuki Ia tinoka ka' notatae, “Soba kita Tuuma talangkan mae hi kami na alati' nu kantuang anu mongkona to pada-padang i totonga' nu gandum aijo'.”

37I Yesus nontaami, “Mian anu monsa'u bine' anu ma'ima', aijo'mo na Anak nu Mian. 38Ale' aijo', aiyamo dunia aiya. Bine' anu ma'ima', aijo'mo to mia-mian anu tinimbalimo mian anu palesayamo hi Tumpu. To pada-padang aijo'mo to mia-mian anu mosambiha' hi Ibilis. 39Sampobali' anu nonsu'an padang haha aijo' Ibilis. Tempo' nu mompadak, aijo'mo Sinaa Kiamat, ka' to mia-mian anu mompadak aijo'mo na to mala-malaikat. 40Sumo aitumo na to pada-padang olimu' ka' opapui i uno nu apu, sumo aitumo na Sinaa de Kiamatmo. 41Anak nu Mian monsaije to mala-malaikat-Nyo molimu' miannyo iwi-iwi' anu nonsaduakonmo mian nombau dosa', ka' iwi-iwi' mian sangga'at anu nombau ka'idekan. 42Aha iwi-iwi' olumbu'akon i uno nu tolukun anu ko apunyo ka' moak hondo; i kiijo' aha humaangje ka' mongoa'i sansala. 43Ka' to mia-mian anu nombaumo kahanda' nu Tumpu majingka sumo batu nu sinaa i uno nu Dunia Bu'ou nu Tumpu, Tuuma nu aha. Jadi, de daagi' ko bihing, pohongomo!”

Kantuang mongkona halata' anu sulu-suluk

44“De Tumpu mompalentahmo, ka'ada'annyo sumomo kantuang aiya: daagi' ko halata' anu sulu-suluk i uno nu tano', lantas i humpak nu samian, ka' po'ule' tinabuhannyo i uno nu tano'. Lapas aijo', kalana i lame'mo, mian aijo' namba nompobaluk iwi-iwi' na halata'nyo, lantas ninsusule' ka' nongoli tano' aijo'.”

Kantuang mongkona mutiara anu ma'ima' hondo

45“De Tumpu mompalentahmo, ka'ada'annyo sumomo aiya: Samian na dagang molio to muti-mutiara anu ko halaga'nyo. 46Salatan ia nohumpakmo sa'angu' na mutiara anu talalo hondo ma'ima', lau-laus ia namba nompobaluk iwi-iwi' na halata'nyo, lantas nongoli mutiara anu sa'angu' aijo'.”

Kantuang mongkona buani'

47“De Tumpu mompalentahmo, ka'ada'annyo: O'umpamakon nu buani' anu binuani'akon i dowiwi, lantas nohumpak manjoo' na ngahan nu ikan. 48Salatan buani' aijo' nobuke'mo, buani' aijo' i hangkat i katano'an, nu topo ikan. Lapas aitu aha sinumuhang ka' nompo'i-po'iwi' ikan haha aijo', anu ma'ima' inguna' nu aha i kalanjang, ka' anu madi' ma'ima' ingalinmo. 49Sumo aitumo na tempo' nu Sinaa Kiamat, to mala-malaikat mambaje mompo'i-po'iwi to mia-mian ma'idek, tiba to mia-mian anu mombau kahanda' nu Tumpu. 50Lapas aijo' to mia-mian ma'idek aijo' o'alinmo i uno nu tolukun anu ko apunyo. I kiijo'mo na aha humaang ka' mongoa'i sansala.”

Halata' bu'ou ka' halata' anu pininmo

51“Pa' komiu mangalati' iwi-iwi' aijo'?” Pinokilawa i Yesus.

“Mangalati' Kita Tuumangku!” tinaaman nu aha.

52Lantas i Yesus notataemo, “Aijo', na sababnyo batu-batu gulu' Agama anu timbalimo mian anu palesayamo hi Tumpu, sumo samian na tumpu nu laigan anu monsabatakon lengkat i tampat nu halata'nyo anu bu'ou ka' anu pininmo.”

I Yesus madi' tinalima i Nazaret

(Mrk. 6:1-6, Luk. 4:16-30)

53Salatan i Yesus ilapasmo na nonsisikakon kantuang aijo', ia nompala'imo tampat aijo', 54lantas ninsusule'mo i kampung-Nyo. I kiijo' mae Ia namba nongajan i laigan pogalejaan, ka' to mia-mian anu nohongo Ia i kiijo' binangangmo hondo. Aha notatae, “Lengkat iyamae na mian aiya nohumpak kapandean sumo aijo'? Ka' lengkat mae iya na Ia nohumpak kuasa mombau anu okabangangi? 55Te misa' Ia anak nu tukang kau'? Te misa' i Maria aijo' na tina-Nyo; ka' to utu-utus-Nyo aijo'mo i Yakobus, i Yusuf, i Simon, ka' i Yudas? 56Ka' te misa' to utu-utus-Nyo boune jojoong i aiya suele? Lengkat mae iya na Ia nohumpak iwi-iwi' aijo'?” 57#Yoh. 4:44 Sahingga aha madi' nontalima i Yesus. Lantas i Yesus notatae hi aha, “Samian na nabi o adati iyayamae, panyo posi i kampungnyo ka' i laigannyo, madi' o adati.” 58Kalana aijo' i Yesus madi' nombau manjoo' na anu oka'ambangi i kiijo', kalana aha madi' palesaya.

Currently Selected:

MATIUS 13: LAILOE

Highlight

Copy