MAREKÙT 16
16
Yesùt ebe eluk agaike wene
(Mat.28:1-8; Luk.24:1-12; Yoh.20:1-10)
1Atì'nogo hasukwasik, ineki sabìt oba Ala hesik welegat welagaukwasik en he, it he Maria aua Maktala mene a'nogo ho, he Maria Yakobùt agosa a'nogo ho, he Salome ho, amusu obasi hano mene Yesùt warek oba wasi lùogolùk oko pali lagaukwa. 2Oko palogo hìlìk he, nogo ìlùk hùenkwe hari Minggu ba ohealek hùp siak hogo mo yegelogo lagai waga kolek, omoulama a'nogo wagaukwa. 3-4Waga logolìk he, helep motok hùko mene te'mek hogo hesukwasi'mo nogo nen he, it-it ìkì logolìk mel isukwa:
“Warek helep te'mek hogo haga a'nogo, sa nen lìpìlogo kwe hù'nisegein he,” ìlùk ìlìk wagaukwa. Atì'nogo ìlìk somarek waga lagaukwasik en, ineileken lìakhasukwa re, helep a'nogo lìpìlogo lakhesukwama kwe hùrìk were'ma hasukwa. 5Hasukwasik, horok hogo wìrìk inebe kisukwa re, ap elege mene aike asu kut uan mene laberek ineki ebekwe higit hùrek were'ma ineileken hìlìk he, ina'maken lagaike. 6Ina'maken lagaikomo, at ap elege a'nogo nen he, mel yogoisasike:
“Hina'maken lagùp o. Yesùt aua o Nasaret mene e ba menhìlìk wata a'nogo herarìk wagep mene re, ebe yoma lek. Ala nen eluguthikomo werek o. Warek haga ba a'nogo obùlùk enek yì hineileken hìthani o. 7Hìthìlìk he, hit en at agoromì ane wanhì lagaika mene Peterùt lak amanogo yogoisa lano o. At Yesùt en he:
An o Kalilea lagalìk hinelokoma logogin o, ìlùk yogohisasike hagat lagagin a'naga o. Hit lagalìk he, at ebe hineileken hogoin o, ìlùk yogoisa lano o,” ìlùk yogoisasike. 8Atì'nogo yogoisasikomo inoake palarìk he, inoak lei'-leik hese wùlùpukwasik inayùk en wene apùnì aike yogoisìgì'lek pìkìt lagaukwa.
WENE HAGEAT EN WÙREP OBA HELAL WAGANOGO HESUKWA WENE
Yesùt en, “Emakum he Maria aua Maktala mene nen eileken neoak o,” ìlùk elokoma melagaike wene
(Mat.28:9-10; Yoh.20:11-18)
9[At Yesùt ebe hari Minggu ba melagaike atì sat ohealek hùp siak hogo re, melagaikesik, at he Maria aua o Maktala mene mokareke inoabùt weak mene inebe 7 nen a'la kìlìk were'ma hageat henogo wulaksasike mene a'nogo nen tak,
“Emakum eileken neoak,” ìlùk elokoma melagaike. 10Elokoma melagaikomo eileken halùk he, yoko it apùnì at Yesùt inom welagaukwa mene hùpì watì logolìk le aganem inoba lagaike. 11Lagaikesik he, mel yogoisasike:
“At Yesùt he, eluk agasik werek o. Ebe arat neileken hìgì,” ìlùk yogoisasikomo, inasuk holhukwa meneat he, eberogoat ìlùk akasukwa lek.
Yesùt en he, “It ap nagoromì inebe pìre atì ineileken neoak o,” ìlùk inelokoma melagaike wene
(Luk.24:13-35)
12Atì'nogo akasukwasik werek kolek, hobuk he, ap inebe pìre aike o sili hamùlù'mo aike wesuogolùk waganem at Yesùt ebe hùnogoat haga'la'lùk he,
An nebe ineileken neoak, ìlùk inopolik wagaike. 13Inopolik wagaikomo re, ineileken halùk inapotkwe inagaiya'lak he'nakit amanogo yogoisa lagaukwa meneat he, it ina'la nen eberogoat ìlùk akasukwa legat.
Yesùt en, “Nebe nagoromì ineileken neoak,” ìlùk inoba kisikesik inelokoma melagaike wene
(Mat.28:16-20; Luk.24:36-49; Yoh.20:19-23; Lak.1:6-8)
14Atì'nogo hagarìk waga lagaikesik, ebe hobuk he, it at Yesùt agoromì inebeo 11 nen amanogo hùrek sùpùrùk niko were'ma,
“Ineileken neoak,” ìlùk inoba kisikesik inelokoma melagaikesik mel yogoisasike:
“Hit yoma hina'la nen he, eberogoat ìlùk akìgì'lek hina'la pùgat yoma rì! Ala nen an nebe arat nelugu'napomo were'ma, it aike nen ineileken neegasik yogohisa wagaika meneat he, hina'la nen eberogoat ìlùk akìgì'legat yoma rì!” ìlùk wenagisasike. 15Atì'nogo wenagisasikesik, wene aike mel yogoisasike:
“Hit he, apùnì inùkùl etage lopok o yì awì tì awì a'loma obogat wene hano wene yì yogoisìlìk laga logoino o. 16Yogoisìlìk laganem he, it apùnì aike nen wene atì eberogoat ìlùk akogoin mene ima pelaginabugun mene hùgì, Ala nen telinabigin meneat he, it aike wene atì eberogoat ìlùk wanugun lek mene hugi Ala nen ùkùm inoba hìlìk weagarinabigin o. 17It apùnì aike nen wene atì eberogoat ìlùk akoagalùk, it wene eberogoat ìlùk wanugun mene hùgì nen he, yì'nogo hagatì logogun. Mokareke oabùt weak mene it aike ina'la kìlìk were'ma an netage palogo henogo wulaksìgìk, inane it aike inane inokot mene elalinat ìgìk, ìkì logogun. 18Atì'nogo ìkì logolìk, walo apùnì inoaterek mene inekimo wanhìk, it inebe wa'lasuagalùk apùnì wa'lagaikarek mene isoak a'la kelagasogo wogisikenem nìkìk, ugun meneat he, atì nen weagarinapì logogin lek o. Nen, apùnì aike ou wanhenem, it en ineki hagisamo, se aga logogunat o,” ìlùk yogoisasike.
Ala nen Yesùt pogot oba wolok lagasike wene
(Luk.24:50-53; Lak.1:9-11)
19Wene atì'nogo arat yogoisasikomo re, at Ala nen Yesùt ebe pogot oba wolok lagasike. Atì'nogo wolok lagasikomo era'lu eki ebekwe kain welagarek. 20Ati'nogo wolok lagasikomo re, at Yesùt agoromì amanogo o yì awì tì awì obogat wene yogoisìlìk lagaukwa. Wene yogoisìlìk laganem he, apùnì nen he,
“It wene yogonisìlìk wagaika atì eberogoat,” ìlùk wene hùthoagalùk, ninoe Etagepogot inom motok logolìk, it en elalinat hagatenem, at en wene atì omamethesike.]
Currently Selected:
MAREKÙT 16: LAIDNI
Highlight
Share
Copy
Want to have your highlights saved across all your devices? Sign up or sign in
