MAREKÙT 5
5
Ap Kerasa mene mokareke oabùt weak mene a'la were'ma, Yesùt en henogo wulaksasike wene
(Mat.8:28-34; Luk.8:26-39)
1Atì'nogo hogorasukwama, at Yesùt agoromì inom i yekelek a'nogo aik ìlì ba apùnì o Kerasa mene inaua wùlùpukwa. 2Wùlùpukwasik he, at Yesùt i so a'la nen aik oba wùlùpenem atemat, ap aike omoula apùnì warek hisagarek oba nen wùlìbì wìrìk, Yesùt oba wagaike. Ap atì mokareke oabùt weak mene a'la kìlìk, 3-4apùnì warek hisagarek oba motok were'ma, apùnì aike nen ninhùp-nanhùp hele posie omaken hele ba eki hele homatìk, esok hele homatìk, homatì lagaukwa meneat he, eki hele tek hogo laksìgìk, esok hele sagalogo tegethìgìk, ikenem he, hobuk yì hele tì hele posie omaken hele inomat walhasukwasik en, nena mene hele ba homasu heat haga'lagaikomo, ebe hakhìlìk oabùt sa nen hebelu heat mea agaike. 5Atì'nogo logolìk, likene hutik, hùako hutik, apùnì warek hisagarek oba kìgìk, tom obakwe lagalìk nìgìk, ìkì logolìk he, ane ngai-wai ìkì logolìk, okawerek en helep oba amep huak-hayak hogo warìkì lagaike. 6Atì'nogo hagatì lagaike mene, Yesùt lagaike atì like, ebe walegat atoma logolìk, eileken Yesùt lakhasike. Eileken lakhaluk he, at oba humusek wagaikesik, eitep awì yagasogo,
7-8“Yesùt Ala Etagepogot aput yì, nìkì'nogo haga'nabigìlùk wagen,” ìlùk yogosikomo, at Yesùt en he,
“Mokareke hoabùt weak mene yì, ap yì a'la nen henogo wùlìbi lan o,” ìlùk yogotenem, at a'nogo ane hùkorogo ìkì logolìk,
“Eige. Nabìt e. Ala oak e. Weaga'napùn,” ìlùk ane hùkorogo isike. 9Ane hùkorogo isikomo re, at Yesùt en he:
“Hat hetage sa,” ìlùk hinok oba wanhikomo re, at en he, mel yogosike:
“Ninebe logolegat welago atì nen he, netage esa logolek u hak, netage Legiun,” yogosike. 10Atì'nogo yogosikesik he, Yesùt en it mokareke lnoabùt weak mene atì o atoma nen walegat laksanogo ìlùk, ane lìok hogo Yesùt yogosike. 11Ati sat o atama tom alema wam logolegat amisang wanhì lagaukwa. 12Wanho were'ma, it mokareke inoabùt weak mene amanogo nen he, Yesùt mel yogosukwa:
“Nit wam a'la kalasi lagùkwe, atoma lakhinan o,” ìlùk inane lìok hogo yogosukwa. 13Atì'nogo yogosukwama, at en he,
“Ì o. Lani,” isikomo re, it mokareke inoabùt weak mene amanogo henogo wùlìbi lagaukwasik, wam a'la kalasi lagaukwama re, wam logolek amanogo kat oba atoma nen lùrogo pìlìk he, i yekele'ma i lagaukwa. Wam i lagaukwa atì re, ebe 2.000 hake motok apigat i lagaukwa. 14I lagaukwama re, it wam serogo welagaukwa mene inayùk arìk humusek yoko lagaukwasik, apùnì o sili hùkoma yogoisìgìk, hamùlù'mo yogoisigik, yogoisasukwa. Yogoisasukwama re, it apùnì nen he:
“Nìkì'nogo haga'lagama nen ega,” ìlùk, ineileken hùogolùk Yesùt oba wagaukwa. 15Wagaukwa re, ap alebat mokareke inoabùt weak mene esa logolek a'la kìlìk welagaike mene a'nogo, epe hebelagaikesik, asu laberogo hùrek were'ma ineileken hasukwasik, inayùk agaike. 16Inayùk agaikomo re, it apùnì aike wene atì'nogo haga'laganem ineileken hasukwa mene nen he, mel yogoisasukwa:
“Ap yì mokareke oabùt weak mene a'la kink welaga a'nogo yì'nogo hagate, Nen, wam amanogo tì'nogo hagate,” ìlùk wene pìlìngìrogo yogoisasukwa. 17Atì'nogo yogoisasukwama, it en he, mel yogosukwa:
“Yesùt. Hat hebe nit were'ma yoma logousak lek. Wele'ma lan o!” ìlùk inane lìok hogo yogosukwa. 18Yogosukwama re, at Yesùt i so a'la kigin ha'ma re, at ap mokareke oabùt weak mene a'la kìlìk welagaike mene a'nogo nen he, mel yogosike:
“Neperak nìkì logouok en he, lùok o,” ìlùk ane elageik ane yogosikomo, 19at Yesùt en he, mel yogosike:
“Lek o. Haua lano o. Lìlìk he, ninoe Etagepogot a'nogo nen etawì nììlìk he, yì'nogo haga'nape, ìlùk hogogi hagoromì yogoisa lano,” ìlùk asuk warogo lakhesike. 20Lakhesikomo re, o kota 10 nen wùrìk were'ma lagaikesik mel yogoisìlìk nìkì lagaike:
“Yesùt en yì'nogo haga'nape, tì'nogo haga'nape,” ìlùk yogoisìlìk lagaikomo re, it inebe obogat en he,
“Nayùk e,” ìlùk hogorasukwa.
Yaìrùt a'logo ho, he aike amep lago motok welagaike mene ho, Yesùt en hagarinapike wene
(Mat.9:18-26; Luk.8:40-56)
21Atì'nogo haga'lùk he, Yesùt i yekelek a'nogo aik yì bakwe so warogo wùlìbi wagaike. Wùlìbi waganem, apùnì esa apik logolegat at oba i esakoma atogosi wagaukwa. 22Atogosi wagaukwasik were'ma re, o apùnì Yahuri mene sapan egarek oba inogogì kain welagaukwa mene aike etage Yaìrùt wagaikesik, Yesùt eileken lakhalùk, awe a'ma eitep awì yagasogo hai watì logolìk he, mel yogosike:
23“Yesùt noe. An na'logo ebe oan mene oba ou en wa'lasigìlùk iko kolek wagì. Hat en heki hakamo ebe hano arìk eluk logouak en, neperak lùogolùk hayoko wagì o,” ìlùk ane elageik ane yogosike. 24Atì'nogo yogosikomo eperak lagaukwa.
Laganem he, apùnì motok apik Yesùt opolik laga logolìk kerelek-hoporek ogat oba yìgìrogo lagaukwa. 25Lagaukwa atoma mene, he aike amep lago motok werek kolek 12 tahun haga'lagaike. 26Amep lago motok logolìk he, loktet lak en hagasuagalùk yì loktet ti loktet inayoko hìlìk, ou oko wogisìkì logolìk he, agarok motok legethesike meneat he, amep a'nogo palagì'lek hobuk ebenageigat laga lagaike. 27-28Amep atì'nogo lago motok logolìk, Yesùt abok asuk holìlùk, a'la nen he, mel akasike:
“An at asu neki hakamo, namep yì palasigin o,” akalùk lagaikesik, Yesùt opolik horok hogo laga logolìk, asu eki hakasike. 29Eki hakiko kolek aremnogoat, amep a'nogo ero ba nen palagaikomo, a'la nen he:
“Ì. An ou weagat welagì a'nogo, haga'nape hìgì,” ìlùk a'la hùthasike. 30Atì'nogo hùthiko kolek he, at Yesùt a'la nen he:
“Eige! An nomamerogo elalin hagarinapìrek a'nogo mene na'la nen apùnì aike inoba laga enagat hìgì,” ìlùk aremnogoat hùthasike. Hùthìlìk he, apùnì logolek amanogo eileken kwanìrogo kelagisìlìk he, mel yogoisasike:
“An nasu sa nen eki hakike,” ìlùk inoba hinok wanhìke, 31Wanhikomo re, at agoromì ane wanhì lagaukwa mene amanogo nen he, mel yogosukwa:
“Eige! Noe. Nit ninebe logolegat hera'lukwe yìgìrogo waga lego yoma heileken nisìkì logolìgat he,
Sa nen ha'niike, ìlùk ìkì lagen?” ìlùk yogosukwa. 32Atì'nogo yogosukwa meneat he, at Yesùt en, “Sa nen ha'niike,” ìlùk, ebe tùkùmethagalùk eileken lagak hogo isìlìk lagaike. 33Isìlìk laganem he, at he a'nogo a'la nen be:
“An nen hakìgìma haga'nape a'nogo mene ìlì'logo hìgì,” ìlùk hùthasikesik he, ayùk arìk, oak lei'-leik ìkì logolìk, Yesùt awe a'ma eitep awì yakhìlìk he,
“An atì'nogo welagarik en he, yì'nogo hagatì o,” ìlùk obogat pìlìngìrogo yogosike. 34Yogosikomo, at Yesùt en he, mel yogosike:
“Na'logo e. Hetaùken noba hìpìrethegen atì nen hano agen o. Halok he, ha'la hanorogo lan o,” ìlùk lakhesike.
35Atì'nogo yogoto kolek aremnogoat, o apùnì Yahuri mene sapan egarek oba inoe kain a'nogo aua nen agoromì yoko wagaukwasik he, mel yogosukwa:
“Noe. Ha'logo a'nogo arat wa'lagama nen wago. Halok he, ninoe kain wene yakùlnisikerek mene arì, hobogomat heperak lùogolùk oba sabelusak nogo? Lek o,” ìlùk yogosukwa. 36Yogosukwama re, at Yesùt en, it inane asuk holhikesigat he, inane warogo heraksalùk kain a'nogo mel yogosike:
“Ha'la wenesùgì ebetùn o. Hetaùken an noba hìpìrethìlìk neperak lùok o,” ìlùk yogosikesik he, lagaukwa. 37Lagaukwasik, apùnì inebe logolegat yogoisìkì logolìk,
“Ninopolik wesusak lek. We, it Peterùt mel, Yohanet agot Yakobùt eperak mel enek ninom logoin o,” ìlùk inom lagaukwa. 38Lagaukwa hak he, kain a'nogo aua apùnì logolegat logolìk he, inane motok apik ngai-wai hùpi wato were'ma lagaukwa. 39Lagaukwasik, at Yesùt ebe ouma kisikesik he, mel yogoisasike:
“Hit he, le ngai-wai aga lagep atì nahalok. Helekerek atì wa'lagì'lek, we, nogo ìlì'logo,” ìlùk yogoisasike. 40Ati'nogo yogoisasikomo re, it apùnì amanogo nen agato apik agaukwa. Agato apik agaukwama, at en he, inebe obogat heleleng hogo olilu wulaksasike. Wulaksìlìk he, it helekerek a'nogo opase agosa mel, Yesùt agoromì inom lagaukwa mene amanogo mel, it enek wogisek o hùlù sekelek helekerek a'nogo welagaike ba kisukwa. 41Kisukwasik, eki hakìlìk he, nit ninane ba,
“Hele yì, na'logo. Mela'nogolùk yogohetì lagi o,” ìlùk u hak, it inane ba:
“Talita kum,” ìlùk yogosike. 42Atì'nogo yogoto kolek aremnogoat, helekerek a'nogo ebe ta'lagaikesik oba nen, mo lagagìk, pìgìk, iko kolek, 12 tahun haga'lagaikesi'mo nogo nen he, ebe melarìk, o hùlùkwe lagìk, wagìk, isike. Atì'nogo hagasikomo, it apùnì amanogo ineileken hasukwasik,
“Egi! Nayùk e,” ìlùk apik hogorasukwa. 43Atì'nogo hogorasukwa meneat he, at Yesùt en he, mel yogoisasike:
“An hagatenem hineileken neegep mene atì, apùnì aike motok yogoisagùp o,” ìlùk inasuk wasikesik he:
“Hele arì apùrùk aike noak en wogo, ni o,” ìlùk yogoisasike.
Currently Selected:
MAREKÙT 5: LAIDNI
Highlight
Share
Copy
Want to have your highlights saved across all your devices? Sign up or sign in
