MATIUS 12

Mompokilawa mongkona sinaa nu Sabat

(Mrk. 2:23-28, Luk. 6:1-5)

1 # Ul. 23:25 Daagi' ko sinaa nu Sabat, tempo'nyo i Yesus notulu i sa'angu' na ale' nu gandum, anu saja' mombatuki Ia, nompadakmo gandum lantas mongkaanmo kalana no'ohopmo. 2Salatan to mia-mian Farisi nontoamo aijo', aha notataemo hi Yesus, “Toa! Anu saja' mombatuki Beleyum nolanggaimo atulan nu agamanto, ka' nombaumo anu o tewa' nu sinaa nu Sabat.”

3 # 1Sam. 21:1-6 I Yesus nontaami, “Te ma'isa toho' komiu nombasa' mongkona apaa na anu binau i Daud tempo'nyo ia ka' to mia-miannyo no'ohop? 4#Im. 24:9 Ia ninsoop i uno nu Laigan nu Tumpu; lantas nongkaan roti anu sinombahkonmo hi Tumpu. Padahan de mombatuki atulan nu agamanto, ia kabai mule' to mia-miannyo, madi' timbali mongkaan roti aijo' – ola to ima-imam na opobee'. 5#Bil. 28:9-10 Kabai te ma'isa toho' komiu nombasa' i uno nu atulan i Musa, tukoonyo de sinaa nu Sabat to ima-imam anu mokalaja i Laigan nu Tumpu, molanggai atulan sinaa nu Sabat, panyo madi' opisala'i? 6Opalahatikan apaa na Kutaloakon aiya: i aiya daagi' ko anu lebe daka' molingkudui Laigan nu Tumpu. 7#Mat. 9:13, Hos. 6:6 I uno nu Kitab nu Tumpu tinulis: Pongkalibosi ahi' na anu Kukahanda'i, misa' koloban nu binatang. De maluannyo komiu totu-totu'u mangalati' i potatae aijo', tantu komiu madi' momposala' to mia-mian anu madi' ko sala'nyo. 8Kalana Anak nu Mian mongkuasai sinaa nu Sabat.”

Mian anu limanyo kapi' na sambiha'

(Mrk. 3:1-6, Luk. 6:6-11)

9I Yesus nompala'i tampat aijo' lantas namba i sa'angu' na laigan pogalejaan. 10I kiijo' daagi' ko mian anu limanyo kapi' na sambiha'. To pia-piangkuka na mian anu kahanda' molio-lio kasala'an i Yesus, nompokilawa hi Ia, “Pa' timbali mompa'alin mian i sinaa nu Sabat?”

11 # Luk. 14:5 I Yesus nontaami, “Bisuannyo daagi' ko samian anu lengkat mae atina' hi komiu ko sa'angu' na domba, ka' i sinaa nu Sabat domba aijo' nanabu' i uno nu bolo' anu maleeng; apaa tumpu nu domba aijo' madi' ko usaha mombuatakon domba aijo' lengkat i uno nu bolo' aijo'? 12Yoh, mian lebe ko angga'nyo molingkudui domba! Jadi, desumo aitu, timbali ahi' montulungi mian i sinaa nu Sabat.” 13Lapas mule' i Yesus notataemo hi mian anu kapi' na limanyo sambiha' aijo', “Tajuakon mae na limaum.”

Mian aijo' nontajuakon limanyo, ka' limanyo aijo' na'alinmo sumomo lima sambiha'. 14Panyo to mia-mian nu Farisi nompala'i laigan pogalejaan aijo', lantas binasale' da opateimo na i Yesus.

Tumpu nompile'i anu sinai

15Nu sumbu' i Yesus saba', to mia-mian Farisi aijo' ko gau' ma'idek hi butong-Nyo. Jadi Ia namba nompala'i tampat aijo', ka' mian da'isan nombatukimo Ia. Lantas Ia nompa'alin iwi-iwi' na mian anu masakit. 16Panyo Ia nontewa' aha monsisik Ia hi mian sangga'at. 17Salatan sumo aijo', jinadimo apaa na anu tinaloakonmo nu Tumpu hi Nabi Yesaya,

18 # Yes. 42:1-4 “Aiyamo na anu pinile'an-Ku anu sinaing-Kumo,

mian anu Ku kalibosi ka' anu kona i kinyonyoang-Ku.

Roh-Ku, Kubee'je hi Ia,

ka' ka'adilan-Ku Nu leleakonje hi to bansa-bansa.

19Ia madi' painggaga kabai moloboo',

kabai ba'ande-ande i jala-jalan daka'.

20Balo anu mopekok madi' o pato'akon,

pansona' anu mokokihom madi' o poho'.

Ia bala usaha sampe ka'adilan o humpak;

21iwi-iwi na bansa montaha'imanije Ia.”

I Yesus ka' i Beelzebul

(Mrk. 3:20-30, Luk. 11:14-23)

22Lapas aitu binoa hi Yesus samian na anu mapisok ka' anu momo', kalana kinuasanmo nu roh ma'idek. I Yesus nompa'alin mian aijo', sahingga ia noko potataemo ka' nontoa. 23Iwi-iwi' na mian binangangmo ka' notatae, “Ugaat aijo'mo Ia na Anak i Daud anu jinanji'mo aijo'?”

24 # Mat. 9:34, 10:25 Salatan to mia-mian Farisi nohongomo aijo', aha nontaami, “Mian aiya timbali molaa' roh anu ma'idek, kalana i Beelzebul kapala nu to roh-roh ma'idek, nombee'mo kuasa aijo' hi aha.”

25I Yesus monsumbu' pikilan nu to mia-mian Farisi aijo'. Jadi Ia notatae hi aha, “De sa'angu' na negara mobagi-bagi, ka' bagi-bagian aijo' mompaha idek, negara aijo' madi' pin na tuminjo. Ka' sa'angu' na kota kabai moto utus mobagi-bagi ka' mompaha ka'ika'ideki samian ka' sangga'at, saba' timbali hansun. 26Sumo aitumo i uno nu kalaja'an nu Ibilis; de sa'angu' na kalaja'an molaa' kalaja'an sangga'at, saba' kalaja'an nu Ibilis aijo' mobagi-bagimo ka' i hansunmo. 27Komiu notatae tukoo miu Aku molaa' roh ma'idek kalana kuasa i Beelzebul. Desumo aitu, tiba kuasa ihe na anu saja' mombatuki belemiu molaa' roh anu ma'idek. Posi anu saja' mombatuki belemiu aijo' na mompobukuti', saba' komiu sala'! 28Panyo aku molaa' roh ma'idek tiba kuasa nu Roh nu Tumpu Allah. Ka' aijo' alati'nyo, saba' Tumpu montampu'unimo mompalentah atina' hi komiu.

29Mosiamo na mian timbali minsoop i uno nu laigan nu samian anu mahoson na mongagoi halata'nyo, de ia madi' pe'e mompungu mian anu mahoson aijo'? Lapas aitu, timbalije ia mongagoi halata'nyo.

30 # Mrk. 9:40 Mian anu madi' matihapa' hi beleng-Ku, totu-totu'unyo mombahakon Aku. Ka' mian anu madi' montulungi Aku, totu-totu'unyo mongidei pakalaja'an-Ku! 31Kalana aijo' osumbu'mo, de mian anu mombau dosa' montaeakon anu moko pa'ambang, ia timbali o ampuni. Panyo de ia mongambangi Roh nu Tumpu, ia madi' daagi' o ampuni! 32#Luk. 12:10 De mian montaloakon hahan anu mombahakon Anak nu Mian, ia timbali o ampuni, panyo de ia mongambangimo Roh nu Tumpu, ia madi'mo o ampuni, mau tempo' uuka, mau pe'e i sinaa anu imihinyo mae!”

Kau' ka' to bua-bua'nyo

(Luk. 6:43-45)

33 # Mat. 7:20, Luk. 6:44 “Da mohumpak bua' anu ma'ima'; pu'unnyo nu kau' tionyo molumba'. De pu'unnyo nu kau' madi' molumba', bua'nyo suele madi' ma'ima'. Molumba' kabai madi' na kau' osumbu' i bua'nyo. 34#Mat. 3:7, 15:18, 23:33, Luk. 3:7, 6:45 Komiu mian ma'idek, mosia na timbali komiu montaloakon hahan anu ma'ima', de komiu ma'idek? Apaa na anu otaloakon nu nganga', aijo'mo na anu mosabat lengkat i kinyonyoa! 35Mian anu ma'ima' montaloakon hahan anu ma'ima' kalana ia buke' nu ka'ima'an. Sumo aitumo na mian anu ma'idek montaloakon hahan anu ma'idek, kalana buke' nu ka'idekan.

36Jadi, o inau': I Sinaa nu Kiamat, toto samian tionyo nu akui apaa na anu tinaloakonnyomo anu madi' ko gunanyo. 37Kalana posi potataeum na anu o pake, momputusi pa' beleyum ko sala'nyo kabai madi'.”

To mia-mian nu Farisi nompoitamo hi Yesus da mombau anu okabangangi

(Mrk. 8:11-12, Luk. 11:29-32)

38 # Mat. 16:1, Mrk. 8:11, Luk. 11:16 Lapas aitu to pia-piangkuka na to gulu-gulu' agama ka' to mia-mian Farisi notatae, “Tuumangku Gulu', kami mongkahanda'i montoa kita Tuuma mombau anu okabangangi.”

39 # Mat. 16:4, Mrk. 8:12 “Palias na ko ideknyo ka' ko geguannyo na to mia-mian tempo' aiya!” tinaaman i Yesus. “Komiu mompoita Aku mombau anu okabangangi? Komiu madi' daagi' obee'i sa'angu' pe'e na anu okabangangi, ola ahi' anu okabangangi i Nabi Yunus. 40#Yun. 1:17 I Yunus jinojoong tolunsinaa ka' tolumpahu i uno nu kompong nu ikan daka'. Sumo aitumo na Anak nu Mian jojoong tolunsinaa tolumpahu i uno nu kompong nu tano'. 41#Yun. 3:5 I Sinaa Kiamat, mian nu Niniwe saidi' mae po'ule' tumuu' tiba to mia-mian tempo' uuka, ka' montutuk aha. Kalana to mia-mian nu Niniwe aijo' binala tobatmo i to dosa-dosa' nu aha, salatan i Yunus nompotokamo sisik nu Tumpu hi aha. Panyo uuka aiya daagi' ko anu lebe daka' molingkudui i Yunus! 42#1Raj. 10:1-10, 2Taw. 9:1-12 I Sinaa Kiamat, tomundo boune lengkat mae i tano' sasu Salatan, saidi' mae po'ule' tumuu' tiba to mia-mian tempo' uuka aiya ka' montutuk aha. Kalana da mohongo pangajalan i Salomo anu pande, tomundo boune aijo' nambamo itano' anu majo'on hondo lengkat i puus nu tano'. Panyo i aiya tempo' uuka daagi' ko anu daka' molingkudui Salomo!”

Pinsusule'nyo nu roh ma'idek

(Luk. 11:24-26)

43“De ko roh ma'idek mompala'imo sala'samian, roh aijo' mamba songko i tampa-tampat anu mateges molio tampat pilawean, panyo madi' i humpaknyo. 44Mokonyo aitu ia notatae, ‘Aku minsusule'mo i laigan anu pinala'iankumo.’ Tempo'nyo ia tinoka i kiijo', laigan aijo' longkang, belesi' ka' ta'atun. 45Lantas ia namba ka' nomboa popitu' na roh sangga'at anu lebe ma'idek molingkudui ia. Lantas aha ninsoop i uno nu mian aijo' ka' ia jinojoong i kiijo'. Ka' ahennyo balu-balu'nyo nu mian aijo' timbali lebe ma'idek molingkudui uuka mae momona. Aijo'mo suele na timbali tiba to mia-mian tempo' uuka.”

Tinanyo ka' to utu-utus i Yesus

(Mrk. 3:31-35, Luk. 8:19-21)

46Hau-haunyo i Yesus daagi' notatae tiba mian da'isan, tinoka na tinanyo ka' to utu-utus-Nyo. Aha tinuminjo i sambiha'nyo ka' binala usaha da timbali basisik tiba Ia. 47Samian anu kiijo' hi mian da'isan aijo' notatae hi Yesus, “Kita Tuuma, tina ka' to utu-utusto nu kita Tuuma kiijo' i sambiha'nyo. Aha mongka'oho' basisik tiba kita Tuuma.”

48Lantas i Yesus nontaami, “Ihe na tinang-Ku? Ihe na to utu-utus-Ku?” 49Lantas ia nontiju' anu saja' mombatuki Ia, ka' notatae, “Aiyamo na tina ka' to utu-utus-Ku. 50Mian anu mombau pongka'oho' nu Tuumang-Ku anu i suluga', iamo na utus mo'ane, utus boune ka' tinang-Ku.”

Currently Selected:

MATIUS 12: LAILOE

Highlight

Copy