MAREKÙT 4
4
“Ap aike awi heik lakhìlìk lagaike,” ìlùk oba lìrogo yogoisasike wene
(Mat.13:1-9; Luk.8:4-8)
1Hobuk he, at Yesùt i Kalilea yekelek a'nogo esakoma logolìk wene yakùlisasike. Yakùlisikenem apùnì inebe apik esa hùkoat oba atogosi wagaukwama re, it inebe i aik oba hisalùk he, at ebe ima i so ba hù'lasi kisike. 2Hù'lasi kìlìk he, wene yì mene tì mene ba lìthìgìk, wene apik yakùlisasike. Yakùlisìkì logolìk, aike mel yogoisasike:
3“Hinasuk holini. Ap aike yabu waganogo awì yaterek mene awì heik lakheigìlùk wùlìpike. 4Wùlìpikesik, heik lakhìlìk laganem he, eken aike kwe ebekalem pìlì lagaike. Pikenem he sùe wìrìk he, heleleng hogo motok nasike. 5Nen, eken aike re, helep oba kweang hamùlùgatma pìlìk lagaike mene re, kweang hamùlùgatma nogo nen he, hageat hulelhike. 6Hulelhike meneat he, a mo lakhei wagaikomo re omaken yasu lek en he, sawet arìk pùk agaike. 7Nen, eken, aike re, pakì were'ma pìlìk lagaike mene re, pakì atì mene hùko aga logolìk he, awì hano mene yago a'nogo palogo pelapikomo kakil arìk he, eken ìtì'lek kamo isike. 8Nen, eken aike re, kweang hanoma pìlìk lagaike mene re, hulelhikesik ebe hùko agaikesik he, eken isike. Ero aike eken 30 nen isike. Ero aike eken 60 nen isike. Ero aike eken 100 nen isike,” ìlùk yogoisasikesik he,
9aike mel yogoisasike:
“Hit hinasuk holusak halok he, hanorogo holini o,” ìlùk yogoisasike.
Yesùt en he, “Wene oba lìthìgìk yogohisìgìrek atì, ebe tì hesik,” ìlùk yogoisasike wene
(Mat.13:10-17; Luk.8:9-10)
10Atì'nogo yogoisasikesik, at Yesùt aligat were'ma, hobuk it inebe 12 nen amanogo mel, it aike Yesùt wene yogoisikenem inasuk holhukwa mene mel, oba wagaukwasik he, mel yogosukwa:
“Hat en wene oba lìthìgìk yogonisegen a'nogo, ebe ki'nogo mene hesik yogonisegen,” ìlùk oba hinok wanhukwa. 11-12#Yes.6:9-10 Hinok wanhukwama re, at an he, mel yogoisasike:
“Ala nen awe a'ma hisikerek wene atì, at a'la hinago welagaike mene, wene hit enek he, hinelu asuageip ìlùk pak hogo yogohisasak akasike meneat he, it apùnì etakwe mene atì nek he at Ala nen he:
It atì weak hagarì'lùgì mene atì heraksìlìk
inoabùt hebelasumo re, an nen sagalogo
legetsanogo ìlùk he, it ineileken hìkì logogun
meneat he, tùkùm hogo hìkì logogun lek o. Nen,
inasuk holhì logogun meneat he, tùkùm hogo
hùthìkì logogun legat o,
ìlùk isike atì higit asuagalùk, wene yì mene tì mene ba lìthìgìk, yogoisìkì lagì atì o,” ìlùk yogoisasike.
At Yesùt en, “Ap aike eken heik lakhìlìk lagaike, ìlùk yogohisìgì a'nogo re, ebe yì'nogo,” ìlùk yogoisasike wene
(Mat.13:18-23; Luk.8:11-15)
13At Yesùt en atì'nogo yogoisasikesik, hobuk mel yogoisasike:
“Hit he, wene oba lìrogo yogohisìgì a'nogo hùthìgì'lek hinokot welagep halok he, hobuk wene yì ba lìtìk, tì ba lìtìk, yogohisikenem he, nìkì'nogo hùthìlìk hinelu asigin. 14Ap aike eken heik lakhìlìk nikerek mene ìlùk yogohisìgì atì ebe re, Ala aneat yogoisìlìk negarek atìat o. 15Nen, awì heik aike ebekalem lakhesike atì ebe re, it apùnì aike nen Ala ane inasuk holharesi'mo nen, Ibilit hageat wagaresik he, wene inetaùkenma yago mene atì henogo wolok lagarek o. 16Nen, awì heik aike helep oba lakhesike atì ebe re, it apùnì aike nen Ala ane atì inasuk holharesik he, ina'la hai hakìkì logolìk he, hepogat wanharek. 17Atì'nogo hepogat wanharek meneat he, wene atì inetaùkenma omaken yatì'lek en hamùlùgat were'ma nen, apùnì aike nen Ala ane atì hesik, yì aik tì aik inoba hìgìk, weagarinapìk, ikenem he, ina'la hageat pùk agaikaresik he, wene atì heraksalùk wùlùparek atìat o. 18Nen, awì heik aike pakì api'mo lakhesike atì ebe re, it apùnì aike Ala ane atì inasuk holharesik enat he, 19ina'la nen,
Yogotak ya hesik nìkì'nogo hagasigin he, ìlùk, wenesùgì ebetìk,
Nagarok apik logoilep e, ìlùk ina'la ebetì logolìk, inokawerek en lalìgìk, ina'la nen yì mene tì mene aike walok akìgìk, egarek atì nen he, wene atì ina'la kakil arìk he, eken ìterek lek atìat o. 20Nen, awì heik aike kweang hanoma lakhesike atì ebe re, it apùnì aike Ala ane atì inasuk holìk wanharesik he, wene atì ina'la eken ìterek o. Ero aike nen eken 30 ìtìk, ero aike nen eken 60 ìtìk, ero aike nen eken 100 ìtìk, ìterek atìat o,” ìlùk yogoisasike.
Yesùt en, “Esage kìalogo sogoloak sebelogo housak lek,” ìlùk oba lìrogo isike wene
(Luk.8:16-18)
21At Yesùt en atì'nogo yogoisasikesik he, hobuk mel isike;
“Apùnì nen esage kìalogo re, sogoloak en sebelogo hìgìk, nogo egarek oba a'ma hìgìk, uogolùk kìalharek nego? Lek o. We, kìalogo re, esok telik oba houogolùgat kìalharek. 22Yì mene tì mene hinago werek atì, hukaluagalùgat hinago werek o, Nen, yì mene tì mene sebelek werek atì, hukalogo sele'mathouagalùgat sebelek werek o. 23Atì nenat, sa nen esako holusak halok he, hanorogo holuak o,” ìlùk yogoisasikesik, 24-25wene aike mel yogoisasike:
“Wene yogohisìkì lagì atì, hanorogo hùthìkì logoino o. Sa nen wanhesik hesogo werek halok, hobuk Ala nen aike inom wogotik, nen, sa nen wanhì'lek, we, hamùlùgat hesogo logogin halok, telogo helìgìk, igin atì nen he, hit en apùnì aike wanuagalùk ìlìreke walhìlìk wogisegesep atì hak, hit en wogisogoin higit hogoat, Ala nen ìlìreke walogo wokhisìlìk he, aike inom wokhisegeinat o,” ìlùk yogoisasike.
Yesùt en awi hulelherek mene oba lìrogo yogoisasike wene
26Yesùt en wene atì'nogo yogoisasikesik, aike mel yogoisasike:
“Ala awe a'ma hisikerek atì re, ap aike nen eyabumo eken awì heik lakhikerek hake o. 27Eyabumo heik lakhìlìk he, o hi ikenem nogo ìgìk, we ikenem eluk agìk, iko kolek he, awì a'nogo hulelheresik he, hùko agarek. Atì'nogo hùko arì'logo meneat he, nìkì'nogo huko arì'logo he, wonogat welagarek. 28Awì atì yabumo yatenem en, emakum abusagat ebe tak hulelìk he, hobuk eken ìrìk, wurik agarek atì. 29Wurik aganem he,
Eken palusak oba arat asi waga, ìlùk, eken palhùkwe mene wolok ebe hepogat palharek o,” ìlùk yogoisasike.
Kìbì-kìbì eken oba lìrogo yogoisasike wene
(Mat.13:31-32,34; Luk.13:18-19)
30Atì'nogo yogoisasikesik he, hobuk aike mel isike:
“Ala awe a'ma hisikerek atì nena hake ugun. Nen, nena mene oba lìrogo ugun. 31Ati ebe re, kìbì-kìbì eken hake o. Ap aike nen kìbì-kìbì heik lakhesike. Yì mene tì mene awì atì, hamùlùtegat meneat he, kìbì-kìbì awì atì nek motok hamùlùtegat o. 32Atì'nogo meneat he, kìbì wùtat mel, aike mene mel, yatenem, hulelheresik he, oake hamùlùgat negen lagaikerek. Meneat he, kìbì-kìbì atì nek he, heik lakhikenem oake motok hùkoat lagaikeresik he, eki apik tualogo eka apik aganem, sùe purogo nikerek mene wìrìk he, kuna'ma atoma awì elok wusi wagarek atì hakeat o,” ìlùk yogoisasike.
33It apùnì nen wene hùthasak higit hogo hùthoagalùk, yì mene tì mene apigat oba lìthìgìk yogoisìkì lagaike. 34It apùnì aike yakùlisagalùk halok he, wene oba lìthìgìk enek yakùlisìkì lagaike meneat he, at agoromì ane wanhì lagaukwa mene amanogo nek he, inom inalepma logolìk weneebe weinamat pak hogo yogoisìkì lagaike.
Yesùt en sogoi mel, i ha'labu mel, hapuguthesike wene
(Mat.8:23-27; Luk.8:22-25)
35Atì'nogo yogoisìkì lagaikesik, o hìmaganekokwe at Yesùt en agoromì amanogo mel yogoisasike:
“Nit i aik ìlì ba wùlùbuok o,” ìlùk yogoisasikomo, 36It en he, i so Yesùt welagaike ba a'nogo were'ma oba kìlìk he, apùnì logolek amanogo atoma hisalùk, at ebe wolok wùlùpukwa. It wùlùpo kolek he, apùnì aike i so aike ba apìne wùlùpukwaat. 37Atì'nogo wùlùpenem, sogoi aninirogo hunha wagaikomo re, i ha'labu hunalogo lìapì logolìk, kesalogo so a'la kisikomo apem hesok igìlùk isike. 38Ati'nogo iko kolek he, Yesùt ebe so alakoma ùkùloak legesogo su inùkùloak legesogo nogo egarek mene ba nogo ikenem agoromì amanogo nen eluguthesukwa. Eluguthìkì logolìk he, mel yogosukwa:
“Noe. Nit i logoin yoma ninebe hetawì lek?” ìlùk yogosukwa. 39Yogosukwama, at eluk agaikesik he, sogoi a'nogo wenagatì logolìk,
“Habolo'lek ame,” isikesik, i a'nogo yogosikesik,
“Hane lek ame,” ìlùk yogosikomo re, sogoi palagìk, i ha'labu motok hapuk ìgìk, isike. 40Atì'nogo hagasikomo re, at Yesùt en he, mel yogoisasike:
“Hit nenahalok hinayùk en ìkì lagep. Hinetaùken an noba oan hipìrethìgì'lek welagep a,” ìlùk yogoisasikomo re, 41inayùk apik agaike. Inayùk apik arìk he, it-it ìkì logolìk mel isukwa:
“Egi! Ap yì sa akegep. Sogoi mel, i ha'labu mel, at ane ikenem hologo lek aga atì, nayùk e!” ìlùk hogorasukwa.
Currently Selected:
MAREKÙT 4: LAIDNI
Highlight
Share
Copy
Want to have your highlights saved across all your devices? Sign up or sign in
