Yaya 20

Yetut eebe ndoome lek kogogwaarak wone

(Mat. 28:1-8; Mrk. 16:1-8; Luk. 24:1-12)

1Tamban eekak yuurak ne iyaalok warennagagerak Hari Minggu paga o weerikit nduk o apit aago kagak, kwe Mariya awi Magaralena mendek ndoome nage nagagerik, yugum tu narak nogo pelenogo nappugu kagagerak. 2Kage nagagerik, puu'nuk Timon Peterut inom, aap Yetut oone waganggwi mendek ambi iniki kunik wonagagerak nogo inom, iya wage nagagerik, yorage logonet, “Wologwe! Ninogoba eebe ndoome nen waganogo nggeeme pi nagaarak nogo nit nineenggo'lek o.”

3Yorage mbareegi, at Peterut aap Yetut oone waganggwi mendek ambi nogo imbirak wundi wogo nogogwaarik, ndoome pekka nawok nduk, 4imbirak puu'nuk nogo logonet, at Yetut oone waganggwi mendek ambi nogo nen Peterut wuppunuk, at aa'nduk ndoome nogome ari nagagerak. 5Ndoome nogome aa'nduk ari nage nagagerik, ena tebe yinuk, enegen mannage nagagerik, yum yawenak nogo mban enaani nggonenak kage nagagerik, unggulik puk agagerak. 6Puk agagerak wonage kagak, at ambokan nagagerak Timon Peterut nogo, nok-nok ndoome unggwi nage nagagerik, yum yawenak enaani nggonenak nogo inom, 7ndi, yum at anobak me perenogo pereegwaarak nogo inom, enegen kagagerak. Yum at anobak me perenogo pereegwaarak nogo yum yawenak nggonenak nogo inom lek, alik me taati liirogon yunggunogo pugu wonage kagagerak. 8Ndi, kage nagagerik, awo taati wonage kagak at Yetut oone waganggwi mendek ambi ndoome aa'nduk nagagerak nogo nen kunduk, ndoome unggwi nanuk, enegen kage nagagerik, abet mbareegerak.

9At Yetut kambunuk, nogo menggam nen eenik a'nuk, mi'narigin nogo, Ala wone liiru mbanak wonagagerak kwe, at oone waganggwi mendek nogo awo liippega'lek kobak aret wonogogwaarak. 10It nogo imbirak inigen kogo nogogwaarik, iname iniyok paga aret wogogwaarak.

Mariya Magaralena mendek eebe nikkagagerak wone

(Mat. 28:9-10; Mrk. 16:9-11)

11Iname wogwe iigak, kwe Mariya nogo ndo ambe paga taati le ari nagagerak. Le ari logonet, ena tebe yinuk, enegen mannage nagagerik, 12#Nap. 1:10 malayikat mendek mbere inayum yanggwi lan aago yirik Yetut eebe warogo pereegwam nogome ambi anobak wonagagim, ndi, ambi iyok wonagagim kwi'ndak wonogwe iyareegerak.

13Iige mbareegi, it nogo nen kwe Mariya yogo logonet, “Kwe yi wae. Kat nonggop nduk le ari agandik o?”

Yogo mbareegwa, at Mariya nen, “Lek o. It aakumi nen an nogoba wonok nagaarak o. Ndi, at eebe nggeeme pi nagaarak nogo an neenggo'lek me, le ari agarik o.”

14 # Mrk. 16:9 Yorage nagagerik, ena logurogon ambokan pe'nage nagagerik, at Yetut taati mi'ndak wonage kagagerak kwe, “Yi at aret,” mbarulik.

15Mbaka'lek mbareegi, Yetut nen at yoge logonet, “Kwe yi wae. Kat nonggop nduk le ari agandik o? Ta kwaake agandik?”

Yoge mbareegi, at Mariya nogo nen, “Aap yi, yabu yarak unde nogo aret,” mbake logonet, “Ai, nogoba. At eebe kat aret wonok nagandak kenok, ngga pi nagandak an wa naakit nduk, yo'niru o.”

16Yoge mbareegi, at Yetut nen, “Mariya wae!”

Yoge mbareegi, at ena logurogon pekkage nagagerik, Iberani inoone paga, “Raboni,” yoreegerak. (“Raboni” yoreegerak nogo ti, nit ninoone paga “Nogoba ngguru o,” yinuk, yoreegerak.)

17Yoge mbareegi, at Yetut nen, “An nogoba wonage me awo ka lagangga'lek me, pi'nabugun o. Kit kinogoba ti, an nogoba. Ndi, kit kinogoba Ala ti, an nogoba Ala aret me, at wonage me ka lagi nage agaarik, yegerak o, yinuk, noreewi ineenu logowak nduk, yora nak o.”

18Yoge mbareegi, at Mariya awi Magaralena mendek nen Yetut oone waganggwi mendek iya wage nagagerik, yorage logonet, “Wologwe! Ninogoba muk eenik mi'nagaarak nenegen kagarak o,” yinuk, yorage nagagerik, Yetut nen at yoreegerak nogo mbininogo yoragagerak.

Oone waganggwi mendek eebe nigiyareegerak wone

(Mat. 28:16-20; Mrk. 16:14-18; Luk. 24:36-49)

19Tamban eekak yuurak ne iyaalok warennagagerak Hari Minggu ti paga o apit agagerak kagak, at Yetut oone waganggwi nogo nen aakumi Yakuri mendek inagabiti nen oome tu kunci nappunuk wonogwe me, Yetut inenggela'me mi'nari unggwage nagagerik, yorage logonet, “Noreewi kinogut li o.” 20Wone ti yorage nagagerik, at eenggi inom, obate pelenak inom, nigiyareegerak. Nigiige mbareegi, at Yetut oone waganggwi mendek nen, “Ninogoba yi aret o,” yinuk, yelok kogo nogogwaarik, iniki ale'nggen ambik mbareegwaarak.

21 # Mat. 28:18-19; Mrk. 16:15-16; Ya. 3:17; 17:18; Nap. 2:38; 8:15-17 Inale'nggen ambik mbakwi iigak, Yetut nen ambinom yorage logonet, “Noreewi o. Kiniki kwippinip o. An nogoba nappani wagagerak nogo kwak, an nen kit nappinagage agarik o.” 22Yorage nagagerik, ambe aagi inoba pu eerogo piige logonet, “Aberiniki kolaanip o,” yorage nagagerik, 23#Mat. 16:19; 18:18 “Kit nen aakumi inomaluk lek eerogo piigwi kiinok, lek aret arigin o. Ndi, it inomaluk lek eerogo piigwi lek kiinok ti, inomaluk ti itok kunik aret logogin o,” yinuk, yoragagerak.

Yetut eebe Tomat nikkagagerak wone

24Wone yoragagerak nogo ti, at oone waganggwi mendek 12 nogo ambi Tomat endage ambi Kulu'mbere toonak nogo, eebe lek kagak iya wagagerak me, 25at Yetut oone waganggwi mendek ando nogo nen Tomat yogo logonet, “Ninogoba muk ninigen kogoorak o.”

Yogo mbareegwa, at Tomat nen, “Wologwe! An at eenggi pulu warak awinobam nenegen kage, ndi, eenggi pulu warak me inom, obate pelenak me inom, neenggi mambege, eeka'lek neegak, an abet mbarigin lek o,” yinuk, yoragagerak.

26Yorage mbareegi, nogo 7 yinuk, ko'lu paga it aap Yetut oone waganggwi mendek Tomat inom oome tu kunci narak kagak wonogwe me, Yetut inenggela'me mi'nari unggwage nagagerik, yorage logonet, “Noreewi kinogut li o.”

27Yorage nagagerik, Tomat nogo yoge logonet, “Tomat wae. Keenggi an neenggi yi, pi'nake logonet, nawinobam pekkage, ndi, kobaak ngginogo nobate pelenak me keenggi mambege, ee'nake logomenggendik, kiniki yungguppegak eeke logonet, abet nombaka'lek logorak ti mage o. Ata, kiniki noba panggombunuk, abet nombake logot o,” yinuk, yoreegerak.

28Yoge mbareegi, Tomat nen at yoge logonet, “Ai! An nogoba Ala kat aret keegi o.”

29Yoge mbareegi, Yetut nen at yoge logonet, “Tomat wae! Kat kenegen neege nagandik, kiniki noba panggombunuk, abet nombakendak kwe, it aakumi ando inigen neega'lek logonet, iniki noba panggombunuk, abet nombakwi iinok perak, iniki ale'nggen ambik kogo logogun o,” yinuk, yoreegerak.

Mbuku yi nonggop nduk liiru mbaneegerak wone

30Yetut nen at oone waganggwi mendek inenggaanom ineenu ariyak inagabiti warak mendek ando apit aret eeke nagagerak kwe, mbuku yi paga liiru mbanak lek o. 31Eeke nagagerak liiru mbanak yi nogo ti, Yetut ti, Ala nen at aput leenogo mippereegerak Keritut aret kit abet mbakwi, ndi, abet mbakwi kiinok, at eekkinabemenggerak paga kineenik mondok mendek kologwe, eeko logomunggup nduk, wone yi liiru mbaneegirak o.

Currently Selected:

Yaya 20: LAIDNW

Highlight

Copy