MAREKÙT 3

Ala hesik welegat werek kolek, Yesùt en ap aike eki hapelek mene hagasike wene

(Mat.12:9-14; Luk.6:6-11)

1Hobuk he, at Yesùt o it apùnì Yahuri mene sapan egarek oba kisike. Kisike hak he, o atoma ap aike eki o'moko hapelek mene welagaike. 2Atì'nogo were'ma kisikomo re, it ap he'nakit ina'la nen mel akasukwa:

“Yogotak he, nineki sabìt oba Ala hesik welegat werek kolek, at en ap arì hagasigin a? Lek a. Hagate halok he,

Hat weak hagaten, ìlùk, ùkùm oba houok o,” ìlùk ineil wanhì lagaukwa. 3Atì'nogo ineil wanho kolek, at Yesùt en he, ap eki hapelek mene a'nogo mel yogosike:

“Hebe mela'lùk he, tùlem ya eme o,” ìlùk yogosikomo, 4melasi lagaikomo re, apùnì amanogo mel yogoisasike:

“Nineki sabìt oba Ala hesik welegat logolìk he, hano hagarinabusak a? Weak hagarinabusak a. Telinabusak a? Inoasusak a,” ìlùk yogoisasikomo re, inane lek kamo isukwa. 5Kamo isukwama re, at Yesùt eileken isìlìk lagaikesik he, a'la nen he:

“Inoabùt lagai-lagorek yì rì!” ìlùk a'la kolo arìk a'mage lagasike. A'mage lagalìk inoba uarek he, ap a'nogo mel yogosike:

“Heki kothan o,” ìlùk yogosikomo re, eki kothasikomo arat hano agaike. 6Eki atì'nogo hagasikomo re, it ap Parisi mene amanogo wùlùpukwasik hepogat Herotet agoromì inoba lìlìk he:

“Yesùt ki'nogo wasuok,” ìlùk inom weim abok isukwa.

At Yesùt i Kalilea esakoma were'ma apùnì logolegat oba atogosukwa wene

7-8Atì'nogo haga'lùk, hobuk, at Yesùt agoromì ane wanhì lagaukwa mene amanogo inomat he, i Kalilea yekelek a'nogo esakoma lagaukwa. Lagaukwama re, apùnì nen he,

“Yesùt yì'nogo hagarì'logo, tì'nogo hagarì'logo,” ìlùk abok ikenem, it apùnì o Kalilea tokwe mene logolegat inasuk holìlùk inopolik inopolik laganem, it apùnì o Yurea tokwe mene mel, o Yerusalem mene mel, o Irumea tokwe mene mel, o i Yoretan aik ìlì ba mene mel, o Tìrùt Siron mene mel, Yesùt oba atogosukwa. 9-10Atì'nogo atogosukwama re, inebe logolegat ou hagarinapenem he, it ou inoba mene obogat en, apùnì aike hìgìlisìlìk-healisìlìk Yesùt ineki hakùogolùkk oba kìkì lagaukwa atì nen, at Yesùt en, at agoromì ane wanhì lagaukwa mene amanogo mel yogoisasike:

“Apùnì apigat ma re, an nera'lu kerelek-hoporek asinogo nen he, i so hamùlùk mene aike hanìlìk logoni o,” ìlùk yogoisasike. 11Ou atì'nogo hagarinapo kolek, it mokareke inoabùt weak mene apùnì ina'la kìlìk welagaukwa mene nen Yesùt ebe ineileken hìlìk he, inelokwe sogoum po i ìlìk he, inane hùkorogo yogotì logolìk, mel ìkì lagaukwa:

“Ala aput he, harat o,” ìlùk yogotì lagaukwa. 12Atì'nogo yogosukwa meneat he, at Yesùt en mel isike:

“At Ala aput, ìlùk nabok yogoisasak motok lek o,” ìlùk ane keirogo wenagisasike.

Yesùt en ap inebe 12 nen inayoko hesike wene

(Mat.10:1-4; Luk.6:12-16)

13Atì'nogo wenagisalùk hobuk he, at Yesùt ebe tom oba lagasike. Lagalìk he,

“Ap inebe atem noba wesuak,” ìlùk a'la akasike mene nek waisasikomo, oba lagasukwama re, 14-15inebe 12 nen menhisìkì logolìk he, mel yogoisasike:

“Hit an ninom motok logopik en he, hano wene yogoisìgìk, mokareke inoabùt weak mene apùnì ina'la kìlìk were'ma, an nomame wokhisamo henogo wulaksìgìk, hagarinabìk nìkì logouageip en lakhikegein o,” ìlùk menhisasike. 16Inebe 12 nen menhisasike mene amanogo, inetage yì: Simon etage aike Peterùt salhike mene a'nogo mel, 17Sepeteùt againapùrì Yakobùt agot Yohanet eperak inetage nit ninane ba okuku ane ikerek hake u hak, it inane ba Poanerekìt salinapike mene mel, 18Atereat mel, Pilipùt mel, Paretolomeùt mel, Matìùt mel, Tomat mel, Alpìùt aput Yakobùt mel, Tareùt mel, Simon,

“O Kana'an yoma ninawìwerek mene hùgì nek logouok,” ìlùk ìkì lagaike mene a'nogo mel, 19Yùrat Isikariot Yesùt wasuagalùk hobuk yoko lagaike mene a'nogo mel, inebe atem menhisasike.

“At Yesùt atì Peelsepùl oba loukse'ma hagarìk niko,” ìlùk isukwa wene

(Mat.12:22-32; Luk.11:14-23, 12:10)

20Atì'nogo menhisalùk apotkwe aua pi wagaikomo re, apùnì logolegat hobuk oba atogosi wagaukwama re, Yesùt agoromì inom inapùrùk nìkì'nogo na heat haga'lagaike. 21Atì'nogo haga'lagaikomo, apùnì aike nen he,

“At etaùken sapan ikesik werek o,” ikenem, it Yesùt agoromì inasuk holìlùk, at ebe wanuogolùk wagaukwa. 22It waga kolek, it ap Ala ane helal waganek esewerek mene o Yerusalem en lagai wìrìk he, mel isukwa:

“Peelsepùl mokareke inoabùt weak mene inoe kain a'nogo Yesùt oba louksek werek o. Atì'nogo were'ma nogo nen he, at omame ba mokareke at agoromì negen inoabùt weak mene apùnì ina'la kìlìk were'ma henogo wulaksìlì'logo o,” ìlùk isukwa. 23Atì'nogo isukwama, at Yesùt en apùnì logolek amanogo waisìlìk he, wene oba lìrogo mel yogoisasike:

“Ibilit apùnì ina'la kìlìk he, okawerek en henogo elok wulakhakasak nogo? Motok mea o. 24Nen, ap kain etagepogot omakeat mene agoromì awe a'ma hagisek welagarek inom it-it hùlithakìlìk inom weak logogun halok, omakeat logolìk inomame welagaukwa hak logogun lek. Maben asugun o. 25Nen, ap aike againapùrì inom hùlìthakìlìk inom weak logogun halok he, ap omakeat againapùrì inom logolìk hano welagaukwa hak logogun lek. Weak asugunat o. 26Ati hak, at Ibilit okawerek agoromì mokareke inoabùt weak mene inom hùlìthakìlìk inom weak a'lepma re, welagaikarek hak inomame logoilep lek. Arat lek a'lep o. 27Nen, ap aike omame apik mene eki hele warogo hìgì'lek he, aua agarok yì mene tì mene ineki abusak wani kusak mea o. At he, eki hele warogo hìlìk enek he, elok wani kusak o,” ìlùk yogoisìlìk wene aike mel yogoisasike:

28“Nane eberogoat yogohisak. Apùnì nen yì weak tì weak hagarì'lùgì mene mel, ina'la nen meatsìlìk, inane ba nen inabok weak palì'lùgì mene mel, at Ala nen elok sagalogo legetsasak meneat he, 29Ala Areagùn atì ina'la meathìlìk abok weak palho halok he, sagalogo legetsasak lek o. We, weak hagasugun atì hesik ùkùm inoba moto'-motok logogin o,” ìlùk yogoisasike. 30Wene atì'nogo yogoisasike atì re, it en he,

“Yesùt mokareke oabùt weak mene a'la kikesik werek,” ìlùk isukwa nen, yogoisasike atì.

Yesùt agosa inom agoromì inom oba wagaukwa wene

(Mat.12:46-50; Luk.8:19-21)

31Wena atì'nogo yogoisasikesik were'ma, at Yesùt agosa mel, agoromì mel, wagaukwasik olilu metek logolìk, Yesùt wùlìbi wesuagalùk apùnì inoba wene warogo kelakhesukwa. 32Kelakhesukwama re, it apùnì logolek Yesùt era'lu hùrek welagaukwa mene nen mel yogosukwa:

“Yesùt, lakhan! Hat hagosa mel, hagoromì mel, herakhabik wagaikasik olilu werek o,” ìlùk yogosukwa. 33Yogosukwama re, at Yesùt en he:

“An nagosa nagoromì atì sanì nogo,” ìlùk yogoisasikesik he, 34apùnì at era'lu hùrek welagaukwa mene amanogo eileken isìlìk lagaikesik he, mel yogoisasike:

“An nagosa, nagoromì hit yìat o. 35Sa nen, at Ala a'la akikerek mene higit hogo hagaterek halok he, at atì an nagot, nerei, nagosa, werek o,” ìlùk yogoisasike.

Currently Selected:

MAREKÙT 3: LAIDNI

Highlight

Copy