MAREKÙT 15
15
Yesùt eki hele warogo Pilatùt wogosi lagaukwa wene
(Mat.27:1-2,11-14; Luk.23:1-5; Yoh.18:28-38)
1Atì'nogo hagatì lagaukwasik, o we isikomo re, ap wene Ala hesik ero pìlìngìtarek mene inebe obogat, it ap Ala esewerek mene inogogì kaintek amanogo mel, inalùgetek amanogo mel, Ala ane helal waganek esewerek mene amanogo mel, he'nakit inomat en,
“Tì'nogo hagasuok,” ìlùk isukwasik he, Yesùt eki hele warogo Pilatùt wogosi wagaukwa. 2Wogosi wagaukwama, at en he, hinok Yesùt oba wokhìkì logolìk mel yogosike:
“Apùnì Yahuri mene inoe etagepogot a'nogo, hat meneat ega?” ìlùk yogosikomo re, at en he,
“Hat egen atìat o,” ìlùk yogosike. 3Atì'nogo yogosikomo re, it ap Ala esewerek mene inogogì kaintek amanogo nen he, yì ùkùm tì ùkùm oba hesukwa. 4Ùkùm atì'nogo oba hesukwama, at Pilatùt en Yesùt oba hobuk hinok wokhìkì logolìk he, mel yogosike:
“Yì ùkùm tì ùkùm apik hoba hìlì'lùgì yoma re, hat en wene oko yogoisegein lek?” ìlùk yogosike. 5Atì'nogo yogosikomo re, at Yesùt ane oko etenhì'lek kamo isikomo, at Pilatùt en he:
“Nayùk e,” ìlùk hogorasike.
Yesùt ebe motok wasuagalùk ùkùm oba hesukwa wene
(Mat.27:15-26; Luk.23:13-25; Yoh.18:39–19:16)
6It apùnì Yahuri mene pesta Paskah hùko isago nìkì logolìk, it en he:
“Apùnì ineki hele warek mene atì, omakeat at atì hak hikalogo wo'nisano o,” ìlùk kìno ikenem he, at Pilatùt en omakeat a'nogoat hikalogo wogisìkì lagaike. 7Atì'nogo wogisikeresi'mo nogo nen he, atì sat ap aike etage Parapat, ap aike inom en,
“Ninogogì kaintek pemerintah mene, ninabìt,” ìlùk holim hìbìrogo inoasuogolùk, inom yapì logolìk, ap aike inoasukwama re, ineki hele warogo hisasukwama, 8were'ma, it apùnì logolek amanogo Pilatùt oba wìrìk he, mel yogosukwa:
“Pilatùt noe. Hat en apùnì ineki hele warek mene hikalogo wo'nisegetek a'nogo tì'nogo, yogotak aike hikalogo wo'nisanogolùk wago o,” ìlùk kìno yogosukwa. 9-10Yogosukwama, at Pilatùt a'la nen he,
“It ap Ala esewerek inogogi kaintek yì Yesùt oba ua palogo ebe wo'nesi wagaika akìgì,” ìlùk hùthasikesigat he, mel yogoisasike:
“Hit Yahuri mene hinoe kain etagepogot yì eki hele hikalogo wokhisoagalùk wagep a?” ìlùk yogoisasike. 11Atì'nogo yogoisasike meneat he, it up Ala esewerek mene inogogì kaintek amanogo nen he, apùnì logolek amanogo ina'la kagalhì logolìk,
“Parapat atìat eki hele hikalogo wo'nisanok. Yasùt atì lek o, ìlùk yogosuageip,” ìlùk ina'la kagalhukwa. 12Ina'la atì'nogo kagalhukwama, it en atì'nogoat yogosukwama, at Pilatùt en he, mel yogoisasike:
“Halok he, hit apùnì Yahuri mene nen he,
Ninoe kain etagepogot, ìlùk ìkì lagep mene yì, nìkì'nogo hagasik,” ìlùk yogoisasikomo, 13it en he, mel yogosukwa:
“E ba menhìlìk wa'no o!” ìlùk inane keirogoat yogosukwa. 14Atì'nogo yogosukwa meneat he, at Pilatùt en he, mel yogoisasike:
“At weak nena mene hagatomo nen,” ìlùk yogoisasike meneat he, it en he,
“E ba menhìlìk wa'no o!” ìlùk hobuk inane ebenageik kei-karogoat yogosukwa. 15Atì'nogo yogosukwama, at Pilatùt en he, a'la mel akasike:
“Halok he, apùnì logolek yoma ina'la hanorogo yì'nogo hagasik,” ìlùk isikesik he, Parapat a'nogo eki hele hikalogo wogisìkì logolìk he, at agoromì tentara nen Yesùt tùgì labisake warogo e ba menhìlìk wasuagalùk wogisasike.
It ap tentara mene nen Yesùt inane sagan wokhasukwa wene
(Mat.27:27-31; Yoh.19:2-3)
16At Pilatùt en atì'nogo wogisasikomo re, it ap tentara mene amanogo nen Yesùt wolok ap kain gubernur awì silimo kìlìk he, it inagaiya'lak inom esa omakeat logolhì lagaukwa mene obogat waisasukwa. 17Waisasukwama wagaukwasik he, Yesùt su elokoken kìbì-kìbì warek hake ap kaintek mene laberisagarek mene hake labethìgìk, ap kaintek mene inakare-kare ìksagarek atì hak, alok weak mene mako ìkogo ùkùl oba ìkhìgìk, isukwa. 18Atì'nogo ìkhìlìk he, mel yogosukwa:
“Wi! Apùnì Yahuri mene inoe hetagepogot a'nogo harat hìgì o, wìl” ìlùk hai watì lago salek inane kerethìgìk yogosukwa. 19Atì'nogo yogosukwasik he, mùl payùk oba ùkùloak pak hogo watìk, wesi oba sup hogo lakhìgìk, inane lagak hogo hai wasuogolùk ineitep awì yagasogo awe a'ma hù'lasi kìgìk, isukwa. 20Atì'nogo arat hagasukwasik, su uan elokoken kìbì-kìbì warek hake mene nokologo hìlìk he, okawerek asu mene apotkwe labethesukwasik he, e ba menhìlìk wasuogolùk legeta'ma wolok wùlìbi wagaukwa.
Yesùt e ba menhìlìk wasukwa wene
(Mat.27:32-44; Luk.23:26-43; Yoh.19:17-27)
21Atì'nogo wolok ebekalem waganem he, ap aike etage Simon, aua o Kirene mene, ap Aleksatat ho, Urùpùt ho, inopase atì, o atama esakoma nen o kota kìgìlùk laganem inom apì agaukwa. Inom apì arìk he, mel yogosukwa:
“Yesùt ebe e ba menhìlìk wasugun mene e yì, hat en woginabin o!” ìlùk inane keirogo yogosukwama wanhìke. 22Wanhikomo re, Yesùt wolok he, tom ùkùl etage nit ninane ba, inùkùloak palek ùkùl oba u hak he, it inane ba Kolkota ùkùl oba wolok lagai wagaukwa. 23Lagai wagaukwasik he, anggur eken amusu mel, hetalì al hake ale weak mene mel, inom ìpìkwe-apìkwe hagarogo wogosukwa mene re, heraksasike. 24#Mzm.22:18 Yesùt ebe arat e ba menhesukwasik he, asu nokolek amanogo inebe lopok,
Sanì hak asugun, ìlùk, oageke lakhìgìk, wakhìgìk, isukwasik, oageke inoba agaike mene hùgì sùpùrogo helasukwa. 25Yesùt ebe wasukwa atì re, ohealek jam 9 e ba menhesukwa. 26Atì'nogo hesukwasik,
“Ap yì wene ero yì oba hogosik en wato,” ìlùk u hak,
“Apùnì Yahuri mene inoe kain etagepogot,” ìlùk helal waganogo hesukwa.
27Yesùt ebe e ba tùlem atì'nogo menhesukwasik he, it ap inebe pìre apùnì inagarok ineki abusak wanhì lagaukwa mene, aike eki ebekwe, aike eki peikkwe, inom menhisìlìk inoasukwaat. [28#Yes.53:12 Atì'nogo hagasukwa atì re, hageat Ala ane helal waganogo hìkì logolìk he, mel isukwa:
“Apùnì nen he, at atì ebe re, apùnì inoabùt
weak hagatarek mene salek inom omakeat ineki
wenaginabugun o,”
ìlùk isukwa mene atì, at Yesùt it ap atì inom atì'nogo menhisasukwa atì ba ebe agaike atì.] 29-30Atì'nogo menhisasukwama were'ma, apùnì kwe atìkwe lagìk, wagìk, ìkì logolìk Yesùt mel yogotì lagaukwa:
“Aha! Hat en he, mel isigin akìgì:
Ala awì wùrìk yì mesalogo hìlìk he, neki pìre ba wùtì logopik en aike nen he, arat katok hogo wusigin, ìlùk isigin a'nogo re, hokawerek hebe e arì ba nen telogo pi me ta!” ìlùk inùkùloak kwanìthìkì logolìk inane sagan wokhìkì lagaukwa. 31Atì'nogo iko kolek he, it ap Ala esewerek mene inogogì kaintek amanogo mel, Ala ane helal waganek esewerek mene amanogo mel, inom it-it inane sagan wokhìkì logolìk he,
“At en he, it apùnì aike mene elok telinapì laga a'nogo meneat he, okawerek en telasak mea hìgì. 32Karìsùt nit apùnì Yahuri mene ninoe etagepogot yì re, nit eberogoat akùgùkwe re, nineilhanem e arì ba nen pi we'nìk he,” ìlùk inane sagan wokhìkì lagaukwa. Nen, it ap aike e ba Yesùt inom menhisasukwa mene aremnogo nen, Yesùt inane sagan atì'nogo wokhasukwaat.
Yesùt ebe wa'lagaike wene
(Mat.27:45-56; Luk.23:44-49; Yoh.19:28-30)
33O like tùlem jam 12 oba o mùm agaikesik he, o atoma obogat hùlì jam 3 mùmat welagaike. 34#Mzm.22:1 Mùm werek kolek, jam 3 arat asi lagaikomo re, at Yesùt en Ala mel yogosike. Nit ninane ba re,
“Nopase Ala! Nopase Ala! An nahalok herakhanhen,” ìlùk u hak, it inane ba re,
“Eloi! Eloi! Lama sabakhtani!” ìlùk ane hùkorogoat yogosike. 35Atì'nogo yogotenem he, it apùnì he'nakit atoma welagaukwa mene inasuk holhukwasik he,
“Elia waerì'logo hìgì,” ìlùk isukwama, 36ap aike humusek lagaikesik he, halìsìken hake mene anggur eken amusu ale weak mene magasogo nen, noagalùk sibat oba hùnogo wogotì logolìk he, it aike mel yogoisasike;
“A! Elia nen he, at yì telogo pelakhei wesigin he a? Lek he a. Nineileken logouok,” ìlùk yogoisasike: 37Atì'nogo yogoisasikomo, at Yesùt ane omake baga hùkorogo isikesik, arat lebek hogo wa'lagaike. 38At ebe wa'laganem he, Ala awì wùrì'mo su kain mene o sekelek ti'mokwe kwe palek welagaike mene, po'loma nen tùlem heirogoat kagalarìk kagalarìk o'lu ba erok hogo kagalagaike. 39Yesùt atì'nogo wa'laganem he, it ap tentara mene inoe kain mene Yesùt elokoma higit hogo logolìk, atì'nogo wa'laganem eileken hasikesik he, mel yogoisasike:
“Ap yì eberogoat Ala aput hìgì o,” ìlùk yogoisasike. 40Ati'nogo hagato kolek, it hìmì aike re, he Maria aua Maktala mene, aike re, he Maria at ap Yakobùt elege mene ho, Yoset ho, inagosa, aike re, he Salome, hìmì aike inomat inebe walegat en ineileken yerisek welagaukwa. 41It hìmì atì alebat he, Yesùt opolik o Kalilea tokwe nìkì logolìk he, lebethìkì lagaukwa mene. Nen, hìmì aike logolegat Yesùt inom o Yerusalem pisukwasik inom atoma logolìk ineileken welagaukwaat.
Yesùt ebe warek omoulama hesukwa wene
(Mat.27:57-61; Luk.23:50-56; Yoh.19:38-42)
42-43At Yesùt wa'lagaike atì re, it apùnì Yahuri mene hùenkwe ineki sabìt oba Ala hesik welegat logouogolùk, yì mene tì mene nomologo hiko kolek wa'lagaike. Wa'lagaikomo, o arat hi isikomo re, ap aike Yahuri inogogì kaintek wene pìlìngìsùogolùk inom atogotì lagaukwa mene etage Yùsùp. Aua o Arimatea mene. Oabùt hano nen he, apùnì nen,
“At hano,” ìlùk abok ìkì lagaukwa. Atì'nogo hagatì logolìk, a'la nen he,
“Ala nen awe a'ma mera nen hinegein,” ìlùk serogo welagaike mene atì, Pilatùt ayùk legat lagaikesik he, Yesùt warek kìno kisike. 44Warek kìno kisikomo, at Pilatùt en he:
“Merakwe wa'laga heat, yì nayùk e,” ìlùk hogorarìk he, ap tentara mene inoe kain mene a'nogo wesuagalùk ayoko laksa wagaikomo lagaikomo re, mel yogosike:
“Ebe hageat wa'laga a? Yogotagat wa'laga a,” ìlùk hinok wokhasike. 45Hinok wokhasikomo, at en he,
“Hageat wa'laga o,” ìlùk yogosikomo, at Pilatùt en he, Yùsùp mel yogosike:
“Halok he, ebe warek atì wani lan o,” ìlùk yogosike. 46Atì'nogo yogosikomo wagaikesik he, su kain kut hano mene oko palogo Yesùt warek a'nogo e ba nen pelakhei wìrìk he, su a'nogo ba ìkìlogo re, omoula apùnì warek hisùogolùk apùnì ineki nen ako holelhukwa mene ba hesike. Hìlìk he, helep hùko mene lìpìlogo wolok wìrìk he, te'mek hogo labethesike. 47Te'mek hogo hikenem he, it he Maria aua o Maktala mene a'nogo ho, he Maria Yoset agosa a'nogo ho, wagaukwasik he,
“Arem hike,” ìlùk ineileken tùkùm hogo hasukwa.
Currently Selected:
MAREKÙT 15: LAIDNI
Highlight
Share
Copy
Want to have your highlights saved across all your devices? Sign up or sign in
