Yaya 21

At oone waganggwi ineebe 7 nigiyareegerak wone

1Ti eeke nagagerik, peebi Yetut nen at oone waganggwi mendek yi yenggenak endage Tiberiyat paga wonogwe me, at eebe ambinom nigiya wagagerak. Nigiya wage logonet, eereegerak nogo yi aret.

2At Timon Peterut inom, Tomat endage ambi Kulu'mbere toonak nogo inom, Natanayen o Nggalileya awi Kana mendek nogo inom, at Tebereyut apuri inom, aap Yetut oone waganggwi mbere ambi inom, ambit me kuwak aago logonet, 3#Luk. 5:5 at Timon Peterut nen, “Wologwe wae! An ikan wa na o.”

Yorage mbareegi, “Ninom nawok o,” yogo nogogwaarik, wundi nanuk, yiiro paga unggwi nogo nogogwaarik, oonikiya ne ambit ti paga inayum wuppega'mban eereegwaarak kwe, ikan yonggo'naga'lek aret wonagagerak.

4Inayum wuppugwi tit iigak, o wiganiyak aret eeke mbareegi, at Yetut nogo yi aa'nggi paga mi'nari wagagerak wonage kagak kwe, at oone waganggwi nogo nen, “Ti Yetut aret,” mbaka'lek wonogwe me, 5Yetut nen it yorage logonet, “Napuri wae. Kit ikan ambi waganggotak ilik, lek a?”

Yorage mbareegi, “Abu woolik o.”

6 # Luk. 5:6 Yogo mbareegwa, at Yetut nen, “Yum ti, yiiro peenok kineenggi abe'nggan nggwe time wuppinip o. Wuppugwi kiinok, ikan waamunggup o.” Yorage mbareegi, wuppogo nogogwaarik, ikan ambik yonggo'nagagerak me, niigogo yiiro paga nippi woroorak abu meek aret agagerak.

7Nippi woroorak meek age mbareegi, at oone waganggwi mendek ambi Yetut iniki kunik wonagagerak nogo nen Peterut yoge logonet, “Wulaga! Aap ti ninogoba aret kagi o,” yinuk, yoreegerak nogo at Peterut aruk konembunuk, ambogoyum endekem mendek nggoorak nogo yikko'nok yiiro nogo mbo punuk yiime tabuk yi wambeegerak. 8Wangge nagagerik, nage kagak, yi aa'nggi paga koorok we meter 100 negen wonagagerak me, Yetut oone waganggwi mendek ando nogo nen yum ikan eno korok togon yonggolak nogo yiiro paga niikkenok wundi nogogwaarak.

9Nikkenok, yi aa'nggi paga wundi nogo mbareegwa, kani kunik anggen paga ikan inom, mbi inom, muk wora'nage mban inigen kogogwaarak. 10Kogo mbareegwa, Yetut nen it yorage logonet, “Wologwe wae. Ikan yogondak iluk waganggotak nogo ando wonok wa'nip o.”

11Yorage mbareegi, at Timon Peterut yiiro paga unggwi nanuk, ikan ineebe 153 yum eno korok togon yonggolak nogo, niigogo yi aa'nggi paga pi wundeegerak. Ikan ambik yonggolak wonagagerak kwe, yum nibik yaga'lek aret wonagagerak. 12Yum nogo yi aa'nggi paga pi wungge mbareegi, Yetut nen it yorage logonet, “Kinambi na wa'nip o,” yorage mbareegi, “Ninogoba aret o,” yinuk, yelok kogogwaarak kwe, it ambi nen, “Kat ta o?” yoriyak inagabiti nen puk ogogwaarak. 13Inagabiti nen puk ogo mbareegwa, at Yetut nen mbi wagangge nagagerik, tumburiragagerak. Tumburirage nagagerik, ikan togop aret tumburiragagerak.

14Ti eereegerak nogo ti, Yetut kambunuk nogo menggam nen eenik a'nuk mi'nage nagagerik, at oone waganggwi mendek at eebe nigiyareegerak nogo ti, aa'nduk ne mbere paga nigiige nagagerik, peebi ne ambi nigiyareegerak nogo yi aret.

Yetut nen Peterut yoreegerak wone

15Mbi nonggo mbareegwa, at Yetut nen Timon Peterut nogo yoge logonet, “Yaya aput Timon wae! Kat koreewi yi, mbuuluk iniki kunik ee'nakwi iigak, kat nggwok togon kiniki kunik ee'nake ilik, lek a?”

Yoge mbareegi, at Peterut nen, “E o, nogoba. An niniki kunik eekkake nogo, kat keenu aret o.”

Yoge mbareegi, at Yetut nen, “An nandomba mbuulogwe ndegeninake logot o.” 16Yoge nagagerik, ti'nuk, ambinom yoge logonet, “Yaya aput Timon wae. Kat an kiniki kunik ee'nake ilik, lek a?”

Yoge mbareegi, at Peterut nen, “E o, nogoba. An niniki kunik eekkake nogo kat keenu aret o.”

Yoge mbareegi, at Yetut nen, “An nandomba liirogon ndegeninake logot o.” 17Ne mbere yoge nagagerik, ti'nuk, ne ambinom yoge logonet, “Yaya aput Timon wae. Kat an kiniki kunik ee'nake ilik, lek a?”

Yoge mbareegi, at Yetut ne kenagan paga, “Kat an kiniki kunik ee'nake ilik, lek a?” yoreegerak paga, at Peterut iniki maluk age nagagerik, yoge logonet, “Nogoba o. Kat yi abok ndi abok keenu aret me, an niniki kunik eekkake nogo kat keenu aret o.”

Yoge mbareegi, at Yetut nen, “Nandomba ndegeninake logot o. 18Kat tawe logonet, kayum yikko'nok ambime noorak mbake'nom nogome nage nagagindak kwe, peebi kanggok age logomenggendik, keenggi ngginogo nappege keenok keele maakkako logomenggaarik, kat noorak keebi mbaremengge'nom nogome aret pagi nagun o, yinuk, mondok abet aret yokkigi o,” yoreegerak. 19Ti yoreegerak nogo, at Peterut nonggop eeppugwi iinok, kambemenggerak nogo paga Ala tiyappuurak nduk, yoreegerak. Peterut nogo yoge nagagerik, “Nimbirak nawok o,” yinuk, yoreegerak.

At oone wagangge ambi abok yereegerak wone

20 # Ya. 13:25 Yoge mbareegi, nogo logonet, at Peterut ena logurogon pe'nage nagagerik, at Yetut oone waganggwi mendek ambi at iniki kunik aa'nduk mbi nunggwi me, Yetut imbirak tebenak logonet, “Nogoba wae. Ta nen konggo mbanigin o?” yoreegerak nogo, inambokan wage Peterut enegen kagagerak. 21Kage nagagerik, Yetut yoge logonet, “Nogoba o. Ndi, aap ti perak, nonggop o?”

22Yoge mbareegi, at Yetut nen, “An nage logominggirik, peebi wage eyom ti paga, At yime eenik nege logorak op o, mbake neenok ti, nege logorak aret. Ndi, lek kenok ti, lek aret. Ti eeriyak nogo ti, kat kobaalombok lek me, kat perak, nimbirak nawok mban o,” yoreegerak.

23Ti yoreegerak nogo, Yetut oone waganggwi mendek ambi ti, “Kambigin lek, yigi,” yinuk, oreewi koneneegwaarak kwe, at Yetut nen, “Aap ti, kambigin lek o,” yinuk, ti yorulik. Ata, at nen, “An nage logominggirik, peebi wage eyom ti paga at eenik yime nege logorak an op mbake neenok ti, eeriyak kat kobaalombok lek o,” yinuk, yoreegerak.

24Aap Peterut nen Yetut oone waganggwi mendek ambi nogo enegen kenok, Yetut yoreegerak nogo ti, an neenok aret yoreegerak o. An nogo nen nenegen kage nagagirak nogo paganogo yokkirage, ndi, wone yugu liiru mbanogo pinagage, eekirak yi nogo ti, nit nineenu me, abet aret yokkiragi o.

Wone irip paga lombok liiru mbaneegerak wone

25At Yetut ambinom ambik lombok eeke nagagerak me, at eeke nagagerak nogo abok aret mbinuk-mbenak eerogo mbuku paga mbaninetak en, o nggween paga yime abu yagabit ngga pubok a'netak mbaki o.

Currently Selected:

Yaya 21: LAIDNW

Highlight

Copy