JAHJA 13
13
Jesusja Etope-taido Bado Jawitogita
1Wadouga etigajake petii tita ga-tou naago beu gaa kodaa Jesus kii makiida jaikaine jato, Nakameepa wado uwii putu kidoke gai. Kii makiida kiija okaija bagee ipa egajake kii kidi ipa ga-wo teete momogiida to.
2Wanee jato nootigo gaa Simon jokame Judas Iskariot kidi kegepa Teege ka gokoo atii, eekegajawiine tijake.
3Jesus epi Nakame kidaa utoma agijo utoma okaija gane duba menita, daana okai Ugatameepa make mejake Ugatameepa wado uwii.
4Okai nooteida make joonidoke tijake egaupita kagaba bejamotii; uwo wunai kagaba motijake okai má maida epijajawii.
5Uwaawe duba uwo no-awijake etope-taido kede bado jawitogai go-motii. Daana má maida epijajawita kagaba kodaa jawunai.
6Okai Simon Peterus kidiipa kijake Peterus eteete mana, „Ei, Tuhan, anija bado aki nawitogaije?” etii.
7Jesus wo eteete mana, „Anija kei teete agijo kodo ito aki gai beu, kodeja wadoutouga aki gamakaitage,” etii.
8Tijake Peterus wo eteete mana, „Umina maakodo anija bado te nawitogai,” etii. Jesus wo eteete mana, „Kou danite ani te kawitogipa ko, ani ma enaimo te kija,” etii.
9Tijake Simon Peterus eteete mana, „Ei, Tuhan, bado to ko beu, kodeja anija gane ma dagi ma,” etii.
10Jesus wo eteete mana, „Uwo buumita me kidi joko ka tine te witogijake bado to witogija, okai umina jimubeu kouja. Ikii maija jimubeu, kodeja ikii utoma ko beu,” etii.
11Okai eekegajawita me kidi epi kouja. Okai kouja okai kou dani wegai, „Ikii utoma jimubeu ko beu.”
12Jesus kidaa etope-taido ka bado jawitogimakijake okaija kagaba egaupijawii. Okai animakijake eteete mana, „Anija kijakei keega kou ko ikii gaaga, mee?
13Ikii Kuduu, Tuhan, naabateiga, daana ikiija eneiga kou ko maakodo, ani ki okai kii kidi kijoka.
14Kou danite ani ki Tuhan ma, Kuduu ma kidija ikiija bado kijawitogipa ko, ikii maija bado akawitoge tija.
15Ani ikeepa komuga kineega kouja, ikii na kei te-tita, anija kijakei keega danite.
16Beu maa kou ani kitiine, jakei te-tai me idaana okaija ibo ma ko ibo ko beu, daana ebadikumita me maija okaija uwii etita me ma ko ibo ko beu.
17Kei agijoudo ikii epi kipa, ikii kei tijawipa ko ikii mobu kidaa.
18Ani ikii utoma maida make wegai ko beu. Anija ewitokita bagee ani epi kouja. Kodeja kapogeije ebijamakita mana kodo koba-tijake, kou ko: Anija goti nota me kidaa koba mani bida aweete.
19Ani kii mana kidi ito kitii, kei tidoke beu gaa. Kei tidoke tipa ko ani ki okai kidi kijoka ikii maakodo ga-tita.
20Beu maa kou ani kitiine, meija anija ebadikumita me kidi ejakimakipi, okai najakimakai daana najakimakai me kidaa nabadikumita me kidi ejakimakai,” etii.
Jesus Eekegajawii Mana Douja Dou
21Jesus kou dani wegajawijake okai kegepa gaagaa umina tijake eteete mana, „Beu maa kou ani kitiine, ikii jupi ka me idaana kiija naekegajawiipagi,” etii.
22Etope-taido utoma kede akado wegene tai, meime maida make eneegi juwa gajake.
23Jesusja etope-taido ka me idaana, kii ke Jesusja ei egata me kidi, Jesus etikaato gebo tawanita.
24Simon Peterus kipo tutu etijake kii kidiipa eteete mana, „Egaado tidou, kii me kidi ki meime no?” etii.
25Tijake okai Jesusja boko maida tawanijake eteete mana, „Ei, Tuhan, kii kidi ki meime?” etii.
26Tijake Jesus eteete mana, „Okai kii kidi ki ani tineena tokami-meniipiga me ki.” Etijake okai tineena tokami-motijake Simon Iskariot jokame Judas kidiipa menii.
27Judas kou tine kodo motijake okai duba Teege awidoke tai. Tijake Jesus eteete mana, „Akija kei taine agijo kodo egaa kei tai,” etii.
28Kodeja enaimo noote bagee kede me idaana ma okaija etita mana boko jato kodo gai beu.
29Me ino ka gai ko, Judas potó dokeigi kouja, Jesus okaapa eteete mana, „Ibo naago dijo doune tijake gai peu agijoudo needai,” juwa, daba bagee meniine tijake juwa, eteegi gai.
30Judas kii tine kidi motijake okai egaa podomai. Okai kou gaa kodo wanee gaa.
Ija Etimakita Mana
31Judas podomijake Jesus eteete mana, „Ito ko Me Joka kidi ajiipi etijawidoke, daana Ugatame maija okai duba ajiipi etijawidoke.
32Kou danite okai duba Ugatame ajiipi go-motipi ko, Ugatame akaato duba maija ajiipi etijawiipagi; beu maa, egaa kodaa ajiipi etijawiipagi.
33Kowaa kei, ani jokaaneido, mijo gaa to ani keetoupiga. Ikii naubaita, tijake ani Jahudi bageepa eteetega danite, ito kou maija okai kou kitii, ’Ani uwiitaida ikii te jawimake’.
34Ija mana mutoona ani kitimakai, kou ko, ikii kede ipa akaga tai. Anija ipa kigai danite, ikii kede ipa akaga tai.
35Okai kou manaidaiga ikii anija kitope-tai kede me jokaija ka kigaitai, kou ko, ikii kede ipa akaga ti-toojogo ko,” etii.
Peterus Beu Puga Etai Mana Douja Dojawita
36Tijake Simon Peterus eteete mana, „Ei, Tuhan, aki kaija uwii?” Etijake Jesus joko eteete mana, „Anija uwiitaida aki ito ko te naapemake; kodeja wadoutouga aki naapeitage,” etii.
37Tijake Peterus wo eteete mana, „Ei, Tuhan, magijo ka ito ani te kaapemake? Aki maida make ani bokai enaa,” etii.
38Jesus eteete mana, „Ani maida make bokaije? Beu maa kou ani katii, ajam mana te taipiga, aki kigi wido beu puga nataipageida to,” etii.
Currently Selected:
JAHJA 13: EKG
Highlight
Share
Copy
Want to have your highlights saved across all your devices? Sign up or sign in
