JAHJA 14

Kegepa Begoo Te Tai

1„Kegepa begoo te tai. Ugatame maakodo egawei! Ani maija maakodo nagawei!

2Naitaija owaapa to-taida wedaba. Kou dani beu naako kiti-toja kodaa. Ikiija to-taida epeepi kijatijawe-uwiita.

3Kou danite ani uwijake epeepi kijatijawipa ko, ani mijo mejake kibukigouta, anija to-taida ikii na to-tijake.

4Anija uwiitaida ita ko ikii epi.”

5Tijake Tomas eteete mana, „Ei, Tuhan, inii ewo aki uwiitageida. Kawe dani tijake inii ita ko epi?” etii.

6Tijake Jesus wo eteete mana, „Ani ki Ita ma, Maakodo Bokouto ma, Ajii Bokouto ma. Me idaana ma Naitaipa te dakii tija, kodeja ani ma ki-toojogo to.

7Ani kii ke ikii epi naako, Naitai maija ikii epi kodaa. Ito kiija make wado ikii okai kidi epi kijake edomakai,” etii.

8Pilipus eteete mana, „Ei, Tuhan, Akaitai kidi nimuwakai, inii mobu kaipage kojoka,” etii.

9Tijake Jesus wo eteete mana, „Ei, Pilipus, ani ikii ma enaimo kou dani tou wedaba tijake aki nadomakai beu, mee? Meija ani nadopi, okai Naitai maija edou. Kawe dani tijake ’Akaitai kidi nimuwakai’ eneege kou ko?

10Aki maakodo gai beu, mee? ani Naitai duba, daana Naitai kidi ani duba. Anija kijawegai mana kodo anija dimiidaiga wegaiga ko beu, kodeja Naitai kidi ani duba tojake, okai kidaa utoma agijo kei tai.

11Ani Naitai duba maakodo nagai, daana Naitai kidi ani duba. Kou danite beu ki-toojogo maija, kei tita agijoudo maida make maakodo nagai.

12Beu maa kou ani kitiine, meija maakodo nagapi, anija kei titaido kei taitagi, daana wo etige ka ibo agijoudo kei taitagi, ani Naitaipa uwiita kouja.

13Ikiija aneeka dubaiga nadiimija agijo ko ani kei tijawiita, Naitai kidi Jokame duba ajiipi go-mote-tijake.

14Kou danite ikii gaja agijo aneeka dubaiga nadiimipa ko, ani kei tijawiita.

15Ikii ei nagapa ko, anija mana dijo nadou.

16Ani Naitaipa ediimaita, tijake okai joko ka Agaagi Me kiniitagi, ikii ma enaimo imo to to-tijake.

17Kou ko maakodo bokouto jago Roh kodo, makiida maki utoma ka te ejakimakija, okei te edomake kouja, daana ewo. Kodeja ikii epi, ikii wa enaimo tou kouja, daana ikii duba kaitagi.

18Dobija joka ti kijaikaita. Ani ikeepa meita.

19Mijo gaa to tijake makiida maki utoma te nadoutai. Kodeja ikii ke nadouta. Ani ajii tai kouja ikii maija ajii taita.

20Okai kou naago kodaa ikii gaita, ani ki Naitai duba, daana ikii ke ani duba, daana ani maija ikii duba.

21Meija anija mana jakimakijake dijo dopi okai ei nagai. Daana meija ei nagapi Naitai kidaa maija ei egaitagi, daana ani maija ei egajake ani akaato emuwakaita.”

22Tijake Judas, Iskariot kidi ki beu, joko ka kidaa eteete mana, „Ei, Tuhan, kawe dani tijake aki akaato nimuwakai, daana makiida maki utomaapa ko beu?” etii.

23Tijake Jesus wo eteete mana, „Kou danite me idaana ei nagapi ko, anija mana najakimakaitagi, daana Naitai maija ei egajake Inai okaapa aamejake okai ma enaimo oojatou.

24Meija ei te nagapi anija mana muto maija najakimakai beu. Daana ikii juweiga mana muto kodo ko anija mana ko beu, kodeja Naitaija mana kodo, nabadikumita me kidi.

25Kei manaido kei ani ikeepa kitii, ani ikii wa enaimo topa gaa kiija.

26Kodeja Agaagi Me kodo, kou ko Rohulkudus kodo, Naitaija aneeka dubaiga ebadikumiitagi kodo, okai kodaa utoma agijo kitopaitagi, daana anija kiteetega agijoudo ga-kiniitagi.

27Muka-muka dimi ani kijajaikidokii. Beu maa kou ani kidaa muka-muka dimi kodo kinii. Makiida ka kinija dani ko beu, anija kinii ko. Kegepa begoo te tai, daana weda te gai.

28Anija kiteega mana, ani uwijake ikeepa mijo meita mana kodo ikii juweega. Ikii ani ei nagai naako, ani Naitaipa uwiita kouja ikii ideide ti-toja. Ani ma ko Naitai kidi ibo kouja.

29Kei tidoke beu gaa kodaa ani ito kiteega; kei tidoke tijake ko ikii maakodo ga-tita.

30Mana wedaba ikii ma te keewegaipiga, makiida ka ibo kidi meete kiija. Daana beu maa kou okai ani maida bida beu.

31Kodeja Naitaija enita kidi danite ani kei tai, ani Naitai ei egai mana kodo makiida maki utoma ga-tita no tijake. Jooniwei, kiija make uwii no,” etii.

Currently Selected:

JAHJA 14: EKG

Highlight

Copy